دورة الاستعداد لفصل الشّتاء بيتي مشرق كفصل الرّبيع

[أم تغاريد]

أنا من البارح وانا نغسل في حوايج الشتاء ونحط في السلل
اليوم نحيت التلايق رايحة نغسلهم
باش غدوة ان شاء الله نخمل برك

همسة صباحيّة: تأكّدي أيّتها الغالية أنّ الله يحبّ العطاء أكثر ممّا تحبّين أنتِ الأخذ ، فأديمي الطّرق ؛ إنّ الكريم إذا فتح الباب أعطى دون حسآب

[أمة الله 84]

السلام عليكم
صباحكن جميل إن شاء الله تكونو كامل بأحسن حال
شكرا أختي أم تغاريد على الهمة و تانشاط لى راكي تحيها فينا
بالنسبة لملابس الشتاء أنا كي غسلتهم عطرتهم و خبيتهم و جبتهم البارح لقيت مازال رائحة العطر فيهم ننشرهم تقيسهم الشمس و لا نعاود نغسلهم أحسن

[أم تغاريد]

وعليكم السّلام ورحمة الله وبركاته حبيبتي أمة الله 84
صباحك أجمل
ادا مافيهمش ريحة الغمال انشريهم تقيسهم الشمس برك بلا ما تزيدي شغل على روحك
ربي يعاونك

[oum sabrin]

صباح الهمة و النشاط
أعتذر عن انقطاعي المفاجيء نظرا لحلل في خيط الانترنيت حتى حسابي بقالي مفتوح الحمد لله اليوم سقمهولي زوجي
البارح نزعت تلايق تاع الخزانة غسلتهم و نشرتهم


بعدما نشفوا حددتهم

امممم راهم جاهزين برائحتهم الجميلة للدخول الى خزانتي عند ترتيبها



هادا واش درت البارح بعدما حضرت الغذاء كسكس + سيقت وفي المساء رحت طليت على زوجة عمي مريضة
ا اليوم نشرت شويا ملابس شتوية في الشمس لانها نظيفة ما فيهاش الرائحة و بعد ما نفطر ولادي احاول ابدا مع الترتيب لانو غدا تجيني لوستي يعني ما نقدرش نحبط الخزانة و الضياف في المنزل
اتمنى التوفيق للجميع

[رقية الناجحة]

السلام عليكم

انت رائعة ياام تغاريد ايقضت فيا الحنين الى البيت الدافئ على الرغم اني لا استطيع ان اكون معكم في الدورة لان ظروفي لا تسمح اتمنى لكل الفراشات التوفيق ولا تنسوني من دعئكم الصالح بالفرج القريب

[أم تغاريد]

أختي الغالية oum sabrin
كلك همة الله يبارك ريحة النقاء راهي تعبق
أعانك الله على الترتيب
كملي هكدا
------
أختي رقية الناجحة
أنت أروع هذا من ذوقك الجميل أخيتي
أسأل الله أن يفرج كربك ويفتح عليك فتحا مبينا
(فإنَّ مع العسر يسرًا )(إنّ مع العسر يسرا)
فأبشري

[أم تغاريد]

ترتيب التسريحة la coiffeuse

ذلك المكان الذي يضجّ بالأنوثة ما لي أراه مهملا هكذا ؟

أختي الغالية ، اليوم إن شاء الله سنتحدث عن طريقة ترتيب التسريحة وجعلها أنيــــــقة
1-خرجي كل الأغراض لي فيها
2-امسحيها جيدا بمشنفة جافة معطرة
3-امسحي المرآة بمنظف الزجاج
4-ارمي العطور المنتهية وراقبي تاريخ انتهاء صلاحية مواد التجميل
5-الان نبداو بدرج او ادراج التسريحة رشيها بعطر
6-ماكياجك لي راه مخلط في pochette افرزيه احمر الشفاه وحدو الأقلام وحدها طلاء الاظافر وحدو....


7-رايحين نستفوهم بطريقة جميلة في الادراج وذلك بترتيب في سلل صغيرة او علب صغيرة مفتوحة من الفوق
فكرة: هاد السلل يبتاعو عند لحوانت تاع الماعن وماشي غاليين اشريهم تقدري تغلفيهم من برة بورق شباب ولا تزيينهم بالحاشية




8-الآن راهم قدامنا المشاطي اول شي لازم نظفوهم احكمي باسينة ديري فيها لتر من الماء و3 ملاعق كبيرة من بيكاربونات الصودا وخليهم لساعات فيها




9-وين تخبيهم؟ اما ديريهم في سلة صغيرة كيما الماكياج او تخدميلهم فكرة مثل هذه مثلا انيقة ! لكن ماتحطيهمش فوق لاكوافاز ديريهم أيضا في الادراج







-10-مجفف الشعر- ليسوغ - مجعد الشعر هادو الأفضل كي تشريهم تخليهم في باطتهم لكن ادا راحتلك الباطة تاعهم تقدري تخدمي باطة بعلب الأحذية وتغلفيها وانت وذوقك في التزيين ولا تخدميها كيما لي في الصورة ادناه وطبعا نخبوهم في الدرج وادا ماعندكش مكان ديرلهم بلاصة في الخزانة





11-الأكسسوارات : الذهب راه في مالات باين لكن الاكسسوارات الأخرى اما تخدميلها علبة شابة مقسمة مثل هذه








اوتخدمي منظم اكسسوارات ادا لقيتيه يتباع فذلك احسن والا فابتكري اشري علاقة يبيعوهم مع الدوزان تاع الماعن لا تتجاوز 100 دج ماتشريش لي فيهم فاكهة اشري واحدة سامبل تجي فيها لصقة من اللور لصقيها داخل البيبان تاع لاكوافز ادا كانت من النوع لي يجي فيه بيبان من التحت او في بيبان تاع الخزانة من الداخل بالطبع ادا لقيتها كبيرة تقدري تكسري على زوج مثلا وتعلقي فيها :




12- المساسك وles epinglesدايما يتبحرو ويلصقو في حوايج اخرين كي تجي تجبدي حاجة يلصقو زوج في يدك الحل النهائي هو مثل هذه الفكرة ما تكلف والو :




13-الكريمات والبودرات ماتحطيهاش في الحمام لانو لازم تحفظ في مكان خالي من الرطوبة خصصي لها درجا وادا ما عندكش مكان ديري علبة شابة وحطيهم في الخزانة
14-الآن بقاولنا العطور بيناتنا البنات التدكاس هذا ليس فيه شيء من الجمال :



حبيتي بيتك تبان منظمة وأنيقة خلي سطح التسريحة تاعك فارغ قدر الإمكان ، دبري باقة ورد اصطناعية واختاري فاز شباب ادا ماعندكش قاع شوفي هاد الأشياء يتباعو 150 الى 250 دج برك ويعطو واحد الحطة شوفي لعفايس لبيوضا تلقايهم اخيتي عند لي يبيعو لماعن بكل الألوان اشري بيوضا لا حمر لا بنفسجي قلنا ابيض اتفقنا والزهور اختاريها بين الأبيض والوردي الفاتح


شوفي هنا حطو فيه لي فرشاة المايك اب انت حطي فيه الورود كيما قلنا


-العطور خيري لي القارورة تاعهم تكون شابة وماديريش عشرين قرعة 6 يكفو تقدري تسقميهم بهاد الطريقة :







15- لمسة أنوثة ورومانسية ودفء نضيفوها لغرفتنا بتزيين التسريحة ببعض الشموع العطرية لي تقدري تخدميها بنفسك


16-حبيت نتهناو من الفوضى لي فوق لتسريحة ونعطوها طابع هادئ ماعلاباليش ادا غير انا برك لي نحس راسي فيه الغاشي كي نشوف سطح معمرة بالاشياء ولا انتوما تاني
لكن المفيد البساطة فيها من الجمال الشيء الكثير فاعتمديها في ديكور بيتك



----------
لي تكمل الخزانة ولا ماتقدرش تخملها حاليا تنطلق في ترتيب التسريحة
موفقآت فراشاتي

[ذات النورين]

مساء الانوار على الجميع
شكرا حبيبتي ام تغريد راح نعمل بنصيحتك
بالمناسبة راني فرغت جمييييييييييع الادراج تاع الملابس الداخلية ورتبتهم بعد ما مسحت منهم الغبرة ولمعتهم
فقط عندي مشكل اخر ممكن يساعدوني فيه الاخوات علابالي كثرت عليكم عذرا
وهو انه راني ساكنة في الطابق الارضي والبالكون مغلوق يعني فيه غير ثقبات صغار قيس ما تدخل الشمس وما نقدرش ننشر فيه فراش الشتاء ما يهزهوليش لانه ثقيل على الحبل
فما الحل من فضصلكن

[amel...]

مساء الخير عليكم و ان شاء الله راكم لاباس .... يعطيكم الصحة يا الشاطرات

انا راني قريب نكمل الخزانة بفضل مساعدة اختي ... بصح فيما يخص التسريحة انا مزالت معنديش غرفتي الخاصة باعتباري مازلت منيش ربة بيت و التسريحة تع ماما

عندها بزاف ملي نحاتها لااخاطر الديق شوية في شامبرتها

المهم ساواصل مع الخزانة نتاعي انا و اخوتي و نستناكم تكملو التسريحة باه نشوف لمرحلة الجاية

ربي يوفقنا ويبارك في لمتنا ان شاء الله

[amel...]

المشاركة الأصلية كتبت بواسطة ذات النورين

مساء الانوار على الجميع
شكرا حبيبتي ام تغريد راح نعمل بنصيحتك
بالمناسبة راني فرغت جمييييييييييع الادراج تاع الملابس الداخلية ورتبتهم بعد ما مسحت منهم الغبرة ولمعتهم
فقط عندي مشكل اخر ممكن يساعدوني فيه الاخوات علابالي كثرت عليكم عذرا
وهو انه راني ساكنة في الطابق الارضي والبالكون مغلوق يعني فيه غير ثقبات صغار قيس ما تدخل الشمس وما نقدرش ننشر فيه فراش الشتاء ما يهزهوليش لانه ثقيل على الحبل
فما الحل من فضصلكن

ربي يقدرك حنونة ... و بالنسبة للاغطية ممكن تحطيهم في التاقة ... اذا يوصلها الشمس و مرة على مرة تقلبيهم باه توصلهم الشمس كامل

[هنو ام ياسر]

يا سلام على الهمة و النشاط يعطيكم الصحة يا الفحلات ريحة النقا راه وصلت عندي
شكرا حبيبتي ام تغاريد على النصائح و على الرابط كنت ديجا شفته من قبل انا ان شاء الله غادي نبدا بخزانة ابني اليوم غسلتله قشه نتاع الشتاء لكن لقيت واحد الصفورية في بعض ملابسه البيضاء و ما راحتش بعد الغسيل مع العلم اني كنت مخبيتهم في كرطونة كبيرة.
بارك الله فيكن و جعلكم اوفى الاخوات لي

[ذات النورين]

شكرا اختي منال لاهتمامك
ولكن راكي عارفة الريتشوسي لازم تعسي حوايجك اذا نشرتيهم في التاقة غير الدراري اذا شافوهم حفلة بالنسبة ليهم ههههههههههههه يديرو رايهم قصدي تاع برا طبعا

[أم ريتاج زهرة]

أهلا حبيباتي ربي يخلينا ديما ملمومين في لمة الخير و على فعل الخير بالنسبة للتطبيقات رانمي ندون في راسي و التطبيق جاري بإذن الله تعالى ربي يوفقنا جميعا

[نهلةن]

السلام عليكم بارك الله فيك اختي تغاريد انا عندي ليبلاكار واحد في الكولوار وزوج في غرف الاولاد فرزت الحوايج تاع الصيف وتاع الشتاء المشكل انو كاين قش مزال نستعملوه والله جبدت كل شئ وكتبت الي خاص للشتاء ونحيت الي نصدقو وخليت كل شئ تحت عيني حتى يبرد الحال مليح ونفرز مرة وحدة الله المستعان اما الاحذية حطيت الي يصلحو كامل في المشينة وغسلتهم وشيحتهم وخبيتهم في كراتن وكتبت فيهم كل واحد وتاعو باش مننساش اما تاع الشتا جبدتهم وحطيتهم في الادراج
الله المستعان التسريحة معنديش رحلت لداري الجديدة وخليت كل شئ قلت نعاود نشري كل شئ جديد مزال مسهلش ربي

[ام مؤمن]

اسعد الله صباحكم يا فراشات المحبة

كما وعدتكم ان شاء الله ستكون لي اطلالات على الدورة السابقة للقائدة حبوبة اخواتها و سانقل لكم باذن الله نمط و سير و تطبيقات الدورة الاولى التي تعودنا عليها و التي ستجعل هذه الدورة متكاملة ان شاء الله مع كل ماتقدمه لنا حبيبتنا ام تغاريد

و البداية ستكون مقدمة من توقيع الغالية حبيبة

'(سيكون الفرق بين ماتخطه اناملي و انامل الغالية حبيبة هي الالوان انا اعتمد على اللون الازرق في الكتابة و سانقل لكم اقتباسات حبيبة بلونها المفضل البنفسجي )




السلام عليكم و رحمة الله و بركاته
بسم الله
سأشرح لكم فكرة الدورة بالتفصيل الممل
ما سنقوم به هو أننا سنتعلم معا بعض كيف ننظم عالما الداخلي
لكل واحدة منا اي علاقتنا مع انفسنا،
و من ثم ننظم عالمنا الخارجي
الذي هو بيوتنا ابناؤنا أزواجنا عباداتنا و أعمالنا
و أي أمر نحن نتحمل مسؤولية ادارته و العناية به
و ننتقل من حياة تحمل مقدارا ضئيلا من السعادة
الى حياة أكثر تنظيما و بالتالي أكثر تحررا من قيود الالتزامات و المسؤوليات
(لان التنظيم يعطي الحرية)
و سيكون ذلك باكتساب عادات جديدة
و جميعكن يعلمن تماما مدى صعوبة طرد عاداتنا السيئة
التي غزت حياتنا و بيوتنا بدون استأذان
و اكتساب عادة جيدة جديدة نحيا بها


و لذلك سيوف نمشي على خطى صغيرة خطوة خطوة
و كأننا فراشات صغيرات لازلنا نحاول تعلم الطيران
(حبيباتي أعلم تماما أن القليلات منكن فقط لازلن في طور تعلم كيفية تحمل مسؤولية بيوتهن و كيفية ادارتها و سنقف معها باذن الله
اما الباقيات فكلكن ربات بيوت مميزات و فحلات و لكن ينقصهن الحماس أو المتابعة أو الالتزام أو النشاط او الصرامة
أو أو أو أو...
كل واحدة تعرف تماما ما ينقصها لتشعر بالرضا عن نفسها و عن حياتها اليومية
و هذه الخطوات هي التي ستعالج باذن الله
اي نقص تشعرين به في أدائك اليومي
و ستوصلك للنتيجة التي تسعين اليها جاهدة كل يوم
منذ لحظة استيقاظك و نهوظك من فراشك بمشقة لما ينتظرك من واجبات و اعمال
الى لحظة وضع رأسك على المخدة ليلا و أنت لازلت متوترة كيف سيكون أداؤك في الغد)


اذا كيف سنعمل مع بعض؟؟
العمل سيكون عبارة عن تطبيقات يومية نقوم بها جميعا كل يوم لمدة شهر
و اهم تطبيق سنقوم به هو
" ان نفرز، نرمي، و نرتب"..
بالتالي سنقضي على الفوضى في بيوتنا
و هكذا دواليك حتى نتم تعلم كل الخطوات و نكتسب عاداتنا الجديدة و نطرد عاداتنا السابقة التي نغصت علينا حياتنا
و طردت منها السعادة و الاستمتاع باوقاتنا
و سنصنع روتيناتنا اليومية
أخبرتكم سابقا انه لدينا ثلاث روتينات سنصنعها معا
و سنتبعها بحذافيرها كل يوم
روتين الصباح
روتين بعد الظهر
و روتين المساء
(هذه الروتينات هي عبارة عن تلك المجموعة من العادات الجيدة التي سنكتسبها معا
أرجو أن تكون الفكرة قد وصلت)
و خلال صناعتنا لروتيناتنا سنقوم بالتنظيف الشامل للبيت يوما بعد يوم

و البداية سطرتها انامل الغالية ام تغاريد و التي خصصت لها الانطلاقة من غرفة النوم

و البداية كانت ترتيب الخزانة

و تليها مباشرة ترتيب التسريحة

و طبعا كلنا سنلتزم ان شاء الله بالحملة الشتوية و زرع الربيع في بيوتنا جعل الله ايامكم كلها ربيع زاهي

كانت هذه المقدمة ربما طويلة نوعا ما لكن ساوافيكم بالمختصر المفيد من التطبيقات المنتظمة في الردود القادمة ان شاء الله و التي ستكون منظمة بدايتها بداية مشرقة مع اولى نسمات الفجر حيث تكون البداية استفتاح اليوم بالنهوض لصلاة الفجر و ادائها في وقتها و قراءة الاذكار اليومية حتى يكون يومنا مبارك من بدايته الغاية فيه قبل كل شيئء رضى و طاعة الرحمان

بارك الله لكم في اعمالكم و اوقاتكم و جمعنا و اياكم على التقوى و الطاعة و فعل الخيرات

سارجع بعد الظهر ان شاء الله لوضع تقريري فيما يخص ترتيب الخزانة و التسريحة

يا الله صباح الهمة و الحيوية و النشاط

اترككم و اتوجه الى ترتيب منزلي الحبيب

في امان الله