وصفات حراير الكوزينة الجزء الثاني - الصفحة 4

idron0 · 2014-12-04, 10:28

كسرة الشعير katrine

لازم تخليها تطول بعد ماتبليها انا نبلها فالليل ونطيبها الصباح اداكان الدشيشة مافيهاش لرطب زيديلها شوية سميد وديريلها الملح وشوية خميرة وبلي بالماء تجي جارية شوية حطيها في كيس بلاستيكي والصباح عجنيها مليح وديريلها شوية زيت ومبعد قرصيها زي الرخساس وطيبيها فالطاجين لمسرح كي تكون الطيب تقليها بحاجة باش تطيب ليه ليه وخلاص .

ام سراج وملاك · 2014-12-04, 11:46

قراتان الباذنجان والبطاطا zahra30

ام التوام تفضلي حبيبتي القرتان انتاعي وان شاء الله تعجبك ( الكمية حسب عائلتك و ممكن تضيفي حوايج حسب ذوقكم )
اقلي كمية من البطاطا دوائر والباذنجان انا درتو في الطول وتخليهم يتقطرو مليييح من الزيت .. خلطي البيض انا درت 6 مع شوية حليب وملح وفلفل اسود وكمون وطرف صغيير من خميرة الحلوى ومعدنوس وزيتون اخضر مقطع دوائر ,,,, رتبي البلا انتاعك ابداي بالباذنجان لانو مشبع بالزيت وكل ما تكملي طبقة حطي فوقها شوية ملح وفلفل اسود وحطي فوقها البطاطا و هكذا حتى تكون الطبقة الاخيرة باذنجان وما تحطيهاش حتى تحطي الخليط انتاع البيض امبعد كملي الباذنجان وحطي فوقو شرائح الطماطم وملح وفلفل اسود وثوم وحطيه في الفرن وكي تشوفي طاب زيدي فوقو فرماج قرويار انا ما كناش عندي للاسف لانو طعمو امممممممم وبالصحة والهناء يااارب

ام سراج وملاك · 2014-12-04, 11:49

وصفة الباتيسري oum ibrahim

وصفة الباتيسري للحبوبات الي طلبوها
درت جينواز بالياؤورت امممممم تجي خفيفة روعة
3بيض كبار او 4 صغار
علبة ياؤورت اي ذوق تحبيه انا ندير فراز
2علب سكر
علبة زيت
3علب فرينة انا نقص وحدة و نديرها نشاء
باكي خميرة
لفاني او عطر الفراز يعطي ذوق روعة للباتيسري
نحضر الجينواز نتاعي كما العادة نخلط البيض مع السكر مليح و لفاني من بعد نزيد الزيت و الياؤورت و نزيد الفرينة و النشاء و الخميرة مغربلين
ندهن البلاتو نتاعي لازم يكون كبير باه نتحصل على جينواز رقيقة بسمك 1سم انا البلا نتاعي 35*35سم ندهنو بالزبدة و نرش بالفرينة مايلسقش و الي تحب تدير ورق الطهي تدير
نحطو يطيب في الفرن 180 د راهو مايطولش لانو رقيق ممكن ربع ساعة الى 20 دقيقة
نخرجو و نخليه يبرد
نحضر كريم شانتيي كاس حليب باااااارد و 4 مغارف شانتيي و علبة فلان كراميل او اي ذوق انا درت كراميل لانو الباتيسري بذوق الكراميل نخلط بالباتور حتى تطلع ممكن نزيد الشانتيي حتى تتماسك لانو الشسانتيي انواع كاينة الي بالخف تحكم روحها و كاين الي لازم تزيدي شوية في الكمية و نحطها تبرد فسي المجمد دقائق
نقص اطراف الجينواز نتاعي لانها تكون قاسية و رقيقة و نقسمها على 3 اجزاء و نشربها بالسيرو او عصير نطلي الجزء الاول بالكريمة و نحط فوقو الجزء الثاني و نشربو و نطليه بلكريمة ثم الجزء الاخير نشربو و نطليه بطبقة رقيقة كريمة و نحطو في الثلاجة حتى تتماسك الكريمة
نخرجو و نحط طبقة من ديكوجال كراميل و نسوي الوجه بالسباتولا و نقطع قطع حسب الحجم الي حبيت و نزين بباقي الكريمة و نزين حسب الموجود و الرغبة ممكن بالفواكه و الف صحة و هناء

sara74 · 2014-12-04, 15:26

يعطيك الصحة الله يبارك

ام سراج وملاك · 2014-12-04, 15:32

روز ام اماني77

الروز

في طنجرة حطي قطع الدجاج +بصل+ثوم+توابل انا عملت فلفل اسود كروية كصبر ملح طماطم معلبة وشوية زيت قليهم على نار هادئة من بعد زيدي شوية جلبانة ومربعات من الجزر

بعد ماتقليها مليح مرقي بالماء ماتكثريش

من جهة طيبي الروز ثلاثة ارباع الاستواء من بعد فوريه حتى يطيب ادهنيه بالزبدة وحطي نصف كمية الروز في المول من بعد فتتي شوية من الجاج حطيه فوقه مع الفرماج ثم كمية الروز ونسقي بالصوص لازم تكون عاااااقدة وحمرا وندخله للفرن يتحمر مع الدجاج وبالصحة والهناء

sara74 · 2014-12-04, 15:36

مشكورة ام سراج على الوصفة وهل هذا المقدار يصلح للبلاط انتاع الفور

ام سراج وملاك · 2014-12-04, 15:45

بغرير oum ibrahim

وصفة البغرير

2كيلات سميد
كيلة فرينة
مغرف سكر
مغرف حليب غبرة
مغرف خميرة الخبز
ملح ونبل بماء دافئ حتى نتحصل على خليط جاري نخلطو باالبرا ميكسور او في الروبو و نفرغو في اناء و نغطيه و نخليه يخمر
لما يخمر نشعل المقلاة او الطاجين وين حابة تطيبيه نزيد للخليط باكي خميرة القاتو و نخلطو و نبدا نطيب نفرغ كمية في المقلاة و نمشيها لازم يكون رقيق باه يتثقب مليح اما اذا درتيه خشين ما يتثقبش مليح عن تجربة
سقيه بالزبدة و السكر او العسل و قدميه بالصحة و الهناء

ام سراج وملاك · 2014-12-04, 15:48

جينواز ام اماني 77

النسبة للجنواز عادة يعمله لكل بيضة 25غ سكر و25غ فرينة

6بيضات 150غ سكر 150غ فرينة م ص خميرة الحلوى

اولا البيض لازم يكون بدرجة حرارة الغرفة

شعلي الفرن على 180د

خلطي البيض مع السكر والفاني حتى يبياض الخليط حوالي 10د من بعد نغربل الفرينة مع الخميرة مرتين حتى ندخل فيها الهوا

نضيفها للخليط على 3 دفعات ونحرك بالملعقة من فوق لتحت غير بالعقل

نحطها في المول مدهون بالزبدة والفرينة وندخلها للفرن بلا مانفتح عليها باه ما تهبطش

sara74 · 2014-12-04, 16:22

ام سراج ماهو ديكوجال كراميل

idron0 · 2014-12-04, 17:30

كسرة الشعير touta2010

لازم تكون عندك خميرة قبل بليلة
الخميرة..كمية من الزرع قليل خل ونفخيها بالماءوخليها تبات .

تعملي كمية من الشعير والخميرة والملح وخميرة خبز وتلميه بالما دافى
تخليها تخمر بعد تديرها خبيزات لازمش تنشفيها بزاف وتسقمي الخبزة بالبن
وطيبيها.
هدا الشعير

إضغط هنا لرؤية الصورة بحجمها الطبيعي.

idron0 · 2014-12-04, 19:25

idron0 · 2014-12-05, 15:04

كيك بالتفاح و لا بالاجاص malek firdaouss

المقادير
100 غرام فرينة
نص باكي خميرة الحلوى
2 بيضات
نص لتر حليب يكون طايب و بارد ;;;;
10 سل زيت نظن تكون نص فنجان تع تاي و زيدي تاكدي مليح
شوي ملح
120 غرام سكر راهم قالو لبنات 12 مغرف
تفاح و لا اجاص
التحضير
خلطي فرينة وسكر و خميرة و ملح و بعد زيدي بيض و حليب و زيت
نقي تفاح و قطعيه كريات و زيديه للخليط و ديريه في بلا تع كيك وديريه يطيب 200 درجه مدة 20 الي 30 دقيقه شوفي كل وحده و فورها
بالنسبة ليا ندير 200 درجه نشعل من فوق و تحت مده 25 دقيقه الي 30
ملاحظة كي تكملي كلش راه يجي مايه ممكن تقدري تزيدي شوي تع فرينة متكثريش ولا يجيك معجن بصح راه هو يجه هكذا

جربيه و رديلي بلخبر راه يجي شغل ميه من داخل كي باتيسري و ذوقو هايل و اذا معرفتيهش طاب ولا لا دخلي لموس و شوفي .

idron0 · 2014-12-05, 15:13

خلطة للسعال ام سهام 02

اعطتها لي حبيبتي جربتها لبنتي راااائعة نفعتها قلت نعطيها لكم ديروها لولادكم وهي عبارة عن حلوة الترك مخلطة بالزيت الزيتون 3 ملاعق في اليوم

إضغط هنا لرؤية الصورة بحجمها الطبيعي.

idron0 · 2014-12-05, 16:34

الروز المفور عازفة الناي

تجيبي الروز تغسليه
وتحطي في البرمة كمية معتبرة من الماء و تضيفي الملح الثوم فصوص، رند، عود قرفة ، اكليل، و حبة الهيل تحطيهم في شاش او كومبراس ننتظر حتى يغلي الما ء