الجزء29 من واش طيبتي اليوم؟ - الصفحة 21

oum ibrahim · 2013-09-26, 08:22

ساندريلا طيابك يشهييييييي امممممممم و البريوش يهبل احمر يبرق يعطيك الصحة
ام فريال سارة طوكيو يا صباح الانوار على النوار ههههه
ام محمد مواااااااح يا الغالية الوصفة تسرقت و تحفظت الى حين التطبيق هههه
لهووووووووومة الهلوبة صباح النشاط يا يما تقولي عام ما شفناكش ههههه ما تزيديش تعاوديها و كولي مليح و راهو جاي الويكاند تهلاي مليح في روحك و استعيدي قوتك هههه

إلهام07 · 2013-09-26, 08:22

صباح الخير ام إبراهيم
عجبني شكل الغريبية كيفاش درتي حتى قطعتيها بمول الوردة عند بالي عجينة الغريبية تتفتت طرحتيها بكيس بلاستيكي ؟
يعطيك الصحة خرجت تهبل حتى الطياب لاخر يهبل كيفك تعرفيني نموت على طيابك
أنا البيتزا والمعجنات كامل قلتلهم منا على شهر ماتناموش تشوفوهم من يدي كرهت العجين هههههههههه
بصح بقالي الكامومبير والشيدار والجبن الطبيعي من المسابقة واقيلا نعفس على قلبي ونعاندك وندير بيتزا هههههه

ام محمد تاج راني حطيت وصفة قاطو النوقة في موضوع بروقة نتاع الوصفات

سخفتونيفي الغريبية واقيلا رحين ديرولي عليها الذبانة ونعاندكم ونديرها للعيد

*زهرة اللوتس* · 2013-09-26, 08:31

صباح الخير لبنات توحشتكم كاملين صباحو ام محمد أم ابراهيم الهام المبتدئة كامل لبنات راني روطار نروح نطل على المسابقة و نولي حقى أم محمد قاطواتك دايما توب ما شاء الله و أم ابراهيم بلا ما نهدر و نقول كلش متحوف و رراااااااااااائع و البسبوسة هذيك تاع المبتدئة راهي تهبل سخفت موت عليها بلاكش نديرها لعشية يعطيك الصحة قريت غير وزج صفحات اللخرين نروح نراجع و نصوت و نجي بووسة ليكم كامل

إلهام07 · 2013-09-26, 08:32

حقة بنات الغريبية لازم بالسمن أنا الوصفة اللي مالفة نديرها بلابال والزيت وجي تذوب في الفم

قولول نقدر نعوض السمن بمارغارين فلوريال ؟ بصراحة نحبها ريحتها كيما ريحة الزبدة

أم إبراهيم ربي يخليك مواح راني معولة غير ماكلة ورقاد هههههههههههههه البارح وصلت لأقصى درجات الارهاق ماتتصوريش نبات نخلط في امطبخ لل2.00 نتاع الليل ونوض على 6.00 نروح نخدم + الضغط النفسي أسبوع كامل هكذا البارح خلاص ماقدرتش نحل عينيا ماجيت نكتب هذاك الموضوع رايحة تخرج روحي

افففففففففففففف تهنيت

القبطية · 2013-09-26, 08:32

السلام عليكم وكيراكم وحبيت نعرف كيفاش نصوت

oum ibrahim · 2013-09-26, 08:34

مواااح ليك يا اللهلوبة انت الي تهبلي حنونتي
الغريبية ماشي حللتها و طبعتها لالا كورتها و دخلتها في الطابع حكمت لافورم و خرجتها
واقيلة راهي بدات حمى الغريبية ههههه
مبتدئة امممممممممم يا عيني على البسبوسة من ايديك تحففففففففففة يسلموووووو
ام محمد و الامهات الي هنا عندي مشكل مع ابراهيم ما يفطرليش الصباح
هو دائما كي ينوض بكري ما يفطرش حتى جوايه 8 و 9 تفتح الشهية نتاعو و اذا حتم على روحو و فطر بكري حاشاكم يرجع كلشي
البارح جربت قلت نعطيلو حتى و لو مغرف عسل يقولو مليح مع الصباح و الله غير والو تمتم قبل ما يخرج رجعو و ارتاح و اليوم و الله ما دخل الكوزينة خلاص و ما شافش الفطور قبل ما يخرج كيف كيف نفس الشيئ سبحان الله ما نعرف غير انا صرالو هكذا و لا كاين الي يديرلهم هكذا و لا مع الوقت يتنحالو و الله ما يجيني الرقاد نبات نخمم و نقول كيفاه يقرا و هو يروح بلا فطور
ماخليت حاجة ما درتهالوش هذا طرواسون هذا قاتو هذا بينيي هذا شوكولا والو الاغرب من هذا كلو انو قبل شهيتو و الحمد لله مليحة يعني ياكل مليح لكن هذي السمانة كي بدا القراية ولى ينوض بكري صرالو هكذا
واش تنصحوني ربي يجازيكم
اسمحولي طولت الهدرة بصح ماعرفتش كيفاه ندير

إلهام07 · 2013-09-26, 08:36

صباح الخير ندوش

حقة بنات بمناسبة انتهاء المسابقة جبتلكم هدية صغيرووووونة بما انكم تموووتو على التقرعيج خاصة وحد القرعاجة لو ما تشوفهاش ديرلها الحمى ههههههههههههههه

أم محمد تاج · 2013-09-26, 08:43

أم برهوووووم الغالية كان ولدي محمد هك يديرلي بصح تفرجت حصة وطبقت وجابت نتيجة رووووووعة مايش غير في الفطور حتى في الغدا والعشا وكلش وهي تجاهليه مدة يعني كي ينوض قوليلو تفطر ولا ماتفطرش إذا قالك لالا خليه ماتحاوليهش خلاص وماتضعفيش قداموووو وأفطري انت وزوجك وأولادك وتجاهلوه تماما مرة زوج ضرك تشوفيه يجي وحدو يفطر وثاني ماتعطيوهش انتباه كي يجي خليوه عادي والله تجيب نتيجة راح تتعبي على الأول بصح أصبري وماتضعفيش صمتيه وخليه وثاني ديريلو لمجة كي يروح يقرا ياكلها باه مايطيحلوش السكر ويدوخ من الجوع
أنا سوفريت مع محمد كان ماياكلش خلاص وكي تجاهلتو أنا وباباه والله ضرك الرحى مايحبسش هههههههههههههه راح المدة طول زوانت أصبري وقولي لباباه يعاونك ونشالله تجيب نتيجة حبوبة مواااح ليك وليه المشاغب

tokio hotel · 2013-09-26, 08:44

اقتباس:

المشاركة الأصلية كتبت بواسطة oum ibrahim

صباح الخيرات
جبتلكم غريبية تفطرو بيها

و هاذو طياباتي الايام الي فاتو
طاجين الشفلور

قراتان لوبيا خضراء

حمص

بيتزا درتها البارح للعشا

و لله الحمد و المنة على ما اعطى

الله يصبحك بالخير اختى فرحت كدكرتينى طيابك مشاء الله ماعليهش تقوليلي الغرتان انتاع اللوبيا

oum ibrahim · 2013-09-26, 08:45

ام محمد ربي يخليك حبيت تعطيني رابط موضوعك نتاع السردين حابة نديرو للغدا و حابة طريقة بلا قليان كرهت القليان هههه
الهام انا تاني و الله العجين هاذو الايامات لايدور ههههه و الله الي درتهم في المسابقة قعدنا 6 ايام ناكلو فيهم و مازال كاينين سي السيد ما يحبش بزاف المعجنات لازم نتحايل معاه باه يا كلهم يعني نزين و نرستق ههه على قولة المصريين و يا ربي ياكلهم و انا الي كنت معولة نزيد ندير الحمد لله الي ما زدتش كون ولينا عائلة اسمها معجنات ههههههه
البارح سقسيتهم واش تتعشاو ابراهيم حاب بيتزا درتهالو و كثرت فيها القرويار على قولتك ههههههه تعجبيني كي تقولي كثرت فيها الاجبان هههه نموت عليها

ميمنة الجزائر · 2013-09-26, 08:48

اقتباس:

المشاركة الأصلية كتبت بواسطة oum ibrahim

مواااح ليك يا اللهلوبة انت الي تهبلي حنونتي
الغريبية ماشي حللتها و طبعتها لالا كورتها و دخلتها في الطابع حكمت لافورم و خرجتها
واقيلة راهي بدات حمى الغريبية ههههه
مبتدئة امممممممممم يا عيني على البسبوسة من ايديك تحففففففففففة يسلموووووو
ام محمد و الامهات الي هنا عندي مشكل مع ابراهيم ما يفطرليش الصباح
هو دائما كي ينوض بكري ما يفطرش حتى جوايه 8 و 9 تفتح الشهية نتاعو و اذا حتم على روحو و فطر بكري حاشاكم يرجع كلشي
البارح جربت قلت نعطيلو حتى و لو مغرف عسل يقولو مليح مع الصباح و الله غير والو تمتم قبل ما يخرج رجعو و ارتاح و اليوم و الله ما دخل الكوزينة خلاص و ما شافش الفطور قبل ما يخرج كيف كيف نفس الشيئ سبحان الله ما نعرف غير انا صرالو هكذا و لا كاين الي يديرلهم هكذا و لا مع الوقت يتنحالو و الله ما يجيني الرقاد نبات نخمم و نقول كيفاه يقرا و هو يروح بلا فطور
ماخليت حاجة ما درتهالوش هذا طرواسون هذا قاتو هذا بينيي هذا شوكولا والو الاغرب من هذا كلو انو قبل شهيتو و الحمد لله مليحة يعني ياكل مليح لكن هذي السمانة كي بدا القراية ولى ينوض بكري صرالو هكذا
واش تنصحوني ربي يجازيكم
اسمحولي طولت الهدرة بصح ماعرفتش كيفاه ندير

صباح الخير ام ابراهيم ما تخافيش راهم كامل هكذا الاولاد وشنو لاقدرتي تعطيلو فاكهة على صباح ربي ولا حاجة يحبها يعني حتى حبة شوكولا برك بصح لا ما قدرش ما تحتميلوش راهم ينوضو صباح ربي عيانين مساكن وزيد القراية يخمو كيفاه

يروحو للمدرسة على هذيك يصبحو مسقمين وشنو ديرلو لمجة مليحة برك الصباح انا ثاني كنت نحتملو توجور يرجع قبل
ولا في الطريق في الطوموبيل يعني وليت نخليه يفطر في المجة خير وشنو نديرلو صباح شوية ما لانو مليح على الفراغ راهو ينشط الدورة الدموية ويخليه من بعد يقدر يصححصح في المدرسة وربي يحفظهملنا من كلس وء يارب

اما الهام الغريبية تجي بالسمن احسن بصح انا باه ما تجينيش ريح ة السمن ندرلها كي تذوب لافاني تاع الميزان تجي ريحتها روووعة وتاع السمن احلى من الزبدة جربيها وتشوفي

oum ibrahim · 2013-09-26, 08:52

و الله كما قلتي ام محمد بالضبط نسقسيه و نحاول فيه واش تحب نديرهالك للفطور والو يقولي لالا و باباه راهو معايا يقولي ما تحتميش عليه و يشريلو الي يحبها في الفطورو الله والو نفس الشيئ بالنسبة للمجة نعطيلو بصح بلا ما يشوف كون يشوفها يقولي نحيها بصح كي يولي من المدرسة نلقاه كلاها ههههه
ان شاء الله نعمل بنصيحتك و يا ربي تجيب نتيجة معاه و ربي يخليلك محمد و تاج و يفرحك بيهم

أم محمد تاج · 2013-09-26, 08:57

https://www.djelfa.info/vb/showthread.php?t=1281148

هاو ليك أم برهووووووم تكرمي يالغالية

أم ياسين الزهراء · 2013-09-26, 08:59

صباح الانوار

اهلا امورة على سلامتك

أم محمد تاج · 2013-09-26, 08:59

حبيبتي ام برهووووم راهم نص لي فوطو راحو من الموضوع مانعرف علاه إذا حابة أي استفسار راني هنا أوكي حنونة وراه روووووووعة زوجي حبيبي يموووت عليه