مشاركتي في مسابقة كيكتي الاجمل

[ام ملاك.]

السلام عليكم
كيكة بديكور لاناب

شكرا اختي ام رامي واختي ام كوثر على المسابقة الرائعة و على التشجيع المتواصل لنا

جات المسابقة في وقتها خاطرش كان عيد ميلاد زوجي حبيبي

وكن حابة نديرهالو سوربريز وكيما كان الحال


المهم هاذ الكيكة 3 ايام وانا نخدم فيها هههه



يوم للابات والحشو ويومين للديكور اللي تعبني بزاف وان شالله يعجبكم وتكون طريقة مبتكرة يارب

نبداو بالعجينة: خدمت عجينة الجينواز عادية لكن نقصت شوية من الفرينة وضفت بدالها الكاوكاو

وطيبتها عادي

خدمت لابات مدورة واحدة ضفتلها كاكاو بالاضافة للكاوكاو وقسمتها على 2

وخدمت 2 كاريات كبار وقسمتهم على 2 بقياسات متساوية شديت مسطرة وقست

هذي بالنسبة للعجينة

الحشو : درت اقل من نصف كاس زيت وكاس عصير البرتقال مع شوية زاست نتاع البرتقال والليمون (تقدرو تعوضوه بعصير الليمون او الماء)

كاس سكر قلاصي او اكثر شوية على حسب الذوق

250 غ زبدة طرية مقطعة صغيرة ليكستري نتاع اللوز والبيسطاش كثري منو سورتو البيسطاش يمد ذوق اممممم

لافاني اكيد لازمة ,وكاوكاو محمص ومرحي رقيق كاس (تقدري تعوضيه باي نوع مكسرات تحبي وتحبي تكثري او تنقصي هي المهم كل ماتزيدي كل ماتزيد البنة)
ماصورتش طريقة الجينواز لانها معروفة للجميع

طريقة التحضير:

تبداي تضربي العصير والسكر بالباتور حتان يذوب تزيدي تفرغي لافاني والزبدة وتكملي تضربي ماتحبسيش خلاص وفرغي ليزيكستري نتاوعك واخر حاجة الكاوكاو وكملي ضربي من بعد اخر مرحلة ابداي فرغي في الزيت بشوية كي المايوناز وكملي ضربي ماتحبسيش رايحة تشوفي بللي الكريمة نتاعك ولات ثقيلة وخفيفة ( ودائما تذوقي باش تعرفي اذا خصها السكر)

وتحطي الحشو نتاعك بجهة وتلونيه كيما حبيتي

نورمالمون نلونو بالشوكولا كانت خلاصتلي الكاكاو عليها درت لونو رايح للبرتقالي لو كان جال ونو شوكولا تخرج منظرها احسن

وجزء خليتو بلونو الابيض




وزدت طلعت لاكريم شونتيي وخلطت نصهامع الكريمة

(الطوابع اللي خدمت بيهم الورود والقلب الكبير والاوراق بطوابع السيليكون وطابع الصابلي نتاع لحديد )

هذو صور لاكريم

درك نروحو لعجينة اللوز:

انا خدمتها بالكاوكاو مرحي رقيق ومغربل تشدي 2 كيلات منو و2 كيلات من السكر قلاصي وشوية عسل تخدميه بيض ماتحمريهش يكون ثقيل

وليكستري نتاع اللوز

تخلطي مع بعض وتخلطي بلعسل غير بشوية حتان تتلايم عندك لعجينة وتولي بات داموند وتجي روعة في ذوقها وبنينة بزاف وتلونيها كيما تحبي

الصور

نسقيو الكيكات بالشاربات فيها القارص باش يكسر الحلاوة ومن بعد نطلوها بلاكريم شونتيي برك