وصفات من حراير مطبخ وش طيبتي اليوم

[مسعودي خولة]

المحوت بالطريقة السطايفية بالدجاج
ام الهضاب

المحوت بالجاج تخدمي صوص blanche بصدر جاج و معه كمشة حمص و كي يطيب تخرجي الصدر و اتفتيه فتات خشين شوي ثم تخفقي بيض مثلا 3 مع ملح فلفل اسود و معدنوس تحكمي طرف الجاج و تغطسيه داخل البيض ثم داخل المقلاة فيها زيت سخون و كملي طراف الجاج حتان تخلصيهم لوحيهم في المرق يغليو زوج دقايق و طفي لازم المرق خاثر يعني ما اتكثريش المريق و زينيه بالقارص و المعدنوس احناي هذا انقولولو المحوت

[sidali 2007]

8حبات بيض+ شوية بصل ومعدنوس +لحم مرحي معنديش مزان+3م كبار شابلور+نص كاس حليب ملح وفلفل اكحل
شوفو انا عيني مزاني

[oum ibrahim]

ام محمد تاج
البريك
نغلي البطاطا مقطعة وكي طيب نحيها ونصفيها مليح ونضيفلها ملح وفلفل أسود ومعدنوس وشوي فرماج
نحط ورقة الديول على صحن شوي غامق ونحط شوي من حشوة البطاطا يعني مقدار مغرف كبيرة ونسقمها بيدي مليح ونعمل مثل السور ساير داير ونخليه فارغ في الوسط وعلى الجوانب نحط الطون والفرماج وبسرعة نكسر بيضة في الفراغ لي في الوسط ونملح بسرعة ونغلق لبريكة ونحطها طيب على نار متوسطة ونقلب حتان تتنفخ يعني طابت البيضة وكاين لي يحب البيض نص طياب هذا حشو البطاطا ونديرو بحشو اللحم مرحي عادي وساعات نديرو بحشوة البطاطا مخلطة مع اللحم والله يالحبيبة من الموجود
السفيرية

مرقي مرقة بيضاء عادي بالجاج وغلي الزيتون من جيهة
وغلي بطاطا كي تغلي قشريها وهرسيها بالفرشيطة وضيفيلها البيض بالشوي ماتجيش جارية وماتجيش يابسة المهم تقدري تكوريها وزيديلها معدنوس مقطع وملح وفلفل أسود ومبعد شكلي صبيعات وأحشي في وسطهم الفرماج من الأحسن فوندو وشكليهم صبيعات ورديهم في الفرينة ثم البيض ثم لاشابلوغ وأقليهم في زيت حامية وقلبيهم بالخف باه ما يتحلوش
كي تخثار المرقة تاعك ويغلي زيتونك حطي السفيرية في طبق التقديم ولوحي فوقها المرق وزيني باه تحبي بالبيض مغلي والقارص والمعدنوس

[بريق الامل&]

ام مريم اسراء

بالنسبة الأرنب في الكوشة اختي سهام الجلفاوية اولا لازم تبليه اغسليه و تحطي شوية زبدة أو زيت في صحن و تحطي التوابل و هي شوي فلفل اسود و ملعقة كبيرة كمون و ملعقة كبيرة راس الحانوت و شوية ملح و قرفة و العود لصفر و تقطعي المعدنوس و تمسيح هاد الخليط مليح على الأرنب و نفس الشيء من داخل إذا مكفاتكش التتبيله عاوديها و من الأفضل طيبية غي أكياس الشواء لانها احسن إذا معندكش اعملي الألمنيوم حطي فيه شرائح البصل دواوير أو جوانح و شرائح الطماطم حبة كبيرة و ثلاثة سنوات ثوم قطعيها طرونشات و قطعي حبة فلفل حلو إذا حبيبتي و فرشي المعدنوس و حطي الأرنب و لفي الورق نتاع الألمنيوم بأحكام و إلى الفرن تقدي تطيبي لو أرز أو طواحين الزيتون بالجزر و تقدري تقديمه مع الصوص نتاعك بال شكشوكة مع لابوري

[بريق الامل&]

أم محمد تاج
تكرمي يا أم ابراهيم تعبك راحة
نغلي البطاطا مقطعة وكي طيب نحيها ونصفيها مليح ونضيفلها ملح وفلفل أسود ومعدنوس وشوي فرماج
نحط ورقة الديول على صحن شوي غامق ونحط شوي من حشوة البطاطا يعني مقدار مغرف كبيرة ونسقمها بيدي مليح ونعمل مثل السور ساير داير ونخليه فارغ في الوسط وعلى الجوانب نحط الطون والفرماج وبسرعة نكسر بيضة في الفراغ لي في الوسط ونملح بسرعة ونغلق لبريكة ونحطها طيب على نار متوسطة ونقلب حتان تتنفخ يعني طابت البيضة وكاين لي يحب البيض نص طياب هذا حشو البطاطا ونديرو بحشو اللحم مرحي عادي وساعات نديرو بحشوة البطاطا مخلطة مع اللحم والله يالحبيبة من الموجود

[بريق الامل&]

*أم كوثر*
ام اسلام سلامتكم اختي ربي يحفظكم
ساكورا
وصفة الكوكا
قطعي كمية البصل مكعبات وقليهم في شوية زيت مليح وفلفل اسود وملح حتى يدبالو
من بعد ارحي الطماطم في ميكسور وضيفيها وخليهم على النار حتى تنشف
تبرد واستعمليها

[ام تقي الله]

بارك الله فيك بروقة افكارك دائما نيرة
لكن نقول لكل من يغلي الزيتون الاخضر باش يخدم بيه ان الزيتون باللغلي راح يفقد البنة الحقيقية نتاعو لذلك من الافضل له تحطيه في الماء البارد مدة 5دقائق واعيدي العملية مرتين راح يبقى هو هو في اللون والبنة وشاد روحو فقط مافيهش الملح
وهذا عن تجربة جربوه ورديولي الخبر

[بريق الامل&]

*أم كوثر*
حشوة لي شوسون
نحشيها حسب الموجود
تع لبارح
قليت لحم مرحي مع زيت وملح وتوابل وفلفل اسود وشوية هريسة وطماطم حب على النار حتى تنشف
ولما نحطها على العجينة ندير فوقها فرماج
موالفة نحشيها كما الكوكا بصل وطماطم مدبلين ونزيدلهم فرماج

[بريق الامل&]

*أم كوثر*
الله يسلمكم اخواتي
طريقتي في الطاجين الحلو مختلفة تماما والصراحة دقتها مرة في عرس وعجبتني بزاف وسقسيت وتحريت وجبت قرارها هههههههه
ماتستغربوش كي نقلكم بلابصل نعم بلابصل
جيبي طراف لحم
في طنجرة ديري مغرف كبيرة زبدة لما تدوب اضيفي قطع اللحم واقليهم مليح من بعد ملحيهم وديري شوية قرفة وامرقيهم غير شوية بالماء
لما تغلي ويقرب اللحم يطيب ضيفي فنجال صغير سكر وخلي يغلي
من قبل تكوني ناقعة العوينة والمشماش والزبيب في ماء زهر حتى ينتفخو
انقعيهم قبل ماتبداي طياب
نضيف العوينة ونخليها تطيب تماما حتى تطرى وتخرج هداك اللون الزين اللي الكل يعتقد انو كرامال السكر
اخيرا نضيف المشماش ونخلو الكل يغلي لما يطرى المشماش ويعقد المرق نضيف الزبيب ويغلي مرة زوج ونطفي لانو ادا بالغنا في طياب الزبيب يخرج المرق حامض
ادا عندك اضاافات متل الشباح ضيفيها في الاخير وديري قطرات ماء زهر وطفي
وعند التقديم زينب بانصاف اناناس او لوز ايفيلي اوكما تحبي
انا هنا قلت فنجال صغير سكر لاني نطيب كمية صغيرة انتم حطو السكر وذوقوا والمرق في الاخير لازم يكون عاقد شوية
والصحة والراحة

[بريق الامل&]

*أم كوثر*

لعيون ام لقمان وصفة الحميس

جيبي فلفل حلو وفلفل حار وطماطم
انا ندير 2 فلفل حلو
2 فلفل حار
حبة طماطم كبيرة
نشويهم على النار منحبش نشويهم في الكوشة

نحطهم في ساشي ونغلق عليهم
يبردوا نقشرهم بسهولة
نغسلهم ونقطعهم قطع صغييييرة منحبش نرحيه والا ندقوا
كي نكمل نخلطهم مليح ونملحهم
نديرو في صحن التقديم
ومن فوق نحط زيت زيتون
نزين بحبات زيتون او بيض مغلي
هدي طريقتي
كاين لي يزيد التوم والبصل وكاين لييديرلو فينيقرات انا نحب كما هك
ومرة اخرى اعذريييييييييني لاني ماشفت طلبك

[*أم ثازيري*]

الدوبارة

kiya



اما الدوبارة ترنخي الفول في الماء مع الملح ليلة كاملة وغدوة بدلي الماء ودريه في الكيكوت يطيب
بعد مايطيب ادا لقيية نقص الماء اع زيديلو شوية ماء ودري ف طبس شوية زيت وفلفل احمر راس احاوت وثوم وملح وفلفل حار مقطع وطماطم تاع باطة ورفدي حبة طماطم وقطعي ادبشة وزيدهمولو وخليه يقلي شوية ولوحلو 2حبات فلفل ولا 3 و تقدميه زيدي قطعيلو الدبشة

[بريق الامل&]

م أسماء 2
اختي وصفة المطلوع كالاتي

رطل فرينة + 6 مغارف زيت + ملح حسب الذوق+ ملعقة خميرة مذابة في نصف كاس ماء ذافء + 6 معالق حليب غبرة + ملعقة خميرة كيميائية
يخلط كل المقادير ونلمهم بالماء حتى نتحصل على عجينة تكون تتلصق في اليد ونتركها تخمر حتى يتضاعف حجمها وبعد ذلك نشكل اقراص صغيرة ونرمدها في السميد ونبسطها على منذيل ونتركها ترتاح للمرة الثانية تسخني طاجين الخبز ان لم يكن عندك مقلة تيفال وتحطي الخبز فيها وتتركيها تنضج يجي خفيف وخاوي من الذاخل
ارجوا ان تكوني قد فهمتي طريقتي

[امونة الشاوية]

يعطيك الصحة حبيبتي موضوع ثري استفدت منو قداه من حاجة
تعيشو البنات نعتولي كيفاه تطويو البوراكة مثلث انا نشمشرهما ونلكمتها فقط حتى تولي شبه مثلث ومعتادة نشوف البنات تجي البوراكة منظمة ومليحة

[ladymillion]

المشاركة الأصلية كتبت بواسطة ladymillion
باتيلا حبيبتي انا صح صح عجبتني لابات نتاعك ديري 3 طبقات من لابات اثقبيهم بالشوكة وحطي كل طبقة فوق صينية وزيدي حطي فوقها صينية وحطيهم في الفرن حتى تحمار راكي تعرفي باتيلا
كريم باتيسيير :
نصف لتر حليب. صفار بيضتان. فنيلا. 50g نشاء او قرينة حسب واش عندك "تاع الفرينة تجي بنينة". 100g سكر عادي
الطريقة : تضربي الصفار مع السكر و النشاء او الفرينة و الفنيلا ثم تبداي تظيفي كمية قليلة من الحليب تنقليها على نار هادئة و تستعملي le fouet و تكملي الحليب تدريجيا تخليها عى النار مع مواصلة الخلط حتى تتخثر و طفي لما تخليها تبرد غطيها ب le papier film يعني خليه يلمس سطحها و حطوها في الثلاجة باه ما يشكلش تلك الطبقة اليابسة
حاولي ما تستعمليش الاناءات لي دير زروقة لما نخلط فيها بالمضرب

وطلعي كريم شانتيي وخلطيها مع كريم باتيسسير
ديريها بين كل طبقة
والطبقة الفوقانية ديري fondant ذوبيه في حمام مائي واذا جامد بزاف زيديلو الحليب كاينة نوعية جامدة بزاف قادرة طيحي فيها
والخطوط نتاع فوق ديري اذا عندك كراميل أو ديري شوي عسل + كاكاو أسود وخلطيهم راح يولي عندك خليط كي الكراميل وديري الخطوط هاذوك كيما تعرفي الميل فاي من فوق حبيبتي

[oum ibrahim]

ام رامي
البقلاوة
ثلاث كيلات فرينة كيلة نشاء كيلة سمن او مرغرين ذايبة وماء زهر ذرة ملح وقطرات خل تعجنيها مليح تقطعيها كريات وغطيهم يرتاحوا من بعد حلي الكريات وادهني وسطهم بمرغرين التوريق 6 من فوق و6 من تحت وفي الوسط الحشوة معروفة وزيني البقلاوة بوردات من نفس العجينة
طيبيها وعسليها فقط