السلام عليكن والرحمة. وا راكم قتلتكن السخانة كيفنا. وزيد الميديتي الصيف هاد المرة سخووووووون صيف تاع 2013 اوت ولدي كان يلبس تريكر غليظ. ونتغطاو فالليل بكوفيرتة والعان لي فات كان مليح ماسخون مابارد
المهم اليوم الفطور كنت حابة المحاجب شهيتوني فيهم. ورىيس الدولة قالي واالو السخانة دير حاجك خفيفة. درت سلمون والسلاطة بالافوكا والخيار.
عشاتي ان شاء الله عندي كروفات صغيرة نديرها سوب مع سلاطة بيطراف وخيار بالاك نديز معاهم بيض ميموزا
الصباح درت قاطو هبلو عليه الناس تاع ام ساااارة. جا هااااااايل. فالذوق. درتو فمول المادلين الصغير ومازال ماكملتش التزيين انا زدت فيه شوي مايزينة برك لانو القاطو كان قليل والعجين جاني ليكيد بزاف والنتيجة امممممممممم راح تبقى نديرها ونديرو فمول كبير ونقطعو مربعات
راجعت الصباح ونسييت واش قريت ههههه
عقلت على قاطو ام وداد واطباق المجد الاماني شهاتني الدجاجة
شفت ليزا العسلاية دخلت.الحمد لله على رجوعكم بخير. وبصحتكم التحوااس. والتقلاش. لوكان حسبت كنت ندير كوراج ونجي لعندك. كنا حابين نروحو وبطلت خفت من السخانة والعرى هههههه. قوليلي كيفاش فوتوها. والحالة كي دايرة باينة الغاشي راجلي قالي تحسب راك دور في وهران من كترة العرب. بصح هو راحلها فالربيع غزالة مانسيتكش عالحريرة مانقدرش نبعت رسائل من نتلاقو هنا راني نكتبهالك. او ابعتيلي رسالة باش نقدر نبعتلك رسالة
ساجدة بصحتك البوزلوف. ياك عايشة فالغربة !!!. ممكن تمديلي طريقتك
الاخت لي سقساتني على اكياس الشواء. بالنسبة للتتبيلة كل مرة واش ندير
زبدة طرية كميلة مليحة ثوم سكنجبير مطحون ليمون عصير كمية مليحة مرات ندير الموتارد. الهريسة وطماطم مصبرة تقدر تستغناي عليها والملح فلفل اسود هاد الاساس والباقي على حساب النكهة لي تحبي. تقدري تضيفي شوي عسل. ماراحش يبان ذوق لكن الدجاجة تجي محمرة
مرات ندير اكلييل جبل. مرات زعيترة مرات اعشاب مخلطة. مرات قصبر ومعدنوس
ادا تحبي الصلصة تكون بزاف تقدر تضيف كاس شاي ماء انا مرات ندير الفطر وشوي من الما تاعه
مرات ندير عصير ليمون وعسل مغرف كبيرة او زوج وشوي سكنجبير وملح برك. يجي حلو وتقدر تضيف حتى عصير البرتقال. انا يعجبني وكاين لي مايحبوهش
بالنسبة للخضر تدير التتبيلة فيها ادا درتي البطاطا راح تشربلك الصوص
ممكن الخضر تديريها في كيس والدجاج في كيس.
الدجاجة حاولي التتبيلة ديرها من قبل وتحت الجلد وخليها ليلة كاملة
كيس ديري فيه شوي فرينة قبل ماتحطي فيه الدجاح انا مرات ننسى
اتقبيها زوج تقبات. واذا نسيتي معليش
لما تطيب الدجاجة ادا تحبي الدجاج ناشف ومحمر خرجيها من الكيس وحطيها في بلا اخر تتحمر فالكوشة
الصلصة ادا تحبيها تقيلة خليها تغلي فوق النار
الصلصة تقدر تدير بيها الارز طيبيه فيها او حت يطيب وخلطيه. انا نصيب الارز نص طياب ونسقيه بالصلصة ونقص عليه النار حت ينشف ويطيب يجي بنين
ممكن تسقي بيها لابيري.
ومرة بقاتلي الصلصة فالفطور طيبت بيعا صوص تومات تاع بيتزا جات اممممممممممممممممم
هذا واش تفكرت واي سوال خليهلي هنا ادا شفتو نجاوبك او ابعتيلي رسالة لاني مرات نراجع وننسى