أرواحو صبروني

[محفوظ البسكري]

المشاركة الأصلية كتبت بواسطة sunshine2013

أكيد أخي
ماني قادرة ﻻ ناكل ﻻ نشرب و خويا في الميزيرية ما نعرف إدا كﻻ و واش كﻻ وين يرقد
يا رب كون في عونو و في عون أمثالو

دوك نقولك واش ياكل

الصباح شوي خبز كوفيتير مخلط مع الماء باش يكفيهم
ساعات حليب لارمي و ساعات عصير

في الغداء يكون عموما لا باس بيه حبة تفاح او مندرين خبزة + شوي سلاطة + عجائن
في العشاء اسوء اكل ممكن تشوفيه سباقيطي زوج خيوط في لترا ماء او مكرونة مع خبزة

هذا اكل الايام الاولى فقط
بعد ان يلبس و يجند يتبدل كل شيء يعود ياكل مليح

[salim chekkar]

ان شاء الله غير الخير .انا جوزتهم نهار كانت 18 شهر
بابا كان مات دمو مازال مابرد .رحت في رمضان .كان عندي حانوت .خاوتي انا كبيرهم الفرق بيني و بين الكبير 10 سنين .وقت ارهاب
ثكنة من اسوء ما يكون .المدرعات باتنة .بالصح كلش فات و عرفنا رجال
المهم راه وسط خاوتو .انا هذي الكلمة لي قلتها لخاوتي في 2
اخرهم انا وصلتو للثكنة
ايامات و كبش يفوت و ربي يلاقيه هو وكل شباب الخدمة الوطنية
ما تخافيش يرجعوهلكم راجل قولي لو يحمل برك

[salim chekkar]

ان شاء الله غير الخير .انا جوزتهم نهار كانت 18 شهر
بابا كان مات دمو مازال مابرد .رحت في رمضان .كان عندي حانوت .خاوتي انا كبيرهم الفرق بيني و بين الكبير 10 سنين .وقت ارهاب
ثكنة من اسوء ما يكون .المدرعات باتنة .بالصح كلش فات و عرفنا رجال
المهم راه وسط خاوتو .انا هذي الكلمة لي قلتها لخاوتي في 2
اخرهم انا وصلتو للثكنة
ايامات وكلش يفوت و ربي يلاقيه هو وكل شباب الخدمة الوطنية باولاد الحلال و يسهل لهم الصعب
ما تخافيش يرجعوهلكم راجل قولي لو يحمل برك

[yazidfcb]

ختي ما تقلقي روحك ما والو راهي غير ليمات الاولى ميزيرية كامل خلعنا في البداية
ان شاء الله يرجعلكم
و على البورطابل مطفيه راه طاحلو الشارجور اكيد بسكو في الثكنة مافيهاش لي بغيس بزاف
ماتحيريش روحك ان شاء الله يرجع

[yazidfcb]

هادي الماكلة نتاع dca في الاغواط

[beldjilali.guellil]

المشاركة الأصلية كتبت بواسطة yazidfcb

هادي الماكلة نتاع dca في الاغواط

هاذي تجربة يمر بها معظم الشباب راح يوالف مراهش وحدو يتلاقى بناس جامعيين كيفو

اللي تقدري عليه هو الدعاء له +عيطيلو من داك بداك

[midodah-17]

ماتخافيش ختي مركز ارزيو ميزيرية في البدية برك
انا دربت فيه سبتمبر الي فات قاسينا بزاف في البدية من بعد صايي كلشي يهون
غدوة السبت يعطوهم التيليفونات نورمالمو
عيطيله غدوة تلقاي التيليفون مفتوح إن شاء الله
و ربي يصبر الوالدين

[midodah-17]

و إذا كاش ما تحتاجي معلومات اعطيني اسمه و لقبه و الرتبة تاعه
إذا كان سارجان غادي نعيط لصحابي تماك يتهلاو فيه

[midodah-17]

بخصوص المالكة في ارزيو
هي أحسن مركز من هاد الناهية
الأكل في ارزيو فور بزاف كي شغل راك في داركم
اللهم كل يوم و ياكل حتى يشبع
عندك العشا برك 5/5

[midodah-17]

انا تاني الوالد تاعي متوفي و راني نفوت فيها في بشار حاليا بعد ما دربت في ارزيو و راني مخلي الوالدة تاعي وحدها بصح الحمد لله هانت 3 شهر و نولي لميمتي بإذن الله <3
و إن شاء الله يآ ربي يطلقوه و يطلقوآ المغبونين و المهم يرجعلكم بخير بإذن الله

[محفوظ البسكري]

المشاركة الأصلية كتبت بواسطة yazidfcb

هادي الماكلة نتاع dca في الاغواط

ايه ماكلة الاغواط

[sunshine2013]

ربي يحفظكم خاوتي ، الأخ mido ربي يرحم الوالد و بارك الله فيك على عرض المساعدة و كل أخ طلعلي المورال ربي يهنيه إن شاء الله و يوفقو
الأخ محفوظ البسكري شكرا على تفاعلك الصريح بصح ما يحس بالجمرة غير اللي كواتو
المهم خاوتي راني فرحانة اليوم فرح ﻻ يوصف، الله استجاب لدعوات أمي و أطلقو سراح خويا ، قالنا مافهمت والو بقينا 10 تواﻻ فوتونا عند الطبيب و قالونا روحو استناو و العشية قالولهم خﻻص سرحناكم فائض و أعطاولو ورقة مؤقتة مكتوب فيها معفى نهائيا من الخدمة الوطنية
الحمد لله يارب
شكرا لكم جميعا ربي يفرج على كل واحد و يسمع خبر مفرح في أقرب وقت
السﻻم عليكم

[sunshine2013]

أخي salim chkkar ربي يرحم الواالد نتاعك و ربي يوفقك
شكرا beldjilali ,و تاني yazid بارك الله فيكم

[sunshine2013]

المشاركة الأصلية كتبت بواسطة محفوظ البسكري

حذاري من ان تنعكس الدعوة عليك هو ماش رايح لاسرائيل راه رايح باش يولي راجل و يخدمو بلادو لازم يصرا هكا بش يكون يعرف كيف يواجه المصاعب مستقبلا وسلامي لوالدتك وان شاء الله ما يصرا والو
من المفروض نحن نشجع اخواتنا و ابنائنا على الخدمة الوطنية

واعتذر على كلماتي القاسية فانا عشت هذا الحدث من قبل

الزواولة برك اللي يخدمو البﻻد؟؟؟
و أخي راجل مش حتى يروح ﻻرمي ، هو اللي قايم بالدار و بأمي و كلش طايح عليه
أمي ﻻ تحتاج لسﻻمك بل تحتاج من يرعاها

المشاركة الأصلية كتبت بواسطة محفوظ البسكري

يا اختي خوك راح للجحيم ؟؟؟؟
رح يتهلاو فيهم مام كاين ميزيرية بصح رح يوالف الامور
روحي لامك اديها تعيش معاك وربي يفرج راهم كل خاوة تما في الكازارنا رح يتهلاو في بعضاهم
راني نشفى روحي تما كنا متعاونين اللي ماعندوش نعطوه يعني ما خصنا ووالو التعاون و الاخوة و المحبة

و هل تعرف ظروفي أنا باش تقولي ادي يماك تعيش معاك لوكان الأمر بيدي مش حتى تقولي ﻻ علينا

المشاركة الأصلية كتبت بواسطة محفوظ البسكري

اختي الفاضل انا ارد على مشاراكاتك بالواحد لذا ارجو ان لا تنزعجي مني
الظاهر اخوك لم ينام مرة خارج البيت ؟ او لم يسافر كثيرا ؟
لدرجة انو يرسل ميساج النجدة لا لا لا
لحد الان ماكان والو في 27 او 28 ماي يبان الجديد غير هاذي الايام ما تنتظرو والو
الحمد لله ربي ما فيه غير الخير
و خدمة الوطن على الجميع ﻻ تمييز فيها و لكن أحيانا كاين ظروف تخلي الواحد يتهرب مش لأنو مش حاب يخدم بﻻدو
سﻻم أخي
وان شاء الله يرجع لوالدتك و تفرحو بيه

لعلمك، أخي مداري يروح يكومبي في الغابة و يشعل النار و يطيب عشاه مع صحابو و يخدم كلش بلومبي الكتريسيان صباغ يريقل البارابول للناس و يبات برا لوكان مش أمي وحدها
و بعثنا sosعﻻخطرش كي راح كان مريض و عندو دوا نسا ما داهش و زاد عليه الحال

[yacine1921]

ربي يفتح عليه و عليك و على جميع المؤمنين