تجهيزاتنا للشهر الفضيل

[ام هزار]

ممكن جهينه و أم شمسو تعطوني برنامجكم الديني لشهر رمضان و كذلك بقيه الفراشات

[رندة.]

أصبحنا وأصبح الملك لله و لا اله الا الله وحده لا شريك له، له الملك وله الحمد وهو على كل شيء قدير.

صباح الخير عليكم

[جهينة اليقين]

السلام عليكم فراشات طاب يومكم هيا الهمة حبيباتي ما بقاش بزاف لرمضان
ما زالت شوي اشغال عالقة نحاولو نكملوها قبل رمضان

[جهينة اليقين]

ام هزار البارح كتبت برنامجي بالتفصيل وطار كل شئء الله المستعان
المهم نحاول نعاود باختصار
نبداو يومنا في رمضان الفضيل بالسحور ننوضو قبل الفجر بساعة ثم نصليو التهجد حتى ياذن للصلاة نصليو ونسبحو ونرقدو حتى الثامنة صباحا
نقوم باشغالنا ثم نصلي الضحى ونقراو شوي قران وبعد صلاة الظهر ناخذ قيلولة حتى قبل العصر بشوي نحاول نقرا القران ونصلي العصر وندخل للمطبخ حتى لقبل المغرب بساعة نتفرغ للدعاء فانه افضل وقت للاستجابة
وبعد الافطار نرتاح شوي ونصليو العشاء والتراويح من المصحف ثم نتسامر مع العايلة شوي وكل واحد يروح للنت يسهر معاه تم ننام بين منتصف الليل والواحدة
نقلل من الخروج في النهار الا لضرورة اوصلة الارحام كالوالدين ونتفادى الخروج في الليل لانو يضيع لي الصلاة الا لضرورة ومنبهة العايلة ما نستقبلش للقصرة الا لضرورة
وربي يبلغنا ويعيننا على صيامه وقيامه

[توتة2008]

صباح الخير فراشات ...جهينة انا ايضا ما نخرجش في رمضان في الليل نحاول نستغل الوقت في الصلاة

[توتة2008]

اليوم ان شاء الله نكمل تنظيف الدوش ونحك الكوكوت وبعض الاواني

[ام هزار]

اعجبني برنامجك يا جهينة ما شاء الله ميش مضغوط رايحة نحاول نقتابس منو و نكيفو مع ظروفي الداخلية و الخارجية بارك الله فيك مرة اخرى انا ثاني ما نخرجش في الليل و كيما تعرفي ما عنديش الاستقبال ربي يقدرنا على الصيام و القيام اللهم امين

[حياتي كلها امل]

السلام عليكم واشراكم انا الحند لله كملت المطبخ قلت اذا كان الحال صاحي هذي الايام نغسل زربية
اما عن برنامج رمضان انا انوض مع سحور انصلي ركعتين ونوجد الصحور ونقرا القران حتى اذان الفجر انصلي مع اذكار ثم نرقد انوض 8:8:30 نصلي الضحى ونخدم اشغالي اليومية والاسبوعية ثم انحاول نقص شوية من الفطور تحلية سلطة اندوزن الشربة والطبق الرئيسي ثم انصلي الظهر ونقري القران انا عاملة برنامج بعد كل صلاة نقرى القران ثم قيلولة بعدها انوض انكمل الفطور ونخمل كل شيء مورايا ونصلي العصر والفطور راه يطيب ونقرى قراني ثم نجلس مع الزوج والاولاد او نهبط عند عجوزتي شويا قبيل المغرب بساعة نبدا نوجد ونفطرو ونخمل المطبخ نوجد قهوة ثم الزوج يروح للتراويح الاولاد يتفرجو او راهم يلعبو وانا نصلي العشاء والتراويح في المنزل مانقدرش في المسجد اولادي مكاش وين انخليهم ثم النوم علما انني نرقدو بكري
اما الخرجا مانحب نخرج لاليل لانهار في رمضان ربي يقدرنا على طاعتو

[ام شمسو محمد]

المشاركة الأصلية كتبت بواسطة ام هزار

ممكن جهينه و أم شمسو تعطوني برنامجكم الديني لشهر رمضان و كذلك بقيه الفراشات

السلام عليكم مرحبا اهلا و سهلا بالحبيبة ام هزورة ...هكذا دائما راكي مخليتنا مشتاقين لك ؟!!!

سالتيني على برنامجي ...و هذا من حسن ظنك لذلك نعتبرو اطراء ليا ...شوفي واش راني حابة ندير وربي هو المعين و الموفق ..

طبعا بعد تقسيم يومي لمحاورو الخمسة ..نفسي ؛ديني ؛بيتي ؛اسرتي؛ محيطي

اليوم يبدا قبل السحور في وقت السحر كيما قالوا لبنات ...الموفَّق اللي يقدر يخطف ركعات في هذا الوقت مهما كانوا قلال
ثم نحضر السحور نسحرهم و نغسل لماعن و نرجعهم لاماكنهم

نقرا شيئا من القران قبل صلاة الفجر ثم اذكار الصباح و النوم قليلا

صباحا ننوض بكري لانو البركة في البكور بعد التنظيفات الشخصية و العناية بالاطفال نبدا في روتيني المنزلي الصباحي اللي يتضمن مع الاشغال اليومية تحضير الفطور و برمجة وجبات اليوم ..يعني مثلا حنا غالبا نتسحرو بربوشة نفورها و نوجدها في هذا الوقت كذلك اذا كنت دايرة تحلية للسهرة او عندي قعدة او متوقعة ضياف ...هذا طبعا مع المنيو تاع الافطار لكل يوم بيومو اللي هو اوتوماتيكي بطريقة ما... لانو بسيط و يتضمن شربة بالتداول نهار فريك و نهار زرارع و نهار دويدة و نهار حريرة ...ثم طبق رئيسي اما طاجين او غراتان بترتيب منطقي كذلك ؛ مانحبش نفكر ههههه ..يعني نهار بالحمص نهار زيتون نهار جلبانة نهار خضار ...السلطات خضرا و طازجة او مطهوة او ماسيدوان ...و نحن من عشاق الحميص و الفلفل بانواعه ....هذا مانطيب ...و اذا كاينة بواقي نحطها مانطيبش

اذن التحضيرات نديرها في الصباح بعد العصر غير ننصب و نعجن

بعدما نكمل روتين العناية بالمنزل و تسييرو ندير جلستي القرانية لمدة حوالي ساعة حتان ياذن الظهر نصلي و نقيل

عادة في الصيف ندير نشاطات مع اولادي تتضمن تحفيظ قران او مدارسة سيرة و قصص انبياء او تعلم لغة لذلك و حسب مزاجهم ممكن نخصص نصف ساعة الى ساعة لهذا النشاط قبل مانرقد ..

بعد العصر تكون للافطار و تحضيراتو و الوقت القليل اللي يسبق المغرب نستغلو ايضا لقراءة القران و الدعاء و الاذكار

بعد المغرب مايخفاش على الجميع بلي وقت حافل بتقديم الوجبة و التنظيفات اللي تليها

ثم نصلي العشاء و التروايح اذا يسر رب العالمين و نتوجهو مباشرة للنوم بعد مسامرة عائلية خفيفة

و بالتالي وقت رمضان قليل جدا و عزيز و نشحو عليه صح مانحب نخرج مانحب حتى واحد يشغلني ...هههههه مؤخرا عدت نقلهم ماتعرضونيش ....خلوني نفطر في داري... هههههه

[ام هزار]

اهلًا بالجميع
أم هاجر ما شاء الله برنامجك متكامل يعطيك الف عافيه راني نحاول نتأسى ليك فيه
أم شمسو يا حبيبتي و غاليتي راني دخلت قداش من مره و سلمت عليك و على باقي الفراشات ممكن ما تولهتيش برك
على العموم أنا و هزوره بألف خير و الحمد لله كيفاه حوالك انت و كامل اسرتك يا رب تكونو في أحسن الأحوال
تعرفي أم شمسو بكل صراحه و بكل صدق نشوفك انسانه متكاملة بها ما نقولش مثاليه و على بالك واش راكي تديري و اشهد الله تعالى أني احبك فيه كما أحب بقيه الفراشات
بكل موضوعيه برنامجك لا يعلى عليه و ملم بكل الجوانب ما شاء الله بقدر ما يظهر بسيط بقدر ما هو دقيق و شامل ما شاء الله
يا رب يثبتني و يثبتكم اجمعين على الطاعه و العباده اللهم امين

[سوسو الزينة]

شكرا اااااااااااااااااااااا

[سوسو الزينة]

حراير بلادي

[haninefadwa]

السلام عليكم ورحمة الله وبركاته كيف حالكن أخواتي ما شاء الله عليكن الله يعاونكم ويتقبل منكم الطاعات شكرا لكل واحد تخط ولو حرفا لاثراء هذه الصفحة
حبيبتي ام شمسو وصلتني رسالتك وكم كانت فرحتي لاتوصف يكفيني انك بخير انت و اهلك حاولت التواصل معك غير انني وجدت قانون المنتدى يشترط 500 مشاركة لاستطيع الرد برنامجك الرمضاني ثري وفقك الله

[جهينة اليقين]

اصبحنا واصبح الملك لله وحده لا شريك له له الملك وله الحمد وهو على كل شيء قدير

[جهينة اليقين]

اللهم وفقنا في هذه الايام المباركة لما تحبه وترضاه
اللهم اعنا على ذكرك وشكرك وحسن عبادتك يا ارحم الراحمين