موضوع مميز الجزء الثالث من وصفات حراير واش طيبتي اليوم - الصفحة 33

idron0 · 2016-10-09, 16:36

بوزلوف صوووص ام محمد تاج

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2016-10-09, 16:41

شربة فارميسال انا هي رزيقة

خوذي بصلة كبيرة و ارحيها في الروبو مع 3فصوص ثوم و نصف ربطة كسبر ثم حطي الخليط في الطنجرة مع لحم او دجاج مقطع صغير ( او الاثنين معا هكذا تزيدي بنة على بنة ..... خخخخخخخ) و زيدي نصف ملعقة سمن مع ملعقتين زيت و ورقتين رند و ملح و كمشة صغيرة حمص منقوع مسبقا و فلفل اكحل و قرفة و كسبر مرحي و فلفل عكري (احمر يعني ) و سكنجبير ، هذو الكمية حسب ذوقك لكن متكثريش يعني متزيدييش على نصف ملعقة صغيرة قهوة من كل نوع و قلي الكل تحت نار هادية حتى اللحم يطلق الماء تاعو كامل ثم زيدي حبتين زروديا كاملين مع حبة قرعة متوسطة مع حبة بطاطس صغيرة و زيدي قليهم مع اللحم . فهذاك الوقت تكوني حطيتي حبة طماطم كبيرة في نفس الروبو لي رحيتي فيه البصل(او سكرفجيها اذا عجزتي ..... خخخخخ) و زيدي ارميها في التقلية تاعك و زيدي معاها ملعقة كبيرة طماطم مصبرة (اذا لم تكن متوفرة لديك طماطم حب مشي مشكل ديري فقط طماطم مصبرة مع شوةي ماء) و زيدي قلي لمدة حوالي 5 دقائق او اكثر ثم مرقي بالماء المغلي و اكديلي على هذيك الماء المغلي . هنا كي ديري الماء لازم ديري حسابك بلي المرقة راح ينقص حوالي الربع منها كي يكمل طيابها . اذا مرقي بالزيادة باه كي تنقص المرقة جيك سواسوا احسن من انك تزيدي المرقة في الاخير و متجيش فيها البنة كيما لازم . في نصف الطياب زيدي كمشة جلبانة تزيد لشربة فرميسال بنة مميزة . بعد حوالي ساعة او أكثر بقليل يطيب اللحم تاعك نحي الخضرة و ارحيها ( هنا عندك خيارات كثير اما ان تعبزيها بالفرشيطة او ترحيها بالرحاية اليدوية او الروبو كيما تحبي) و رجعيها للطنجرة مع فصين ثم مرحيين . ثم خذي كاس فرميسال و اقليه في شوية زيت (هذي لاستوس ديتها من ست الكل ام رحاب ربي يحفظها تمنع الشربة من انها تتحرحر اذا بقات لغدوة من داك و هذا عن تجربة) متخذلكش الوقت بلاك دقيقتين و تلقايها اصفرت صفيها و ارميها في المرقة تاعك و خليها تغلي حوالي 5 دقائق و طفي عليها و ارمي عليها شوية حشيش كسبر مقطع رقيق مع رشة نعناع يابس اذا كان متوفر و ذوقي البنة على اصولها .

idron0 · 2016-10-09, 17:13

كروكي رولي ام لجين هيثم

إضغط هنا لرؤية الصورة بحجمها الطبيعي.

ملاحظة : لي تحب تضيفو 2 يايورت قارس يعطيلو بنة روووووعة ورائحة فور .

idron0 · 2016-10-09, 18:57

كريات الثلج ام محمد تاج

رووعة ويصلحوو مخبز والله رووعة
300غ نواد كوكو و100غ سكر عادي وبيضة ومغرف كبيرة نشاء وبشور 4 ليمونات ونلم بماء الزهر حتى نقدر نشكلوو نخليه يرتاح ساعة ونكوروو او نطبعوو نحطو يطيب حتان يشيح ويصفار فقط من تحت ونقلاصيه بالقلاصاج لي موالفين تخدموو بيه ونرش عليه النواد كوكوو وبريوو كلمسة اخيرة .

idron0 · 2016-10-09, 20:59

حلوى اقتصادية و ذوب في الفم ام طيري الجنة

1حبة بيض + 125غ زبدة ذائبة او بحرارة المطبخ +3 ملاعق كاكاو مر + 1 ملعقة صغيرة خميرة الحلويات + كاس سكر رطب و الفرينة حسب اللي تلتم العجينة و تكون طرية
نشكلو كويرات صغيرة و نرمدو وجهها في السكر الخشن ثم نديرو ثقب بالاصبع في وسطها و ندخلوها لفرن ساخن على نار متوسطة و نتركه يستوي من 20 الى 25 د ما تفوتيلهش بزاف الطياب باش ما يقساحش و كي تخرجيه و يبرد زينيه في الوسط باش ما حبيتي شكولا ذائبة او نوتيلااو مربى او ....... و بصحتكم ( انا هذ المقادير دارولي 35 حبة ذات 20 غ ).

idron0 · 2016-10-10, 18:14

شوفلور بصوص مورني ام طيري الجنة

الوصفة شفتها في اليوتيوب دارتها يو تيوبوز جزائرية اسمها كهينة مليسا بلاك تعرفوها عجبتني.
نبداو بالشوفلور انديروه في ماء وملح على النار
نروحونوجدو الصوص مورني نفس صوص بيشاميل لكن كي تبدا تتقال نزيدو ملح او احسن جومبو دجاج و فلفل اسود و فص ثوم تنقيه و ترميه كيما هو
و تزيدي صفار بيضة مع الخلط المتواصل على النار دائما ثم نضيفو كمية من الفرماج رابي ثم اضيفيلها بصل مقلّي في شوي زيت و مقطر هدي الخطوة الاخيرة هي اضافة و اذا حبيتي ايضا تزيدي شوي معدنوس ثم نحيها من النار خدي البلا نتاع الفور ادهنيه و رتبي فيه زهرات الشوفلور اللي طابو في الماء و الملح و قطرتيهم اذا حبيتي ادهنيهم بشوي زبدة او لا و رشيهم بكمية قليلة نتاع لاشابلور ثم فرغي فوقهم لاصوص مورني اللذيذة اللي تجي شوي تقيلة و زيدي فوقهم شوي فرماج رابي و دخليهم الفرن يتقراتيناو فقط تتحمر كلش طايب و شهية طيبة .

idron0 · 2016-10-10, 18:26

مسمنات chez biba

idron0 · 2016-10-10, 18:27

مسمن ام وليد

idron0 · 2016-10-10, 18:45

سويس رول um alaa

idron0 · 2016-10-10, 20:26

غرتان بطاطا ام ساجد وسيم

غليت بطاطا مع سنة ثوم وملح بطاطا مقشرة كي طابت عبزتها بهذيك لي يرحو بيها البطاطا وزدتلها شوي حليب واذاتحبي الفرماج ديري
من جهة قطعت لحم مكعبات وقليتو مع سنينات ثوم وملح وفلفل كحل وشوي كمون وحطيته بجيه هذاك شوي صوص لي كان في المقلا تاع لحم شوي برك مسحتو مليح وزدتو على البطاطا
قطعت حبة فلفل ونص على حسب الكمية لي ديري درت شوي زيت وخليتها طيب مع رشةملح ورشة فلفل وغطيتها وحركيهاماتغفليش عليها تقدري ديريلها شوي ماء باش طيبلك في سع درتها في مقلاة طبعا وكي طيب خليهاتتحمر شوي في المقلاة
وجدي البيشاميل وديري معاها فرماج
حكمي بلاطوتاعك دهنيه بزبدة ديري طبقة بطاطا ماتنسايش ذوقيها في الملح اذاعندك فرماج رابي ديري فوقها وحطي لحم وزعيه مليح ومنبعد زيدي الفلفلة وزعيها وزيدي طبقة البطاطا والبيشاميل ودخليها للفور امممم
تقدري ديري كورجات مقلية معاهم تجي تحفة .

idron0 · 2016-10-10, 21:13

المعقودة ام ساجد وسيم

اولا الطريقةهذي تع حورية المطبخ كي شفتها وكانت تهدر عليهاقالت تجي خفيفة بزاف خير من لي تقليها بالفرينة تجي ثقيلة المرة لولة مافهمتش قصدها حتى جربتها....المهم حكمي حبات بطاطا غليهم بقشورهم انادرت ثلاث حبات متوسطين شرحتهم وهي طاطاحورية قالتلك غليها مع عروق الكرفس وورقة رند وسنينة ثوم وملح تجي بنينة كثر انا ساعات نديرها وساعات لا على حساب المورال ههههههه المهم كي طيب قشريها وعبزيها بهذيكتاع البطاطا ديري سنينات ثوم قطعيهم رقيق رقيق ذوقي لملح اذاخصها زيدي فلفل كحل رشة كمون معدنوس قصبر شوي كركم اوزعفران والبيض هناالبيض كي ديريه تجيك تلصق في اليد انا في ثلاث حبات بطاطا متوسطين درت زوج بيضات كبار وديري فرماج هيحورية قاتلك ثلاث حبات ولا ربعةتاع فرماج المهم ديري على حسب واش عندك خلطي مليح وكيما قلتلك تجيك تلصق في اليد حطي حداك غرفية فيها شوي ماء وبداي تخدمي الحبات بالاستعانة بالماء هذاك بللي طراف صباعك برك وديريهم في مقلاةتاعك وتكون زيت سخونة وقليهم كي تشوفيها تحمرت من تحت قلبيها ماتكثريش تقلاب عليها وستمتعي باروع معقودة
ملاحظة ماتجيش بالبطاطا البيضاء اوك دوك نحطلك صور

إضغط هنا لرؤية الصورة بحجمها الطبيعي.

هنا في المقلاة شوفي كي ماتتحلش

إضغط هنا لرؤية الصورة بحجمها الطبيعي.

تقدري توجدي صباح وتحطيها في الفريجيدار تشد روحها وتقليها في ليل تجيك اسهل

إضغط هنا لرؤية الصورة بحجمها الطبيعي.

فاتي 05 · 2016-10-10, 22:11

يعطيكم الف صحة و عافية للجميع

idron0 · 2016-10-11, 11:41

العيش (البركوكس) بالحليب chez biba

تاخذي الخضر تنقيها وتقطعيها مكعبات متوسطة وتحطيها في كوكوت مع طراف تاع دجاج وبصلة و2 سنات ثوم مرحيين وتمرقي بشوي ماء قيس ما تتغطى الخضرة فقط وتلوحي معاهم حمص وفول يابس ملحي وأغلقي عليهم وخليهم على نار هادية حوالي 40د
غلي العيش (البركوكس) في ماء مع شوي ملح حتى يطرا بلا ما يتعجن صفيه وفوريه مرة وحدة
من جهة اخرى فيضي 1ل حليب وزيديلو لحظة (ممكن تستعملي اكثر حسب الكمية ونوعية العيش)
كي تحلي اذا لقيتي مازال الماء قوي النار وخليها حتى تبقى غير شوي صوص خاثرة فرغي لحليب تاعك وزيدي العيش مع الخلط باش تعرفي القيس ولوحي شوي شحمة مخدومة وخليه يتغالى زوج دقايق وطفي عليه.
وقدميه بالصحة ولهنا يجي بنييييين .

إضغط هنا لرؤية الصورة بحجمها الطبيعي.

idron0 · 2016-10-11, 12:14

بسبوسة بنواد كوكو جازيا ام البنات

1 كاس سكر
3 بيض
1كاس نوادكوكو
1كاس شابلور
1 خمارة حلوى
1/2 كاس زيت+قشور ليمون
السيرو او الشاربات نحتاج كاس سكر +2كيسان ماء+عصير الليمون
الطريقة
نخلط البيض+السكر ثم نضيف الزيت+قشور الليمون+نواد كوكو والشابلور والخمارة نفرع الخليط في مول مدهون والى الفرن لما تخرجيها سقيها بالشاربات تخلطي السكر مع الماء فوق النار خليه يغلي 5د من بعد نحيه وضيفي عصير ليمونة
بالصحة والراحه

idron0 · 2016-10-11, 14:04

بريك انا هي رزيقة

عادة نعمرو بالبطاطا و اللحم المرحي و زيتون ايفلي و فرماج و بيضة كاملة طبعا و معدنوس مقطع رقيق مع بصل بصح هذ المرة نسيت مشريناش اللحم درت في بلاصتو طن طماطم و النكهة مميزة فعلا مع الفرماج و المعدنوس و البصلة .