يوسف هاك التعريفات الي طلبتهم جيت نكتبهملك في هذاك الموضوع ماقدرتش نخدم رد
المهم
نعطيك شويا تعرف للتيار الكهربائي
التيار الكهربائي هو معدل تدفق الشحنات في الدارة الكهربائية (ينتج عن طريق انتقال الشحنات الكهرباية (الدقائق الحرة)) وهو نوعان كان التيار المستمر الذي نجده في البطاريات وكان التيار المتناوب لي نصيبوه في مثلا المحطات توليد ولا في الدرجات مثلا ياخا كي تجي باه تشعل الضو تاع الدراجة تدوس على هذوك لي بيدال وكل ماتزيد السرعة تاع الدراجة يزيد توهج المصباح
وتاني التيار لي فالمنازل هو تيار متناوب علاش مانستعملوش التيار المستمر؟؟ لخطرالتيار المستمر يحتاج بزاااااااااااف تاع طاقة مثلا كما تجي تشوف هذيك la pile تاع 5v ولا ماعلباليش شحال فيها وفي المنازل لازمنا تيار تقدر طاقته ب 220v وباه تجيب تيار كما هذا لازم يكون كثر من هذا بالالاف لخطر ليوزعو الكهرباء على المنازل لازم في كل مرة يتفرع وفي كل مرة ينقص (لخطر كل منزل كاياخد منو) ملاباه تجيب تيار بهذا الحجم لازم une pile الحجم تاعها قد حالمنزل ولا حالمدينة صغيرة + التيار المستمر ماتقدرش تحطو على التفرع على مااظن يعني التيار المتناوب اجود واظمن وااقتصادي تقدر تولدو حتى بالطريقة لي كي نولدوه في الدراجة مي تكون الالات المختصة بتوليد التيار (الدينامو) كبيييرة طبعاا
*بون نرجعو لسؤالك
-شدة التيار هو كمية التيارالمتدفقة في الدارة الكهربائية (التيار المار في الدارة) تقدر تقيسو بالامبير متر ولا الميلي امبير تحسبو بطريقتين الطريقة الاولى تاع i=p:u الطريقة الثانية والله غير نسيت القانون تاعها ههه ايه والوحدة تاع القياس هي امبير ويرمز لها ب A
-توتر التيار الكهربائي هي القوة الكهربائية المحركة وحدة قياسه هي الفولت ويرمز له ب v يقاس بجهاز الفولث متر او هذاك جهاز متعدد القياسات يحسبو عن طريق تطبيق القانون u=p:i
-الاستطاعة الكهربائية هي استطاعة تحويل الطاقة (اي الاستطاعة التي تستهلكها الدارة) وايضا سرعة تحويل الطاقة
يرمز لها ب p تحسبها عن طريق تطبيق القانون p=u*i او p=E:t وحدة قياسها هي الواط يرمز لها ب w ويمكن تاني ب الكيلو واط kw
اتمنا اني اكون قد ساعدتك ولو بالقليل واي استفسار راني هنا ان شاء الله
بالتوفيق