بيتزا x بيتزا نتحداكم جميعا بعجينتي المميزة

[عماني نور]

السلام عليكم و رحمة الله و بركاته
ان شاء الله كاااامل تكونوا ملاح و بصحة و سلامة

~
وليت نتحدى يااااه هههههه بصح صدقوني عجينتي للبيتزا صح مميزة ،، و مستحيييل تجربيها و تستغني عنها

و تقدري حتى تخدمي بيها لي توغت ،، و مام تسحقي خبز ديريها و طيبيها على شكل خبز والله تجي هاااايلة

احنا فالدار معتمدينها و معتمدين عليها ،، و الحمد لله عمرها ما خيبتنا ^^

يعني ناااجحة ناااجحة بإذن الله

و مام تخبيها فالكونجيلاتوغ تبقى شحال تبقى مايصرالها والو ،، و تجي خفييييييييييييييفة و طرية (( انا مانحبش البيتزا الي تجي كيما الفطير ،، مانحسش كااامل بلي راني ناكل ))

بصح هاذ العجينة تخرج منفوخة الله الله و بنيييييييييييينة ، زيديلها صووص مليحة من فوووق مانحكيلكش ممممممممممممممممم لا تقاااوم

المهم مانطولش عليكم

نعطيكم الوصفة ،، و اسمحولي لأني ماصورتش الطريقة ،، عندي صورة لبيتزا درتها في أول أيام رمضان الي فات ،، و كي شفت وصفاتكم قلت والله غير نحط مام انا الوصفة تاعي و تحديتكم بيها لأني واثقة من روووعتها

يلااااا نبداو بسم الله :

المقادير :

- كأس زيت .

- كأس حليب دافئ .

- كأس ماء دافئ .

- ملعقة كبيرة خميرة الخبز .

- ملعقة كبيرة سكر .

- ملح (( حسب العبار الي راكم تعبرو بيه ،يعني عينكم ميزانكم بصح ماتكثروش ))

- 2 حبات بيض .

- علبة ياغورت طبيعي (( هذا هو سر الطعم الخطييير و الخفة اللامتناهية ))

- فرينة ... حتى تتلم العجينة .


التحضير :


خلطي السوائل مع بعض : البيض + الحليب + الزيت + الياغورت + ماء .... نضيفلهم الخميرة و السكر و الملح ... و نلم بالفرينة

لازم العجينة تجي طرية ،، ماتكثروش الفرينة

غطيها بكيس بلاستيكي ،، طرشون و خليها تخمر


حضري الصلصة ::

أنا شخصيا نموووووت على البيتزا بالطون ،، و على هاذيك دااايما ندير هاذ الصلصة

(( ماتستغربوش كي تشوفو البيتزا معمممممرة بلاصوص راني نموووت عليها ))

- حبة بصل نقطعها قطع صغيرة جدا + حبة طرشي (( فلفل أخضر )) مقطعة قطع صغيييرة جدا ... نقليهم مع بعض حتى يذبالو

نرابي 2 حبات طماطم كبيرة حمراء + ملعقة كبيرة طماطم مصبّرة ... و نفرغهم فالمقلاة ... نزيد التوابل " عكري + فلفل أسود + زعيترة + و الملح اكيييد

كي تطيب الصلصة ،، نحل العجينة ،، نديرها خبزة أو ميني بيتزا

نحطها في سنيوة ،، و نحط الصلصة فوقها و نبدا نوزع الطون كيما نحب (( تونة بالطاطم أو الطون الطبيعي الي يجي غير مع الماء و الملح )) ،، و نحط الزيتون ،، و المعدنوس (( الي يحبو )) ،، و الفرماج

ندخلها تطيب


و تبدى ريحتها تعبببببببببببق و تشهيييييي

و بالصحة و الهناء


نتمنى تجربوها باش تفهمو احساسي و انا نكتب ..... تهبل تهبل تهبل

و تجي خفييييفة و بنينة و تشبع أهم حاجة

يلاااا الله قولولي رايكم زعما قد التحدي .؟؟

و ماتضحكوش على بيتزاتي راني نحبها هكذا معمممممممرة و محممممرة

علابيها دبدوبة

~

(( بالنسبة للصور والله راني من 6 تع لعشيا و انا نسيي نطلعهم ماحبوش ... حطيت واحدة فالمرفقات مي ماعجبتنيش تبان شكشوكة ماشي بيتزا .... المهم الوصفة راهي الفوق ،، و الصور نحاول ممبعد نحطهملكم ~ ))