بغرير قبايلي على اصوله .... تفضلو حبيباتي و الله ساهل و البنة اممممم .....

[انا هي رزيقة]

نهاركم سعيد و مبارك ان شاء الله راكم كامل في احسن الاحوال

دائما ضمن سلسلة اكلات الجدات الطيبات جبتلكم اليوم بغرير قبايلي على اصوله ........صراحة جربت وصفات اكسبراس كثير نجحتلي طبعا بصح كانت فاقدة لعنصر مهم جدا لي هو بنة اليدين ... صدقوني يا بنات اخطر سر في اي اكلة هو بنة اليدين لذالك نلقاو دائما اكلات الجدات لذيذة لذة مبعدها لذة لا لشيء الا لانهن يستعملن ايديهن في الطهي و في العجن و في كل امور المطبخ... في حين نجد بغرير الميكسور مثلا مهما كان مثقب و الله يا بنات يفتقد للبنة الاصيلة ... هذا عن تجربة لذالك قررت ان الرجوع الى الاصل فضيلة و شمرت على يديا و خدمتو اول محرم الماضي و جبتلكم الوصفة باه تشاركوني متعتي مع عائلتي ...

نحتاجو سميد رطب طبعا انا استعملت غرفيتين كبيرتين تع الشربة ... السميد ملازمش يكون من النوع لي يتعلك يعني مشي هذاك لي نديرو به المسمن ..... و ملعقتين كبيرة خميرة الخبز و ملعقة كبيرة سكر و ملعقة كبيرة ملح .. و فقط يعني لا خميرة الحلويات و لا حليب و لا اي اضافات عصرية اخرى

نلم السميد تاعي بالماء ثم نعجنو حوالي خمسة دقائق على الاكثر قيس فقط منخليه يتشرب هذاك الماء... شفتو يا بنات سهولة مبعدها سهولة .... ثم نبداو نسقيو العجينة تاعنا شوية شوية بالماء يعني نلوحو فيها قيس فنجان صغير ماء و نعجنو حتى تشربو ثم نزيدو نفس القيس تع الماء و نعجنو حتى تشربو و هكذا .... صدقوني يا بنات العملية لا تاخذ وقت طويل بتاتا ... حتى يبدا العجين يتلاصق ... نواصل في وضع الماء مع الخلط باصباعتينا و حنا نشكلو حركات دائرية مثل عقارب الساعة مع اخذ العجينة بين يديينا و محاولة فركها كي تتفتت و تذوب ...مع خفق العجينة قليلا و دائما مع مواصلة وضع الماء و انتظار حتى تتشرب الكمية باه نزيدو كمية اخرى الهدف من اتباع حركة دائرية مع خفق العجينة هو ادخال الهواء في العجينة و هكذا حتى الحصول على القوام المطلوب لي هو عجينة البغرير انا مقدار غرفيتين معمرين بالسميد شربلي نفس المقدار من الماء بصح مشي معمرين لاحظو فقاقيع الهواء ...... هذي من الضروري التحصل عليها لضمان نجاح البغرير تاعك... ثم نفرغو العجين داخل اناء عميق ثم نخلوها تخمر ....هنا بعد ماختمرت شوفو الفقاقيع ماشاء الله

هذي قعدة قبايلية تع طياب البغرير ..... خخخخخخخ و هذيك الغرفية الصغيرة زيت زيتون طبعا

بعد ميسخن الطاجين.... النار لازم تكون متوسطة الى مرتفعة قليلا لان طاجين الطين يحب النار نبدا في طهي البغرير تاعنا بالاستعانة بالغراف طبعا... هنا كاين استوس مهمة جدا ... لازم كل مرة كي تجي تحطي بغريرة لازم تخلطي العجينة تاعك بحركة دائرية مع اخذ شوية عجينة ثم اعادتها داخل الاناء و هكذا ....هذي حركة مهمة جدا لا تغفلو عنها .... كي تشوفي بداو الفقاعات يتشكلو غطي البغريرة بالغطاء .. لي معندهاش الغطاء يمكن تستعمل كسكاس الجود بالموجود يعني ...... خخخخخ وكل مرة تنحي بغريرة دهنيها و هي سخونة بملعقة او اثنين زيت زيتون .... هنا راني نهدر على روحي.. انتوما طبعا تقدرو تستعملو زبدة او لي موالفين به ... بصح اكيد متخسرو والو كي تجربو شوية بغريرات بزيت الزيتون ....... خخخخخخخ و هكذا حتى تكملو و بالصحة و الهنا على قلوبكم .....و هذي النتيجة الجميلة و الحمد لله
ايه حنا في العائلة و في منطقتنا عموما كاين لي يرافق البغرير كي يشربوه مع القهوة بالسكر و مع موجة العصرنة اصبحت الامهات تدهن البغرير بالمعجون اشكال و انواع باه ياكلوه الاطفال و فعلا يعجبهم بزاف هكذاك .... بصح القاعدة دائما راهي مدهونة بزيت الزيتون ...... خخخخخ هذو درتهم خصيصا لاطفال اخواتي ربي يحفظهم و يحفظ جميع اولادكم ان شاء الله يا رب العالمين