قصتي مع وحش البيام °_°

[اَشْرَفْ اَنيِسْ]

انا تلميذ في السنة الاولى ثانوي
اذكر انني عندما كنت في السنة الرابعة متوسط اتشوق لقراءة مثل هذه القصص من طرف الاعضاء المنتقلين و و جدت احدى العضوات كتبت موضوعا بعنوان قصتي مع وحش البيام
كانت دراستي جد عادية خلال السنة الدراسية كنت خائفا جدا من مواد الحفظ لاني اعتقدت اني سأنسى ما حفظته
و قلت مستحيل ان احفظ جميع البرامج تمت اختبارات الفصل الاول
تحصلت على معدل 17
و بدأ الفصل الثاني و دقيقة بداو الاختبارات و المعدلات و تحصلت على 18
و بدأ الفصل الاخير و اقتربت الشهادة بدات الاختبارات و كولش و بدأ العد التنازلي للشهادة
رتبت توقيتا انا و امي و كنت نمشي على حسابو لكن ساعات مانلتزمش بيه
المهم حليت جميع الشهادات التعليم المتوسط و بالفعل جاءت بعض الاسئلة مكرر
اليوم السبت غدا الامتحان اصفر وجهي قبل وقته ههه
لم اراجع تلك الليلة المهم نوضت الصباح صليت سجيت روحي و اوراقي فطرت و روحت انا و اخي التوأم في التاكسي وصلنا للمتوسطة و كانت متوسطتي وجدنا بعض الاصدقاء و هم يراجعون نعم هههه كتبو ملخصات و يراجعو فيهم انا هزيت الاوراق و بديت نراجع شوي
دخلنا للمتوسطة خلع و خوف كبير بديت نحوس على رقم الحجرة و لقيتها و جيت في القسم الذي اكرهه و صبغوه بالاخضر القاتم ظلمة بدأت ابحث عن اسمي في الطاولات لم اجده هههه لقيت روحي في اخر طاولة في الصف الثاني صونات و بداو يوزعو في الاوراق وحد الخلعة تمنيت كون مدخلتش ههه عطاولي الموضوع لقيتو يهطر على التدخين بديت نضحك ههه هادا هو تنحات الخلعة كملت راجعت و كولشي نورمال و دخلنا للفيزيا تنحات الخلعة مع الاول فرات
كملت تغدينا في المتوسطة و بدينا لعشية في الاسلامية جا للقسم تعنا و جابو الساجيات و يخلطو فيهم و جابو لمقص انا تما خلعت عطاونا لي سوجي تنحات لخلعة و نورمال روحت و الحمد لله
و كان كابوسي هي الرياضيات روحت بديت نراجع فيها التاريخ و الجغرافيا و الانجليزية مارجعتهومش رجعت غير الرياضيات
اليوم الثاني خلعت بزااااف وصلنا عطاونا المواضيع و قلبت الورقة على الوضعية الادماجية تمنيت كون عطاونا على الدوال لكن لا تاتي الرياح بما تشتهي السفن بديت نحل مع لخلعة هاديك نسيت كفاه نحسب PGCD و غلطت فيه و روحت لتمراين خرين بقات ساعة وصلت للوضعية حليت وحدة زيها في البيام نتاع 2008 كانت عندي فكرة عليها بديت المهم وصلت لتمثيل الدالة ماخرجش مليح خليتو راح عليا الحال رجعت للتمرين الول و فاصيتو و عاودت حسبت صونات قولتلهم نكتب دقيقة خلاوني كملت و الحمد لله و التاريخ و جغرافيا و الانجليزية راحلي منهم لخوف جا ساهلين
اليوم الاخير راجعت العلوم و الفرنسية و خدمت فيهوم و الحمد لله راحلي لخوف خلاص
و بدات النتائج و قول يوم يقولو غدوة و الليلة و المواقع الكاذبة ... الخ انا كل يوم نزور الموقع دارو الاعلان فنهار بلي راح يعلنو النتائج شعلت لميكرو و حليتو على الصفة و بقيت ندير اكتياليزي فجأة تحلت الصفحة و بدات الخلعة بديت برقم تسجيل اخي لقيتو دا و درت رقم تسجيلي غلطت فيه المرة الاولى و المرة الثانية ههه و المرة الثالثة جا لقيت روحي ديت ب 17 كنت طامح ل 18بصح نورمال و شفت ارقام تسجيل لي يقراو معايا فوتلهوم
- النهاية -