تكاليف الزواج في ولايتك

[faridos]

ليقالك الزواج عندوقيمة راهوا غالط ...نهار تروح تخطب او يبداو les faux frais تفيق بلي الزواج قمار ياترتاح يا تهبل ...على كل حال كل واحد او مكتوبو ...بالاك زواجك يجي ساهل انشاء الله

[حلاوة_87]

المشاركة الأصلية كتبت بواسطة faridos

ليقالك الزواج عندوقيمة راهوا غالط ...نهار تروح تخطب او يبداو les faux frais تفيق بلي الزواج قمار ياترتاح يا تهبل ...على كل حال كل واحد او مكتوبو ...بالاك زواجك يجي ساهل انشاء الله

اخي الزواج ""مودة ورحمة"" وكامل اللي يخطبو فالبداية يحمهم التوتر والقلق واحيانا يحسوا بالندم...وحتى لبنات هكذا لكن الواحد يتكل على ربي وان شاء الله الخير.

[gana djamel]

أنا ما زلت في قفص العزوبية وأنتظر الدخول إلى القفص الذهبي لكن أرى أن مصاريف الزواج تبدو باهضة بغلاء سعر الذهب أرجو أن أجد بنت الحلال المرأة الصالحة تنسينا هذا الغلاء والتكاليف وكما يقولون الزواج ليلة وتدبيرتو عام لكن إذا كانت المرأة صالحة تنسيك تدبيرة العام وتعيش معها بقية الحياة حياة سعيدة

[Abdellah M]

في عين الدفلى المهر حوالي 12 الى 15 مليون اما التكاليف ككل حوالي 40مليون
ربي يستر

[همسة مشاعر]

غالي ياسر الحق المرى تشرط من 20حتى 30 مليونوالراجليخسر حتى 60 مليون الله لا يشوفك الحق راهي تكاليف تعجر والله هكا كثرةالعنوسة لي الجال والنساء

[هشام 12]

شكرا على المرور العطر
يسّر الله أموركم جميعا

[nadine lamara]

مانيش عارفة بالضبط


لكن صدقوني العريس ينهار


و ابن عمي سنوااااااااات و هو يبني و يخدم و يوجد و يلايم و كلشي راح في شهر

[هشام 12]

آمين يا رب العالمين

بارك الله فيكم مشكورين على المرور

[yasmine1989]

نعطيك مثال على حالة راجلي مسكين و من كلش شحال تستقام
الشرط"10ملاين"+ خاتم الشوفة"3ملاي"+الجهاز"9 او 10ملاين"+عندو وحد 4سهم"مهيبة" قول كل وحدة 2 ملاين "8ملاين"+الكباش 2" 6ملاين"+جهاز الدار من كلش "60مليون"+العرس "20مليون"+la bague de fiancailles et l'alliance "6ملاين"+شهر العسل لمصر "30مليون"



DONC WAHD 150 MILLIONS...................!!!!!!!!!!!!!!!!!

[abedalkader]

السلام عليكم
الزواج الناجح يحتاج سكنة ..........ايه اسمحلي
يمكن يسكنوا عند اماليهم
يا صاحب الموضوع راك انسيت السكنة
بصح ما عليهش راهي حاجة ساهلة ما هيش غالية
ثانيك تقدر تكري ...وما تسقامش ....
الله يكون في العون

[nacer555]

يا أخواني أنا راني متزوج والحمد الله بصح نهار لي نويت نتزوج الفراك معنديش وربي يسهل فيه.

[دعاء آية]

السلام عليكم

انا من منطقة سوف انا مزال متزوجتش بصح راني فالطريق لدخول القفص الذهبي المهر

انتاعي هو 10املاين بصح معاه الذهب مع شوس حوايج اخرين ... بصح المفيد مش شحال

جاب ولا شحال مد المفيد فالهناء وربي يستر كل بنات ويجبلهم مكتوب شباب ومتنسوش

قول الرسول صل الله عليه وسلم (اقلهن مهر اكثرهن بركة ) ...تقبلو تحياتى

[susette]

اخي انا من الجزائر العاصمة و نتا علابالك واشنو العاصمة الهدرة كامل من 100 مليون و طلع لكن انا من المؤمنات بلي الي اخفهن مهورا اكثرهن بركة مالا سهلت على روحي و علا زوجي
مهري 8 ملاين كلش و خاتم واحد لكلش و لغيت التصديرة لانها خسارة الدراهم بلافايدة و نقصت بزاف حاجات الي الناس يديروهم غير للزوخ و معلاباليشبالغاشي الي حب يهدر يهدر الصح الهناء و ربي ييسر للجمييييييييييييييييع
قولو امين

[aissa2008]

السلام عليكم

انا مازال ما تزوجتش مي سقسيت اصحابي تزوجوا سقاملهم كامل العرس بحوالي 40 مليون يعني من المهر لاخر حاجة في العرس

والحاجة المليحة ليلة العرس يتجمعوا لشباب يقصروا مع بعضاهم بعد ما يتعشاو ويمدوا الدراهم كل واحد وكفاه يمدلك يعني لي يمدلك 1000 دح ولي يمدلك 2 ملايين وراهي رايحة يعني اذا جاوك اصحابك بالزاف ممكن يلمولك 10 ملايين ولا 11 مليون في ليلة واحدة ـ بصح دير حسابك نهار عرس اصحابك باش تقوم بالواجب معاهم

ربي يوفقكم لي فيه الخير

[أبو عبد الرحمن الشريف الجزائري]

الله المستعان أصبح الزواج بمثابة كابوس وهذا كله من التقليد الأعمي للناس و الحسد
يقال هذا دار عرس ب كذا لازم ندير أكثر منو
هذا كله على كاهل الزوج المسكين الذي لا طاقة له
و قد نسي الناس الحديث الصحيح عن النبي صلى الله عليه و سلم و هو في مسند الامام احمد:حماد بن سلمة عن ابن سخبرة عن القاسم عن عائشة رضي الله عنها عن النبي صلى الله عليه وسلم قال : أَعظم النساء بركة أَيسرهن مؤنة ومن نفس الطريق في مسند الشهاب بلفظ أعظم النساء بركة أقلهن مؤنة وفيه عيسى بن ميمون بدل ابن سخبرة وهما واحدوهو نفسه ابن تليدان أو بليدان كل يسميه باسم
قال الحافظ العراقي اسناده جيد كما في تخريج الاحياء