شاركونا ... جازاكم الله خيرا - الصفحة 3

أم أروى · 2014-11-25, 15:08

السلام عليكم ورحمة الله وبركاته
بارك الله فيكن
كل المعلومات الي حطيتوها راهي صحيحة
اختي طوكيو المعلومة الي قلتيها على السكر راهي 100 بالمئة خص نفهموا الاهل ديالنا بيها انا سمعت بيها مؤخرا قبل شهر رمضان وزوجي اقتنع بها
بصح ارواحي انت وفهمي الاخرين قالك لازم السكر باه اديري الطاقة قتلهم عوضوه بسكر طبيعي يعني حليوا بالعسل ولا التمر او فواكه موسمية اخرى وهناك ابحاث كثيرة تبين ان السكر يثبط التقدم الدراسي والفهم
فهمواولادكم غير بلعقل قوللهم هادي سموم و تسببلكم المرض يعني برمجولهم عقلهم والله الموفق

ام نهوله · 2014-11-25, 15:59

ام اروى اكيد نمدهالك اصبري عليا نصورهالك باش تعرفي كيفاش دايرا
تصيبيها في الكوزينه و نهار نطيبها نحطها لاختي
ديري فيها غير البصل والثوم و لفت مقطعه زروديه و الطماطم مخلعه نديرها انا
و التوابل

Memories · 2014-11-25, 16:00

موضوع في القمة بارك الله فيك اختي زينب.. لي عودة ان شاء الله للمشاركة..

زينب 83 · 2014-11-25, 16:39

شكرًا ليكم حباباتي
ام نهولة راهي عجبتني قصة بارد في بارد فهميني فيها

*أم جابر* · 2014-11-25, 16:37

السلام عليكم ورحمة الله و بركاته

بارك الله فيكن اخواتي و الله موضوع في القمة ففي الكثير من الاحيان نتبه للكمية و الذوق دون الانتباه للمصدر و النوعية فنحن نفتقد للثقافة الصحية كثيرا
جزاكما الله خيرا

Memories · 2014-11-25, 16:50

اختي زينب على ما اظن ام نهولة تقصد ببارد في بارد انها ماتقليش المكونات يعني تمرق مباشرة بالماء و في الاخير تزيد ملعقتين زيت زيتون

ام نهوله · 2014-11-25, 16:56

زينب اختي على عيني و راسي
الحريره مثلا نقطع البصل غير على ربعه الزروديه كيف كيف البطاطا القرعه الكرافس الحشيش
الثوم الطماطم صدر دجاج والتوابل اللى كنت حطيتيهم و2مك زيت زيتون والماء
وحطي فوق النار كي يطيب كلش نرحيه مع قطرات ليمون والجاج فتتيه و شهيه طيبه

عازفة الناي · 2014-11-25, 16:58

ماشاء الله
زينب و كل الاخوات عندهم حق في اللي قالوه
نهتموا ايضا بالنظافة وغسل الخضر والفواكه جيدا لان فيها كيماويات وخلافه
المهم نحاولو ندخلوا مكونات صحية لاكلنا
بذور الكتان جد مفيدة نضيفها في السلطة
الشوفان صحي وهايل جدا نديرو شربة او في الخبز او نطيبو مع الارز بالحليب هايل ومفيد
ايضا السانوج لازم في الكسرة و الخبز
الحلويات ناكلو المخدومة في البيت لانو نعرفوا المكونات ونهتموا بنظافتها
كي نتفكر لي عودة

أم محمد تاج · 2014-11-25, 17:07

سلام عليكم
والله مين طرحتي الموضوع وانا مترددة نشارك المهم اولا الله يعطيك الصحة على المعلومات القيمة انت وام اروى والف شكر على الوصفات والصراحة متمنية كيما قالو الاخوات نرجعو شوي للغذاء النباتي الطبيعي وماكلة جدودنا بصح يالحبيبة منين تبداي ومنين تخلصي
يالحبيبة انت تقولي غذاء صحي وينهو ??????? اذا الشعب الجزائري راه ياكل بطاطا مدودة موجهة كغذاء للخنازير كرم الله وجوهكم ودجاج محقون بالهرمونات السامة القاتلة والحليب يجينا غبرة من الخارج من اسرائيل واتباعها الله اعلم واش فيه يا اختي منين نبداو الغذاء الصحي والفواكه الموسمية عادت كل وقت مثل الدلاع موجود حتى في الشتاء وفواكه وخضروات البيوت البلاستيكية منين نتغذى صحيا اذا خضرواتنا مسقية بمياه المجاري المائية كرم الله وجهكم منين نبدا وغذائنا فاسد في فاسد ومسبب لسرطانات الله يعافينا منين نبدا ومنين نخلص وخضرواتنا وفواكهنا مداوية بادوية كيميائية تخترق الحبة مثل ماحدث مع قضية التفاح هاذ الايام ووووووووو والفضائح بزاااف بزاااااف الله يسترنا
لكم من الف تحية يالحبيبة كي الدولة تحافظ على صحة المستهلك ممكن ممكن نتناولو غذاء صحي

زينب 83 · 2014-11-25, 18:41

ام محمد تاج اذا خذينا بكلامك ، يعني نمو تو و السلام ، لالا حبيبتي ، هذا الكلام لي راك تقولي فيه راهو احباط ، و إذا نقيسو على كلامك نتخلاو او على كلشي في حياتنا، المجتمع راهو فاسد من كل النواحي ، أيما لا نبطلو الصلاة و نبطلو نتعلمو ولادنا الأخلاق و نبطلو كلشي مليح ، حبيبتي ما كان حتى شيء كامل في هذه الدنيا لكن الانسان لازم يتخذ الأسباب ، ماشي نأكل المقلي و نقول عندي كلسترول و الناكل الزبدة و الشحمة و نقول عندي القلب ، وماشي نأكل كيلو سكر في النهار و نقول الدولة هي السبب ، وماشي نهار كامل و انا نأكل في الخبز و الحلويات و نقول راني سمينة و أكيد راكي علابالك بلي بزاف أمراض سببها السمنة ، شوفي حبيبتي ماشي الدولة لي قابلتان اشربو كل يوم 2 قرع تاع فازور و اشرو لولاد كم الشيبس و الحلويات ، يا حبيبتي ماناش مضطرين ناكلو الفواكه في غير مواسمها و ماناش مضطرين نشرو الخضر الفاسدة و الحمد لله و الله الخير لي بلادنا ماكان في حتى بلاد
و الحمد لله ربي خلقلنا أعشاب و توابل تقوي مناعتنا و ان شاء الله تحفظنا من الأمراض ، و بإذن الله راح نأكل صحي و نقول عند كل وجبة بسم الله و ربي يحفظنا و يحفظك من كل سوء
النبي صلى اله عليه وسلم أمرنا انا نغيرو المنكر و ان راني نحاول بقدر المستطاع

المسلم يتخذ الأسباب و يتوكل على ربي و هو خير حافظا

بارك الله فيك حبيبتي على الرد مع أني تمنيت انو يكون فيه تشجيع اكثر

علابالي بلي مانديروش نغيرو كل شيء لكن نحاولو نقصو الأضرار على قدر المستطاع يعني ماشي هوما يهلكونا و حنا نزيدو نكملك على رواحنا

أم محمد تاج · 2014-11-25, 19:24

حبيبتي الله يخليك على المداخلة وكلامك الطيب بصح حبيت نقولك موضوعك يالحبيبة مايش على الاخلاق والتربية اسمحيلي كتبتي الغذاء وانا رديتلك على الغذاء وعلى المواد الطبيعية لي من المفروض ضاربين عليها رقابة مشددة واذا على الشيبس والسكريات كيما تقولي فانا وحدة من الناس ناكلهم بتحفظ ماكانش البديل وزيد تقولي العصائر الطبيعية يالحبيبة عصير البانان لي بعشرين الف للكيلو ولا الرمان ل 18ل الف للكيلو وووووووووووو والسكر تاع عشر آلاف حبيبتي رانا غرقين فالفساد وكيما يقول المثل واش يدير الميت بين يدين غسالوووووووو والمعيشة لي راكي تهدري عليها يالحبيبة راهي معيشة الايستقراطيييين مايش معيشة جزائري عادي شهار

om wassim · 2014-11-25, 19:35

يعطيكم الصحة على الموضوع القيم
انا ن نفسي الله غالب والفت السكر لكن وليدي عمره قريب 3 سنوات يشرب الحليب بدون سكر مايحبش الحلويات جامي كلا الشيبس او الكشير او المرقاز اكلو صحي الحمد لله
يوميا ندير الكسرة تاع النخالة
لازم نحاولو نتبعوا نظام صحي المرض كثر ربي يستر

om wassim · 2014-11-25, 19:54

و القازوز جامي نشربو انا و وليدي كاين بزاف حوايج نقدرو نستغناو عليهم
انا زوجي الله غالب مايخلصش مليح فالاول كان كي يقضي يجيب حاجة رخيسة بكمية كبيرة لكن مع الوقت اقنعتو يجيب خضرة و فاكهة مليحة معليش كمية قليلة

زينب 83 · 2014-11-25, 20:39

شكرًا ام وسيم ربي يخليلك و ليدك و يرزقك بفتاة معافاة و يسلكك على خير

راني حابة نقول بلي الأكل الصحي ماشي غير فاكهةو خضر ، الأكل الصحي هو انو نغيرو عاداتنا السيءة خاصة في طريقة الطهي ، يعني علاه لازم نقليش البصلة في الزيت في طياباتنا، والله انا ماندير الزيت في المرق كامل و الله الماكلة جي بنينة كيما الاخرى و احسن ، و علاه اللحم نقل يوه و علاه مانشويوهش، و علاه نقلو البوراك و علاه مانطيبوهش في الفور و علاه.............

لميس اميرة · 2014-11-25, 21:04

سمعت اخيرا معلومة جد مهمة سبحان الله

لما ناكلو التمر و يكون عدد فردي يعني 1 ولا 3 ولا 7 رح يستعملو الجسم على شكل طاقة

و لو كليناه بعدد زوجي رح يستغلو الجيم على شكل سكريات

يعني باختصار لي عندو السكري لازم ياكل التمر بعدد فردي حتى ما يطلعلوش السكر في الدم

و لي يعاني من السمنة كذلك ياكل بعدد فردي حتى يستغلو الجسم كطاقة و يحرقو