دورة خطواتي الواثقة لأصبح ربّة بيت متألّقة - الصفحة 225

Sii · 2016-12-20, 11:58

الحمد لله سوال عليكم اخواتي سالي وشراكي واش راهم وليداتك وام اروى نتمنى راكي بخير وتحسنتي ربي يقويك ويشفيك
اختي فرحة العمر تهلاي فروحك كما قالولك لبنات اخدمي حاجات خفاف برك حتى يكتب ربي ويثبت الحمل وبتنحالك هاد المشكل ويرحمها ربي

فرحة العمر · 2016-12-20, 12:35

شكرا لكل وحدة ردت وربي يفتحها في وجوهكم ويبعد عليكم الهموم انا راني فالخامس واحتمال نزيد في السابع ولازم نظف الدار على الأقل في الشهرين هذو.الأخت اللي اقتارحت عليا نجيب وحدة من العائلة مانقدرش لانو خواتاتي مزوجين بعاد وأهل زوجي وحدة ما تعاون يحبو الزردات والماكلة والخدمة ربي يساهل وعندو خواتاتو صغار بصح غير من ابوه منقدرش نجيبهم امو معايا وهي صغيرة بصح ماتعاونيش خلاص كل شيء نديرو وحدي ربي يعيني وخلاص واسمحولي كثرت عليكم

arwa alaa · 2016-12-20, 13:19

اختي فرحة بلعقل على روحك وانتي اولى من الشغل ووسخ عام ينحيه نهار ومشي محتم عليك الشغل مدام زوجك متفهم الوضع ومدخلكش في الناس واش تقول راكي في وضع صحي ماش مليح وقلتي لطبيبة على الماء الي يسيح منك ؟
ولاكان تقدر وحدة من خياتك تجيك مرة في السمانة تسيقلك
والمواعن حطي كرسي فوقو مخدة واغسليهم والطياب كذلك

ام صفصف · 2016-12-20, 15:08

السلام عليكم فراشات،ان شاء الله تكون كامل بالف خير

ام صفصف · 2016-12-20, 15:10

اروى حبيبتي،ان شاء الله تكوني راكي تتحسني

ام صفصف · 2016-12-20, 15:13

اختي فرحة،صحتك و صحة جنينك قبل كل شئ
ومادام زوجك متفهم،فلايوجد اشكال،الوقت يمضي وتزيدي ان شاء الله وتلقاي الخدمة مستنياتك

ام شمسو محمد · 2016-12-20, 15:17

السلام عليكم.
اليوم العشرون من مراجعة و إدراج أساليب الفراشة ،و ضمن مخططنا الأسبوعي اليوم هو :
الثلاثاء : " اليوم الحر "

يوم من الأسبوع تنصح الفراشة بألا تتقيدي فيه ببرنامج خاص أو عمل محدد،فقط حافظي على الروتينات اليومية.
إختاري اليوم الحر حسب ضروراتك ، ربما تفضل الأمهات يوم الثلاثاء لأن أولادهم لايدرسون في المساء و سيكون عليهم القيام ببعض المهام ( نقل الأبناء إلى مقر نشاطهم الرياضي الأسبوعي ،زيارات إجتماعية ضرورية ، بعض التسوق ، خرجات طارئة ...).
عندما لا تبرمجين عملا خارج الروتينات لا تشكلين ضغطا على نفسك و تكونين مرتاحة في القيام بنشاطاتك .
يمكنك اختيار اليوم الذي يكون لديك فيه عمل كثير خارج المنزل حتى لا تلتزمي بعمل آخر في المنزل.
من حقك أن تجعلي اليوم الحر " يوم كسل " ( لا نقصد أبدا الروتينات اليومية ) ، تحتاجين إلى فواصل إستراحة حتما ، و قد ترغبين بممارسة أعمال أخرى تحبينها ( خرجة مع الصديقات ،جلسة على الإنترنت ، حمام مغربي ممتع......).
تستطيعين جعل هذا اليوم فرصة لاستدراك بعض الأعمال المبرمجة التي لم تنجزيها ،أو لإستباق أعمال أخرى تريدين القيام بها في الأيام القادمة......لكن حذاري لا تستمري في الجري وراء المهام من أجل تعويضها !!!

ام صفصف · 2016-12-20, 15:34

بارك الله فيك ام شمسو، راني نتبع ونطبق
وعلى فكرة،عندك اسلوب تبسيط وتقديم رائع

ام شمسو محمد · 2016-12-20, 15:43

أم صفصف كي قريت ردك تبسمت من السرور شهادتك انتي بالذات بالنسبة ليا وسام.

فرحة العمر · 2016-12-20, 16:23

كثر خيركم والله ريحتوني ربي يريحكم دنيا وآخرة الحمد لله زوجي مريحني وحتى الماكلة يقولي ماتنوضيش ديريها بصح انا نعرف ظروفو والماكلة تاع برا غالية وتحب مصروف وانا بعد كلامكم قررت ندير غير الضروري كيما الماكلة و غسيل المواعن اما الباقي كي نطمن على البيبي نديرو لانو التسياق ممنوع عليا مدايرة عملية على سرتي وانا في الشهر الثالث إدعيولي يتمملي حملي ويشفيني الاخت اللي سألتني على الماء قاتلي الطبيبة مكروب وعطاتلي ندير عليه تعيارات لانو كاين بزاف لقاتو داير براسو كامل

جهينة اليقين · 2016-12-20, 17:31

حبيبتي فرحة لو كان تطرحي انشغالاتك في الدردشة احسن باش تاخذي راحتك في الكلام ومنها تنحي على خاطرك واحنا رانا معاك باذن الله

أريج13 · 2016-12-20, 18:28

اقتباس:

المشاركة الأصلية كتبت بواسطة ام شمسو محمد

حبيت نعلق على تطبيقي لأسلوب الفراشة لتنظيم العمل المنزلي و نعطيكم النتائج...
أولا ،سابقا كنت نستعمل أسلوب مرهق شوية كنت مقسمة ساعات الصباح الثلاثة ( من 8 حتى 11 )ساعة و نصف للتنظيف اليومي ( نص ساعة لكامل المنزل و ساعة للمطبخ ) و ساعة و نصف للتنظيف العميق كل يوم غرفة خمسة أيام في الأسبوع .....هذا النظام يكون فعال في حالة الإلتزام الدائم ، ومن خلال تجربتي نقولكم بلي الإلتزام الدائم مستحيل ،بالإضافة لعامل الإرهاق و الضغط ...كاين أماكن تقعدي تعاودي فيهم و ممكن يكونو نظاف و أماكن ما تلحقيش ليهم... .تأخيرك للعناية بنفسك ( التزيين و اللباس )أحيانا يستمر طول النهار و إهتمامك بأحباءك مستحيل في هذي الفترة....
مع أسلوب الفراشة بدءا بالقواعد لا تتركي شيئا وراءك ،إجمعي ما تستعملينه .مكان لكل شيء....هذي الأعمال تنقص الكثير من الشغل و تعطي جو عام تاع ترتيب و نظافة.
الروتينات اليومية..تلميع الحوض،ترتيب السرير ،تجهيزات الغد....تركز المجهود حسب النشاط و بالتالي ما تحسيش بلي راكي تقضي في الشغل،تحسي بالأعمال تابعة للنشاط ..غسل الأواني تابع لتناول الطعام ،ترتيب السرير تابع للإستيقاظ ،وضع الملابس في الخزانة تابع للغسيل...
تبريد 20 د اليومي يحارب تراكم الأعمال و يخفف الضغط كليا على المناطق و ما يخليش الدار تظهر فيها أماكن موسخة أو غير مرتبة.
التنظيف الأسبوعي المرة الأولى يكون مزعج 10 د ما يكفيوش نهائيا و تقعدي تسمعي وحد الصوت في راسك يقولك زيدي شوية برك،بصح الإلتزام بالساعة يخليك تحترمي باقي الأوقات (مشكلتي مع التنظيف العميق أنو دائما يأخرني على باقي الأشغال كل مرة نقول نزيد هذي برك )،.....و نتيجة الساعة الأسبوعية هايلة حتى إذا كانت ناقصة ( على العموم حتى أسلوبي السابق كانت نتايجو ناقصة و ما كانتش عندها هاذ الفعالية )،و الآن كاينة غرف كاملة في البيت مش محتاجة للتنظيف العميق ( اللي مزلت ما بديتوش ).
هذا دون أن أنسى الوقت اللي حصلت عليه باش نوزع إهتماماتي المتنوعة بنفسي و ديني و أسرتي و الأشياء اللي نحب نديرها

بارك الله فيك ام شمسو و الله العظيم فكر و عطاء و شطارة الله يقويك و يزيدك من فضلو
انا ايضا عندي نفس الراي اسلوب الفراشات عملي جدا و يخفف على الفراشة الاجهاد و التعب اثناء القيام بعملها بالاضافة الى انو المنزل يكون نظيف و منظم في معظم اوقاتو
في الحقيقة ما زلت نراجع في الشئ اللي فاتني و مع ذلك طبقت تبريد 20د وو جدت بانه ساعدني كثيرا خاصة مع العمل خارج المنزل .......ان شاء الله نزيد نفهم كل القواعد و نطبقها و نوصل للنتيجة اللي وصلتي ليها
شكرا ليك مرة اخرى ....حسب رايي انت مثال للمراة المنظمة و العملية .....

ام متين · 2016-12-20, 18:35

مساءكم طيب يا طيوبات الحمد لله رايحة تجي العطلة ونرتاحو شوية من الخرجة كل يوم واعرف ان الشغل رايح يزيد لكن نرتاحو شوية لان عيينا بالصح
الاخت فرحة العمر نقولك يا اختي ربي يهديك ان شاء الله من المفروض انك تخمي في صجتك قبل كل شيئ والي وجعو قلبو يجي ويعاونك وزيد احمدي ربي ان الزوج متفهم لان كاين ازواج ما يفهموش حلاص لذا صحتك وصحة البيبي اهم من كل شيئ وزيد لما تحبي تديري شغل ديري اشياء بسيطةواعرفي كيفاه تكوني ذكية في شغلك وزيد مادام عجوزتك صغيرة بشوية ضرافة تقدري تخليها تعاونك وربي يقدرك ويعطيك وقفة ساهلة

أريج13 · 2016-12-20, 18:42

اقتباس:

المشاركة الأصلية كتبت بواسطة فرحة العمر

السلام عليكم
الله يبارك عليكم حراير تاع الصح غيرتوني
حبيت نشاوركم وياريت متبخلوش عليا بآرائكم انا حامل والطبيبة قاتلي المشيمة هابطة والبيبي ثاني وعندي مشكل كي نوقف بزاف ولا نقعد بزاف يسيل عليا الماء حاشاكم وعندي طفلة وزوج وعجوزتي معايا ولازم نقوم بالدار زوجي مانعني والطبيبة قاتلي ساسي روحك بصح انا كي نقعد يجيني تأنيب الضمير ونوض نخدم فالدار ونسيق ونفرز وزوجي يزعف والله حرت نقعد ولا نخدم ربي يخليلك العزاز عليكم شورو عليا متبخلونيش

اختي فرحة انا كان عندي نفس المشكل مع ابني الاصغر منذ دخولي الشهر الثاني و انا نعاني من مشكل المشيمة و البيبي الهابط ....في الاول ماسمعتش كلام الطبيب وعانيت دائما مع المرض و المستشفى و لما شفت باللي الله اعطاني روح و امانة ومارانيش محافظة عليها ضربت فيه صحيح واغمضت عيناي عن الاعمال المنزلية اخذت عطلة مرضية من العمل ومن المنزل و الحمد لله ابني الان عندو ثلاث سنوات و نصف ....
اللي حبيت نقوله ممكن يوجعك قلبك من الاوساخ و لكن تذكري دائما انك تحملين روحا بين احشائك من واجبك الحفاظ عليها
شفاك الله و اتم حملك على خير.......

ام متين · 2016-12-20, 18:44

ام شمسو لما نشوف اللون الاخضر ينش رح صدري لقراءة الافكار الجديدة حتى لو لم استطع تطبيقها
جهينة اليقين يسقسي عليك الخير راني غير هنا النهار قصير من الوقت الي نطل عليكم في الصباح وانا نجري حتى لصلاة العشاء والشغل عادي فطور وعشاء وتنظيفات عادية غير هذا المساء اديت بنتي للمسجد تقرا القران وحضرت ان مع قسم اخرحلم كبي ان الوحدة تحفظ القران وبالاحكام ربي يقدرنا جميعا