السلام عليكم يا قمرات
وحشتوني جداً، أنا الحمد لله رجعت من السفر ومكملة معاكو الموضوع إن شاء الله
احنا دلوقتي وصلنا إن عندنا روتيني صباحي و مسائي و روتين أسبوعي
الروتين المسائي :
- مواعين العشا تتغسل و الحوض يتلمع و يتنشف (لو كسلتي اعملي التايمر على 15 دقيقة وقولي أنا هخلص اللي أقدر عليه في الوقت ده وبعديها أروح أرتااح هتلاقي نفسك يا إما خلصتي كلو في الوقت ده يا إما فاضل لك حاجة بسيطة هتتشجعي تخلصيها )
- امسكي hot spot (حاجة في شغل البيت عاملالك عقدة نفسية وقربتي تروحي الدكتور بسببها هههه ) وإشتغلي عليها 5 دقايق بسسس
- تحضير لبس بكرة (حتى الستات اللي قاعدة في البيت ... اللبس حاجة مهمة للراجل، مش لازم ديماً لبس مغري حتى اللبس العادي لو كان شيك و عليه قيمة و مناسب لجسمك بيديكي ثقة في نفسك )
- أذكار ما قبل النوم
الروتين الصباحي :
- صلاة الفجر
- العناية الشخصية (شعر، أسنان، منظف حلو للوجه، مرطب، كحل، أحمر خدود خفييف)
- ترتيب السرير
- صلاة الضحى
وعيزاكو إجباري تكتبو كل حاجة في الثلاث ورقات اللي قلنا عليهم
النهاردة هنزود شوية في الروتين و هنتناول عملية Decluttering أو التخلص من الأشياء اللي ملهاش لازمة و بتسبب الكركبة و الإزدحام في البيت، احنا الستات عندنا عقدة خطيرة و هي إننا مش بنحب نرمي حاجة يعني ممكن نحتفظ ببرطمان المربى لو شكله حلو، طقم الاطباق اللي بقالك 5 سنين مستعملتهوش، ملابس أولادك اللي بقت ضيقة عليهم، الكرسي أبو رجل مكسورة اللي من أيام الحملة الفرنسية ههههه وغيره و غيره
لو تلاحظو بيوت الغرب تحسيها شيك حتى لو العفش بسيط عشان مفيش كركبة، و بتدق إحساس بالراحة و بتبين المنزل واسع
أنا عيزاكو تشتغلو في عملية ال-Decluttering أو التخلص من الفوضى دي على مهلكو، يعني ممكن البيت كله ياخد في ايدك شهرين أو أكثر
أدوات "التخلص من الفوضى":
3 كراتين كبيرة
كرتونة للأشياء اللي مبقاش لها أي لازمة و هتترمي
و كرتونة للأشياء اللي لسة كويسة بس مبقتيش تستعمليها ومن الأفضل تتصدقي بيها
وكرتونة للأشياء اللي حاسة إن مكانها مش الغرفة دي ولازم تتحط فمكان تاني في البيت
اضبطي التايمر على 15 دقيقة وابدئي الشغل
وعشان تعرفي الحاجات اللي بتسبب الفوضى ولازم تتخلصي منها اسألي نفسك الأسئلة دي :
- هو الحاجة دي عزيزة عليا للدرجة دي ؟
- أنا استعملت الحاجة ولو مرة السنة اللي فاتت؟
- هي بقت فعلاً غير صالحة ومكانها الطبيعي سلة المهملات ؟
- هي الحاجة دي عندي منها إثنين ؟ هو أنا فعلاً محتاجة الاثنين ؟
لما الكراتين تتملي، خدي كرتونة الصدقة و حطيها على جنب لغاية متديها لحد يستحقها و خدي كرتونة الحاجات اللي هتترمي و ارميها قبل ما ترجعي فكلامك هههه و كرتونة الحاجات اللي مش في مكانها لفي بها على كل الغرف و حطي كل حاجة في مكانها المناسب
ممكن نفس الغرفة تاخد منك أسبوع، إشتغلي بس ال-15 دقيقة عشان متتعبيش و متيئسيش
و كل سنة و انتو طيبين