طبقت البغرير فوق الكرلاجة وخرج هايل شكرا لكن حبيباتي

[islam1aya]

السلام عليكم

طبقت بغرير حبيباتي الغاليات

ام ماجد وبروقتي وليدي ايمانو


هههههههه

مقاديير ليدي ايمانو زدت عليهم ااظافة الحليب والزيت لام ماجد ووعملت بنصائح بروقتي ونجحليي الحمد لله
وانا طيبتو فوق الكرلاجة عمتي ربي يحفظها قاتلي على العفسة
شوفو بدا يتثقب من الاطراف كما قالت بروقة علامة النجاح ههههه

اليكن الوصفة التي اعتمدتها

400غ سميد رطب نوع مممتاز جاني حوالي بول تع شربة
300غ فرينة حوالي 2كاس
ملعقة كبيرة خميرة الخبز
ملعقة كبيرة حليب بودرة
ملح ملعقة صغيرةماش معمرة
2ملاعق كبيرة زيت
3بيض حجم متوسط
نصف كاس حليب
1خميرة الحلوة
ماء دافئ
طريقة التحضير
درت السميد والفرينة ووخميرة الخبز والسكر والملح وببودرة الحليب وخلطتهم مليح اضفت الزيت وبديت نبل العجينة بالماء ماجرتهاش بزاف وبديت نعجن عادي كما نعجن اي عجينة باش السميد يدير الخيط ويجي مليح بعدين بديت نجري العجينة بالماء كل مرة ندير الماء ونعجن براحت اليد ثم زدت البيض حليتهم بالاصابع في العجينة واضفت ونصف كاس حليب ونعجن دائما براحة اليد
نحط الخليط في قدر نغطيه ونتركه قدام الطبونة شاعلة ونحط الكرلاجة نوع gرانيطونوع الخشين ماشي رقيق و تسخن مليح بعد نصف ساعة نلاحظ الخليط دار فقعات نخلط الخليط بالغراف ونزيد عليه 1خميرة الحلوة ونخلط ببطئ
بعدها تكون الكرلاجة سخنت مليح ادهنيها بصابون الطرف مليح ثم امسحي بطرف قماش فيه شوية زيت وامسحي جيدا ثم ابداي اطيبي وكري العملية بين كل 3 حبات

الزبيب تخليه يتنفخ في الماء الساخن حوالي ساعة منقبل ثم صفيه ونشفيه وغير تحطي العجينة اطيب حطي حبات تع الزبيب من الفوق












قدمتو مع العسل والزبدة



شكرا لكن غاليتي ام ماجد ربي يحفظلك الوليدات

وايمانو ربي يرزقك بالزوج الصالح

وبروقتي ربي يرزقك بالذرية الصالحة
اليكم الروابط للاستفادة

https://www.djelfa.info/vb/showthread.php?t=1396450
https://www.djelfa.info/vb/showthread.php?t=1195741
https://www.djelfa.info/vb/showthread.php?t=1400779

مع تحيات ام اسلام واية ويوسف