الجزء 156 واش طيبتي اليوم متعة التذوق مع تكنلوجيا الصورة - الصفحة 42

أم محمد تاج · 2015-12-20, 09:21

الله يسلمك ام الجوووووووووووج وبصحتك القاطوووو رووووعة في انتظار تقصيه بصحتكم مسبقا
صبح بح ام ساجد حنوووونة كاش جديد ماكيش موالفة تجي بيديك فارغين ههههههههه
ام ياسوووو بصحتك الزليف حنوووووووونة
فراشات العمر والله ماشفيت آسفة ذاكرتي مدشدشة خخخخخخخخخ والتارت يابنتي بهدلتيها هههههههه وأكيد حليتي عليها بزاف الفور عليها ماطابتش راهم جربوها لبنات وصلحتلهم حنووونة ماعليش المرة الماجية على قول الداية
ام رحاب ممممم على الخرشف يهبل انا لي عندي ماياكلوهش ومع البربووووشة مممممممم
البحر الصافي مممممم يعطيك الصحة وحتى حنا نديرو بربوشة الخضرة بلا لحم مممممم بصحتكم

omjoujou · 2015-12-20, 09:23

ام ياسين راني رحت باه نقطعوا ونحطلك تشوفي صورتوا لقيت مزال الشيكولا ما نشفتش بصح الذوق تاعو رهيب جربي وعينيك مقفولين
شوفي انا درت سينية صغيرة تاع الفور راهي تبان في الصورة لي حطيتها قبيل ضاعفت الكميات تاع العجينة التحتانية برك بصح المعجون والعصير درت نفس الكمية لي حطتها ليزا لهي باطة صغيرة تاع معجون المشمش يعني رطل ودرت كاس ونصف عصير تاع البرتقال نقاوس معنديش تاع المشمش ونصف حبة عصير القارص والنشا
وكي بردت الكريمة تاع العصير و المشمش ذوبت شوي من الشيكولا فيجيكاو مع لحليب وطليتها من لفوق ودردىت عليه لوز ايفيلي

فراشات العمر · 2015-12-20, 09:25

السلام عليكم
اختي ام تاجو بالنسبة لبياض البيض درت قرصة ملح وضربت بالباتور شوية ثم اضفت كاس سكر مباشرة هل هذه الطريقة الصحيحة
البارح طبقت غراتان شفلور بالباطاطا لاخت روزالتا لميس لقيتكم حطين لارسات طبقتها
وامس ثاني درت غراتان بطاطا بالطماطم لاخت صبريت جات حامضة شوية بصح الباطاطا ماطابتليش مليح ما غطيتهاش بالامنيوم

ام ساجد · 2015-12-20, 09:25

ام رحاب بصحتك الخرشف امممم نموت عليه مي مانحبش نقيه هههههه كي نروح عند ماما ناكلو

ام جوجو امممم بصحتك القاطواكيد بنين وغدايا كيفك تليتلي بالدحاج بصح نديرها حمرا

ام ياسو واش هاذ العجل ما فضش ههههه ابعثيلي هبرة

البحر الصافي اممممممم اكلك والله يشهي باللحم ولا بلا لحم

امتاجو وينها عروستنا راي كبرت نجو نخطبو هههههه

omjoujou · 2015-12-20, 09:27

ام تاجووووو تسلميلي يا لغالية
ام ساجد بصحتنا انا وياك التليتلي خخخخخخ تاعي ابيض

ام ساجد · 2015-12-20, 09:28

ام تجو والله كاين غير ما عدتش نقدر نصغر الصور نفشل ونخاف نحطهم كبار تقطشيني ههههه

الكبر كيما قالت ام ياسو راني غير هكاك برك

x ام رحاب x · 2015-12-20, 09:28

خرشف بالزيتون واللحم
ام جوجو مايكون غي خاطرك
اتنقي الخرشف واتغسليه واتغليه في الماء ونص حبة قارص وشوية خل كي يغلي مليح صفيه
في طنيجرة وجدي اللحم وديري الدرسة حمرا يعني الثوم ملح فلفل ادريس فلفل اكحل كمون طماطم مصبرة وخليهم ايتكتكو شوية في لاصوص واتكوني غليتي الزيتون تاعك 2 مرات وارميهم معاهم وارمي الخرشف تاعك ايطيب مع اللحم امبعد ايلا حليتي عليها القيتي اللحم طاب نحي اللحم وخلي الخرشف ايكمل طيابو لازم ايكون طايب مليح ولازم اتكون المرقة عاقدة وحمرا ايجيك هايل ويلا حبيتي تقدري ادزيديلهم بطاطا مقلية انا مانحبش انزيدها وانت ايلا حبيتي تقدري اديريها ويلا مافهمتيش انزيد انفهمك وراني عارفاتك فحلة اجيبيها خير مني

ام ساجد · 2015-12-20, 09:30

الله يسلمك ام جوجو
انا سحتوني نروح لاشغالي نديو لغدا ولازم نعجن حتى مع العجائن زوجي لازم كسرة ولا خبز
حتى مع الكسكسي ههههههههه

x ام رحاب x · 2015-12-20, 09:31

شكرا حبيباتي عيونكم الحلوين
ام ساجد هههه عندك الحق اخليلك يديك عجب بصح لازم ناكلوه في الياف مليح للصحة

فراشات العمر · 2015-12-20, 09:33

اقتباس:

المشاركة الأصلية كتبت بواسطة أم محمد تاج

الله يسلمك ام الجوووووووووووج وبصحتك القاطوووو رووووعة في انتظار تقصيه بصحتكم مسبقا
صبح بح ام ساجد حنوووونة كاش جديد ماكيش موالفة تجي بيديك فارغين ههههههههه
ام ياسوووو بصحتك الزليف حنوووووووونة
فراشات العمر والله ماشفيت آسفة ذاكرتي مدشدشة خخخخخخخخخ والتارت يابنتي بهدلتيها هههههههه وأكيد حليتي عليها بزاف الفور عليها ماطابتش راهم جربوها لبنات وصلحتلهم حنووونة ماعليش المرة الماجية على قول الداية

ام تاجو فهميني فاش النقص اذا حبيتي المدة الازمة باه تفتح ونشوفها الكوشة لي عندي اوني تاع دزاير وماهي درجة الحرارة
وكتاه نحيها من المول حتى تبرد ولا ثم ثم
انا لي فسدتلي الكريمة نهدر على كرام شانتي تستعملي الغبرة ولا السائلة والغبرة 100 غ كيفاه نطلعها
فهموني راني حابة نتعلم

فراشات العمر · 2015-12-20, 09:39

اقتباس:

المشاركة الأصلية كتبت بواسطة x ام رحاب x

خرشف بالزيتون واللحم
ام جوجو مايكون غي خاطرك
اتنقي الخرشف واتغسليه واتغليه في الماء ونص حبة قارص وشوية خل كي يغلي مليح صفيه
في طنيجرة وجدي اللحم وديري الدرسة حمرا يعني الثوم ملح فلفل ادريس فلفل اكحل كمون طماطم مصبرة وخليهم ايتكتكو شوية في لاصوص واتكوني غليتي الزيتون تاعك 2 مرات وارميهم معاهم وارمي الخرشف تاعك ايطيب مع اللحم امبعد ايلا حليتي عليها القيتي اللحم طاب نحي اللحم وخلي الخرشف ايكمل طيابو لازم ايكون طايب مليح ولازم اتكون المرقة عاقدة وحمرا ايجيك هايل ويلا حبيتي تقدري ادزيديلهم بطاطا مقلية انا مانحبش انزيدها وانت ايلا حبيتي تقدري اديريها ويلا مافهمتيش انزيد انفهمك وراني عارفاتك فحلة اجيبيها خير مني

شكرا على الوصفة ام جوجو حنا الخرشف نقيوه مليح ونغسلو ثلاث مرات من بينهم مرة بالخل او القارص وقبل ما نخدموه نحكو ايدينا بالقارص با ما يسوادوش
ونستعملوه مباشرة بلا ما نرميو الما نتاعو هذي نصيحة من طبيبة وقاتلي الما نتاع الخرشف راه ضد الكلسترول خاصة مغلى الاوراق نتاعو
جامي جربتو مع الزيتون بصح نوعدك اليوم للعشى ان شاء الله نديرو عندي الداند والزيتون والخرشف

أم محمد تاج · 2015-12-20, 09:40

ياخرابي يخطبولي في امورتي وااااااااع ام ساجد حنوووونة لازم تجيبولي ذيب احرش عمرو ماتخبش وتجيبولي العمود الفقري تاع ذبانة وتجيلولي سنة تمساح حي وشحمة ديناصور وحجرة من بركان فاير وثائر باش نمدلكم حبيبة قلبي وعمري وعويناتي

فراشات العمر · 2015-12-20, 09:44

ملاحظة
اهديكم هذه الانشودة الموجودة في التوقيع الرابط الاول

أم محمد تاج · 2015-12-20, 09:45

فراشات حنووونة يعطيك الصحة على الاصرار والتعلم ومن عيوني حنوونة
شوفي المسكوتة طيب على درجة حرارة 180 درجة ولازم الفور يكون سخون وتحطي الكيكة تاعك وتنقصي على درجة 180 وماتفتحيش عليها حتان ل 45 دقيقة
وانا نحيها من المول سخونة وكل وحدة كيفاش
والبياض باش يصلح ضيفي السمر دفعات حنووونة باش مايهبطش
والكرام شونتي المليحة تاع الميزان وتاع الباط نقص الحليب باش تثقال وتصلح
حنوونة كاش سؤال راني في الخدمة

أم محمد تاج · 2015-12-20, 09:46

اللهم آمين زهرة اللوتس حنووووووووونة واكيد حرب خخخخخخخخخخخ