راني نهدر معاك

[بنت غليزان]

ربي يفرج عليك و عليا

[الحلم الجميل]

السلام عليكم
كي شفتك كاتبة ( راني نهدر معاك) قلت ندخل بلاك راهي عليا
شوفي يا اختي قبل ما نقولك الصبر غادي نقولك بلي معظم الاسر هكا العجوزة و الكنة صراع ابدي
انت قلت علاه و علاه بصح تاكدي بلي بنتها الا راهي متزوجة راح تذوق اكثر ما ذقتي و هي تاني راح تقول علاه و علاه
و الا ماشي متزوجة غادي يجي نهارها ..
عيشي حياتك ما تخليش كلامها ياثر عليك و خليها على ربي
كي تكون هي تعاير فيك ديري روحك مراكيش تسمعي و ربي يفرج عليك و يهدي عجوزتك
خوفتونا من العجايز

[(( هبة الرحمن ))]

الشح فيكم هههههه قلتكم ماتتزوجوش ما سعفتونيش يسما راكم تقولو لبنات شرطو واحد يتييييييييييييييييييييييم ماعندوش يما ( علاه مسكين وانتوما تبغو تكونو يتيمات )

مين كنت مخطوبات كنت تنادوها لالة وحبيبة ودرك.............
ماعليش شوفي الوجه راجلك مين مليح معاك ...العجوز خليها خارج غرفة النوم الراجل مسكين يتوجع ميت تهدريله في ماماتو مادخليش الهم معاك ..ياخي هاديك حملاته 9 اشهر وكبراته وكون ماهي انت ما تتزوجيش بيه
صبري حنونة وربي معاك واللي ماتزوجتش نقولها خطيييك راكي غاية

[kiki-lacharmante]

الله يهديهم ولا يديهم

[sali-sali]

السلام عليكم

ايييييييه والله في هدو الامور صعيب تتفلسفي لانو كل ام تحب الخير لولادها
لكن حنا تاني تفكيرنا سلبي و نعاندو .... اد ا العجوز ماحبتنيش ..معناها انا تاني مانحبهاش
يا ختي خليها تدير وتقول واش تحب و الله مانعمر راسي بيها... + ندير معاها غير الخير

عندي قريبتي اهل زوجها قاسوها بزااااااااااف لكن صبرت ... نهار ماتت كلهم ندموا

الوحدة مهما تكون عجوزتها ... لازم تساعف و تصبر و تديرها كي امها

[كونجلي]

حرب نساء...اذن خاطينا حنا




و نصيحة من كونجلي [لا تتدخل بين امرأتين...ليصرالك كيما عريوات... رجل و امراتان]

[أملي و حبي3> ربي]

حاولي تخليهم يقادروك بصح بلا ما تجرحيها
كوني حنينه معاها و قابلي الالم بالحب و حتى ادا فوق قلبك و لازم راجلك يعاونك
عمرك ما تعانديهم فقط حطي النقط عالحروف بأدب و متكونيش حساسه بزاف و تاني تعلمي متتوقعيش منهم أي شي يعني لي تديريها أنويها لمولاكي عز و جل
أنوي الخير و أسبقي النيه و نأكدلك ربي ميضيعش سبحانه
عن تجربه

[khawlita.dz]

للاسف يحدث هدا كثيرا بمجتمعنا
ولا افهم كيف تريد من المنة ان تخدمها و تعينها و تعاملها كما تعامل والدتها لكنها ابدا لا تضعها محل ابنتها
تبقى الامور نسبية هناك حماوات فى القمة ما شاء الله
يبقى حاولى ان لا تحتكى كثيرا بها و حاولى تصريف امورك بسلاسة وهدوء
ولا تستسلمى للواقع بل بالسلاسة و الليونة وطبعا الاحترام المتبادل وحاولى ترك مسافة بينك و بين اهل زوجك
فان كثرة الاحتكاك تولد المشاكل واكيد ضعى النقاط على الحروف فحقك حقك وحق حماتك حقها ولا واحدة منكما تتجاوزه
اما قصة حياتك و امورك الشخصية فانت الوحيدة المسؤولة عليها
لا تياسى فلعل الله يفتح عليك و ييسر امرك
بالتوفيق

[الأستاذ *قداري*]

كلام معقول وفي الصميم بارك الله فيك اعجبني الطرح المتميز والكلام النقي والعبر المستوحاة منه لا يمكن ان نجدها في امهات الكتب

[شمس 15]

المشاركة الأصلية كتبت بواسطة siham mokrani

بمناسبة الموضوع .. نعم هو في الصميم ..
لي جارة تخطيبت سنها 17 سنة .. و اخوها اكبر منها 34 سنة أراد الزواج حين طلب من والدته ان تخطب له فلانة .. قالت له انتظر حتى تتزوج اختك كي لا تظطر لتحمل زوجتك .. و بعد اصرار من الابن اظطرت الأم لخطبة العروس .. بعد العيد اتت الجارة المخطوبة عندنا كي تتفاخر بالحلي و الدراهم و اللبسة للي جابلها خطيبها في العيد ..
قلتها مبروك و بالهنا ان شاء الله و كا ن سؤالي بعدها كالأتي * و انتم واش ديتو لعروستكم ؟ * قاتلي بالحرف نديولها كفن ان شاء الله ..
انا هنا ماشي شوك لحمي و لا احترت ..
قلت في داخلي ، يا ابنتي حطي رجليك على الأرض ما تدري شكون للي يتكفن قبل الأخر ..
بعد مرور أيام .. عادت لزيارتنا مرة اخرى .. تتفاخر بأمور أخرى ..
سألتها و قلت * انت رايحة تتزوجي ، كاش ما تعرفي طيبي ؟ ديري قاطو ؟
أجابت / انا قالي خطيبي انا نقلي و انت كولي هههههه
و من بعد مر الحديث و قالت انا و امي رانا نتحلفو في العروس كي تجي من الكوزينة ما تخرجش غير للحمام أعزكم الله ..

يمهل و لا يهمل

الله المستعان

[كلمة مني]

يا لطيف يا لطيف على هدو لعجايز الغيارين حرنا فيهم كون جات مليحة لي تحبها لبنتها تحبها لبنها ، من الطبيعي لعجوز تغير على بنها لكن ماشي هكذا راهي كثرت بزاف .......
لكن نشوفو لعكس كي يزوج الذكر يروح في الجرة مع مرتو
أنا نعرف لعجوز لي تحب بنها صح تحب مرتو ثاني وهكذا
ربي يديها ويهدي الخلق اجمعين

[moumen60]

لوكان تتفاهم العجوز والكنّة ...ابليس يدخل للجنة

[السيدة كرمين]

طريقة الطرح قممممممة الروعه
جعلتيني ندمع
سأحاول اجابتك بشئ ممكن يبرد قلبك

هي أم

أي تريد أن تكون بنتها مدللة وفي احسن حالها
ما ينغص عليها شئ وكلشي على يدها

أما ابنها فهي تريد ان يكون في احسن احوالوا
مرتوا ديما قدامو تخدموا بعينيها و تسمع كلاموا
وتحافظ عليه ،وتغير عليه من اي كلمة ممكن تتقال على مرتوا
و بسببها
لذا حاولي تتقربي منها ان كانت هاته مشكلتك وتحسسيها انك بنتها
وتتعاملي معاها على هذا الأساس وتشاوريها وتهاديها وووو

ربي يسعدك ويسعد الجميع

[جويرية الإيمان]

شوفي ختي
العجوزة راهي جايبة راجل لبنتها بصح بالنسبة للكنة راهي مادية راجل و أي رجل .....
راه ابنها و من الطبيعي جدا أن تغير من كنتها فهي التي حملت و أنجبت و تعبت في ولادته و احتضنته و قبلته و حمّمته و ألبسته و حضّرت له ما يشتهي من أكل و سهرت عليه

في مرضه و أعطته الدوا بيدها و بكت عليه في غربته في الجيش

و انتظرت رجوعه بفارغ الصبر و احتضنته بقوة و قلبها يرقص فرحا لعودته من إجازته من الجيش و و و و و و و و ....

أشياء كثيرة فعلتها له و اشياء كثيرة فعلها لها .

هل تتصوروا أن طلب الإبن من أمه أن تعد له أكلة معينة يفتح لها أبواب السعادة على مصراعيه

و تعدها له في كل الأحوال حتى و لو كانت مريضة

حتى و لو لم تملك أي شيء لإعداد الأكلة

في الأخير تتملّكها سعادة غامرة لما ترى إبنها يأكل و يتلذذ بما حضّرته أمه .

ماذا تتوقعون من أم كهذه ترى إبنها في حضن إمراة أخرى تفعل له ما كانت هي تفعله .

صحيح هذه هي سنة الحياة

صحيح هذا هو الزواج

صحيح الرجل يحتاج إلى زوجة و إلى تكوين أسرة

لكن الذي تنساه الزوجة أن الأم تغير على ابنها من إمرأة تعتبرها أخذته منها و حرمتها الإهتمام به كما في السابق .

نصيحتي للزوجات سواء كنتن ساكنات مع الحماة أو منفردات ببيوتكن

ساعدن أزواجكن للبرّ بأمهاتهن فلن يعشن إلى الأبد .

قد تكون الحماة قاسية جدا في تصرفاتها لكن كونك تعلمين السبب فلا تلومينها فأنت أيضا لديك أولاد و

ستشعرين بنفس إحساسها عندما تزوجين إبنك

و ستتمنين ساعة واحدة تجلسين فيها مع ابنك مثل السابق .

أقول هذا عن تجربة فأنا أيضا لدي زوج و حماة و إبن صغير .

[fati_mohamed]

اختي جورية الايمان كلامك دواء و صح لازم نحطو هاد الشي في بالنا
لكن هدا ما يمنعش من انها تحرمك من الخروج من البيت لقضاء حجياتك العكس نورمالمو هي تقول لولدها خرج مرتك دور بيها راهي عروسة جديدة
و زيد هي تغير على ولدها بابا تاني و ماما مايحبوش على بنتهم