دورة الاستعداد لفصل الشّتاء بيتي مشرق كفصل الرّبيع

[أم تغاريد]

السّلام عليكم ورحمة الله وبركاته



الشّرطة افتحي الباب!



الفراشات لي كملو غرفة النوم جات الشرطة ليوم تراقب حال الغرفة بعد انتقالكن لتنظيف االحمام هل أهملتنها؟

هل السرير مرتب؟

كل شيء في مكانه المحدد في التسريحة؟

سافتح الخزانة هل لازالت كل الرفوف مرتبة ؟

طاولتي النوم هل سطحها فارغ ؟ ماكاش قارورة ماء ماكاش شاحن مرمي؟

----------------
العقوبة المفروضة على كل من خالفت نظام غرفة النوم هي :
حرمانها من القيلولة اليوم لإعادة كلّ شيء إلى مكانها في غرفتها


-------------

الروتين اليومي لغرفة النوم: ( حاولي دايما تطبقيه باش تبقى غرفتك نظيفة ومرتبة وماتعاودش تتخرب)

1-فتح النوافذ وابواب الخزانة
2-نفض الفراش تشميسه ان امكن وترتيبه
3-لمي قاع الحوايج المرمية حطيها في سلة ( كي تكملي تخملي كل الغرفة رجعيها كل حاجة لمكانها)
كيما قلنا الحوايج المستعملة ديرهم في علب الترتيب او سلة جميلة ماترجعيهمش للخزانة حتى ولو كانو نقايا
4-اضربي طلة على الخزانة والتسريحة وطاولتي النوم ادا لقيتي كاش حاجة ماشي في مكانها سقميها
5- امسحي بمنشفة جافة غبار الاثاث بسرعة
6-الزجاج امسحيه على الاقل مرة في الاسبوع
7-خرجي les descentes de lit انفضيهم
8-جوزي نشافة معطرة على الارضية وخلي بيتك تتهوى مليح
9-اغلقيها عطريها وتمتعي بغرفة نظيفة يوميا

تسياق الغرفة بالماء مرة واحدة في الاسبوع وكذلك مسح الغبار عن الثريا

[آسيا 25]

صباح الخير على كامل الفراشات الشاطرات
للأسف البارحة ما درت حتى تطبيق و الله كنت مريضة بعد ما حطيت أكل اليوم فوق النار يطهى رحت نتكسل شوي على السرير على أساس أني بعد ربع ساعة نقوم نكمل الوظائف لكن غلبتني نفسي و رقدت الحمد لله أن زوجي انتبه و نزع الأكل من النار و إلا كان احترق هههه و الله حتى مواعين الأمس لازالت تنتظر في الحوض سأنظفها عندما أرجع اليوم بإذن الله.
أخت حبيبة مبروك عليك حبيبتي ربي يهنيك و يزين سعدك يا غالية رانا منتظرينك تشاركينا بأفكارك و نصائحك حنونة استمتعي بأيامك الأولى حبيبتي.
حبيبتي أم تغاريد الإسمنت أسود عندما أغسل الحائط بالصابون و الماء يزول لكن عندما يجف تعود الآثار المزعجة سأجرب السلك و أرجو أن لا يسبب خدوشا على السيراميك شكرا لك على النصيحة.
يوم موفق لكامل الفراشات.

[ام آدم]

السلام عليكم
نطبيقاتي ليوم امس
غسل الاواني و تلميع الحوض تم النطبيق
تجهيز مستلزمات الغد 5/10
تطبيق الفازلين للااسف لم يتم
حهزي نفسك 5/10
تطبيق 15د لم يتم
راني شوية فشلانة راح تزورني ان شاء الله نقدر نحسن روحي اليوم
موفقات جميعا حبيباتي

[ام آدم]

حبيبة مبارك زواجك لعقوبة للبنين و البنات و ربي يطيب عشرتك انت و ناس دارك
ام مؤمن الغالية طهور ان شاء الله ربي يرجعك لينا بخير و عافية
ام تغارد راني خفت من الشرطة راح نروح نجري نوضب غرفتي قبل ما يجيو
بقية الفراشات يومكن موفق وسعيد ان شاء الله

[حبيييبة]

صباحووو صباااحوووووووو
صباح الخير حبيبات قلبي
يا فراشاتي الغاليات
شكرا لكل من باركتلي من جديد
شكرا لكم جميعا حبيباتي ربي يخليكم ليا ياا رب
و لعقوبة لكل البنات ان شاء الله

مازالني نقرا في صفحات الدورة لكن حبيت نصبح عليكم فالاول قبل ما نرجع نكمل التصفح
حبيت ايضا اشكر حبيبتنا ام مؤمن على مشاركتها الفعالة في هذه الدورة
(كتبت الرد و مبعد رجعت ندير تعديل حتى اخبرك حبيبتي ام مؤمن انك قمت بمبادرة راائعة لا تقل روعة عن مبادرة حبيبتنا ام تغاريد
الكلمات لا توفي شكري و امتناني لكما
ما قمتما به في نظري لا يعتبر انابة ولا عمل مؤقت الى حين رجوع حبيبة
بل يعتبر مواصلة المسير نحو الامام
انا اراها مثل جيش في ساحة الحرب
و ان كنا في حرب رقيقة مع انفسنا الانوثية الجميلة و مع ظروفنا المتغيرة التي لا تاتينا الا بالخير باذن الله
لكن رؤيتي للامر هي تماما كما اصف لك.. اراها و كأننا جيش في ساحة حرب يمشي قدما في غزوه الى الامام
تعلوه راية (او لواء كما تسمى) في المقدمة
و الراية هي نقطة التوجيه لكل الجيش
هي مَعلَمه و بوصلته التي تدله على الوجهة في مسيرته دااائما الى الامام
و الراية يمكن ان يحملها اي فرد من افراد ذلك الجيش
يكفي ان يكون له همة قوية و رؤية مبينة لمسار الرحلة و يعرف جيدا الهدف من هذا المسير
و أن يتطوع لذلك و يحمل الراية و يتحمل مسؤولية التوجيه و رفع الهمة
و كان ذلك ما فعلته حبيبتنا أم تغاريد
ربي يجازيها عنا كل خير ياا رب
اما عن طريقة المسير و التوجيهات التي تعين الفريق على مشقة الرحلة
و هو ما يسمى بالنظام المتبع فهو ما تقومين بنقله حبيبتي ام مؤمن
و عملكما معا جدير بالتقدير
فهو عمل متكامل و سيصل بالفريق الى ابعد الآفاق باذن الله
فحسن القيادة + نظام = رحلة ميسرة و ناجحة باذن الله
و هذا ما وفرتماه في هته الدورة الجديدة
و باذن الله ستكون رحلتنا هذه اجمل رحلة و انجحها و سنستمتع برفقة بعضنا البعض
بقيادة ام تغاريد و يتوجيهات ام مؤمن
و بتناصح الفراشات لبعضهم البعض
بحول الله و فضله
اكثرت الكلام لكن حبيت ارد على كلامك في هذا الرابط حبيبتي
https://www.djelfa.info/vb/showthread...860409&page=16
و فكرة الانتقال الى هذا الموضوع طانت اجمل فكرة
فالاهم جمع شمل كل الفراشات في موضوع واحد
لان ذلك احسن و انفع لهم
خصوصا و ان هذا الموضوع او الاحسن القول هذه الدورة
لها طابع و رونق خاص
و بصمة خاصة اسمها Made in ام تغاريد هههههه
و تقسيم الفراشات بين موضوعين او اكثر لم يكن ليجعل هذه الدورة الراائعة ناجحة الى هذا القدر
اريد ايضا ان اضيف ان حبيبتنا ام تغاريد ابهرتني فعلا
اولا لفكرة الدورة المبدعة
ثانيا لايجادها الوقت و تفرغها للدورة و الرد على المشاركات اول باول و نحن اعلم بانشغالها مع اسرتها
و ثالثا بطريقة سردها للفقرات و التطبيقات
و رابعا لحكمتها و طريقتها في القيادة التي تدل فعلا على انها قائدة عن جدارة
و لازلت اكتشف شيئا فشيئا صفاتها التي كانت تخفيها عنا و تظهرها مرة على مرة من خلال طلاتها التي كانت تشعرنا و كأنها والدتنا التي تحبنا و تخاف علينا
و تتابعنا من بعيد ولا تتدخل الا اذا رات ان احدى بناتها بحاجة للنصح و المساعدة ولا تتردد اطلاقا في ذلك

اعلم اني اكثرت الكلام لكن اود ان استطرد بان افصح لكم
اني منذ اكثر من عامين كتبت في قائمة اهدافي
هذا الهدف:
"هدفي ان اصنع نساءا مسلمات عابدات ربات بيوت مكتفيات ماديا و معنويا قائدات لانفسهن و اسرهن و للمجتمع من حولهن قادرات على ان تضعن بصمتهن الخاصة
التي ستكون شاهدا عليهن يوم القيامة"

و ها انا ذا اكتشفكن حبيباتي شيئا فشيئا و اكتشف مزاياكن و امكاناتكن الرائعة
فانا هنا ادعوكن.. ادعو كل من تريد ان تكون ضمن الفئة التي ذكرتها في "هدفي" ان تعلمني بذلك
لاساعدها على تنمية مهاراتها و اكتشاف مزايا اخرى كانت تخفى عنها
و نصل معا لتحقق ذاتها في القيادة و ترك بصمتها الخاصة فيمن حولها باذن الله

نروح نكمل قراءة و نرجعلكم باذن الله
قبلاااااااااااااتييييييييييييييي

[om wassim]

صباح النور عليكم
اه أم تغاريد جبتيلنا الشرطة هههه هداك واش يليق
تطبيقاتي راهي ماشية امبعد نحط التنقيط أن شاء الله
الله أكبر الله اكبر الله اكبر

[om yousra]

اختي ام تغاريد ههههههههه ووالله خوفتيني كي قلتي الشرطة نتي تسقسي ونا نضحك من الحشمة خطراش انا كي ننوض طول نجهز روحي ونحدر نجري لعجوزي نقضيلها شغالها غد وتسياق ولاكشما قضا شيخي نفرز القضيان ونوجد للمواكل اللي رايحة نطبخهم فيالايام الجاية وكي نخلص نتغداو ونغسل لماعن ونلمع الحوض ومبعد نطلع لفوق نصلي الظهر ونجي نطل عليكم وبعدى نبدا في الفريز وووووالفوق يعني نهاري دايما معمممممممممر المهم علابالي راني نبرر بصح والله نعمل وش نقدر باش نكون من الفراشات الاوائل
دمتن متالقات عزيزاتي الفراشات ,,,,,,My beauty room tour | Partie 1,حبيباتي ممكن تدخلو لليوتوب وتكتبو هزو افكار هايلة

[oum sabrin]

السلام عليكم

هذه بعض الصور لتطبيق الحمامذ

أفرغت خزانة الحمام من كل شيء ونظفتهاو نظفت الأكسسوارات و خليت كل شيء يجف


نزعت الريدو تاع البينوار و غسلتو و نشرتو الى حين نكمل التنظيف يكون جف


غسلت البينوار بخليط ازيس جافيل و خل ابيض

و كذلك لافابو

نظفت الحائط و لافايونس كامل و سيقت الارضية
بعدما جفت رديت كل شيء لمكانو في الخزانة

بعدما جف الريدو علقتو

و هذه لمستي في تزيين فايونس الحمام



تطبيق تلميع الحوض ليوم 19/10 تم التطبيق
تطبيق الفازلين ليوم 19/10 تم التطبيق بعد الاستحمام
تطبيق تجهزي 08/10 ليوم 20/10 تم التطبيق

تطبيق الحفاظ على ما أنجزناه في غرفة النوم بالمراقبة المستمرة تم التطبيق و خاصة مع حضور الشرطة هههه و اله غير ضحكت كانت قارورة دواء تاع ابني فوق طاولة السرير لما اعطيت لابني الدواء في الليل حطيتها و لما قريت بان الشرطة جات رفدتها بسرعة عرفت بلي فاقتلي ام تغاريد

تحياتي لكل الفراشات في انتظار عودتك حبيبتي ام مؤمن طهور ان شاء الله
تحية خاصة لك حبوبتنا سررت بقراءة ردودك

[amel...]

مساء الخير يا اجمل فراشات .... و الله توحشتكم بصح راني كنت ديما نطل بصح منقدرش نحط مشاركات

ام تغاريد شكرا ليك حسيتي ببلاصتي و تشطنتي علي

اختي حبيبة بزيان السعد ان شاء الله و ربي يهنيك ان شاء الله و يا ريت تكوني استاذتي و تنوريلي طريق حتى اكون امراة فحلة

من جهة اخرى و بالنسبة للتطبيقات

يوم الاحد

تطبيق تجهزي تم التطبيق

تبريد الاماكن الساخنة تم التطبيق

تلميع الحوض تم التطبيق

تطبيق الفازلين تم التطبيق

تجهيزات اليوم الجديد تم التطبيق و الحمد لله

يوم الاثنين

تطبيق تجهزي تم التطبيق

تبريد الاماكن الساخنة تم التطبيق

تلميع الحوض تم التطبيق

تطبيق الفازلين تم التطبيق

تطبيق المهم و هو اسعاد الاخرين تم التطبيق و مع كل التعب لحسيتو بصح فرحت كي حسيت بفرحت هاذ الانسان

تجهيزات اليوم الجديد تم التطبيق و الحمد لله

من جهة اخرى راهم شدوني لابوليس اجريو لي .... و لازم غدوة نسلك البروسي ههههه

ام تغاريد انا نقدر نحط الصور غير في الويكاند و راني حطيت اول الصور في المشاركات السابقة و للاسف منقدرش نحط كل الصور لاسباب خاصة ... يا ريت تاخذي هاد الشيئ بعين الاعتبار ... المهم الشيء لي نقدر عليه نحطو

تنظيف الحمام راهو 80 بالمئة و الخزانة رايحة نعاودها اليوم في الليل لاخاطر قش خويا نحيناه و لازم نعاود نرتب

تقبلو احلى سلام .... لي عودة باذن الله

[amel...]

في ما يخص الاقتراحات حابة نمد اقتراح و يا ريت توافقوني .... الاغلبية منا ميقعدوش بوضعية صحية للعمود الفقري ... شوفو مع رواحكم

كيفاه قاعدين .... وش لقيتو .... حابة نوليو ديما نجربو نجلسو جلسة صحية حتى نتعودو و تولي عادة ... وش تقولو

كذلك مناش نشربو الماء بكميات كافية ... علا هذيك ياريت نلتزمو و نوليو نشربو الكمية اللازمة و باه نعاونو رواحنا نقدرو نستعملو

القارورات الصغار و نديوهم معانا في الاماكن لي نكونو فيهم و كل ما تفرغ نعاودو نعبيوها باه نشربو اكبر كمية ممكنة

تساعفوني و نبداو هاد الالتزام ......؟

[أم ريتاج زهرة]

المشاركة الأصلية كتبت بواسطة حبيييبة

حبيبات قلبي
تجرأت و شاركتكم صوري
حتى تحسوا انكم كنتم معي في ايام فرحي و سعادتي
لانكم في قلبي و بالي كنتم ديما حاضرين
و عمركم ما غبتوا عني حبيباتي
احبكم جميعا ♥

ألف ألف ألف مبروك و راكي منورة ما شاء الله و تبارك الرمحان بالتوفيق يا الغالية و يا الجوهرة القيمة على قلوبنا ربي يرزقك الذرية الصالحة ربي ينور دربك بالتوفيق أختي و رفيقة دربي

[ام اكرم31]

السلام عليكم حبيباتي الفراشات
مبارك عليك حبيبتي الغالية حبيبة ربي يهنيك ويعطيك الدرية الصالحة
انا راني مع التطبيقات تطبيق تلميع الحوض 10/10
تطبيق نحضير لوازم الغد 10/10
تطبيق الجانب الجمالي 6/10 راني نسهر مع وليدي وبسيف باش نوض يادوب نغسل وجهي ونبدل ملابسي

[ام اكرم31]

تطبيق الفازلين مداومة عليه اي 10/10
تطبيق تبريد الاماكن الساخنة 10/10


اخواتي من فضلكم ساااعدوني منعرفش نزين غرفة النوم والصور مطلعتش معرفتش كيفاش نزين التسريحة و طابل دونوي والصور مطلعتليتش راني مغمومة الغرفة نظيفة بصح مشي مزينة ساعدوني ورولي كيفاش ندير
ام صبرين حابة نزين الحمام كيمما انتي الله يبارك عجبني

[om yousra]

اختي (حبيبة امها)
راني شفتك مع جماعة الريجيم ههههههههه قرعجت ,الله يسترك انا وقت فات نقصت من وزني وبعد3سنوات راني بديت نزيد ربي يستر ,بصح حاباتك تكوني منقذتي مادامني في2 كلغ خيرمن نولي في عشرة كلغ ماهي اسرع طريقة باش نلحق بروحي وكيفاش هاذ الريجيم اللي راكي متبعاتو مفهمتوش؟ ولك مني الف تحية وشكر

[ام اكرم31]

اختي امال انا راني معاك خاصة اني نرضع لازم نجلس مستقيمة ونشرب الما بزاااااف
الماء راني نشرب بصح الجلوس مرات نكون محنية خاصتا فالليل