موضوع مميز الجزء الثالث من وصفات حراير واش طيبتي اليوم - الصفحة 21

idron0 · 2016-05-05, 12:15

الملفوف RIMA 87

تختلف قليلا عن وصفة ام اماني
العجينة: 250غ مرغرين طرية -نستعمل مرغرين ماني -كاس سكر ناعم ،3صفار بيض (و البياض نستعملوه باش نلايمو الحشو) ,فاني،3ملاعق كبيرة حليب سائل كيس خميرة كيميائية و تلايمي بالفرينة ،
الحشو:
2كيسان نواة كوكو ،كاس سكر ناعم ،فاني ،3ملاعق كاكاو اسود نخلطهم و نرحيهم و نحط بياض البيض تدريجيا_ما راحش تستعمليه كامل_حتى يصبح مثل العجينة ثم نضيف شوية ماء حتى يولي متلوق شوية حتى تقدري تبسطيه فوق العجينة.و الطريقة راهي موضحة في رابط ام اماني
https://www.djelfa.info/vb/showthread.php?t=1061944
و هاد المقادير اعطاتني 50حبة بالحجم لي راهو في الصورة.

إضغط هنا لرؤية الصورة بحجمها الطبيعي.

idron0 · 2016-05-05, 12:19

حلوة المهراس على طريقتي ام محمد تاج

العجينة: رطل مارغارين طرية رشة ملح كاس سكر قلاصي ومغرف صغيرة فانيلا نخبط الكل مليح ونضيف زوج صفار بيض وبيضة كاملة ونص مغرف صغيرة خميرة القاطو ونخبط ونلم بالفرينة نخليها ترتاح نص ساعة ونشكلها في لي مول سبيسيال تاع المهراس ونثقبها بالكوردو ونطيبها
كي طيب نخليها تبرد مليح ونغطس الجوانب في معجون المشمش ونردهم في كاوكاو مرحي رقيق ونذرذر عليهم البريو دوري قبل مانحشيهم خرج تحححفة ومن بعد نحشيهم بالحشو التالي
الحشو اختياري انا عملت حشو بلونين خرج تححححفة
حطيت كاوكاو مقلي ومرحي بقشورو طبقة اولى غير خفيفة وزدت كمية من النيستلي العادي ابيض ومن بعد كمية من النيستلي كاراماليزي وزينت كيما شفتووو خرج رووعة رووعة ونذرذر رشة خفيفة من البريوو فوق التزيين
نحمل الصور للافادة

إضغط هنا لرؤية الصورة بحجمها الطبيعي.

هاذ الكمية خرجتلي 70 حبة زاكي واقتصادي رووووعة

idron0 · 2016-05-05, 18:46

كريمة كرام ديبلومات ام محمد تاج

700ملل حليب نحطو في كاسرونة نكسر عليه زوج بيضات و5 مغارف كبار سكر ومغرف صغيرة فاني و5 مغارف كبار نشا ونخبط بالباتور حتان يذوب كلللش ونحطها على النار حتان تثقال ونزيد نخبطها بالباتور ونغطيها بالبابيي فيلم لازم يلامس الوجه ونخليها تبرد مليح مليح كي تبرد نضيفلها 4 مغارف كبار كرام شونتيي غبرة ونرجع نخبطها حتان تبياض وترجع ملساء ورطبة وخفييييفة رييييشة ونستعملها للتارت ولا كتحلية تهبل تهبل.

كوثر التائبة · 2016-05-06, 23:15

في ميزان حساناتك ختي

idron0 · 2016-05-09, 10:12

مقبلة بكريمة الجبن ام ساجد وسيم

هاذ لكمية تخرجلك 12 حبة
درت بيضةوحدة خرجتلي 12 حبة
بيضة مفصولة
ربع مغرف طماطم عبري بلمغرفة تاع لماكلة بصح ماتعمريش ربع مليح فهمتيني
ربع كاس ماء
42 غ زبدة
مغرف ك فرينة
ربع مغرف نشاء
طلعي لبياض وحده كي ثلج تخلطي كل المقادير من بعد ضيفي بياض البيض لي طلعتيه خلطي كلش وديريهم في مول سيليكون لي عندك المهم يكون فيه فراغ من داخل باش ديري كريمة الجبن هذي كشغل جينواز صالي
كريمة الجبن طلعي زوج كيري مع مغرف كبيرة فرماج شاف
وعمريهم من داخل بلابوش ادوي وزيني بزيتون وكورنيشون وخيار او سلاطة
تقدري ديريها في مول مرب او مستطيل وديريها كشغل رولي.

idron0 · 2016-05-10, 16:39

سموتيز فريز انا هي رزيقة

في خلاط كهربائي ديري حوالي 10 حبات فريز مقطعين و حبة موز و عصرة ليمون باه ميكحالش لون الموز و حوالي كوب حليب بارد و باطة ياوورت ذوق فراز و اذا تحبي لحلاوة زيدي مغيرفة سكر سينو ماكان لاه و شغلي الخلاط و شوفي كثافة الخليط تاعك كيما تحبي تقدري تزيدي لحليب اذا جاك كثيف بزاف و دوقي الحلاوة على طبيعتها .

إضغط هنا لرؤية الصورة بحجمها الطبيعي.

idron0 · 2016-05-10, 16:49

الغريبية بالزيت ام ساجد

إضغط هنا لرؤية الصورة بحجمها الطبيعي.

idron0 · 2016-05-10, 16:54

كعيكعات بالجلجلان لام وليد ام و ابنة

بصح انا درت مكان الفاني قشور القارس الاخضر عطا ذوق روووعة مع الجلجلان
و نقصت شويييا سكر ما عمرتش الكاس
و بياض البيضة اللي دهنت بيه الكعيكعات خلطت معاه ماء الزهر.

idron0 · 2016-05-10, 16:55

طاجين الدجاج لحلو ام و ابنة

بالنسبة لطاجين الدجاج لحلو هو وصفة مغربية لذذذذيذة تجي حلوة لكن اشي لدرجة حلاوة اللحم الحلو يعني حلاوة معتذلة
ممكن الاكتفاء فقط بالبصل و الزبيب
ممكن وضع كل الفواكه الجافة يعني على حسب الذوق و كذلك الامكانيات
بصح الاكيد الزبيب لاااازم و ما نستغناوش عليه

نحط ملعقة زبدة و ملعقة زيت في طنجرة و نقلي فيهم الدجاج
نرمي فوقهم البصل مقطع جوانح الوصفة الاصلية فيها بزاف ابصل يمكن حتى ثلاث حبات انا ما عجبتنيش بزاف هكذاك ندير بصلة وحدة كبييرة
نقلي على نار هادية و نحط الملح و شويا كركم على جال اللون و فوايدو و نحط عود قرفة و نجمة الارض و حبات تع الهيل و نزيد شوييا برك قرفة بودرة ما نكثرش بش ما جينيش المرق لونو غامق
نقلي و نمرق بماء سخووون
ما نكثرش الماء مجرد ما يتغطى الدجاج نغطيه و نخليه يطيب
نغسل مليح الفواكه الجافة انا مثلا غسلت مليح البرقوق او العينة بالماء البارد ماشي سخون و نصفيها مليح و نفس الشيء مع الزبيب
كي يقرب الدجاج يطيب نحط عليه عسل او سكر حسب الرغبة انا درت ثلاث ملاعق عسل يعني الحلاوة معتدلة و ما درتش ماء الزهر لانو العسل خدمتو في الدار و فيه ماء الزهر اللي تحب تحط السكر و تزيد ماء الزهر
نعاود نغطيه و نخليه حتى يطيب الدجاج و المرق ما يكونش بزاف و يجي خاثر نوعا ما
ننحي من هذاك المرق كاس نحطو في كسرونة على نار هادية و نحط فيه الزبيب و العينة و نغطيهم يطيبو و ما نحركش بالملعقة نحرك بيد الكسرونة بش البرقوق ما يطلقش الكحولة ديالو راهي ما تاخذش بزاف وقت في الطياب و تتعسل و يخلاصلها المرق
نغلي الروز مع المنكهات نحطو في صحن نزين بقطع الدجاج و الفواكه المعسلة و نسقي بكمية المرق القليييلة اللي تقعد مع الدجاج و نرمي حبيبات لوز محمصين او ممكن تعسيلهم مع الزبيب و العينة كيما تحبو

السر في الوصفة هو التحكم في كمية الماء ما لازمش تكون بزاف بش يجي بنين و ثقيل.

soulefa · 2016-05-10, 17:30

fort ces gateaux

idron0 · 2016-05-10, 18:06

معجون الفراز انا هي رزيقة

خوذي الفراز تاعك غسليهم و نحيلهم هذاك العنقود الاخضر معلاباليش كيفا يسموه ... خخخخ و قطعيها الى نصفين او ثلاث اجزاء حطي فراز في كاسرونة او مرميطة تكون سميكة باه ميتحرقلش المعجون و ارمي فوقها السكر . لكل 1 كلغ فراز حطي 700 غ سكر . و خلي السكر يذوب فيها بعد حوالي ساعة تلقاي السكر ذاب و الفراز طلق ماء وردي جميل جدا زيدي فيه ملعقة صغيرة فانيليا و حطي الكاسرونة فوق نار متوسطة و بمجرد كي تبدا تغلي نقصي عليها النار و خلي الخليط يبطبط في هدوء و متروحيش بعيد نحي هذاك الريم الابيض لي تشوفيه من فوق و بلاكي السيرو يغلي و يفيضلك انا صراتلي خطرة .... خخخخ و صراتلي كارثة مطبخية . بعد حوالي نصف ساعة يبدا السيرو يعقاد نحي شوية في ملعقة صغيرة و شوفيه الا يلصق ما بين صباعتيك اذا كان يلصق هذا معناه خلاص طاب اذا مزال خلي يزيد شوية . لازم تتحصلي في الاخير على فراز يدوب في الفم و يعوم في سيرو احمر براق و لامع و لاصق متستنايش حتى يعقد مليح هذاك فات الطياب . و فرغي المعجون تاعك و هو يغلي في البوكال و غلقي عليه و قلبيه على راسو و خليه هكاك حتى يبرد. تقدري تحتفظي به هكذاك لمدة سنة خارج الفريجيدار و ميفسدش بصح اذا حليتيه ديريه في الفريجيدار.

إضغط هنا لرؤية الصورة بحجمها الطبيعي.

idron0 · 2016-05-10, 18:55

طريقة تصغير الصور لام رامي oum ibrahim

البنات عييت نحاول فيكم تصغرو الصور ما حبيتوش امالا صورتلكم الطريقة بالتفصيل الممل و الي تعلمتعا على ام رامي ربي يذكرها بالخير وهي للي يستعملو الكميوتر يعني بدائية شوية ماعليش المهم نشوفو خيراتكم و نتمتعو بيها
اولا بعد ما تحملو الصور للجهاز تروحو للصورة الي رايحين تصغروها اضغطو عليها رايحة تتفتح في صفحة اخرى وحدها

إضغط هنا لرؤية الصورة بحجمها الطبيعي.

الفوق اضغطو على فتح الصورة و اضغطو على برنامج معالجة الصور Microsoft picture manager

إضغط هنا لرؤية الصورة بحجمها الطبيعي.

رايحة تخرج الصورة في صفحة اخرى فيها الفوق مكتوب صورة نضغط عليها تخرجلنا خيارات من بينها تصغير الصورة نضغط عليها و نختار الحجم الي نحبو انا ندير هذا الي في الصورة المهم يكون حجمها صغير و مناسب

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

لما ننتهي نضغط على زر اغلاق الصفحة تخرجلنا ايقونة حفظ نضغط عليها

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

وهكذا تكون الصورة مصغرة

إضغط هنا لرؤية الصورة بحجمها الطبيعي.

واذا حبيتو تكتبو عليها روحو كما المرة الاولى فتح الصورة و اضغطو على برنامج الرسام paint

إضغط هنا لرؤية الصورة بحجمها الطبيعي.

رايحة تتفتح الصورة في صفحة اخرى اضغطو وين مكتوب حرف Aواختارو اللون و الحجم الخط الي حبيتو مع اللغة الي رايحين تكتبو بيها عربية او فرنسية و روحو للصورة و اضغطو يخرجلكم اطار الكتابة و اكتبو ثم انزلو تحت هذاك الاطار نتاع الكتابة لكن ابقاو فوق الصورة و اضغطو رايح يختفي الاطار

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

ثم روحو لغلق النافدة و اضغطو على حفظ الصورة و فقط
وهكذا الصورة تكون صغيرة و جميلة و الاهم من هذا كلو ما تثقلش الصفحات.

idron0 · 2016-05-10, 18:58

طريقة تصغير الصور ام ياسين الزهراء

انا كانت عازفة ولاتلي طريقة ساهلة نحاول نوريهالكم المهم حاولو تفهمو ياحابسات شفتو الصورة انتاعكم اكليكو باليمنى تاع لاسوري تخرجلكم لاليست انتم روحو modifier ادخلو فيها يعني اكليكو عليها راح تدخلو للصورة تلقاو الفوق redimrnsionner تكليكو عليها راح يخرجلكم طابلو فيه pixels اكليكو عليه راح يخرجولكم ارقام انتم فاصو الرقم اللي فيه الخانة الاولى برك راح يتعدل الثانية وحدها واكتبو 666 ومنبعد ديرو ok ومنبعد كيتدو تخرجو من الصفحة تجيكم بلاكى اقبلو التعديلات راح تصغار .

كوثر التائبة · 2016-05-10, 19:01

في ميزان حساناتك

ملاك ملاكي · 2016-05-12, 12:40

ربي يجازيك اختي والله بحفظك والله يهلتيها علبنا ربي يعطيك ويمنيك على قد نيتك
مشكووووووورة