لا اقبل الزواج الا من رجل له سكن مستقل

[فاطمة شلف]

السلام عليكم ورحمة الله وبركاته
موضوع مهم جدا
من خلال تجربتي في الحياة 27 سنة زواج عشت 26 سنة مع العائلة حتى العام
الماضي باش سكنت وحدي لكن قاصيت ياابن عمي ياربي رحمني
7 بنات وولد المليحة غير من عندي
اذا كان لديه سكن منفرد معليش تسكن وحدها
واذا مكاش عندوا الله غالب تتحمل وتصبر والعائلات مهمش كفكيف
الكبار تصبهم دواء يعاملوا الكنة كاابنة لهم والبعض الاخر يعملها كاعبدة عندهم
والسلبيات اكثر من الاجابيات
انا مثلا اذا حبيت نزوج ابني وكان قادر على المسؤولية مذابيا يعش حياتو خير
لااعترض في ذالك
واذا عاشت معيا ندرها كما ابنتي لي فات عليا مايفوج على ابني واذا غبنتوا
نغبن روحي لاني تعذبت باه نلت هذوا الاولاد
ولازم نكون عادلة في حياتي بين الذكور والاناث لي مر عليا مهوش ساهل
واذا كان قادر على توفير السكن ربي سهل على وليدي
وفي اخر الامر مكاش كما الاستقرار لاحياء في الدين كل شئ من الساس
حتى ولو كنتي في وسط العائلة حسب الرجل هو لي يعطيلك الاحترام
وذا كان عكس ذالك راحت عليك حتى الضوئ طفتولي عجوزي صدقوا
ولا تصدقوا صبتني ندرس في اولادي قتلي متقرهمش على الضوئ
افتحي النافذة وهل عند المغرب نفتح النافذة
كي نجي خارجة للعرس ندير السشوار يطفوه عليا وبنتها يديروا السشوار
كي جوا بناتها تقلي نضي طيبلهم جاو باش يريحوا في دار مهم وانا
ربي في اولادي والشابة قاع كنت بل لحمل طيبتلهم ومقدرش نوض
ونجلس قللها خوها رفدي الصحن عليها قالت الام راك خايف عليها رفدت
وكمدتها لقلبي وسكنت
وانا رايح نزيد طيبت الفطور لحماتي وعجنت وطيبتها وفطرتها
وقالت الام روحي طيبلها القهوة وهما رحو للعرس وخلاوني مريضة
يعني باغي نزيد رحت انا وزوجي فقط سلاك الغلبة ونجبت صهيب
وكبر وتهل في جدو وحملوا على ظهرو كي مرض ويغسلوويديه لحمام يدوشلوا ونا حتى رجله نغسلهملو ودينادعوة الخير ومخلناش بغبونين والحمد لله هو وانا حتى مات في حجرصهيب وسبحان الله
مغير الاحوال انا نافسة ونغسل ونطيب والحمة عليا ويدي ترتعش
وللحديث بقية وهذا ميبنش مع الغبينة الي تليها
وكي جوا اهلي متقبلهمش نحشم على روحي
البراني يفوتك بكل بساطة ام الاهل محال يضروك
هذا مجرد راي ليس الاخلاصة القول لي وحدها احسن باش يبقى الاحترام
مابين الكنة والعجوز
الله يجيب الخير ويصلح الاحوال
تقديري

[Asmaa.B]

المشاركة الأصلية كتبت بواسطة النجمة القطبية

الحقيقة ان نعم البنات معدورررررات في دلك لكثرة ما نسمع ونرى
لانه من النادر ان تجد فتاة تقولك راني عايشة في بيت شيخي وكاني في بيتي
خاصة لو كان الزوج من النوع المتواكل يا سلام
تلقاه لا يصرف فلسا وقاعد ياكل ويشرب ويخرج مع صحابو والمراة مثل الطنجرة فوق النار !!!!!
وين راه مبدا الزواج هنا الله يهديها
لا بيت تستقبل فيه ضيوفها ولا واخدة راحتها في ماكل او ملبس او نوم او عمل
ما تقدر تطيب واش تحب
ما تقدر تسهر مع راجلها
ما تقدر تناقشو في امر خوفا من اهل الزوج
وخايفة من خيالها مثل الفار
حتى الماء متقدرش تستخدمو كيما تحب بحجة مكانش وو
اليس هدا هو حال كثير من الاسر الجزائرية !!!!!
ولكن بالمقابل صحيح كاين عجايز مثل العسل والنسمة الباردة تلقاها فااااااهمة من عند ربي سبحانو
قارية بلا ما تدخل للمدرسة
كيما يقولو ريحة الجنة فيها
واحيانا ايضا يكون الرجل معدور في الماديات والظروف هدا نعدروه
لكن هدا لا يعني انو يسكن مع دار باباه يتواكل
ما يصرف ما يعاون يبهدل بمرتو وين راهي الرجولة والمسؤولية هنا
المهم خلو البير بغطاااه كامل نعرفو البير واش فيه
مالا صح معدورررررررررررات ونص

قلتي الصح.. الصراحة راحة

[randa3]

على حساب وش رانا نشوفو ونسمعو الشباب هوما الي ولاو يحبو يسكنو وحدهم للاستقلالية أكثر وباش يبقى القدر بين الاهل والكنة
ربي يجيب الخير

[hamoudz86]

انا درت سكن مستقل في دار الشوابين ( ايتاج وحدي ) و امي هي اي فرضت عليا نبني و قالتلي باش كي تتزوج ما تصراش المشاكل.

[الاريام]

السلام عليكم
اختي هدا حق اعطاه الله للزوجة ممكن ان تشترطه و على الزوج ان يسكنها حيث يسكن هو و ان يحعل لها بيتا محترما بحسب مقدوه مهما كان عند ابويه من جااااااااه عليه بذلك في الدين
و هو افضل شيء بالنسبة للزوجين من اجل الخصوصية في حياتهما وحياة الابناءوعدم وجود اشخاص ثانويين ياخذون دور الزوج او حتى الزوجة بفرض اراءهم في مختلف الامور وتعكير الجو على الزوجين

[nounousky]

هههههههههه

[nabil.novi]

انا من وجهة نظري اريد أن اقول صحيح أن أغلب البنات الجزائريات يطلبن سكن منفرد بداعي راحة البال و تفادي حدوث بعض المشاكل.. لكن أيضا هناك أسباب كثيرة سلبيه أغفلت منها.. هاذ البنات تجد أغلبهن فنيانات يعني ماذابيها تسكن وحدها باش دير الشغل وقت ما حبت خطره فالأسبوع أو وقت ما تبانلها ديرو.. تغسل المواعن تاع العشاء غدا ماشي اليوم و غيرها من أشغال البيت التي تتهرب منها لكن لو كانت في بيت الأهل سيكون عليها ضغط لتقوم بكل شيء في وقته و هذا يتعبها بحكم التفنيين.. لذا تحبذ منزل خاص باش حتى واحد ما يلومها... و هذه حقيقة لا داعي تقولولي أحنا ماشي هكا و شاطرات و منعجزوش ﻻنه حقيقة النساء تاع هذا الوقت ما يقدروش للشغل كيما تاع زمان و خاصه لي تخدم برا الدار.. تلقاها تدخل عيانة و الدار أغلب الوقت هاملة و خلي و خلي..

[صفيان 11]

خاوتي واش نقول انا انتمي الى عائلة ترية و معروفة و كل شيئ متوفر و الحمد الله عل هد النعمة كي كنت نروح نخطب و نشرط المراة تحبس الخدمة و تدير الحجاب الشرعي و تعيش مع امي و ابي مكاش لي كانت تقول لا او تقولي نشرط نخدم او منلبس الحجاب الشرعي او بيت مستقل الكل كان يطمع يصهر عائلتي و دخول لي عالم الرافهية مقابل تنزل عن كل شروطهن من هد التجارب الفاشلة و التي ادت بي الى تعليق مشروع الزواج الى اشعار اخر عرفت بلي المراة الجزائرية الا من رحم الله من اجل المال هي تستطيع ان تعيش معك او مع عائلتك بدزن اي مشكل يا خاوتي عندي ابن عمي ربي يغفرلو معيش زوجة تاعو حياة الرفاهية بي اتم المعنة مي هناك ضريبة غالية عال هد المعيشة و الرفاهية الزوجة تاعو داير فيها التير مرخسها قدام العائلة و امه ربي يهديها تانيت داير فيها حالة مي هي صابرة و جامي ولا هدرت وعلاش المال و الرفاهية تقدر تصبر و تحمل الدل مي كي جي اخي متوسط الدخل و ميقدرش يحل مسكن تقولو منعيش معا اهلك بي الله عليكم واشنو هدا قالك المال يبدلو النفوس يا اخي

[نور الصباح]

المشاركة الأصلية كتبت بواسطة asmaa.b

الحقيقة اني اسكن مع اهل زوجي منذ 4 سنوات و قابلة بالوضع حتى يفرج الله و اذكر جيدا انه حين وافقت على خطبته لي عارضتني اغلب نساء عائلتي من عازبات و متزوجات و استغربن في قبولي لعدم استقلالية السكن و كانني قبلت بالعيش في غوانتانامو.. الا ان الواقع يعطينا من الدروس ما يجب ان يكون لنا عبرة.. فانا و الحمد لله متفاهمة مع زوجي رغم وجود بعض السلبيات و الشعور بعدم الارتياح نتيجة السكن الجماعي الا انه و للاسف ابنة عمي التي تزوجت قبلي بقليل تطلقت رغم انه كان لها سكن منفرد من البداية..
انا مبدئيا ضد البنات اللاتي يحملن هذا الشعار لانه لا يتماشى مع واقعنا تماما و لكني لا اهمل ان مخاوفهن في محلها خصوصا للغرائب التي تسمعن عنها و الحل الوسط الا تجعل هذه النقطة سببا لرفض الصالحين من الشباب رغم ان الامر ليس بالهين فمن تسكن مع اهل الزوج عليها ان تكون صبورة و تتغاضى عن الكثير مما ترى و تسمع حتى تستمر سفينة زواجها.. نحن لا نسيء الظن و نقول انهم سيؤذونها و لكن مجرد اختلاف الطباع و رغبة المراة المتنامية في ان تكون سلطانة حرة في بيتها يخلق المشاكل و ينغص عيشها

السلام عليكم انا مثلك تماما اسكن مع اهل زوجي واخوته و زوجة اخيه واولادها الاربعة و زوجة اخيه الصغير ... نحن معهم منذ اربع سنوات طبعا تاتي بعض المشاكل ولكن ننساها

[Asmaa.B]

المشاركة الأصلية كتبت بواسطة ام اسلام

السلام عليكم انا مثلك تماما اسكن مع اهل زوجي واخوته و زوجة اخيه واولادها الاربعة و زوجة اخيه الصغير ... نحن معهم منذ اربع سنوات طبعا تاتي بعض المشاكل ولكن ننساها

على قول جدتي "الله يعطينا تيساع الخاطر"

[silent scarf]

ما رأيكم في ان تتحجب من راسها الى اخمص قديمها امام اخوة الزوج و ابنائهم عند البلوغ و لا يجوز لها حتى ان تتكلم معهم و يحرم عليها حتى وضع كحل تتزين به لزوجها و ناهيك عن اعمال البيت بالحجاب و هل يتقبل اهل الزوج ذلك منها و كيف سينظرون اليها و من هذا تتنامى المشاكل و يدخل الزوجين في صراع فكري و ديني
ما ذنبها ان تعيش حياتها العادية مع اجانب فكروا في الامور من منطلق آخر و عقلانية ااكثر

[نصرالدين الايوبي]

إخوتي اخواتي من وجهة نضري ان الزوجة عند طلبها السكن المستقل يعني انها تريد كرامتها اولا وخصوصيتها ثانيا وحريتها في بيتها اذا من لم يستطع توفير سكن فليحاول توفير ما تريده مثلا ان ضلمت من اي طرف من اهلك دافع عنها وحاول ان توفر لها بعض الخصوصية ويجب ان تعرفها بعقلية كل فرد من اهلك وان حدث خلاف بينكما لا تعلنه امام الجميع المهم كل واحد يعرف واش كاين في دارو كما يقول المثل اذا عرف السبب زال العجب

[زوجي الغالي]

الرزق على الله