مشاركتي في مسابقة وصفة تقليدية بلمسة عصرية - طاجين الزيتون

[سيرين 5]

السلام عليكم صديقاتي هاذي أول مرة نشارك في مسابقة من مسابقات الطبخ إن شاء الله تنال إعجابكم
أولا و قبل كل شيء شكرا لصاحبة الفكرة عجبتني كثيرا لكن من سوء حظي زوجي ما يحبش طاجين الزيتون و أنا راني ريجيم كيما علابالكم
لذلك قررت ما نخبرش زوجي بلي راح نطيب طاجين الزيتون لكن هو فضولي و يحب كرشو كل يوم يحب يعرف واش راح ندير للعشاء
طيبتو بالخميس الماضي قبل ما يصل للبيت كالعادة يتصل واش نجيب و واش راح نتعشاو ؟؟؟ قلتلو مفاجئة و طبعا راني نطيب صحي لذالك الطبق عملتو صحي مئة بالمئة

1- في طنجرة رابيت بصلة + دجاج + م ك زيت زيتون + ملح + فلفل أسود +شويا كمون و قليت البصل حتى ذبال بعدها حطيت حبات جزر مقطع دوائر يتقلى هو الآخر



2- بعد ما تقلى البصل و الجزر مرقت بماء ساخن و حطيت ورقتين رند و خليتها طيب في غرضها



3- في الأثناء قليت شويا فيوند آشي بالثوم و الملح و الفلفل الأسود و حطيت عليه زيتون مرحي منقوع في الماء مع قطعة خبز ليلة كاملة لكي تمتص الملح الزائد منه + معدنوس + شويا فلفل أسود + شويا كمون + م ك جبن طبيعي و نجمع بالبيض



4- استعملت هاذ الأشكال في طهي اللحم المرحي و الزيتون



5- هنا دهنتهم بشويا فقط زيت زيتون باش الوردات ما يلصقوش و يجو محمرين شابين و عمرتهم بالخليط تاع الزيتون و الفيونداشي و إلى الفرن



6- و هنا المرق طاب و أصبح عاقد و الدجاج دهنتو بشويا زيت زيتون و حمرته في الفرن



7- و في صحن حطي المرق و حطي وردات الزيتون و الفيونداشي و الدجاج و إليكم الطبق مممممم قدميه بالصحة و الراحة







و في الأخير استمتعي بأحلى عصير برتقال و بومبلوموس بدون أي إضافات ممممممممم



زوجي قالي واشنو هاذ الماكلة قلتلو من اختراعي بدا ياكل في الوردات قبل ما نسقي كي كلا و كمل و عجبو قلتلو هذا طاجين الزيتون بلمسة بنت اليوم هههههههه