ما هو أكبر شيء عشوائي قمت به في حياتك؟ -متعونا من فضلكم-

[بـــيِسَة]

السلام عليكم

بيسة الي ميعرفهاش هههه دوك نقلكم واش دارت

مرة كنت نقرا في الابتدائي المهم مدللة و لازم شعرة متقيسني وحد النهار خرجنا من المدرسة قبل الوقت يعني المعلم كان عندو ظروف المعلم الي هو أبي حبيبي احححم قالي نوصلك للدار قتلوا لا سيبالابان نروح وحدي راني نعرف التريق شاطرة كنت هكاك 2 ابتدائي °°°°
خليت بابا ساق السيارة و انا رحت نتمشا وحدة وحدة لحق اليل و انا كنت شبعت لعب عند جدي يعني أب أمي كليت و رقدت و لعبت مخصني والو
ههههه و ليجوندارم ديجا بداو يسمعوا ب فقدان طفلة بيت جدي قالولي قلت لداركم قلتلهم وي كيفاه
ماما تعيط بابا يعيط يحوسو في المدرسى المهم في المدن المجاورة في كل مكان آخر اتصال داروه لخالي باش يخبروه بلي راني مفقودة
و مبعد خالي كان يقري في ليتيد عيط للدار بيت جدي انا منين سمعتو يهدر مع زوجة خالي في التيليفون هربت اااا الهربة تسلك [ الجري الجري ... ] قالوللو مكاش بيسة هربت ههههه المصيبة كبرت و مبعد وصلت للدار احممممم حسيت روحي |[ كاش رئيس قع يشوفوا فيا الناس عندنا معندي منقلكم ]| المهم المرة الجاية نكمللكم واش صرااااا نخليكم تقارعوا شوي
...

[بـــيِسَة]

عدت مرحبا ...
هيه وصلت للدار هههه وأتخيلوا واش لقيت ؟؟؟؟ لقيت ماما موجدتلي ديجا السلاح ها قاللها خالو بلي هربت من تماك معرفت الا تضربني و الا منعرف واش ادير المهم أديت طريحة مريقـلة الوجه ولا حمر ... اليد قريب تكسرت ... الشعر طار ... و الرجلين من هداك النهار مزادوش راهو لكاش بلاصة بلا ميسقسو ياو أديت السقلة و الكف حتا قلت ستوب و هكاك ومحبستش اللهم لا توقع أحد في يد أمي هههههههههه واقيل قعدت 3 ايام مرحتش نقرا من الخلعة و مبعد مسكينة ماما تجرح و داوي ههههه
و الله لوكان مضربتنيش نزيد نهرب من لمسيد الصراحة
[ ماما ماشي قاسية لهاديك الدرجة عاقلة غير منين نقلقها تضربني برك ربي يحفظها ]

[Elwawy]

مرة في الجامعة في مقياس equipement (تخصص هندسة), في td تمرين عن قياس أشياء معينة و النتيجة وحدتها ب ملم HG أظن و الHG هو الزئبق, المهم شرحت الأستاذة حٍل التمرين فهم الجميع ثم بدأ الجميع في النقل.

إنتظرت حتى سكت الجميع و عم الهدوء : أستاذة, HG هي هيموقلوبين؟
لم يستطع أحد التوقف عن التفركيس في الأرض من الضحك, هيموقلوبين في مقياس هندسة...

[❣سڪڕ❣]

هههههه دخلتلهم الدم في جد الهندسة هههه

[حميد.ص]

فكرت و فكرت و لم اجد اي عمل قمت به من قبل بشكل عشوائي للاسف

[رَمَادِيَاتْ]

هذا السؤال العابر جلب لي ذكرى لطيفة من أيام الطفولة، كنت حينها في الحادية عشر من عمري، وغير بعيد من منزلي، كانوا يهيؤون حيزا صغيرا للعب، كنت أمر بالمكان في كل يوم وأنا أنتظر متى يصير جاهزا لندخله، بيد أن الأمر طال كثيرا وخانني صبري حين رأيت الألعاب قد غرست في الرمل والسياج الحديدي لازال يحاصرها، فكان أن تفقدت المكان رفقة صديقتي فلم نجد حارسا يحرسه، فذهبت إلى البيت فأحضرت ابنة أخي مروة وابن أختي عبد الرحمن الذي كان بالكاد يجيد المشي حينها، وعدت بهما إلى صديقتي، رفعنا السياج الحديدي من الجهة الخلفية قليلا وزحفنا تحته زحفا كسارقين، تركت مروة وعبد الرحمن مع لعبة التزحلق، وصعدت رفقة صديقتي على لعبة الميزان. أستطيع إلى غاية هذه اللحظة أن أتذكر كيف كنت أرفرف من الفرح وأنا أرتفع للأعلى وأحط للأسفل في تجربتي الحياتية الأولى لهذه اللعبة.
لم تمر علينا خمس دقائق حتى ظهر الحارس مهرولا اتجاهنا بعصاه، سقطت على الأرض ذعرا ومن ثم هرولت باتجاه فتحة السياج ناسية أن بجعبتي طفلين صغيرين يجب أن أصطحبهما، أخذت صديقتي تنادي وتصرخ، فاستدرت لها وأنا أواصل جريي قائلة: أحضريهم أنت.

فما كان منها إلا أن أحضرتهم بالفعل ، وخرجنا سالمين، ضاحكين، خائفين.. والحارس يتوعدنا بالعقاب إن عدنا مرة أخرى.

[جَمِيلَة]

السلام عليكم ورحمة الله وبركاته
أهلا أوفياء هذا الموضوع جئتكم اليوم بفعل عشوائي ناجح آخر:
مرة خرجت مع أمي وقد كانت في قمة القلق والانزعاج من مشكلة حدثت قلت لم لا أقوم بشيء يرفه عنها وينسيها همها، فقلت لها لنتبادل الأدوار أنا أمك وأنت ابنتي، حتى نرجع للمنزل وافقت رغم أني أعلم بأن هذا الدور صعب عليها ولا يناسبها، قلت لها الغضب مني ممنوع تصرفي كبنت بارة ومطيعة أنا لا أرحم (أكو تعرفوا فرصة مثل هذه لا تعوض ويجب استغلالها)
تقمصت أختكم دور الأم بما يقتضيه الوضع يعني قلبا وقالبا، درتلها بالضبط كيما ديرلي، لكنها لم تستطع التحمل ووصلنا للشجار يعني بالمختصر بطلت اللعب، فقلت لها: بما أنك عصيت أمري فأنا غاضبة وغير عسي روحك إذا صراتلك حاجة أني أنا سبابك....
يا ربي.... مع خلصت الهدرة خرجلها ديك أحد الجيران طالع فيها وينقب ههههه دار فيها حالة، وهي ولات تقولي جميلة وشبيه هذا علاه يديرلي هكا تخلعت تاع الصح حتى إن صاحب شاحنة كان مارا ويشاهدنا ومن كثرة الضحك كاد ان يصطدم بالحائط وأنا غير نتفرج معاها وأفعل هذا-- على مبدأ متعة ايذاء الغير
راح الديك ونظرت إليها النظرة الشريرة وقلت لها: هكا باه ما تزيديش تغضبيني، حتى إني هددتها قلتلها المرة الجاية سبع ماشي ديك، أثر فيها الحادث هذا وبقيت تضحك أسبوعا كاملا كلما تذكرتها تحكيها
لكل من يظن ان القصة توقفت هنا لا تتسرع... اصبر جاي الخير
انتهت القصة وعشنا حياتنا بشكل عادي... زدنا خرجنا مع بعض هذي المرة كل واحدة بشخصيتها ههه تناقشنا كالعادة أساءت فهمي وظلمتني قلتلها انساي لا نسامح وانتظري السبع الموعودمشينا خطوات وفجأة يخرجلها كلب ينبح غير عليها هي تقول محرش ههه لمزية مربوط.... والله مررت بذلك الطريق طوال خمس سنين ذهابا وإيابا للجامعة لم أعلم بوجود كلب هناك إلا في ذلك اليوم
زهرها معندوش الزهر مسكينة، ولات تقولي ما هذا الشّر اللي فيك والحمد لله سلامات...
وفي مرة خرجنا كذلك وتناقشنا كيما مالفين ودائما نخلصوها مالاباسش، وكالعادة انا نهدد ونتوعد، ماجينا نخلصوا القنطرة، جا ليها أحد الشباب الذين يبيعون على الطريق، قال لها يا مَّا ما تتخلعيش، كاينة جرادة كبيرة في خمارك، طارت ماشي برك تخلعت لأن لها فوبيا من الحشرات، قال لها ياخي قلتلك ما تتخلعيش قالتلو الله غالب المهم في ذاك اليوم أجبرتها على إرضائي (رغم أنني أشفقت عليها مما أصابها لكن كبحت نفسي لا مجال للشففة)
بيني وبينكم أنا حرت صح في الحالة اللي رانا فيها اللي بدات بطريقة عشوائية ثم تحولت مع الوقت إلى لعبة ممتعة للطرفين رغم وجود بعض الخلايع...على كل حال قلتلها ثبتت عليك الحكاية هذي والمرة الجاية ديناصور ضربة واحدة...
المهم ركبتلها الحكاية في راسها لدرجة أننا في مرة خرجنا مشينا ثلاث أمتار عن المنزل تشاجرنا ههه رجعت لدار قالتي والله ما خرجت معاك روحي وحدك
مرة ضاعت ركبت في مواصلات منطقة أخرى دون أن تنتبه بعد أن غادرت غاضبة وتركتني أرجع وحدي سيرا على الأقدام هههه
خلاص جماعة نتوقف هنا وإلا سيعم الظلام المكان (زعمة جانبي المظلم أكو فهمتو)
وإلى اللقاء في عشوائيات أخرى إن شاء الله
تحياتي