موضوع مميز الجزء الثالث من وصفات حراير واش طيبتي اليوم - الصفحة 28

اريج 07 · 2016-09-20, 17:30

ام هيثم لجين

وصفات مصورة

جازيا ام البنات · 2016-09-20, 17:34

كريات الثلج ام محمد تاج

كريات الثلج رووعة ويصلحوو مخبز والله رووعة

300غ نواد كوكو و100غ سكر عادي وبيضة ومغرف كبيرة نشاء وبشور 4 ليمونات ونلم بماء الزهر حتى نقدر نشكلوو نخليه يرتاح ساعة ونكوروو او نطبعوو نحطو يطيب حتان يشيح ويصفار فقط من تحت ونقلاصيه بالقلاصاج لي موالفين تخدموو بيه ونرش عليه النواد كوكوو وبريوو كلمسة اخيرة

اريج 07 · 2016-09-20, 17:37

انا هي رزيقة

شرائح اللحم بزيت الزيتون و الطماطم

لحم شرائح مقلي مع طماطم و زيت زيتون من وصفات امي القديمة . تدير لحم فخذ شرائح و تقليه في زيت الزيتون ثم تنحي هذاك اللحم و تدير في بلاصتو طماطم مقطعة صغير و فلفلة مقطعة ايضا حارة او حلوة على حسب الذوق ( انا مكانش متوفر) تقليهم مليح ثم ترجع اللحم في الطوماطيش و تزيد تقليهم مع بعض ثم تفرغ كلشي في الطبسي و تزيدلو زيت زيتون باردة . طبق صحي و جميل و الذ منو مفيش امممم [IMG]http:

RIMA.87 · 2016-09-20, 17:53

السلام عليكم

كريات الثلج رووعة ويصلحوو مخبز والله رووعة

أم محمد تاج

حياة مليزي · 2016-09-21, 12:47

بارك الله فيك وصفات روعة الله يبارك

حمدية حرة · 2016-09-21, 13:09

ما شاء الله

ام احمدي · 2016-09-22, 09:01

لحم محمر في الكوكوط على طريقة ام ساجد ووسيم

هلا امونة ربي يحفظك ختي وسلميلي على ماماك بزاف بزاف لحم محمر في الكوكوط شوفي احكي لحم تاعك ارمي عليه ثلاث سنات ثوم يكونو كبار شوي واحكمي نص بصلة ولا حبة على حسب كمية لحم انا ندير نص حبة ونقطعها غليظة يعني نص حبة تقسميه على ثلاثة ولا اربعة ديري ملح فلفل كحل رشة خفيفة كمون وكركم ولا زعفران او تقدري ماديريهش غير للون فقط تحطيه فوق نار قليلة وديريلو تقريبا كاس قازوز تاع ماء اذا خفتي تقدري تزيديشوي ماء برك غلقي الكوكوط وخليه يطيب على نار قليلة ديريه في جهة صغيرةتاع نار خليه تقريبا اكثر من ساعة باش يطيبلك مليح بصح تفكريه ساعة على ساعة ماتنسايهش خليه حتى يطيب مليح ومايبقاش الماء هذاك ويطلق لاصوص تاعه وراح تلقايه تحمر وحدو وخدا لون احمر هذيك لاصوص كي تنحي لحم قدري ترمي عليها الروز او بطاطا طيب فيها وبصحتكم نسيت نقولكتقدري ديري ورقة رند مع لحم
كي يطيب تقدري ديريه في الفور يتحمر اكثر وبصحتكم

جازيا ام البنات · 2016-09-22, 11:18

فيرو روشي ام ياسين الزهراء

لبنات هدي وصفتي لفريرو روشي

3 كيلات نواة كوكو + 1كيلة سكر ماشي معمرة زاست تاع القارص كثري وربع كيلة زبدة دايبة وربع كيلة عصير قارص ولمي بصفار بيضة وحبة كاملة حتى تتلم وكوري وحطيه يطيبو طبعا مايديش الوقت وكيبرد غمسيه في المعجون وخليه يقطر ومنبعد احكمي الشيكولا ورابيها عليه روعة روعة

اللي عندي مايحبوش القلاصاح هناوني منو بصح اللي تحب القلاصاج تقدر دير قلاصاج ويجي فيه طعمة القارص يالهوي روعة

أ م ساجد وسيم · 2016-09-22, 12:00

شكشوكة الفلفلة...حياة نورالدين

وردة الرمال43 · 2016-09-22, 14:41

يعطيكم الصحة 444444444444444

ام احمدي · 2016-09-25, 15:20

تيراميسو على طريقة ام محمد تاج

في سوبيار نحط 5 مغارف كبار عبرة الشونتيي ونضيفلها 3 كرام ديسار كارامال نخبط راح يثقال ونضيف الحليب البارد على دفعات حتان نوصلو لقوام كريمي مممم نضيف 5 فرماجات لافاش كيري يكونو بحرارة الغرفة باش يذوبهم الباتور كون يكونو باردين راح يبقاو حبيبات ونضرب الكل راح نتحصل على كريمة خيااال ملوحية وحماضة الفرماج مع حلاوة الكرام شونتيي والكرام ديسار
من جهة نغطس لي بودوار تاعي في نيسكافي ونرصو في صحون التقديم وندير طبقة قاطو وطبقة كريمة ورشة كاكاو بالصفاية ونعاود العملية مرة اخرة ونرش الكاكاو على الوجه كمرحلة اخيرة نحط التيراميسوو يبرد اقل شي 6 ساعات وتمتعوو بالذ طعم .

ام احمدي · 2016-09-25, 15:22

سوب العدس الاحمروالجزر على طريقة ام محمد تاج

في كوكوط نحط نصف حبة بصل مقطعة و3 سنينات ثوم مقطعين وربطة صغيرة معدنووس بالسيقان تاعووو ورطل سنارية مقطعة وحبة بطاطا كبيرة مقطعة وزوج مغارف كبرا زيت زيتون ومغرف كبيرة زيت عادي ونملح ورشة فلفل اسود ونحط القفص الصدري تاع دجاجة عمبالي معظمكم يطيشووه اخخخصصص ههههه ندير بيه لي سوب روووعة وكاس عدس احمر ونمرق لازم الماء يغطي الخضر ونغلق ونخليهم يطيبو نصف ساعة نفتح ونحي اللحم لي في القفص نمشمش مليح ونرد اللحم للكوكوط ونضيف 3 حبات فرماج لافاش كيري ونص كاس كرام فراش ونميكسي الكل راح الكرام تثقال وتمد قوام رطب وثقيل للسوب.

ام احمدي · 2016-09-26, 08:52

طاجين الشواء على طريقة ام محمد وتاج

قصي اطراف اللحم الاحمر تاعك لقيمات يعني يتهزو بالمغرف وحطيهم في مقلة مع شوي زيت وملحي ونقصي خلاص خلي اللحم يطيب على مهلو ويطلق الماء تاعو ويرجع ذايب زبدة كي يطيب قوي للنار وحمريه مليح نحي اللحم تاعك وفي هذيك المقلة المحمرة نقصي شوي من الزيت اذا اللحم تاعك طلع ليدام وخلي قدر 3 مغارف كبار زيت تاع اللحم المحمر ورابي عليهم اربع سنينات ثوم ونص مغرف صغيرة فلفل اسود ومغرف صغيرة راس الحانوت وحمصي الكل في هاذيك الزيت كي يتحمصو ضيفي مقدار كاس ماء وحاولي تذوبي التحمير تاع المقلة تاع اللحم يعني تغسلي المقلة بهاذاك الكاس وتستخلصي كل النكهات نقصي للنار وخليها تهز غلوة في غرضها طفي للنار وردي اللحم تاعك واعصري نص ليمونة في الصوص انا رافقتو بزيتون مغلي مليح مليح مليح ماحبيتش الزيتون يطلقلي البنة تاعوو فقط للتزيين وكي سربيتو زينتو ببصل مقطع ومعدنوس وقارص.

ام احمدي · 2016-09-26, 09:10

سلاد دوفروي على طريقة ام محمد وتاج

زوج تفاحات وزوج موزات وكمية من العنب مقطع نصغين ومنزوع النوى وباطة اناناس معلب وباطة خوخ معلب
نقطع الفواكه ونحطهم في صحن غميق ونضيفلهم نص كاس من ماء الاناناس ونص كاس من ماء الخوخ ونص فنجال ماء زهر وكاس كبير عصير رامي كوكتال خوخ وفراولة وبرتقال مممممممم وزوج مغارف كبار سكر وانت تتحكمي في الحلاوة ونحط فيهم قشور ليمونة بصح مقطع طراف كبار يطلقو البنة ومن بعد نحيهم نخلي الكل يطلق النكهات تاعو تقريبا 3 ساعات ونقدمهم في كؤوس التقديم والتزيين كل وحدة وشطارتها انا قطعت الفواكه كبار وحطيت مع الكؤوس لي باي باش يشربو العصير اللذيذ وحطيت معاهم بروشات كي شغل فرشيطة صغيرة يهزوو بيها الفواكه.
كل وحدة والفواكه لي عندها
وماء الاناناس والخوخ راح يمنع تاكسد الفواكه رووعة تبقى هي هي حتى كي صبحت كلش بقى بطبيعتووو.

حياة نور الدين · 2016-09-26, 09:25

بارك الله فيك ام احمدي راكي قايمة بها وراء الكواليس حنونة