الى ام اسيد1 وكل وحدة حاصلة واش الطيب - الصفحة 27

نخله. · 2014-10-02, 16:26

قاطو النفاس خدمتو انا واختي الله يحفظها

وش شريتو؟؟العيادة؟؟؟

حنا شرينا *رخلة * عندنا شهر مللي شريناها راحو يجيبو فيها

ام هاديل وياسين · 2014-10-02, 16:53

اهلا نخلة قاطوك شباب عجبني هذاك الصابلي شفتو مرة في قناة سميرة

بصحتكم العيادة رخلة مليحة يجي فيها لحم خير من الخروف

حنا شرينا خروف ومزال عند مولاه غدوى ان شاء الله يجيبهولنا لولاد راهم غير يستناو

ام حمزة22 · 2014-10-02, 19:49

سلام
دخلت نحطلكم الباطاطا لي وجدها في الصباح مازال ما تعشيتش طيبت الباطاطا وجيت ديركت نوريلكم المراحل نتاعها
انا الصبح وريتلكم الباطاطا كي قليتها ووجدها هي والمعدنوس والبصل بله لعشية منريح ني انا ني بيتي بريحت الطياب
نسخن البطاطا فالمقلة منبعد نضيفلها الخليط المتكون من بصل ومعدنوس وملح وفلفل اكحل
نضيف هاد الخليط فوق البطاطا ونخليها تحكمروحها مع البيض من بعد نقلب البطاطا ونخليها تشد روحها من الجيها التانية ونتحصل على هاد الطبق كيما قالت نخلة يشبه للبيتزا
نخليكم مع الصور

سمسومة 05 · 2014-10-02, 23:06

يعطيك الصحة ام حمزة ولكل البنات اللي راهم هنا والله حكاياتكم يهبلو

صدفات · 2014-10-03, 05:28

صباح النور للأخوات جمعة مباركة أن شاء الله الحقي يا سمسم شاركينا الموضوع رأي أم حمزة تحط اطباق وأفكار حطة لا كلفة والشكل ربي يحفظها ويحفظ ولدان

ام سوهيل · 2014-10-03, 08:50

صباح الخير وزقزقة العصافير كراكي صدافات شكرا ام حمزة عجبتني البطاطا وشراكم مع العيد الله يتقبل منا ومنكم الصيام

وجمعة مباركة ومتنسوش تطلبو ربي وش بغيتو اليوم دعوة مستاجبة بي ادن الله

الله يحفدنا ويستر ولداتنا ولدات المسلمين وفرج كرب المكروبين ونصر غزة وكل بلاد المسلمين امين

ام حمزة22 · 2014-10-03, 09:39

صباحكم سعيد
تقبلة الله منا ومنكم وربي يكتبنا العيادة فالخير
ربي يرزقنا بالصحة ويحفضنا اولادنا ويسترهم وينورلهم تريقهم
ربي ينصر كل المسلمين في غزة وغير غزة
ربي يرجع كل غائب لاهلو
ربي يرزق الدرية الصالحة لي ما عندوش
ربي يفرح كل دار وينحي الهم عليها
لي ما لقاش خدمة ربي يرزقو
لي مازال ما تزوجش ربي يرزقو بالزوج الصالح او بالزوجة الصالحة
لي راهي بالحمل ربي يسهلهالها
ربي يرزقنا الجنة
آمييييييييييييييييين

ام حمزة22 · 2014-10-03, 09:45

لبيك الله ما لبيك لبيك لا شريك لك لبيك ان الحمده والنعمةلك والملك لا شريك لك
والله كي نصبح على هاد الكلام ينشرح قلبي وجيني الدمعة

ام حمزة22 · 2014-10-03, 09:46

ام سوهيل واش راكي مع الرحلة

ام حمزة22 · 2014-10-03, 10:50

اليوم راني نتمقنن مع شغلي كي تكون بنتي فالدار يوم الجمعة هي لي تمسح وتخمل البيت وانا نقعد مع الكوزينة
لهادا حطيت الطياب يتقلى وجيت نصبح عليكم وان شاء الله تكونو الكل بخير وعلى خير
اليوم الاسرة كامل راهي صايمة غير المازوزية ربي يتقبل منا ومنكم
وكي العادة وقت الصيام انا نحضر الشوربة فالصباح
ومع الشوربة درت طبق اخر يحبوه ولادي بزاف كي يكونو صايمين
وهو لازانيا ما نكدبش عليكم لازانيا ديالي ماشي مكلفة بزاف هي تطلب رطل لحم مفروم وانا نديرلها غير شوية كيما يقولو غير الريحة ههههههه
باه نحضر هاد الطبق لازم باكي لازانيا من الاحسن النوع محبوبة هداك لي متعودة نشريها وجي روعة
لازمنا المرقة شوية بزيادة باه تتشرب اوراق الازانيا
للمرق: بصلة كبيرة او2 + طماطم حب ومصبرة + العكري+ ثوم + زيت +رند + حبق + زعتر ( انا اليوم ما عنديش الحبق والزعتر فالبيت بصح موالفا نديرها غير بالرند جي روعة)
نقلي البصل والثوم والتوابل ثم نضيف الطماطم المصبرو والحب من بعد نضيف اللحم المرحي ونمرق ونخليه يطيب
اما عن الشوربة ديالي لازم : بصل + حشيش مقطفة + زرودية _ قرعة + حبيبة بطاطا + زيت + عكري +فلفل اكحل + قرفة+ فرميسال
الشوربة طيبت غير شوية قيسي وقيس زوجي ولادي حبو يفطرو بلاسوب لي طيبتها البارح
الشوربة هادي اقتصادية باللحم المرحي ههههههه
نقلي البصل مع الزيت والالقرعة وزرودية والبطاطا كي نشوف الخضرة دخلها الطياب نحيها ونرحيها ونرجعها فالمرقة ونضيف الطماطم الحب والمصبرة من بعد نضيف كويرات اللحم المرحي من بعد نمرق كي نغلي نرميلها شوية فرميسال والحميصة لي كنت طيبتها من قبل وحطيتها فالمجمد كي يطيب الفرميسال نضيف شطبة نعناع تغلي غلية ونطفي
ملاحضة : اوراق لازانيا ما نغليهمش في المساء نصورلكم مراحل الطبقات اي نحط طبقات لازانيا وطبقات المرق والطبقة الاخيرة بيشامال والفرماج
هادي الصورة الاولية لتحضير مرق الازانيا وامامها علبة الازانيا
وامام قدر مرق لازانيا قدر الشريبة هههههه

هنا الشوربة طابت ومرق لازانيا طابت في المساء بادن الله نكمل طبق لازانيا
مراحل لازانيا
هادي طريقتي الخاصة في تحضير لازانيا
ما نستعملش بين الاطباق البيشامال نستعمل غير الصوص لي طيبتها باللحم المفروم
في سنيوة نحط غراف صوس من بعد طبقة لازانيا منبعد الصوس ثم لازانيا حتى تخلاص الصوس و الطبقة الاخيرة للازانيا نختمها بصوس بشاميل والفرماج
نحطها فالفوغ نصف ساعة والطبق راه جاهز

[Iوهادي طاولة فطورنا تقبل الله منا ومنكم

ام هاديل وياسين · 2014-10-03, 11:41

السلام عليكم و جمعة مباركة على الجميع صيام مقبول الله يغفر الذنوب
اليوم جبتلكم تشوفو القاطو اللي خدمتو

ام حمزة22 · 2014-10-03, 12:06

حاوت نحمل صور مرق لازانيا كي طابت ما حبتش تطلعلي الصور ما عليش فالمساء بادن الله
ام هاديل حلوتك روعة ما شاء الله بصحتكم

ام سوهيل · 2014-10-03, 13:29

مساء الخير للجميع وشراكم ام حمزة رنا اخرنا الرحلة حتى شهر ولا شهرين بي ادني الله

وعيدسعيد للجميع وام هديل بصحتكم الحلوى

ربي يتقبل منا صالح الاعمال

ومر العيد لي عودة بي ادني الله

دمتم في حفض الله ورعايته

ام حمزة22 · 2014-10-03, 13:38

ام سوهيل كل عطلة فيها خير ما تقلقيش روحك وقت ما فرج ربي ترحلي
بالتوفيق

ام حمزة22 · 2014-10-03, 19:09

اقتباس:

المشاركة الأصلية كتبت بواسطة نخله.

قاطو النفاس خدمتو انا واختي الله يحفظها

وش شريتو؟؟العيادة؟؟؟

حنا شرينا *رخلة * عندنا شهر مللي شريناها راحو يجيبو فيها

نخلة ربي يحفضلك صحتك ويخبيلك اختك
مبروك الرخلة ربي يكتبها
حنا شرينا خريف