يوميات عضوة

[ام عبودة]

العشاء درت جلبانة حمراء وستنينا ابو العيال كلمتو قال راني نتعشى م الجماعة برا
ايا هذوين عشيت ولادي وانا من الباتيسري تاع قبيل خلاص شبعت
وراني نجول في قوقل. والمنتدى ههههههههه
نرقد ميمي ونستنى الزوج والدودودو
الى الملتقى

[عيدة نور الهداية]

السلام عليكم
ان شاء الله يكون الجميع بخير
حبيت نقوللكم توحشتكم بزاف بزاف بزاااااااااااااااااااااف والله شهيد على ذلك
وشكرا جزيلا ام عبودة لانك سئلتي عني وجبتيني للموضوع مرة اخرى ههههههههه واسمحولي لانني دائما متواجدة هنا لكنني لا ادخل
راها عندي الخدمة بزاف تعبتني الحمد لله اننا تهنينا من الختبارات وتصحيح الاوراق
هذي الايام راني فرحانا بزاف ههههههههه خلصونا ودخلتلي الشهرية
شريت منها لوالدتني جبا سطايفي ب 50000دج باش تحذر لعرس بنت خالتي
.................بغيت نسقسيكم حاجة هل هذه المحاداثات والتعليقات يقراها اي واحد يدخل هنا او لا . لانني بغيت نحكيلكم شويا وندي رايكم في امور .
نتمنى للجميع الهنا وربي يدومكم يا خواتاتي

[المستغفرة]

والله لباس الحمدلله بصحتكم ام عبودة
خيتي الا تقدري اعطيني العنوان
بشفا عليك
اختي حبيت نجاوبك الا سمحتي
العضوات برك ليقراو هذي الصفحة
يعني ممنوعة على الرجال
ام عبودة عيال خويا دارت طعام بمرقة بيضا
حنا نديرو طعام كل جمعة وفي وسط الاسبوع
نديرو مسفوف و لا مرقة بيضا
وديسير برتقال و تفاح
ربي يطرح البركة عليكم وعلينا

[نخله.]

صباح النور للي تحب تحكي وتفرغ قلبها رانا هنا https://www.djelfa.info/vb/showthread...45073&page=267

[ام عبودة]

صباااااااااااح الخير واش راكم
يا مرحبا عيدة رجعت الحمد لله على السلامة
الله يكون في العون ومبروك عبى ماماك الجبة وتلبسها بالصحة والعافية
لا لا القسم هذا يدخلولو الذكور راهو كاين قسم للدردشة في قسم شقائق الرجال هذا ما يدخلولوش الذكور
المستغفرة بصحتكم العشاء وعيال خوك دزيرية ؟؟؟؟؟؟؟؟
الطبيب راه في المعمورة

[ام عبودة]

نخلة كي صبحتي اذا على تفراغ القلب رانا كامل هنا هههههههه
غير من جري الاولاد هههههههههههههه

[نخله.]

ام عبوده..................باه نخرجوش على الموضوع برك

انا نضت الصباح توضيت وصليت و وجدت القهوة وفطنتهم فطرو ولبسو وانطلقو

بديت لاورد حفظتو ورحت حليت وشمست الدار ودرت دوره خفيفه وجيت حطيت تسميعي

الغدا عندي عدس من غدا لبارح بالاك كاش ما نجرب حلوى ملي طحت ما درتلهمش حاجه بنينه



سلام

[بنت الجزاير الغالية]

فكرة الموضوع رائعة نتمنالكم يوميات ممتعة
نشكر صاحبة الموضوع

[ام ياسمين10]

صباحكم ورد وعسل وياسمين وشراكم حنوناتى .ام عبودة كى شفت رسالتك فرحت ياسر اول رسالة رانى منقدرش نبعثلك رانى فقيرة فى عدد المشاركات اهلا بيك يا بنت عمى .

[ياسمين1990]

السلام عليكم ورحمة الله وبركاته
اهلا بالغالية بنت الجزائر والله فرحت بيك شرفتينا
انت متعرفينش لكني عرفتك من موضوع بيتك جنتك رقم 4 وقريت واستمعت لمشاركتك واستفدت شكرا لك ورب يجزيك الجنة وكل ما تتمنى
ارجو المعذرة اختي ام عبود مقدرتش نلتزم خرجت شوية على الموضوع كي شفت اختنا بنت الجزائر اسمحيلي ههههههههه
على العموم اليوم راني حاكمة لفراش جسمي كااااامل مدققققققق مع شوية حمة منيش عارفة واش بيا قلت نريح شوية نشرب حبة براسيتامول
ومن بعد نوض للجهاد ان شاء الله ادعولي سلام

[ام عبودة]

راني فاتحة بختة منا وانا راني مع التسياق والمسيح من بعد نحطلكم اليوميات ههههههه

[ام ياسمين10]

صباح الخير حبوباتى تعيشو قولولى على مزيل الدهون مليح للكويزينيار وحيوط الكوزينة ربى يحفظ لى ترد عليا.سامحونى الى خرجت من الموضوع .

[نخله.]

iiiiiiiiii ا ياسمين راني نعاني في هذ الدر تع الكرا ملي سكنتها ونا نحك في وسخ اللي قبلي ما زال ما راحش درت كلشي حاجه ما نفعت


و الكويزينيار تاعي فلام بلو زجاج الباب لاصق ما يتنحاش يعني ما يتغسلش والوسخ يدخل بين الزجاج انا ملي زوجت ماغسلتهاش ملداخل لخاطر لقيتو شرا وحده ركاي كيما للي عند اختي ومره دارتلها برودوي نثقبتتلها

راني نسايس حتى نبني داري ونشري وحده جديده

اما الحيط انا ما يشريليش لي برودوي يدير سبه الولاد يمالا نخلط خل ابيض مع البيكاربونات و الجافيل بصح احرزي روحك راهم اكثر من لاسيد



انا بعد ما خليتكم رحت للكوزينه درت بتي فور جا مليح بصح ما عجبتنيش البنه ماشي كيما تع برى

و دوزنت الدجاج ورجعتو للفريجيدار باه نديرو عشا وجدت سلايط لخاطر عندي العدس و وجدت لتاي و جا ابو العيال على 11 تغدينا وشرب تاي بالبتي فور وراح غسلت ماعن وتوضيت حليت الميكرو حتى اذن الظهر صليتو وغفيت هذا وين فطنت راني نخمم وش ندير بالدجاج كرهتتو محمر حابه كاش ما نديرو فالفور بصح راني درتلو الكمون والزنجبيل وال

[imane-droit]

ما شاء الله عليك نشيطة تبارك الله انا يومياتي تختلف عن يوميات بكثير أولا لانني عزبا و الكبرى في البيت عاملة و ندرس في نفس الوقت يعني لا توجد راحة و زيادة عن هذا ماما عاملة أيضا واش نحكيلك و واش نخليلك المهم الصباح نوض بكري باش نروح للخدمة ما ندير والو نتلها بروحي برك ماما دير الفطور و القهوة و انا نغسل ماعن القهوة و نمشي للخدمة اخر من يخرج من الدار و نولي الفطور ماما ما جيش للفطور نسخنوا و ندير شلاطة ونحضر الطابلة لخوتي مين يجو مل الدراسة كاش حوت نقليه كاش بطاطا و لا بذنجان للقلي انا نقوم بالمهمة و من بعد نغسل كل الماعن و نكنس الدار و في بعض الايام نسيقها كلها و نعطر البيت إجباري كل يوم و نمشي للخدمة عيانة و نولي مساءا نلقى الحالة نظيفة و جميلة ما عليا غير نطيب القهوة و نخمم واش ندير للعشاء لأنه كلنا نتلايموا على طابلة العشاء و نغسل الماعن و نظف المطبخ مليح مليح يليق ما نشوفش نملة دور فيه هههههههههههههههه باش نروح نرقد نحل البيسي نتلاقى باحبتي على النت و نرقد ليلة سعيدة إلا في أيام العطل عندي اغسيل القش و نظف المنزل كله الفوق و التحت و نهتم بالنباتات و الفطور لازم يكون يشهي و متنوع و نعمل حلويات او تورتات غجباري عليا و نمسح الغبار و نخرج الفراش للشمس يعني يوم الجمعة بالنسبة إلي يوم شاق من الساعة 09 الى الساعة ا17 بدون انقطاع ماكانش قيلولة يوم الجمعة ماما تروح للحمام و انا نكمل الميناج وحدي اما يوم السبت نريح فيه و اذا خصني حاجة نشريها و نكمل بعض الاشغال و الحمام في المساء و من بعد الحمام نرقد نكون دايرة الفطور و العشاء مع بعض ما علي إالا التسخين و عندي بعض الايام دراسة في الجامعة و الحمد لله موفقة بفضله

[ام ياسمين10]

ربى يعينك ايمان راكى تتعبى بزاف .نخولة شكرا حنونتى نجرب الخلطة نتاعك ان شاء الله تفيدنى رانى عييت من الحك بدون فائدة حتى انا دارى كان فيها ناس قبلى واش نحكيلك كيفاش خلاوها حاشاكم الدجاج مايسكنهاش.......