[u]السلام عليكم و رحمة الله تعالى و بركاته[/u
اهلا اهلا بام منى الحمدلله الي تلاقيت و لقيتك بخير
امس برك و اريج تقولي جاوباتك ام منى على والدتها
رانا حيرين عليها و نتمناو انكم ترمضنو و انتوما بصحة و سعادة و هناء
بارك الله ففيك على اهتمامك ببنيتك
لكن حبيتك ما تبينيلهاش انه امر جلل
بل تهوني عليها
و حبيت نقلك على طريقتي مع افنان باش تهتم بالمطالعة
اريج من صغرها تحب القراءة و الحمدلله
اما افنان فكيما منى تشري و تزوق بيهم مكتبتها
حتان واحد النهار و احنا في المكتبة و بعد ماخيرت القصص قلتلها ما. نشريلكش حتان تقراي الي عندك و زاد عاوني المكتبي بانه انبها
في الدار نقعد حداها نبداو بالتفرج على الصور و نتخيلو وش تقول القصة
ندير انا رواية و هي رواية و نشوفو شكون الي روايتو صحيحة
كي يعود حوار نقراه انا وياها
كي تعود قصة طويلة نقرا انا صفحة و هي صفحة
و في الحق انه اريج تعاوني فيها
درك افنان مستحيل ترقد بلا ما تقرا
و ثان خطة ام بدرو
في القيلولة جميع الاجهزة نطفيها
الي عينو يرقد و الي ماعينوش يقعد يقرا او يلعبو سكرابل عربية
,,,,,,,,,,,,,,,,,,,,,,,,,,,,,,,
بالنسبة للفرنسية انا ثان كنت مدايرة كيما اغيلاس
النص الي تحفظو تلصقو في الكراس او تعيد كتابته
لكن بكل صراحة الي ساعدني هو اليوتيوب
و خاصة الحوار
تكتب اريج تعليم الاطفال مثلا التعارف
مثلا عند الطبيب
تستمع ليه عشرات المرات
حتان تقريبا تحفظو و من بعد تكتبو و هي تستمع
و من بعد نصلحلها الاخطاء او تستعين بفخونسي فاصيل يصلحلها
هي اصلا هلدي هي لعبتها المفضلة
,,,,,,,,,,,,,,,,,,,,,,,,,,,
لكن و بكل صراحة النصيحة الوحيدة الي حابة نقولها في الوضعيات سواء عربية او فرنسية
هو انكم تعودوهم من اول يوم الفواصل و النقاط يعني علامات الوقف
تعودوهم كيفاش يحلل السؤال و يحدد الافكار الي لازم يكتبها
كيما تقول اريج
نمصمص السؤال
حتى انها ساعات ترسم دوائر و تكتب فيهم الافكار و من بعد تحدد وين تحط الافكار
ثان حاجة مهمة بلاك المعلمين ما يكونوش معايا فيها
لكنها نفعتني
انه تعطيها افكار تحفظهم مش غير شواهد
اريج في وضعية الشهادة بدات بجملة حفظتها في السنة الرابعة
بلدي الجزائر نبنيها بالعلم و العمل و لا يكون عمل بلا علم
و لا علم بلا كتاب
( الجملة مش هك بالمعنى برك راهي تفوقت عليا في تركيب الجمل)
ثان الشواهد ناكد عليكم ماتعطوهمش بالساهل خلوهم يبحثو عليهم باش يرسخو في رؤوسهم
لكن اوقفو معاهم و ماتخلوهمش وحدهم يعنئ كي تشوفك قاعدة معاها و تقراي معاها و تهتمي حتى هي راح تهتم اما انك تقوليلها دبري راسك و قرايتك ووووو فانا نقلك راهي صغيرة و مش راح تميز بين وش يهمها و وش ما يهمهاش
تخيليها فرس هائجة للعب و انت راح تروضيها
فالصبر و اللمداومة و الاستعانة بالله و الدعاء
و بالتوفيق للجميع