وصفات ام محمد تاج

[ام احمد وصال]

ليزافار والمخ مشرملين ( شفتو ندلل فيهم خخخخخخخخخخخ)
نقي المخ مليح وليزافار قشريهم وقصيهم رونديلات والمخ قصيه طراف وحطيهم في مقلة فيها شوي زبدة وشوي زيت وملحي وشوي فلفل اسود وثوم اربع سنات حطيهم على النار كي يبدا يغلي نقصي وساعة ساعة قلبي ضرك يطلقو الماء تاعهم وخليهم يطيبو في غرضهم حتان يخثارو نحيهم واعصري عليهم عصرة قارص وزيني بالدبشة ولا المعدنوووس وشهية طيبة

عش العصفور ام محمد تاج
العجينة:
3كيلات فرينة وكيلة سمن نصها مارغارين ونصها سمن ورشة ملح وزوج مغارف سكر قلاصي وبيضة ونلم بماء الزهر نلوزها ونخليها ترتاح مليح كل مارتاحت كل ماتعبكش في الخدمة نحلها ماشي رقيقة وماشي خشينة ونحطها في لي مول .
الحشو:
200غ كاوكاو مقلي بالقشور و600غ مقشر ومقلي وثلاث مغارف سكر عادي وزوج مغارف مارغارين طرية وفاني ومغرف كبيرة اكستري تاع الكارامال ونلم بالبيض ومالازمش تجي جارية ولا يابسة ونخليها ليلة تبات وباقي الطريقة راهي موضحتها الحبيبة فلة في الرابط وكي طيب نعسلها مرتين وكي نحط المكسرات في التزيين نسخن شوي جولي وندهن برفق من فوق ونذرذر شوي بريو دوري وخلالالالالاص ولا نذرذر حبيبات فضية الصغيرة

فلفل مرقد في الكوكوط ام محمد تاج
اغسلي ونقي الفلفل تاعك ونحيلو الراس والزريعة وقصيه قطع كبار وحطيه في الكوكوط وفرغي عليه كاس خل وكاس زيت ولي تحب زبت الزيتون دير نص كاس زيت عادي ونص كاس زيت الزيتون وملحي وخلطي مرة وحدة واغلقي الكوكوط وخليها على نار هادئة مدة 15 دقيقة وحلي عليها ونحيه من الكوكوط بلاصوص تاعو وستفيه في صحن غامق ومن جهة رابي طماطم وثوم كثري وشوي كمون وعدلي الملح تاع الفلفل اذا خاص زيدي في الطماطم خلطي مليح ولوحيها على الفلفل لازم يغرق وحركي بلطف باش الصوص تدخل بين الفلفلات وخلاص وحطيه يبات وهو كل مايبات يجي رووووو

حميص الفووور روووووعة

فرشي قطعة من ورق اللومينيوم وحطي فيها فلفلة حارة وفلفلة حلوة وثلاث سنات ثوم بالقشور وحبة طماطم كبيرة وشكلي الالومينيوم على شكل صحن باش ما تتوسخلكش الكويزينيار وحطيه في الفرن لتحت خلاص يعني على قاعدة الفرن واغلقي الفرن وساعة ساعة قلبيه حتان يتشواو مبعد نحيهم وقشريهم وقطعيهم رقيق والثوم اكيد قشريه وحطيهم في صحن وملحيهم وضيفي الخل وزيت الزيتووون صدقوني ممممممممممممم ولي ماتحبش تفرش الالومينيوم ماتفرشوش تحط ديراكت على قاعدة الفرن وانا ضربت عصفورين بحجر واحد الارنوبة طيب الفوق والحميص تحت

ملاحظة اذا الطمطومة ماطابتش كي تنحي الفلفلات والثوم غلفيها بهذاك الالومينيوم ورديها طيب مليح
وشهية طيبة

وصفة الخبز للعسولة ام محمد تاج


حنونتي ديري الدقيق تاعك قيس قرصة كيما موالفة ندير معاها زوج مغارف لحظة وفنجال زيت وفنحال ماء الزهر وثلاث مغارف صغارخميرة الكسرة وزوج مغارف صغار سكر وزوج مغارف صغارملح وبيضة والماء الدافي للعجن والصراحة انا نعحن بالبيترا وحتى باليد يجي يهبل اعجني مليح وخليه يطلع ومبعد قرصية وديريلو البيض من فوق ورشيه بشوي سكر والجلجلانية انا ماكانتش عندي وخليه يطلع مليح وطيبيه على نار قاوية

كاشير ام تاجوووووووووو
كيلي خمس مغارف كبار روووز وحطيه يغلي وملحي شوي برك
من جهة خبطي ثلاث بيضات ومعاهم خمس مغارف دقيق وباكي جومبو دجاج ورشة فلفل اسود ومغرف صغيرة كسبر ومغرف صغيرة راس الحانوت ومغرف صغيرة هريسة ونص مغرف كموووون وثلاث سنينات ثوووم كبار ورشة فلفل احمر حاارولي ماتحبش دير الحلو عادي
كي يطيب الروز خليه يبرد شوي وخلطيه مع خليط البيض وضيفي الملون الاحمر وابداي لوحي الخليط في كيس السباغيتي ومرة الزيتون الاخضر ومرة فروماج مثلثات وهكذا حتان تكملي الخليط واغلقيه مليح بالخيط وحطيه يغلي ساعة والحمد لله
بالمناسبة هاذ الكمية تقطعلك باكي سباغيتي بالتماااااااااام

لمشلوش
طيبي الفطير تاعك يعني الشخشوخة ورولي مثلا كل اربع ورقات ولا خمسة مع بعضاهم وقيصم بالموس رقاق كي تكمليكامل الفطير تاعك حطيه يفور مرة والمرة الثانية بخيه بالحليب وماء الزهر وشوفي الطراوة تاعو يعني كلش كلش تفويرتين بالبخاخ تاعهم كي تفوريها لوحيها تتسمغ في الزبدة والعسل حسب الذوق وكاين لي يذوب في الزبدة والعسل شوي غرس وكي تسمغيه لوحي فيه كمشة جوووز وزينيه بقطع الجوز والسكر قلاصي

وصفة بوسو لاتمسو لي ام محمد تاج
زوج كيلات زبدة طرية
نص كاس تاي حلب مع ماء الزهر مخلطين
زاست تاع القارص كسب الذوق
نص كاس نواد كوكو
نص كاس كاوكاو مرحي رقيق
والفرينة لمي بيها بصح العجينة تجي طرية بزاف ماتجيش يابسة
شكليه حربوووش وقصيه مقروضات وحطيهم يطيبو كي يطيبو لوحيهه في ماء الزهر والسكر قلاصي حتان يتغطى كامل
قاطو الفرماج للاخت ام محمد تاج

250 غ مارغارين طرية زيديلها اربع فرماجات لافاش كيري خبطي مليح ومبعد لميه بالفرينة شكليه الشكل لي تحبي وطيبيه وكي يطيب سخني عسل ولوحي الحبات في العسل وعاودي مرمديم فيالقوفريط مرحي وكي تجي تحطيه ذرذري عليه السكر قلاص بالصفاية وخطوط الشوكولاتة

وصفة صابلي بالعسل

ثلاث بيضات ضربيهم مع زوج مغارف كبار سكر وخمس مغارف كبار عسل ورشة ملح ورشة فاني خبطي مليح حتان يذوب السكر وزيدي كاس متوسط زيت وثلاث مغارف معمرين زبدة طرية وراني ناكد حبيباتي راه عندنا ثلاث بيضات يعني الزيت يكون الكاس متوسط مايش كبير ونخبط مليح ونزيد باكي خميرة وثلاث مغارف نشا والفرينة حتان تتلم ندير العجينة في كيس ونخليها ترتاح عشر دقائق ونطبعها ونطيبها ونلصقها بالمعجون وعلى لحواشي نسخن شوي عسل وندهن على لحواشي ونلصق القوفريط مرحي من الاحسن ذوق الشوكولاطة

قراتان الكبدة تاع الجاج والباطاطا لام محمد تاج
في مقلة نقلي بصلة وثلاث سنينات ثوم كي يتقلاو نظيفلهم الكبدة تاع الجاج مقطعة مربعات ونملح وندير فلفل اسود وفلفل حار احمر نقص للنار باش تطلق الماء تاعها ونطفي يعني نخلي فيها الماء ونظيف معدنوس مقطع
من جهة اخرى نقلي زوج حبات باطاطا كبار نقصها دوائر ونوجد لابيشامال تاعي
في مول الفرن نحط البطاطا كامل ونحط عليها الكبدة بالصوص تاعها ونحط عليها لابيشامال ونطيبها مممممم كي تحمار لابيشامال نقطع القراتان مربعات ونحطو في الصحن وراح نلاحظو لاصوص خثارت وهبطت لتحت كي نحطها في الصحن نسيح عليها هاذيك لاصوص لي بقات في المول وشهية طيبة

بربوشة الشاوية
رابي بصلة معاها زوج طماطمات وسنينات ثوم حطيهم في البرمة تاع التفوار لازم +ملح وزيدي شوي زيت ومورصو شحمة اذا حابة ومغرف صغيرة كليلة اختيارية اذا حابة وداويها غير بالكسبر فقط خليهم يتقلاو ومرقي غير شوي وغليها كي تغلي لوحي الخضرة تاعك لي تحبي بطاطا مثلا وجريوات ولفت وكابويا وفول يابس وكي تبدا تغلي فوري البربوشة تاعك في البرمة لي راكي طيبي فيها راهي راح تمد نكهة خطيرة للبربوشة
فوري المرة الاولى وزيدي الثانية عادي وخلي المرقة تاعك تشرب مليح يعني يبقى عندك حوالي كاس ونص مرقة وقبل ماطفي النار لوحي فيها فلفل حار وطفي
غلي حليب لحظة يجي بيها خيرمن الحليب العادي وخثريها مليح ولوحيها في المرقة وذوقي ملح البربوشة مع المرقة
والبربوشة كي تفورالتفويرة الاخيرة صمغيها بشوي دهان جديد وخلاص بالصحة ولهنا حبيبتي
واذا حابيتيها حمرا شوي عادي تقدري ديريلها نص مغرف كبيرة طماطم الباط تخرج تهبل ثاني

وهذا المطبق الخليجي
والله هبال هبال ويصلح في دقيقة مثلا للعشا ولا كنتي حاصلةوالعجينة تبقى طرية ممممممممم تهبل تهبل

.
هاهو رابط المطبق ولحبيباتي بصح انا درت زوج بيضات وزوج كيسان فرينة والملح والماء
حبيباتي والحشو درت شوي لحم مرحي ذبلتوةفي الزبدة والبطاطا مربعات مقلية وجريوات مقلية مربعات ومعدنوسبصلة مقطعة مربعات وفروماج وجريتها بالبيض
حبيباتي هاذ الكمية قطعتلي 8 حبات
ونصيحتي ديرو معاها حاجة مثلا تغميسة ولا صوص حارة وانا من رايي تمشي مع لي سووووب مممممممم نلى خاطر جات شايحة بصح البنة هبااااال
ونصيحتي الثانية عمروها بالقارص راه لازمها ويمدلها بنة رهيبة
وراهي وصفة ساهلة وتصلح للعش

طريقة ام محمد تاج في التليلي

مرقو حبيباتي مرقة حمراء ولا بيضا في زوج يصلحو بالجاج ولا باللحم لحمر لكن الاختير وخثروها وخليو منها تقريبا زوج كيسان لزوم نجمرو التليتلي تاعنا ونكونو طيبنا الحمص ونحمرو اللحم تاعنا مع البطاطا مقطعة دوائر ولا براجات لزوم التزييين والبيض نغليه كي نفورو التليتلي
وضرك تفوار التليتلي حبيباتي كي نجي ندير تليتلي ابيض نحي ثلث اشكارة تاع التليتلي ونحمرها في المقلة معها شوي زبدة حتان يحما رالتليتلي ونردو على باقي التليتلي الابيض ونزيت مرة وحده ونحطو يفور كي يفور نبخو بالماء ونخليه يتشرب مليح ونزيد نزيتو ونفورو ونزيد نبخو ونزيتو وهكذا حتان نوصل لتقريبا اربع تفويرات وحبيباتي كاين تليتلي يفور بسهولة وكاين اي يطول يعني التفويرةةالاخيرة ذوقو اذاةطرا خلالالالاص ملحوه وردوه يزيد يفور الفويرة تاع الملح
من جهة صفيو المرقة تاعكم وحطو فيهاةالليتلي يتجمر وخلطو باش مايلصقش وكي تبقى لاصوص فيه غير شوي طفيو ولوحو مورصو زبدة وخليوه يكمل التجمار مممممممممم
كي تجيو تسربيو حطو التليتلي في الصحن ورابيو البيض وحطو لحميصة والبطاطا محمرة واللحم محمر كيما حاطة في الصورة ولا كل وحدة ولمستها في التزييين
حبيباتي كتش سؤال راني هنا نحبكم ياغاليات والعيب مايش في لي ماتعرفش العيب فلي تعرف وتبخل مع حبي
وشوربة لسان العصفور ماناش مشهورين بيها ناس الشرق وماعندناش عجائن ختصة بلسان العصفور وكي نحب نوع ندير الشوربة بالتليتلي وتخرج رووووووعة


عصير الموز على طريقة ام تاجوووووووو
اربع موزات نقصهم ونحطهم في الميكسور ونزيدلهم زوج مغارف سكر وعصير نص قارصة وكاس حليب وكاس عصير رامي برتقال وبرتقالة كبيرة ومغرف كبيرة شانتيي غبرة ونخبط و خلالالاص والله جاوني الضياف شربو منو هبلو عليه

النيقروووووووووو

250غ مارغارين - 5 مغارف كاكاو- 2 كيسان سكر عادي- 2 كيسان فرينة - 2 خميرة وكاس ماء و6 بيضات
حبيباتي في كاسرونة حطي الزبدة والسكر والكاكاو وكاس الماء وحطيهم فوق النار حتان يغليو كي يغلي نحي قيس كاس وحطيه على جنب ولي بقى في الكاسرونة نحيها من على النارو ضيفي صفار البيض وخبطي بالباتور باش مايطيبش البيض والفرينة ولخميرة
ومن جهة طلعي بياضالبيض مثل الثلج وضيفي برفق في خليط الفرينة وحطيه يطيب في مول مدهون بالزبدة والفرينة وكي يطيب قصيه في البلاطو مربعات واسقيه بالخليط التالي
شفتي هذاك الكاس لي نحيتيه رديه نلى النار وزيديلو باطة شيكولا واسقي بيه النيقرو تاعك وشهي طيبة حبيباتي وراهي وصفة تهبل تهبل تهبل
حبيباتي
طاجين المخفي على طريقة امي الله يرحمها يارب
حبيباتي نحتاجو مرقة بيضا عادي ونطيب فيها جيهة وحدة من صدر الدجاج وشوي لحم باش نشبحو بيه كي يطيب اللحم وتوجد المرقة نحي الصدر ونرحيه بالفرشيطة ونخلط معاه اربع فرماجات وشوي معدنوووس وفلفل احمر مرحي ونعجنهم باليد احسن ونخليهم بجيهة
نقلي ثلاث بطاطات كبار على شكل دوائر ونحمرهم مليح ونحكم كمية من الصدر ونعملو خبزات ونحط كل خبزة على رونديلة بطاطا ونغلق برونديلا اخرى وهكذا حتان نكمل ونغلق البطاطات ونعدلهم باليد ونوجد بيض وفرينة وعدنوس وملح وفلفل اسود كيما نعملو بيض الالبروكلو بصح هاذي تجي شوي خاثرة ونغمس الحبات تاعنا ونقليهم ونحمرهم
نجيو للتقديم نحط البطاطات ولازم نسخن المرقة مليح ونحط في الوسط زيتون او حمص لكي الاختيار ولازم نسيح المرق على المخفي تاعنا على مرتين باش تتشرب ونزين بالمعدنوس وعصرة قارص ممممممم والله مايتشبع على ضمانتي حبيباتي وهام الصور تبين اكثر
ضرك نلحق الصور وااااع ههههههه

إ.

.

دوبارة الغالية ام محمد تاج


فيوزة حنونتي الوصفة مزيج من مخماخاتي ومزيج من وصفة ام كوثر ومكيج من وصفة الحبيبة ام اياد الغالية وخرجتلي دوبارة والله زوجي ماصدقش بلي خدمتها حسبها مشرية راهي طبق الاصل
شوفي حبيبتي ديري الحمص تاعك فيةالكوكوط وملحيه وغطيه بالماء ومغرف زيت باش مايفورش واغلقي عليه يطيب
من جهة قطعي بصلة كبيرة ولا زوج صغار ورابي زوج طماطمات وثلاث سنينات ثووم كبااار ربيهم وحطيهم بجيهة واذا ماعندكش الاولاد الصغار قطعي فيها فلفل حار راهي بنتها في الفلفل الحار وزيدي قطعي القارص مكعبات وجديه ونجيو للدرسة في الميكسور حطي بصلة صغيرة ومغرف زيت الزيتون ومغرف زيت عادي وطماطمة ومغرف كبيرة طماطم الكونسارف ومغرف صغيرة هريسة وخبطيهم وحطيهم بجيهة
كي يطيب الحمص تاعك نحي منو مقدار نص كاس بالمرقة تاعو وارحيه ورديه في الكوكوط مع الحمص لي طاب ولوحي خليط البصلة المقطعة والطماطم وذوقي الملح وزيدي زوج مغارف تاع الدرسة ومكعبات القارص ونص مغرف كبيرة كمووووون وخليها مثلا ربع ساعة قبلةالتقديم وديري الخطوة الاخيرة لي قتلك عليها وكي تقدميه حطي الحمص في الصحن وغرقيه بزيت الزيتوون ممممم نموت عليها ومغرف كبيرة درسة في النص واذا تحبوو الدبشه والمعدنووس ديري شوي انا تاوعي مايحبوهمش وااااااااااخ وخلالالاص احلى دوبارة لاحلة فيووووووووز

الميرلو

حبيبتي ام ماجد الميرلو ملحيه واقليه في شوي زبدة برك ونحيه وخليه يبرد مليح وقطعيه مربعات بلطف وشتي هذيك لاصوص لي قليتي فيها حطيها تسخن وصبي عليها لاكرام فراش ملحي وزيدي فلفل اسود وردي فيها مربعات الميرلو وخليها بجيهة وفوري الروز تاعك وسمغيه مليح بالزبدة ستار وحطي لكل واحد مقدار من الروز وفي الوسط حطي كمية من صوص الكرام مع الميرلو والله على ض مانتي هباال هبااال الوصفة تاع ام محمد تاج

كيكة الميكرو اوند
2بيضات وزوج مغارف معمرين سكر عادي وفاني ومغرف صغيرة كاكاو ومغرف كبيرة زيت واربع مغارف حليب ونص باكي خميرة وحطيها في الكيسان ولا صحونة خاصين ومدهونين بالزبدة والفرينة وحطيه ثلاث دقايق وانا زدت ثلاث دقايق خريييين : كي طيب نحيها وذرذري عليها السكر قلاصي

مسمنات ام محمد تاج

حبيباتي نطيب المسمنات كل وحدة وحدها ونحطهم فوق بعضاهم باش يطراو ويجيو ساهلين للخدمة ونحل ورقة وحدة ونحط عليها الزبدة والسكر ونطبقها ونزيد نحل الورقة الثانية وندير عليها العسل ونحط عليها المطبقة ونطبق مرة اخرى ونحطهم يطيبووووو



حبيباتي الصورتوضح اكثر



.
.








.

وصفة الترافل

العجينة: 500غ مارغارين طرية+ 400غ سكر قلاصي+ فاني +150 غ نشا+ 3بيض+ باكي خميرة وبشور ثلاث قارصااااات والفرينة لمي بيها واطبعيها دي ترافل وطيبيهم وكي يطيبو لصقي كل زوج حبات بالكريمة التالية وزيني بالقلاصاج التالي
الكريمة: مارغارين طرية وعصير قارصة والسكر قلاصي حسب الذوق وملون اصفر خبطي كلش مع بعضاه حتان تتحصلي على كريمة حطيها تبردشوي وتتماسك ولصقي بيها القاطو وديريلو القلاصاج التالي
القلاصاج: عصير زوج قارصات ومغر كبيرة زيت وفاني وزوج مغارف ما الزهر تاعو كانك تاكلي في تارت الليمووون ممممممممممم

محجوبة البرنوس
نحلو ورقة تاع مسمن وجهد ما طيب نقلبوها على بياض ونحط عليها تقريبا مغرف كبيرة حشوة المحجوبة ونزيد نحط عليها ورقة وحدة ونقلب ونزيد مغرف ونزيد عليها الحشو وورقة وحدة ونقلب وهكذا حتان تكملي انت وواشتحبي الخشن تاعها انا نستعمل في كل برنوووس خمس ورقات وهام ليكم الصور يفسرو اكثر وكاش سؤال راني في الخدمة

وهاذي النتيجة حبيباتي





خبز التوست لام محمد تاج
300غ فرينة وزوج مغارف مملوئين دقيق وزوج مغارف صغار خميرة الكسرة وباكي خميرة القاطوووو وزوج مغارف زييييت ومغرف صغيرة ملح ومغرف كبيرة سكر لميها بالما والحليب واعجني وخليها تخمر وكي تخمر عاودي ادلكيها بمغرف صغيرة زبدة وحليها بالقنوووط وروليها مليح وحطيها في مول الكايك مدهووووووون وخليها تتخمر حتان توصل لحواشي المول رشيها بالجلجلانية وحطيها طيب حتان تحماااار
انتظرو ساندويتشاتي نياهاهاهاهاهاااااااااا تاع ااشرااااااار

.
.

.
.


مربعات الليمون لام محمد تاج

امربعات بالليموووووون هباااااااااااااااااال
العجينة: 250غ مارغارين طرية+ كاس سكر عادي+ 2 ملاعق أكل عسل كبار+ 3 ملاعق أكل حليب + 50 غ كاكاو أسود+ 2 ملاعق صغار ومملوئين بيكاربونات و4 بيضات ولمي بالفرينة ومبعد أقسمي العجينة الى قسمين وطيبي كل قسم على ظهر السنيوة وأثقبي وطيبيها والخشن ماترققيش بزاف وماتخشنيشبين بين وبين وكي يطيبو الطبقات حاذري راهم يتفتتو لازم كي تخرجيها وهي سخونة وطرية نحيها وحطيها في بلا وطيبي الطبقة الثانية وظهر السنيوة أدهنيه وديريلو شوي فرينة كي تكملي الطبقات تاعك أحشيهم بالكريمة التالية:
نصف لتر ماء نقصي منو كاس وعوضيه بعصير الليمون وكاس سكر عادي و3 مغارف كبار نشاء وزوج صفار بيض وطيبيها حتان تخثار كي تخثار خليها تبرد مليح وأحشي بيها القاطووو
والتزيين ذوبي الشوكولاتة وديريها على الوجه وزيني حسب الرغبة وشهية طيبة
صوص بالكرام فراش ل ام محمد تاجحنونتي شتي صوص الجاج كي يطيب في الفرن مثلا في الألومينيوم ولا في الأكياس كي تفوت عليه ساعة نحي الصوص لي طلقتها الجاجة وصفيها وسخنيها وضيفي عليها لاكرام فراش غير تهز غلية وطفي وتكون عندك صوص بلاكرام فراااش منكهة ممممممممممممممم
وحتى حنونتي كي تقلي اللحم ويتحمر مليييح هذيك الزيت المحرووقة لي تبقى في المقلة ضيفيلها شوي ماء تولي صوص بني ضيفيلها لاكرام فراااش وترجع عندك صووص حطيها على اللحم لي تقلى

شاوارما من مطبخي

وطريقتي لأربع أشخاص: 400غ فرينة ثلاث مغارف صغار خميرة الكسرة ومغرف صغيرة سكر ومغرف صغيرة ملح ومغرف كبيرة زيت أعجنيهم مليح ماتجيش جارية ومايجيش ناشفة مليحة حطيها تطلع وكي تطلع قرصيها أربع قرصات على الفرينة وشعلي طاجين الشخشوخة يسخن مليح على نار خفيفة كي يسخن أبداي حلي القرصات بالقنووط أي الحلال وهزيهم بواسطة الحلال وحطيهم يطيبو من الجيهتين وكي تنحيهم حطيهم في ساشي تاع النيلو باش يطراو ومايتكسروش كي تجي تروليهم
التغميسة ياخي تعرفيها حنونتي
وصدر الجاج قصيتو رقيق وتبلتووو وخليتو أربع سوايع ومبعد قليتو حختان نشف
بطاطا مقلية
كرم مقطع
سلاطة مقطة
فروماج للدهن
مايوناز
بصلة الشلوط حلقات
ولافينيقرات كي تخلصي وتجي تروليها اسقيها بلافينيقرات مممممممم ورولي وأضغطي وقصي ودجيري في الألومينيوم باش ماتخرجش الحشوة من تحت
نشالله نكون وفيت كاش سؤال راني هنا
حقة كي تجي تحشيها أدهني سع القرصة بالفروماج وحطي باقي المقادير كيما تحبي وماتنسايش الفينيقرات راهي ماتخليهاش شايحة

دوزان العرضات
شخشوخة لستين معرووووووووووض
18 نكيلو شخشوخة ماتخافوش راهي تبقى بصح الاحتياط واجب
65 سهمة لحم للاحتياط
11 نبصلة متوسطين
11 طماطم كبيرة حمراء
8 ريوس ثووووم
3 مغارف كبار فلفل أحمر حار مرحي
2 مغارف كبار فلفل أسود
6 مغارف كبار كسبر
6 مغارف كبار راس الحانوت
والزيت عينك ميزانك على خاطر اللحم راح يطلق الدسم تاعو
وباطة تاع كيلو طمامط كونسارف ونص باطة هريسة
ورطل حمص يفوتلك
و250 غ زبيب مفور ومبعد نحيه بجيهة وزيديلو مرقة الشخشوخة يغلي فيها نخليوه للتزيين برك
كاش سؤال راني في الخدمة

أم محمد تاج

حبيبتي أم نهال الغالية شفتك كي حطيتي طلب وصفات بالكرام فراش والله نسيت نحطلك عندي شوي
شوفي اول روسات: أرحي صدر الجاج مع بصلة صغيرة وثوم ومعدنوس وفلفل أسود وملح أكيد خلطيهم مليح وديريهم خبيزات كيما تحبي الحجم تاعهم وأقليهم حتان يطيبو ويحمارو وفي نفس المقلة صبي الكرام فراش تاعك عليهم وخليها تهز غلية وطفي وقدميها وزينيها بالشومبينيو والمعدنوووس ممممم يموت عليها زوجي ح
والكوتلات بالكرام فراش:
حطي لي كوتلات تاعك في الكوكوط ونقصي وملحي وديري شوي فلفل أسود وكي يبداو يطلقو الماء تاعم لوحي البطاطا الصغيرة تاعك وأغلقي الكوكوط بصح على نار هادئة خلالالاص مدة ربع ساعة ومبعد حلي عليها وأبداي قلبي في اللحم والبطاطا وقوي شوي للنار باش يحمارو مليح مبعد نحي كلش وهذيك الزيت وليدام تاع لكوطلات لوحي فيهم كرام فراش مخففة بشوي ماء وضر ترجع بني وخلطي مليح حتان تتجانس النكهات وزيني الصحن تاعك بالكوتلات والبطاطا وسيحي عليهم صوص الكرام فراش

بوراك لاكرام فراش
قلي بصلة صغيرة مع شوي لحم مرحي وملح وفلفل أسود كي يطيبو لوحي عليهم شوي معدنوس وخليهم بجيهة
ومن جهة أخرى غلي حبة بطاطا وملحيها كي طيب صفيها مليح من الماء تاعها وأرحيها غير بالفرشيطة ضيفيلها أربع فرماجات ومعدنوس نموت عليه في البوراك وبيضة وملح وفلفل أسود ونص كاس كرام فراش راح يجيك الخليط جاري ماتخافيش ضيفيلو اللحم تاعك وحطيه في الثلاجة حتان يبرد مليح ويتماسك ومايش راح يتماسك بزاف ماتخلعيش كي يبرد حطي مقدار ثلاث مغارف من الحشو ولفي البوراكة تاعك وحطيها طيب وضرك كي طيب تحكم روحها لاكرام فراش ويصبح هكذا والله بنة هايلة وتغييير مممممم وماتنسايش القارص رووووعة مع لاكرام فراش

غراتان بالشوفلور بالكرام فراش

.


قراتان الشوفلور باللاكرام فراش مممممممم
مرقي مرقة بيضاء بشوي جاج وخليها تخثار حتان يولي عندك زوج كيسان مرقة واحد نحيه صفيه وزيديلو زوج مغارف فرينة ورديه يخثار كي يخثار ضيفيلو الفروماج روج كمية كبيرة ونص كاس كرام فراش ومعدنوس حسب أفراد العائلة يحبوه ولالالا وخلطي مليح حتان يتجانسو وخليه بجيهة
كي يطيب الشوفلور تاعك يعني غليتيه في شوي ملح أقليه بخلطة البيض والفرينة وأقلي معاه شوي باطاطا لا أولادك كيما ولادي مايحبوش الشوفلووور
ستفي البطاطا تاعك والشوفلور في صحن الفور وهذاك الجاج فتتيه عليهم ولوحي عليهم الكريمة لي خدمتيها وحطيها في الفور كي تحكم روحها أجبديها وبالشوي أسقيها بنص الكاس لي نحيتيه الثاني وعاودي رديها حتان تحمار مليح
اذا حابيتيها ماتجيكمش ناشفة كي تخرجيها كملي نص الكاس تاع المرقة لي بقى انا صراحة خليتها ناشفة كيعاد معاه الشوربة بصح لوكان وحدها راني كملت سقيتها باش نجوزو بيها