يوميات عضوة

[ام عبودة]

نهى هذا وين شفتك. راهو مشكل في المنتدى صفحة تخرج واخرئ لا لا دوخنا معه
شوفي. نبحث على صور خزانتي من الدورة اللي فاتت ونظملك اجابة تفرحك

[ام عبودة]

حبيت برك نحط اعمال يومي تاع البااارح
الصبااح نظت ماصليتش الله غالب عذر
بصح اذكاري مش ناسيتها والاستغفار كان يوم راااائع. شمس دافئة ولا سحاب ولا غبااار ولا نسمة
غسلت بالماشينة ويدي حتى نكمل ثمثم
حكمتلي على الحيوط بدين من غرفتي الحق ما شي موسخة مي تاع الاولاد كارثة القلم هذا هبلني. العلم نوووووور
شوفو تاع الشمعية حكمت السشوار منا و قطعة ناشفة منا والله مثل السحر ومن بعد جوزت بالجافيل الرغوي سيدهم غي سيدهم تاع الصح
وقلم الرصاص الدونتفريس والله الله. او حتى ممحاة القلم
نرجعو للفوتر مزيل الطلاء والطباشير ما عنديش مشكل ثمثم يروح المهم الحيط يشعل من بعد نحط الصور
خرجت في الكولوار غير نصو الله غالب ا لحق عليا الظهر ودارنا كبيررررررررررة بزاف وما عنديش اللي يعاوني
كملت مع الفطور رجع الزوج حبست الحمد لله العجوز هي اللي تحظرو فطرنا ولمت طفلتي المواعن طحت في السرير باش نرقد رجعو ولادي من المدرسة ما خلاونيش
نظت الى المطبخ درت كيكة تاع الليمون تهبل
ايا البيت اللي خزنين فيها الفراشات والحوايج احتاجها زوجي للادارة فرغو منها وااااع طاح ذراعي من التخمال المهم كملتو دتلو الكافور وغطيتو وسكرت عليه
درست راوية شوي ومن بعد دخلت الى المطبخ درت العشاء شربة فريك وغراتان من المنتدى واااو تحفة ووجدت تيراميسو تاني من المنتدى تعشينا ولميت المواعن والله ما قدرت نغسلهم يديا لهبو عليا من الصابون ننصحكم سيدهم البسو معه القفازات
قعت شوي مع الزوج عندو اعماال مكتبية بزااااف عاونتو شوي وطحنا. هلكانين انا درت الفازلين ليا وهو درتلو مرطب للوجه مع هذه الشمس والجري من الصباح الى اليل غير تعب الله يعينو

[ام عبودة]

اليوم الصباااح
نظت غير مع السبعة ما قدرتش مع الصلاة ما كانش
الاستغفار والاذكار
نوظت اولادي شربتهم حليبهم مع كيكة الليمون رووووعة
ومن بعد راحو ناض الزوج تقهوينا مع بعض ووجدتلو حوايجو تاع الخرجة
ايا قبل ما يخرجو عندو وفد هام جايو ايا رتبتلو مكتب تاعو رجع يشعل
بيني وبينكم انا نحب نخملو وحدي اما الجهة الاخرى عندها عامل
ومن بعد قعت مع غرفتي وغرفة الاولاد وصبحت الحالة تقوووول غبااار ما عنديش الغسيل كنت معولة على النص تاع الحيوط بصح ذراعي واجعني بطلت
وجدت القهوة للزوج في المكتب والحمد لله فرجت
ذرك نروح نفطر دايرن كسكس احمر وسلاطة ودسير
من بعد نولي باااي

[كابريسة]

و هذا وش راني ندير ديجا الكل يشهد بهذا يقولولي مش عارفين كيفاش تسحرينا و تخلينا نخدمو واش تحبي بلا ما نزعفو من الشيخ حتى لطفلاتي و سلفاتي و نحمد ربي لاني محبوبة

بصح باش تولي انت دايما اللي تخدمي و غيرك يفسد ثاني هاذ الشي محبط و من كثرة ما تمدي ملاحظات تكرهي روحك
احنا ثان دايرين كيما دالة صاحبتك هاذي يعني عندي نهار في 3 ايام في الكوزينة و الحمد لله غرفتي و زوجي و اولادي قايمة بيهم كيم يلزم الحال...
و كيما قلتي الاتكال ينحي من قيمتك كامرأة

[كابريسة]

حاولت نرد عليك في الخاص ما حبوش على خاطر راني جديدة
نجاوبك هنا معليهش
كنت ساكنة في الصحراء
و ضرك كي تحول راجلي من خدمتو و عاد يخدم هنا في مدينتو رجعنا لبيت الشيخ على خاطر ما هوش قادر يكري الوقت الاول و من بعد مرضت امو مسكينة بشلل نصفي ما حبيناش نخرجو و نخلوها هاك لا يزيد عليها الحال و خاصة انها تسمع لكلامو و هو الحق مش كي عاد راجلي بصح قايم بيها اكثر من خاوتو الاخرين و حنين عليها و على جميع افراد العايلة لهذا حتى و لوكان يعول يخرج يشدو فيه قع...
و رانا هاك حتى يفرج علينا ربي
الحمد لله على كل حال

[badr75]

شكرا ليك ام عبودة صديقيني بعد قراءة ردك لن تتصوري مدى سعادتي لاني ليس لدي اخوات لاحكي لهن او افضفض لهن وامي كبيرة في السن (79سنة) وهي بعيدة عني اماعن يومياتي لهذاالنهار مثلا استيقظ زوجي وذهب للصلاة في المسجد بعدها اسيقظت اناوحضرت الافطار اامابالنسبة لاطفالي فهم يستيقظوا بمجرد مايتحرك اي واحد هههههههههههههه الصغيرة تبات ترضع لانها لا تشرب الامن صدري بعدها يرجع الزوج منالصلاة نفطروا بعدما يكونوا غسلوا وجهوهم ثم نحضرملابس البنت 7سنوات اما الولد 8سنوات فيعتمد على نفسه بعدها ندخل المطبخ نغسل الاواني ونرتب ثم نرجع للغرف نرتبهم ثم نرجع للمطبخ نحضر غداء الصغيرة نوكلها بعدها نرجع للغداء ومن ننهي حتى يرجعوا الاطفال وابوهم نحطلهم يتغدوا وهكذا ............ دبري عليا

[رهف هبة الرحمان]

يعطيك الصحة يا ام عبودة شاطرة الله يبارك

[ام عبودة]

المشاركة الأصلية كتبت بواسطة majoud14

يعطيك الصحة يا ام عبودة شاطرة الله يبارك

الله يسلمك خيتي ومرحبا بيك نورتيني

[نهى اسطاوالي]

والله غير عجبتوني خلوني نشارك معاكم شوية هههههههههه ونقولكم اليوم واش درت خطركش الاخت ام عبودة طلعتلي المورال ورجعتني فوووووووووووووو تستاهل كادو كبير المهم
انا نضت الصباح على 6 و خمس دقائق صليت الفجر وزوجي كذلك ثم رجعت للفراش تكسلت شوية حتى ل 9 لاني مع الاولاد رقدت على 12 بنتي ساعات تنفحلها ماترقدش بكري المهم زوجي ماخدمش اليوم بسبب الفاكسا تاع بنتي والمشكل انها مقطوعة طيب حضرت الحليب وعملت موسكوتشو ومباعد حطيت الشربة تطيب وحضرت عجينة باه ندير خبيزات تاع الفيونداشي وخليتها تخمر في هذا الوقت رحت غسلت الحوايج ونشرتهم ومباعد ناض ابني اعطيتلو فطر ثم قرصت الخبيزات وعمرتهم بالفيونداشي وخليتهم يزيدو يخمرو ورجعت فرزت الغرفة تاع ابني لميتلو العابو في الصندوق وخرجت العصافير ههههه صينو يحاوزني الزوج ومباعد حطيت الخبيزات في الفرن ممممممممممممم ماعندي مانقولكم روووووووووووووووعة خلصوني نعطيلكم الوصفة ههههه تغدينا الحمد لله الزوج راح يصلي الظهر وانا قعد نحارب مع اولادي اومباعد رقدو ورجع الزوج تكسل شوية لحق العصر قعدت على الحاسوب نكتبلكم يومي واش عملت فيه وراني نكتب الان ومعولة نعاود نفرز خزانتي ام عبودة دارتلي القلب ربي يحفظها
بارك الله فيكم جميعا

[ام عبودة]

هاذا جزء من الحيط تاع الاولاد اه ه ه ه. راحت عليا لو صورتو قبل الغسيل



خزانة الاولاد والسرير





وهذه سينية تاي غير من قبيل درتو القاطو والتاي سخون تفضلوااااااا

[ام عبودة]

نهى راني وليتلك نعطيك انا واش ندير وانت. اسرقي مااااعليش راني سامحتلك هههههه
بصح بشرط هاتي وصفة خبيزات اللحم ههههههههه

شوفي انا خزانتي كبيرة. اولادي عندهم خزانة وحدهم
عندي الوسع البرا يعني ندير حوايج الصيف برك في الصيف وحوايج الشتاء في الشتاء
يعني كل فصل نفرز عااادي جدا راهو مرتين في العام وممتع جداااا
الان حوايجي انا تاع الخرجة في رف وتاع الدار في رف والبيجامات في رف
الادراج كاين اربعة في الخزانة وكبار زوج ليا وواحد للزوج والاخر مشترك
واحد فيه الملابس الداخلية تاع الزوج والاخر ليا
الثالث فيه خماااراتي والرابع الجوارب بانواعها
باب الزوج الرف الاول. تريكوات الصوف والرف الثاني السراول الدجينز والقطيفة الخ والرف الاخير السرافت تاع الحمام
بقي زوج بيبان كباار تاع المرايا
واحد فيه الفراشات والكوفيرطات والدراوات برك
والثاني. لي كوستيم تاع زوجي ومعاطف معلقين وفيها رف فوقاني فيه لي سورفيت تاع زوجي
والحمد لله كل شئ منظم والله غير تزهي وعندي طريقة في تعطيرها راهي موضوع

[ام عبودة]

الاولاد عندي الوسع ربي يبااارك والحمد لله
الخزانة رف العلوي لولدي الصغير ماهر واللي تحتو تاع عبودة وبقي رفين تاع راااوية
وجهة المعالق انا عملتها لفراشاتهم وفيها رف تاني اغطاوات ودراوات الكل تاع الاولاد
في السرير تاع كل واحد ادراج. انا استغليتهم مليح للجوارب والملابس الداخلية قبعات الشتاء والاشياء بزاف والمكتب تاني الادراج فيهم الكتب والادوات
المهم كل شئ منظم بصح مشكلتي في الخزانة ما تتسكرش بالمفتاح والله غير نرتاح من الترتيب اليومي مس الاسبوعي عييت نعيط وعين معهم بصح الله غالب رايحين ويكبرو مش لازم نقعد نتذمر. وخلاااص العمر يجري ومن بعد نقعد نادمة علليه
وثاني ما يعنيش اني راااايحة كي راني منظمة مع اولادي والله العظيم غير نخدم منا ترجع كيف زمان او اكثر منا برك يدخلولها والله العظيم البارح نحك في الحيوط غير من الكتابة تاعهم تقولش ما عندهمش الاوراق والله غير نشرو الاوراق ملونين بيظاء كبااار وصغار غير باش ينفحو فيهم بصح وااالووووو يديرو بلعاني
ايا قلت ندير كي القاورية نحب ولادي يخلبطو المهم يتعلموووووو

[ام عبودة]

نهي تدللي وزيدي بصحتك التصباحة فكرتيني بكري من كانو اولادي صغار نصبح بصح من بعد الصلاة غير في الشتاء مع البرد نديرهم بحدايا ونجيبها الى التاسعة
المهم والله وانا نقرا غير تنشطت معاك تقولش راني معاك في دارك
ربي يكملك. ويعطيك في اولادك وتشوفيهم حاااااااجة تفرحك
المهم بلا ما ننسى الفاكسان غير ما تخافيش حنى انا راوية تاع ثلاث اشهر كانت مفقودة ولحقت ودرتهالك والحمد لله

[ام عبودة]

اختي بدر علاش ماكيش دايرة الحليب لبنتك




خياااتي اسمحولي الباتري راهي تسينيالي نروح ندرس الاولاد وندير العشاء ونوليلكم بربي
دامت ايامكم كلها نشااااااااااااااااط وهمة

[نهى اسطاوالي]

درك نكتب وصفة الخبيزات في المطبخ حقيقة راني نبروفيتو في ياماتي تاع الماتيرنيتي خطركش ديت 4 اشهر وندخل في 27 فيفري ان شاء الله وتبدا الميزيرية ههههه مع التحضير تاع سنة خامسة يطروشوني التلاميذ ويكملو علي ولادي ربي يعينا كامل المهم بارك الله فيك اختي ام عبودة على طريقة ترتيب الملابس ف الخزانة رايحة نسرق من عندك شوية على فكرة بالنسبة للكوفيرطات في بيتي الجديد عندي بلاكار كبير والحمد لله