الكوفرولي( الدرس التطبيقي الاول لورشة انجاز تروسو سموكس)

[fifiarch]

مساء النور لبنات ان شاء الله اموركم تمام
اليوم مع درس الكوفرولي
والذي كان اول درس في ورشة انجاز تروسو سموكس
نبدا على بركة الله
اتمنى لكن متابعة مفيدة وان شاء الله نكون على قد الثقة ونتحصلو في النهاية على اجمل الاعمال
هنا رابط الدرس النظري الاول
والذي عرفنا من خلاله انواع الكوفروليات واكيد كل اخت اختارت واش يناسبها وتانا تعلمنا كيفاه نقيسو ونستعملو القماش

https://www.djelfa.info /vb/showthread.php?t=863414

كل اخت تحمل المخطط لي عجبها و تجيب ورقة بيضاء و تحاول ترسم المخطط على هذه الورقة و هكذا باه تفهم العمل لي حابة تديرو
خلاص فهمتيه عرفتي كيفاش تقسمي القماش
جيبي مقص و ميترة وابداي على بركة الله
روحي لغرفة واسعة حلي القماش نتاعك و اكيد لازم تكون الارضية نظيفة كيما تفاهمنا



بداي القص و حاولي تنظمي حواف القماش لانو ممكن البياع نهار لي باعلك يكون قص القماش معوج



نتحصل على قطعتين بالمقاسات المطلوبة وكالعادة باه مايتسنسرش القماش نجيبو ولاعة ونحرقو اطراف القماش



الان نحضر الباترون والذي هو عبارة عن قطعة كرتون نرسم عليها جدول ابعاد مربعاته ستة سنتيمتر لانو البعد المناسب لعمل الكوفرولي
ونثقب رؤوس كل المربعات ثم نضع الباترون على القماش ونبدا في تنقيطه كاملا مع مراعاة ترك عشرة سنتيمتر على الحواف من كل جانب
هذه العشرة سنتيمتر هي حساب نتاع الخياطة



بعد ذلك نتحصل على زوج قطع متماثلين في الابعاد ومنقطين وجاهزين للعمل



ولان الفراش نتاعنا راح نخدموه بالياسمينة المقلوبة
اول خطوة هي عمل الياسمينات ولازم تكون على ظهر القماش
وهذا الفيديو راح يعلمكم طريقة عمل غرزة الياسمينة

https://www.youtube.com/watch?v=mhnWFQKet6s

لازم نكملو كامل القطعة بالياسمينة على ظهر القماش طبعا



ومن وجه القماش يكون العمل هكذا



الان نجو لطريقة عمل الياسمينات المقلوبة
وهي تكون عن طريق حشو الياسمينات
اولا نحضرو المادة لي حابين نحشو بيها ومن الاحسن لاوات نتاع الميترة لانو الافضل
انا هنا اخترت البونج وللاسف لقيت غير الرقيق قصيتو مستطيلات وطويتها باه تجيني مليحة



وهنا الفيديو يبين طريقة حشو الياسمينات

https://www.youtube.com/watch?v=Jvlv_...hannel&list=UL

هزو اربع اوراق نتاع الياسمينة واحشو وسطهم بالبونج و خيطو
لازم تكون خياطة مليحة باه نهار اخر ماتتفتحش

والاخوات لي حابين ينوعو بين الياسمينة المقلوبة والياسمينات الكبار يشوفو هاذ الفيديو يعلمهم الطريقة

https://www.youtube.com/watch?v=-dw8L...hannel&list=UL

راكي تخرجي الورقات نتاع الياسمينة من تحت لفوق يخرجلك كانو مربع
في النص خيطي راح تخرجلك الياسمينة
وماتنسايش تزيني بالعقاش



وفي الاخير نتحصلو على قطعة القماش مخدومة بهاذ الشكل

من الخلف



من الامام



والان ننتقل لمرحلة اخرى وهي غلق الحواف ناع القماش وتنظيمها والصور تبين الطريقة

في جهة العرض نغلقو بالياسمينات الكبار هكذا



وفي جهة الطول نغلقو من الخلف بهذا الشكل



وبعدين نخيطو كامل القطعة على الحواف باه يتنظم القماش مليح
واللي تقدر تزيد تدير السيرفيلاج لانو هاذيك الخياطة مبعد لما نلصقو القطع بالمشينة نتاع الخياطة ضك ننحوها
ونقصو الزوائد باه تجينا القطعة منظمة وتخرجلنا من الخلف هكا



ومن الامام



ونكملو القطعة الثانية نتاع القماش بنفس الطريقة
نتحصلو على زوج قطع متماثلين نحطوهم فوق السرير بهاذ الشكل



الان نجيبو القماش لاخر لي عندنا نتاع ثلاثة امتار ونحاولو نقسموه الى شرائط نتاع خمسون سنتيمتر
نتحصلو على ثلاثة شرائط



نهزو احد هاذو الشرائط ونقصو طرف منو يكفي باه نربطو بيه بين القطعتين الاولى والثانية فوق السرير
وهذه القطعة لازمتلها بعض التزيين
انا اخترت انو نزينوها عن طريق الطرز بالشرائط
وحاولت اختراع رشمة مناسبة
شوفو على واش اتحصلت
هاذي الرشمة نتاع الوسط
اطبعو منها زوج ومبعد لصقوهم مقابل بعض وانقلوها وسط القطعة





وهاذي نتاع الجوانب



وقمت بنقلهم على قطعة القماش



ومبعد بديت مع الاغصان وخدمتهم عادي كيما تعلمنا في درس طاطا ام سفيان نتاع دورة التطريز بالشرائط
point de tige
اما عن الورود ضك نتعلموهم مع بعض في الدرس المقبل نتاع دورة التطريز
ومبعد هذا على واش اتحصلت
هاذي نتاع الوسط



وهاذي نتاع الجنب



بعدين عندنا الزوج القطع لاخرين هاذو نخلوهم لكشكشة الجوانب كي نلصقو القطع نتاع فوق مع بعض بعد لا نكملو الطرز



اما عن كشكشة فوق نخدمو شريط عرضو صغير برك لانو جهة الفوق كالعادة مالازمش تهبط منها كشكشة
وكشكشة اسفل على حساب نوع السرير لكن ينصح بعملها لانها ضرورية
وبالنسبة ليها راهو باقي عندنا قماش لي قعد من الشريط الثالث لي قصينا منو قطعة الوسط لي رانا نطرزو فيها




نطلب منكم فقط انكم تحضرو قطعة قماش من اي نوع رخيص فقط المهم يكون عرضها متر ونصف ولونها يتماشى مع لون قماش الكوفرولي باه نعملو منها التبطين نتاع الكوفرولي

هنا في درس التطريز بالشرائط راح تلقاو باقي طريقة الطرز نتاع القطعة بالتفصيل
https://www.djelfa.info/vb/showthread.php?t=964585

الان وبعد لانكملو الطرز نلصقو القطع الثلاثة في بعض
من فوق واسفل السموكس والوسط القطعة المطرزة

الان نروحو للكشكشة
شفتو القطع لي قصيناهم المرة لي فاتت
نحكموهم نسرفلوهم من تحت ومن جانب



ونعملولهم مكان الطيات هكا باه يجي طولهم من طول القطع في ثلاثة لاصقين في بعض


االان نخيطو الكشكشة مع القطع السابقة وماذا بينا تكون خياطة معاودة باه تشد مليح



نكملو الكشكشة من الجانبين واسفل
ومن فوق على حساب واش تحبي تديريها او لا
يجينا الفراش هكا من الخلف


ومن الامام


وهنا عن قرب الخياطة


لازمكم تبطنو الفراش من تالي كيما قلتلكم جيبو اي نوع من القماش بلون مناسب للكوفرولي نتاعكم وقصوه بنفس الابعاد من فوق برك ماتحسبوش الكشكشة ولصقوه
للاسف انا ماعملتش هاذ المرحلة

شوفو كشكشة الجوانب
مازالت ماشي منظمة مليح



الان نجيبو الدونتال وندورو بيه الفراش كامل ونخيطوه مليح


ننظمو الفراش و نحددو الكشكشة باه تتنظم




وهكا نكونو كملنا الكوفرولي نتاعنا
وهذه النتيجة لي تحصلت عليها


هنا لبنات عمل اختكم بترا عماد
شوفو فكرة الكشكشة لي فيه


ونظرا لطلب الكثير من الاخوات الشرح لهذه الكشكشة
قدمتلنا اختنا بترا الشرح
فالف شكر لها
ونخليكم مع الشرح نتاعها



في الأول تحسبي 10 سنتيم و تعملي خط و باقي اللخطوط تحسبي 15 سنتيم

تخيطي الأورغونزا مع الكوفرولي و هي مرسومة بالخطوط كيما فهمتكم
و من بعد تفصلي 13 متر الباقية
كيما هي بلى ماتمقصيها
اولا 15 سم بعد ماتكوني بلاصيتيلها بيي ساتيني و تلسقي معاها الدونتيل
و تبليسيها على طول الكوفرولي و لازم يكون منضم
و باقي الخطوط 21 سنتيم طبعا تبليسيها بعد ماتكوني بلاستيلها بيي ساتيني

و تستفيها على طول الأورغونزا حتى تكملي
ملاحظة: طبعا رايح تقولولي شانديرو ب 45سم هديك لي زدناها في القطعا الأولى
هذيك تجي زيادة في شرشيفة عند جانبي الكوفرولي باش ما يجيكمش مزير
و راح يبقالكم من الأورغونزا و الدونتيل ديروه في المخايد
بصح 14سم عرض الأورغونزا فقط

بعد ماتكني فصلتي كيما شرحت في الأول من 4 متر الأولى من الأورغونزا
و خيطتيها مع الكوفرولي تجيبي القطعة التانيه الي طولها 13 متر كاملة بلا ماتمقسي منها



راني حطيت هدي الورقة باش نشرحلكم على اساس
طول الأورغونزا 13 متر و كيفاش تقسميها






هكا لبنات نكونو كملنا الكوفرولي


بعد مشوار طويييييل
الحمد لله تم بعون الله

اكيد نعرفكم شاطرات وتخدمو فيه مليح وتكون ان شاء الله اعمال رائعة


نتمنى الاخوات لي عاملين هذا النوع من الكوفرولي يسرعو وتيرة العمل هكا باه الاخوات لي عاملين الفراش كامل سموكس مايتعطلوش
مطلوب منكن انجاز هذا العمل طيلة ثمانية ايام
يوم الاثنين المقبل ان شاء الله يوضع الدرس الجديد
مالا اشطارو هكا باه مانبقاوش متعطلين
بالتوفيق



الى اللقاء لبنات في الدرس القادم نتاع المخاد ان شاء الله