الجزء 140 من واش طيبتي اليوم - الصفحة 43

omjoujou · 2015-08-23, 14:27

ماريا حبيبتي منقولش خلاص لالا غير ابعثيلي شوي و زيدي الوصفة لي عتمدتيها

ام و ابنة · 2015-08-23, 14:30

السلام عليكن

سبحان الله الانسان يدير حساب و ربي يدير حساب من عندو
البارح المساء قررنا على غفلة نروحو للبحر في الليل وجدت كلش بسرعة
نضت صباح سلمت عليكم و وجدت أحوالي انا و اولادي جا راجلي بش يدينا لدارنا في الطريق وليدي مرض حاشاكم غير يستفرغ مع انو ما حب ياكل والو و تكسل في السيارة مذباااال و عيااااان
لحقنا لدارنا ركبت مع يما و اختي و اولادي و راجلي راح يخدم
في الطريق للبحر يما خافت على وليدي قالت لي حالتو ماشي تع بحر
جينا لداري و قعد سويعة مريض و منبعد الحمد لله ناض لاباس عليه يلعب و يهدر و ياكل بسلامتو و سلامة وليدات الجمييييع
و الحمد لله رآنا مجوزين النهار هنا في داري ماشي في البحر علما انو البارح كي عيطت لي اختي و قالت لي نروحو للبحر قتلو لراجلي ما رانيش حابة نروح و عيانة من النفيض و منبعد قلتلو نروح على جال اختي و اولادي
و الحمد لله كما ينبغي لجلال وجهه و عظيم سلطانه

فطورنا كان رايح للبحر و كتب ربي كليناه هنا
ما كانش عندي خبز برغر جبدت من المجمد الكعك التركي و خدمت بيه خخخ

و هذا سردين جابتو يما معاها

و هذا قلب اللوز بالنوادكوكو اول مرة نجربو راهو سخون هذا وين سقيتو مازال ماتشربش كي يتشرب نزينو بجوز الهند

و هذا عشانا واجد عالبكري خفت يعاود يمرض وليدي و لا نتعطل العشية و بما انو الغذاء كان واجد و اولادي يلعبو شويا مع يما قلت نبروفيتي نوجد العشاء و نتهنا
مسفوف معممممر بالخضار و زيت الزيتون

نراجع و نولي

روضة 88 · 2015-08-23, 14:33

يعطيكم الصحة على الخيرات لي حطيتوها

ام سراج في انتظار الصور خاصة الحلويات.

omjoujou · 2015-08-23, 14:35

لبنات تفضلو شوي ديسار بارد نسيت محطيتوش قبيل

ام و ابنة · 2015-08-23, 14:39

ام كاميليا ربي يفرج همك و يفرح قلبك انت و فضيلة و ميزو و كل مهمومة
دايمة الحمدربي يشفيك انت و ام اسلام و ابو رحاب و ام حمزة و كل مريض
ام سراج و ملاك مبروك على خوك ربي يهنيه و يجعل زوجتو و ذريتو من الصالحين بش يعوضوه حنان الوالدين ربي يرحمهم و يوسع عليهم
ام جوجو هايل البركوكس ارواحي في غرفة التحقيق طيحي بالطريقة و القديد كيفاش تخدميه و البركوكس منين تشريه خخخخ
الرجاء الله يبارك كلش متحوف و بانتظار لي بينيي يا ربي ينجحولك
ماريا هايل حلا المرايا و بالنسبة للصورة ارفدي الرابط المباشر و حطيه
ليزابيل استخدمي مركز التحميل أسوار راهو هايل ربي يرضى على الاخت ادرونو هي عرفتني بيه

ام سراج وملاك · 2015-08-23, 14:40

اقتباس:

المشاركة الأصلية كتبت بواسطة روضة 88

يعطيكم الصحة على الخيرات لي حطيتوها

ام سراج في انتظار الصور خاصة الحلويات.

اكيد حنونة نحطلكم الصور كامل الحلويات ضك نعدل الصور ونحطلك الصور راني صورتهم خطراه درتو في داري وخملتو حقا روضة شكرا على المساعدة ودرت ترافل كيما قلتيلي بصح الطابع ملقيتوش يتباع هنا عندنا طبعت بطابع مختلف باقي الصور راهم عند بنات اختي مع يبعثوهم نحطهملكم

oum anas 69 · 2015-08-23, 14:44

أم سراج مبروك على خوك تهنيتو و تهنى ربي يرزقو الذرية الصالحة
عرفت الطفلة هي بنت أم نسيت شكون بصح راوي متصورة مع خوها في البارك مع الغوريلا صح ... ياااااي نسيت أسمها

ام و ابنة · 2015-08-23, 14:46

ساجدة وشراكي حنونة كيفاش قلبت عجينة المحاجب للسفنج
اولا قولي لي كيفاش عجينتك تع المحاجب ثم وش زدتيلها

ام محمد تاج بروفيتي ارفدي و ريحي قبل ما تزيدي ربي يسهل لك ان شاء الله انت و كل الحوامل

سكوربيون اصبري نحوس بش نقيسلك قطر المول ما عندي لا متر و لا مسطرة خخخخ بصح ننصحك اذا عندك مول الموسكوتشو اللي فيه حفرة في الوسط هو المناسب لهذه الكيكة سواء في المنظر او الذوق بصح انا للاسف ما عنديش و اذا ما عندكش استعملي مول الكيكات و التارت العادي يعني لا كبير و لا صغير يكون متوسط

ام سمسمة البنات جاوبوك عجينة ام رويدة هايلة

ام سراج وملاك · 2015-08-23, 14:48

ام وابنة ربي يشفيلك ابنك ومخلوفتلك التحواس شكرااااااااااااااااااااا

ام و ابنة · 2015-08-23, 14:55

ربي يحفظك اختي ام سراج
بالنسبة للطفلة خاطيني ما عرفتش

اهلًا ام انس كيف الحال

المعلمة الجديدة البحر اللي نروحو هنا في العاصمة قريب ليا في زرالدة شاطىء عائلي و نرتاحو فيه و الحمد لله كي تجي للعاصمة نديك ليه خخخخخ

البنات اللي ما ذكرتش اسمها تسمح لي حاولت نرد عالجميع

ام سراج وملاك · 2015-08-23, 14:56

اقتباس:

المشاركة الأصلية كتبت بواسطة oum anas 69

أم سراج مبروك على خوك تهنيتو و تهنى ربي يرزقو الذرية الصالحة
عرفت الطفلة هي بنت أم نسيت شكون بصح راوي متصورة مع خوها في البارك مع الغوريلا صح ... ياااااي نسيت أسمها

ام انوس شكرااااااااااااااا ياغالية وربي يتمملك حملك وان شاء الله هديل تكون بالف خير وصح راكي عرفتيها هيا سيدرا سوبا الطفلة لي في صورة وصح مصورة مع الغوريلا متوقعتش اني في يوم نعرفها وزيد لقيتها تسكن قدام دار جداتي ربي يرحمها تعرفت عليها في فايس بوك نهار لي قالت بلي الاقامة نتاعها نقاوس بعثتلها رسالة خاصة بعثت فيها عنوان فايس بوك نتاعي وتواصلت معاها حتان كي جات هاذي المرة ضيفة هنا في لبلاد وكتب ربي وتلاقيتها انسانة طيبة متتصوروش وراهي تبلغ سلامها ليكم كامل

mariya · 2015-08-23, 14:59

ام جوجو هاي لك الوصفة حبيبتي
2بيض و 8 مغارف سكر 8 مغارف حليب 8 مغارف زيت 8 مغارف فرينة و 1 خميرة و مغرفة صغيرة كاكاو نخلطهم بالباتور ثم نفرغهم في مول مدهون بالزبدة و مرشوش بالفرينة و ندخلهم للفرن
في هذه الاثناء نحضر كاس حليب بودرة و 3 ياوورت طبيعي انا كانو عندي 2 درتهم و زدت شوي حليب سائل و 3مغارف سكر و شوي فاني نخلطهم مليييح و غير نخرجو المول من الفور نفرغوه فوقو و ندخلوه مرة ثانية بصح ما نطولوش عليه يجمد برك بلا ما يحمار
نحضرو الطبقة الثالثة لي هي ربع لتر حليب او اكثر مع ملعقة صغيرة نيسكافيه و فلان شيكولة ونخلطهم على النار ثم نفرغوهم على الطبقة 2و ندخلوه للثلاجة
و قطعيه و كوليه بالصحة و الهناء

أم أروى · 2015-08-23, 15:01

السلام عليكم ورحمة الله وبركاته

ما نعرف ادا تشفتوو عليا كنت شاركت مرة في احدى الكوزينات ونعرفكم بالوحدة-ابتسامة- اسمحولي منيش نشارك ماعنديش باش نصورلكم تيليفون عيان

من فضلكم اخياتي جاوبوني رايحة نجرب كعك النقاش تع الهام حبيت نعرف شحال قيمة النشا135g بالكوب قالت كاس كبير قولولي لكاس تع 250 g ولا اعطوني بالملعقة شحال
ان شاء الله تكونوا فهمتوني

mariya · 2015-08-23, 15:01

ام سراج هيا قوليلنا على الطفلة بنت من

mariya · 2015-08-23, 15:03

ام و ابنة معليش كل عطلة فيها خير المهم يكون بنك ريح شوي