"◦˚ღيوميات ربة بيت في رمضانღ˚◦"

[omelbanin]

السلام عليكم، كيف الحال، على سلامتك ام صابرين، توحشناك، وكي غبتي الاسبوع الماضي عرفتها بلي كنت مع الاختبارات، انا وليدي دارهم بالاحد والاتنين، والنتائج حتى 25جوان.
انا البارح جاز عليا نهار شوية متعب، تسحرت ماشي كيما موالفة، صليت وقريت من المصحف، رقدت 8:30نضت خملت الشنابر ومسحتهم، وولادي قالك نفخونا لابيسين نعومو، نفخناها وزرزقولي كامل الدنيا، نهار كومبلي وانا شادة النشاف حاشاكم.، خفت خوهم الصغير يزلق.
طيبت الشربة الصباح، وجابلي السلق قطعتو وغليتو، دوشت انا ووليدي الصغير، راح الزوج للجمعه، صليت وقريت شويه قران وتكيت حتىقريب العصر طيبت حليب للاولاد وشربو. وصليت العصر. درت الفلان، وكان جابلي وحد الطيور نتاع السمان قالك حبيت نذوقهم دوزنتهم وطيبتهم، ودرت غراتن سلق والبطاطا. بعد ما فطرنا غسلت لماعن وطيبت طعام للسحور. وممبعد صليت العشاأ ومن التعب رقدت.

[ام متين]

مساءكم طيب يا فراشات الحال راه مليح اليوم لكن هذا اليوم من اتعب ايام رمضان الي فاتت علي احس بعدم القدرة تماما على الوقوف لا ادري ربما ما تسحرتش مليح وكيما قالي وليدي ما ننشوفك تفطري ولا تسحري ولا اي شيئ المهم راني غير ندز في روحي وخلاص ربي يعطينا القوة من عندو يا رب ويقدرنا دعواتكم لنا جميعا.

[kala11]

الله ايكون مع نساء الجزائر في رمضان ....غدا سوف يبدا التصحيح للبكالوريا للمواد غير السربة و انا واحدة منهم ..لست ادري كيف اكون مع الإثنين خاصة التصحيح من السابعة حتى الثالثة مساءً ..العودة للبيت اي تحضير الفطور وليس لي بنت تساعدني بيتي كله رجال .....الله معنا جميعا

[ام متين]

ربي يكون في عونك استاذتي الكريمة انا نقولك شيئ الاكيد والمؤكد انك تقومي بمهنة نبيلة واوراق واجابات الطلبة امانة في رقبتك وهي حمل كبير والاكيد انك رايحة تقومي بواجبك المهني وربي رايح يعطيك من القوة ما يساعدك في القيام بواجبك الاسري ربي يقويك وتهلاي في اوراق الطلبة راهم يغيظو .

[حياتي كلها امل]

مساءكم سعيد ربي يكون في عونك ام متين وكولي يالعزيزة على اقل باه تتحركي يااستاذتي العزيزة ربي معاك واتهلاي في ولداتنا ربي يتهلى فيك صح فطوركم

[omelbanin]

السلام عليكم، صح فطوركم. حبيبتي ام متين اكيد ما تسحرتيش مليح الجسم راهو يدي الطاقة نتاع اليوم من وجبة السحور، انا البارح صرالي كيما راكي تحكي وليت نتكركر، والسبب كلو السحور.
يا استاذة ربي معاك، وكيما قالو لي قبلي اتهلاي برك.

[ام هزار]

صح فطوركم حبيباتي
ام البنين . شكرا اخيتي على السؤال عني . راني شفيت و الحمد لله . نظن انو سبب الام المعدة مع الفطور مباشرة هو اني كنت نفطر و قلقانة من وحد الامر شخصي .
ام صابرين و الله نورت الصفحات بطلتك البهية . توحشناك حبيبتي . ربي ينجحلك بنتك و تشوفيها في اعلى المراتب . في انتظار يومياتك غاليتي
ام متين لا باس عليك ان شاء الله . انا ثاني كيما نسحرش هكذا يصرالي . و زيد ماكلتنا مع الفطور قليلة غير مع المااء برك . ربي يقدرنا
اما عن يومياتي فهي عادية جدا . نوض صباح في العاشرة متاخرة لاني ما نرقدش من الفطور حتى ياذن الفجر باه ما تروحش علي الصلاة لاني لو نمت من قبل نحس بتعب شديد يدخلني في سكرة نوم عميييييقة . المهم في الصباح نوض متثاااااااااقلة و نعمل فطوري كالدوووووودة . يلحق علي الظهر نصلي و نولي للحالة نفرزها مع الدخول للكوزينة بين الفترة و الاخرى . وعندي يوميا غسلة تااع ملابس لازم . و نتهلى في بنتي شوية . ومع باقي الصلولت و الاعمال حتى لموعد الافطار . بعد الفطور نغسل لماعن و نفرز الكوزينة . بسياس لاو عاودت رجعتلي نوبة الام الظهر . نصلي العشاء و نقرا وردي للقران الكريم نكمل ما بين ال12و 30 ليلا الى 1 قبل الفجر نتكى شوية برك و نشوف كشما ناكل اكيد مع شرب الماء . راني عطشت و ندير جولة في الانترنت . ومن بعد يجي الزوج و يسحر و نصليو الصبح و الى النوم
الحقيقة هذا الروتين متعبني . و اريد منكم تقولولي كيفاه راكم تنظموا في مواقيت نومكم . شكرا لكم الف شكر

[ام متين]

صباح سعيد مبارك اخواتي شكرا على الاهتمام وعندكم الحق في الشيئ الي تقولوه والسحور نتاع اليوم حاولت نفورصي روحي وناكل حتى ما يصيرليش كيما امس ام هزار وقتك نتا ع النوم اظن ان متعب لانك لما ترقدي على 1.00 و تعاودي تنوضي للسحور تتعبي شوفي انا نقولك كيفاه ندير لما نكون مليحة شوية بعد الفطور نغسل الماعن ونفرزهم شوية برك نشرب قهوتي ونقعد مع الاولاد شوية قدام التلفاز حتى ياذن العشاء لازم نوض تم تم ونصلي ونعمل تراويح ونقرا على قدر ما نقدر نوقف من بعد الى النوم مباشرة تكون11 او فايت شوية حتى 2.45 نعاود نوض نصلي ركعات ونكمل الشفع والوتر ونروح نحضر السحورومن بعد الادان نصلي ونقر الوردنتاعي واذكار والى النوم مباشرة في الصباح نوض على 7.30.حتى لوكنت تعبانة لان الزوج يروح للعمل نوض انا نطل على حبيباتي في المنتدى ونصلي الضحى وهكذا à(هذا الامور نديرها لما نكون مريحة شوية اما اداكنت تعبانة حتى الصلاة المفروضة نصليها بالقاعدة) الحمد لله على كل الاحوال

[ام متين]

]
عن ابن عَبَّاسٍ، عَنِ النَّبِيِّ صلى الله عليه و آله:
" اللَّهُمَّ أَعِنِّي عَلَى صِيَامِهِ وَ قِيَامِهِ، وَ جَنِّبْنِي فِيهِ مِنْ هَفَوَاتِهِ وَ آثَامِهِ، وَ ارْزُقْنِي ذِكْرَكَ وَ شُكْرَكَ بِدَوَامِ هِدَايَتِكَ يَا هَادِيَ الْمُؤْمِنِينَ ".
ثواب هذا الدعاء

"مَنْ دَعَا بِهِ أُعْطِيَ فِي الْجَنَّةِ مَا يُعْطَى الشُّهَدَاءُ وَ السُّعَدَاءُ وَ الْأَوْلِيَاءُ" 1.

[جهينة اليقين]

السلام عليكم يا اخواتي راكم ما ذكرتوش القيلولة كامل والله غير تريح والنهار راه طويييييييل على هاذاك راكم تتعبو لان النوم قليل انا ننوض ما بينالسبعة والنصف حتى الثامنة نخدم شوي شغل ما كان والو غير ماعن تاع الصحور وبنتي تسيق ونشوف كاش ما نخيط واذا كانت عندي زيارة للوللدين الي ربحو الخامسة او نشري على التناعش نديرو الشربة ونصلو الظهر والى القيلولة حتى للرابعة اذا عندي الجين نعجن او ندير فلونوبعد العصر الدخول الجدي الى المطبخ وبع الفطور نغسلو الماعن انا وبنتي ونصلي العشاء والتراويحمن المصحف قد ما نقدر السن عندو دوروونقعد فالنت مع فنجال قهيوة وكاش حاجة حلوةوالى النوم في منتصف الليل والسحور على الثلثة حاجة خفيفةونرجع نصليالتهجد حتى للاذان الثاني نصلي وننخبط

[OME AHLAM]

السلام عليكم ورحمة الله وبركاته
حياكم الله اخواتي وحبيباتي في الله
اسعد الله اوقاتكم وتقبل منا صالح الاعمال ويجعلها خالصة لوجهه الكريم

[OME AHLAM]

المشاركة الأصلية كتبت بواسطة kala11

الله ايكون مع نساء الجزائر في رمضان ....غدا سوف يبدا التصحيح للبكالوريا للمواد غير السربة و انا واحدة منهم ..لست ادري كيف اكون مع الإثنين خاصة التصحيح من السابعة حتى الثالثة مساءً ..العودة للبيت اي تحضير الفطور وليس لي بنت تساعدني بيتي كله رجال .....الله معنا جميعا

حياك الله اختي وكان في عونك
ممكن تضهر نتيجة الفائزين في شهادة الباكالويا للشعب االغير مسربة في شهر رمضان

[oum sabrin]

صباحكم جميل حبيباتي واش راكم
حبيباتي ام متين ام هزار ام البنين ترحب بيكم الجنة
اروى ربي يقدرك مع بناتك رمضان مع التربية ماشي ساهل
ام متين سلامتك حبيبتي اكيد هذا تاثير السحور او نقص النوم كذلك و كيما قالت حبيبتنا جهينة اليقين القيلولة عندها اهمية كبيرة لتجديد الطاقة بين الفترة الصباحية و المسائية
حبيبتي ام هزار شكرا على ترحيب و ها هو روتيني الرمضاني بصفة عامة كنت ناوية نحطو البارح و لكني رحت سهرت في بيت اهلي و رجعت متاخرة رقدت مباشرة
نبدا من السحور نوض على 2/30 نسحر انا و زوجي غير قهوة حليب بالتمر و شويا بريوش و شويا فوكه على حسب الموجود و نشرب كمية مليحة من الماء
نرفد الاواني نحطهم في الحوض مع كؤوس الشاي تاع السهرة نمسح الطاولة نجبد اللحم من المجمد على حسب واش ناوية نطيب ثم نتوضا و نبقى نقرا في القران حتى ياذن زوجي يروح للمسجد و انا نصلي و نكمل نقرا قران و نقرا اذكار الصباح من الهاتف المحمول راني مبرمجتهم يطعولي تلقائيا ثم نرقد حتى 7/30او 8/00 على اقصى تقدير
نغسل اواني السحور و السهرة و نرتب الغرف ما عدا غرفة الابناء راهم راااااقدين و ندير ملابس في الالة اذا كانو موجودين نوض زوجي باش يروح لعملو و في حدود 9/00 نبدا ندوزن فبي الفطور و نحطو يطيب بلعقل اذا كان جواز نطيبو اما اذا كان غراتان نوجد كل شيء و في المساء ندخلو للفرن فقط
نقطع السلاطة و نزينها نغلفها بالفيلم الغذائي و نحطها في الثلاجة في المساء ندير لا فينيقرات فقط نعجن المطلوع و نطيبو الشربة نطيب نهار بنهار و الطبق الثاني كل يوم و لكن بكمية قليلة و لي يبقى نفطر بيه اولادي في اليوم الموالي
بالنسبة للتنظيفات اليومية راني نمسح نهار بنهار تنظيف الحمام و المرحاض اليومي طبعا المطبخ نجوز عليه بعد ما نفطرو و نغسل الاواني
هذا عموما روتيني الصباحي نجيب بيه الظهر بعدما نفطر اولادي نصلي نرقد شويا و نوض نبدا نحضر التحلية او الديسير اما تارت او سلطة فواكه او فلان ...الخ و نحطها في الثلاجة نصلي العصرنعطي الحليب لاولادي و نزيد نقرا قران و اذكار المساء يجي زوجي نجلس معاه شويا نفرز كاش ما قضا و نعاود ندخل لمطبخي نكمل واش بقالي نطيب القهوة و الشاي و نديرهم في التيرمو س و نوجد صينية السهرة نحطها بجهة نكمل نقلي البوراك و نحط الطاولة بمساعدة صابرين (تموت على ترتيب الطاولة)
بعد الافطار غسل الاواني نشوف شويا تلفاز نصلي و نتكا شويا اجري بعض المكالمات الهاتفية و راني مع اولادي نحاول نرقدهم حتى يرقدوني هوما هههه
يجي زوجي نشرب معاه شويا شاي و ندخل للغرفة متعبة

[oum sabrin]

لي عودة لاحقا الله يعينكم

[ام آدم]

صباح الخير عزيزاتي
اولا نبارك لام لينا وام هاجر على نجاح ولادهم و تفوقهم لعقوبة لاعلى المراتب في لدنيا والآخرة
ام لينا شكرا للنصيحة بانسبة .للمطلوع لكني ما نحطوش مباشوة في كيس بلاستيكي راني نحطو في كيس قماش اولا ومن بعد نحط في كيس بلاستيكي
ام متين غاليتي اسأل الله العظيم ان يشفيك ويعطيك القوة على الصيام والقيام وكيما قالولك الاخوات حاولي تاكلي شوي وتحتمي على روحك في السحور حتى تشحني طاقتك
ام هزار حبيبتي على سلامتك يا اختي العزيزة وربي يشفيك ويحفظك من كل مكروه
ندية الروح الله يبارك عليك وربي يتقبل منك وربي يهدينا لاحسن من هذا رشدا
ام صابرين ربي يوفق صابرين في الامتحانات والله يعينا على الصيام والقيام