موكا كريم مع اللوز المحلى من مطبخي

[omaymen]

السلام عليكم اخواتي واش راكم ان شاء الله بخير
جبتلكم وصفة رائعة يارب تنال اعجابكم... هي حقيقة بنينة بزاف وهايلة
نعطيلكم ان شاء الله المقادير

بالنسبة للجنواز: 4 بيض,110 غ سكر ,110غ فرينة,نصف ملعقة خميرة كيميائية
نضرب البيض مع السكر لمدة 10 دقائق حتى يولي الخليط على شكل رغوة ثم نضيفو الفرينة والخميرة الكيميائية
ندهنو المول ونحط الخليط فيه ونطيب الجنواز في فرن يكون ساخن على درجة حرارة 180 درجة لمدة 15 حتى 20 دقيقة









la crème mousseline praliné
250غ حليب(ماتتعجبوش الحليب بالغرام هكذا الوصفة تقول) ,115 غ زبدة,70غ سكر,2 صفار البيض,30غ نشاء,75 غ chocolat pralinois(انا ماتوفرتش عندي درت نوتيلا )

نسخن الحليب مع 10 غ سكر
والسكر الباقي نخلطوه مع صفار البيض و النشاء
نضيف شوية من الحليب السخون مع الخليط( النشاء وصفار البيض و السكر) ونعاود نرجع كلش في الكسرونة مع الحليب المتبقي نحرك جيدا حتى يعقد كلش مليح ومن بعد نضيف النوتيلا ونحرك جيدا

نضيف55غ الزبدة معاه ونحرك حتى تذوب مليح

نحطوه في صحن غامق حتى يبرد تماما

كيبرد مليح نبداو نضيفولو الزبدة المتبقية على 3 مراحل ونخلط جيدا (من الاحسن ديرو هذا العملية بالباتور او الروبو)حتى يتبدل اللو ن وتولي كريمة خفيفة, نحطوها في frigoتبرد جيدا باش نقدرو نستعملوها

انا الجنواز ديالي شربتها بالسيرو

درت 2 كاس ماء,كاس سكر,قطعة من الليمون وخليتو يغلي مدة 15د

تقدرو تزينو الجنواز كيما تحبو نتوما ,انا درتلها الشيكولا المرحية وشبحتها بحبات الكرز المجفف

ملاحظة:250 غ حليب= 1/4 ل حليب

ان شاء الله الوصفة تكون نالت اعجابكم راكم عارفين تحميل الصور و الكتابة ماشي سهلة بصاح علجالكم كلش يهون
احبكم في الله اخواتي