دجاج بالكريمة الرهيبة......وقراتا بفكرة هايلة

[اسمهان79]

السلام عليكم ورحمة الله وبركاته
كيفكم حبيباتي اكيد طولت عليكم بالوصفات بصح ما عليش
الظاهر انو التفنيين قتلني
يلا بِسْم الله
كيفيات بسيطة وسهلة وفي نفس الوقت بنينة
دجاج بالكريمة الرهيبة
وقراتا بفكرة هايلة
دجاج بالكريمة الرهيبة



اول شيئ ارحي صدر دجاج مع حبيبات زيتون اخضر من دون نوات طرف زبدة صغيرون راس فلفل حار او نصف (يمدلو بنة امممممممم) ملح فلفل اسود زنجبيل كسبر مرحي وثوم و2 ملاعق كبار خل ارحي الكل مليح وجدي من جيه شوية لحم مرحي وتبليه بشوية ملح وفلفل اسود ولفاح وثوم



حطي ورق بلاستيكي وحطي فوقو كمية من الدجاج بالطول وضعي اللحم المرحي في الوسط بالطول ولفي عليه الدجاج وروليه شوية (شغل راكي ديري في المقروط )



لفي عليه الورق البلاستيكي ولميه مليح على الجوانب مثل الصورة تتحصلي على أسطوانة ثم حطيه في ورق ألمنيوم وزيدي لفيه عليه مليح وحطيهم في قدرة فيها ماء وخليهم يطيبو تقريباً ساعة غير ربع



من جيهة ديري في قدرة اخرى (انا درت في طاجين لمغاربه ) ديري معدنوس شوية زبدة وشوية زيت ثوم فلفل اسود زنجبيل لفاح ما ديريش الملح مغرفة خل قلي شوية المعنوس ثم فرغي كاس ماء وخليه يغلي كي يطيب الدجاج نتاعك نحيه من ورق الالمنيوم والبلاستيك ( كي تفتحيه تضرب ريحة الزيتون والخل الله روعة ) وقطعيه دوائر كيما في الصورة وحطيهم في مرق المعدنوس اللي يغلي خليهم يتشربو شوية من المرق



وروحي وجدي صوص الموتارد ولكرام فراش
في طاوة حطي ملعقة كبيرة موطارد معدنوس مقطع ثوم بودرة شوية ملح وفلفل اسود عصير نصف ليمونة كمية من الفرماج رابي وتقريباً كاس كرام فراش اذا شفتي الخليط نتاعك ثقيل شوية ممكن اضافة الماء او الحليب وحطي فوق النار وحركي حتى يتجانس الخليط



فرغي فوق الدجاج نتاعك بعد ما تشوفي المرق نشف وزيدي شوية فرماج رابي من فوق وخليه يغلي مليح حتى تشوفيه يبقبق وبدا ينشف طفي عليه وقدميه لعايلتك بالصحة وما تنسايش تدعيلي معاك اذا عجبك






صراحتاً ذوق مختلف تماماً وجديد انا عن نفسي نعشقو يفكرني في الاطباق السورية راااااائع نتمنى يعجبك من كل قلبي
قراتا بفكرة هايلة





ارحي كمية من صدر الدجاج ضيفيلها سلق مذبل في مقلا مع شوية زبدة وفلفل اسود ومعصور كمية من الشيفلور مغلي في الماء والملح والخل ثم اقليه بخليط البيض ( خليط البيض فيه بيض ملح فلفل اسود شوية حليب شوية فرينة وهريسة وثوم بودرة ) نصف حبة بصل مرحية كمية من الفرماج الرابي ملح فلفل اسود لفاح ثوم بودرة زنجبيل خلطي الكل مع بعض



ثم شكلي أقراص كبار مثل اللي في الصورة وحطي في كل قرص حبة فرماج ولفي عليها سطحيهم شوية ثم رمديهم في الفرينة واقليهم



خذي طماطم قطعيها دوائر ثم اقليها وضعي في كل غامكا ( مولات صغار فردية ) حطي دائرة من الطماطم اول شيئ تمد بنة هايلة كي تكوني تاكلي فيه والحاجة الثانية باه البولات نتاوعك ما يتحرقوش من الاسفل لانو الماء اللي في الطماطم ما يخليهمش يلصقو



ثم حطي البولات اللي قليتي واعملي من فوق حفرة بالملعقة وفرغي حبة بيض في وسطها حاولي انو الصفار يبقى مجمول ثم شويةفرماج مرحي وفلفل اسود وذرة ملح غطيهم ودخليهم للفور من عشرين حتى لخمسة وعشرين دقيقة





وقدميهم سخونين وااااااااو البنة هايلةةةةةةةةة

في امان الله حبيباتي
دعوة خير