السلام وعليكم ,
ياجماعة الخير انعلوا الشيطان ... والله الواحد يحير مين يقرا كلامكم ,, سبحان الله كنتوا جايبينها علاما وممبعد تحسب ناس واحدوخرين رانا نحكيوا معاهم ....من قبل كنت نشوف هذا الشي قلق, قلنا ماعليش نساعفوا هاذوا ليراهم يهدروا غير باللتي هي أحسن ,,, مي دوكا اسمحولي بزاااف لاخترش راني نشوف فيها جياحة ونص ,,, اللي يهدر تعطوه ,,, اللي يحب يوصل حاجة تعطوه ..
الواحد سبحان الله يكون لاباس عليه مين يحب يضرب طلة هنا ... القلقة تخرجلوا من راسوا .
المهم والمفيد سقسيت واحد نعرفوا من سلك الامن على الدخلة ... أكدلي بلي من مارس انشاء الله يبداو يعيطلولنا ,,,على حساب كلاموا قلي مستحيل يعيطولكم في هذا الشهر و حتى فيفري مايعيطولكومش ,,,لاخترش هذا العام راهي حالة استثنائية بالنظر لعدد المناصب المفتوحة ...
وقلي بلي 3000 متربص مارايحش يشكل مشكل بالنسبة للمدارس لاخترش كلشي راه مدروس مسبقا من طرف الادارة .
بالنسبة ليراهم يقولوا ويهدروا بلي ليكملوا الملفات دياولهم ماراهمش ناجحين بصفة نهائية ..كلامهم راه صحيح ولكن في الحالة الاتية : الملفات تكون غير مطابقة للشروط المطلوبة . التحقيق الاداري يكون سلبي ... هنا راني معاكم .. ولكن ليراه عارف بلي الملف ديالوا راه مضبوط ومريقل .. وعارف بلي التحقيق مايخرج بحتى نتيجية ... من أحسنوا يستنى واقتاش يلحوا الاستدعاء .
وسمعنا هاك وهاك بعض الناس يقلك المتربص يدخل للمدرسة ليراه تابع ليها جهويا .... هنا اسمحلولي .. أنت تسكن فالغرب ممكن تروح تقرا في عنابة .... وانت ليراك تسكن فالصحراء ممكن تروح للبلعباس ... وانت ليراك فالشرق ممكن تجريها في بلعباس .,,نعطيكلم مثالو على مسؤوليتي عندي زميل نعرفوا راه دخل مع الدفعة تاع قسنطينة ليدخلت هاد الخطرة .. وهو من الغرب وماعندوا حتى شهادة اقامة من الشرق .... ولكم التعليق على ذلك .كل واحد يفسرها كيما يعرف .
ولوكان نزيدوا نفتحوا أكثر النقاش ديالنا .. يقولوا البعض بلي فالمدرسة مايمدولهومش البسة رياضية في فترة التربص . ,,هذا ممكن ولكن هنالك بعض المدارس التي تسلم للمتربصين البسة رياضية باللون الازرق مكتوب على ظهرها اسم المدرسة ..بغرض عدم التمييز بينهم ,, ومع الامكانيات ليرهي تسخرها المديرية العامة للأمن الوطني ممكن وهذا الأمر غير مستحيل أن تعمم الالبسة هذي على جميع المدارس وتفرضها في نفس الوقت .. ومن جهة اخرى الواحد من باب الاحتياط مادابيه يدي التوني ديالوا معاه في حالة ما اذا ماكانش هد الشي .
البعض تاني قال بأنوا حصة الرياضة الصباحية تكون على 6 ,, معلومة صحيحة ولكن مشي دايمن لأنوا ممكن تبرمج على 4 تاع الصباح وتكون على مدة ساعتين ..وراهي صح كاينة لدى بعض المدارس لتكون اعوان الشرطة لحتى اليوم ....على كل حال 6 أو 4 في زوج ملاح ...الرياضة راهي متعة وراهي بليزير بالاضافة انها تربي العقل تاع الانسان وتحافظ على الصحة تاعوا ... ولكم التعليق على ذلك ....
نسيت تاني حاجة مهمة وعربالي بلي أي واحد فيكم رايح يتأسف عليها ... كاين بزاف ناس من سلك الامن مين زعما اتحب اتسقسيه على الشرطة وكيفاش الخدمة ... تلقاه يلعبلك بالمورال من هدرتوا ... يقلك مشي مليحة وفيها المشاكل .. والضغط مايحبسش ... وزيد هم الدنيا ,,,,الخ ,,,,يعني تلقى نسبة الرضا بالمهنة هادي شبه معدومة عندوا .وللأسف نلقاوا بزاااف ناس يروحوا مع هذي الديباجة .. كاين لي يدخل للمدرسة باه يدير ستاج يقعد يومين يلقى الحالة صعيبة ويبدا يتفكر فالهدرة تاع السيد ... امالا على جال هاديك يخرج ويخلي بلاصتوا للناس وحدوخرين ......
ومن هادي مادابيا نوصل رسالة ,,انشاء الله تفهموني هادا ماكان ,,,, الناس هادوا ليفشلوا وضاعوا في هذ المهنة لوكان نعملوا دراسة عليهم ,,,, ياتلقاهم ماعندهمش مستوى ومين نهدروا على المستوى تدخل فيها بزاف صوالح ( يعني ماكانش عندوا ارادة باه يتكون ويأهل نفسوا .... ثانيا يا هذا ربما كان انسان محقور في حياتوا ومين دخل للشرطة ماقدرش يفرض شخصيتوا على الاخرين ... ماعرفش يفرض رأيوا ....مشي منضبط ... مايحبش يخدم ... فنيان .... يخدم على جال الشهرية .... يخمم على روحوا برك .... يتحايل في خدمتوا ... يزرطي .. يهدر ويشتكي بزاف ..... الخ الخ هنا الخدمة هي لتكرهوا مشي هو ,,
والحمد الله تاني كاين ناس ماشاء الله ... ناس في هذا الميدان يمدوا بيهم المثل فالسيرة ديالهم وفي خدمتهم واغلبهم ناجحين في حياتهم ,,ملاح مع ربي ومع العباد ,,,هادوا الناس لوكان تسقسيهم على المهنة هادي ...رايح يقلك مليحة وخدمة شريفة ويخليك تتفائل بالخير ......عكس الناس لخرين
من الاجدر والامثل الانسان يبني المشوار المهني ديالوا على مبادىء وأخلاق ...يكون منضبط ومتمسك بالقانون لأنوا الواحد لوكان يمشي بالقانون واحد مايهزوا وواحد مايضغط عليه ...يلزم الواحد يعرف بلي المهنة هادي شريفة والكل يتمناوها لاخطرش راه فيها منفعة كبيرة للبلاد وللمواطن ...يلزم يكون هاذا الانسان محترم لكي يحترم من طرف الاخرين ...يكون هاذا الانسان راض على المهنة ديالوا باه يقدر ينجح فيها ... يكون يحبها كيما يحب أي شىء من حولوا ... يكون مخلص ليها ومتمسك بيها ولو كانت الظروف صعيبة عليه ..وبالباقي انشاء الله كلوا خير على خير ليه و للبلاد .
خلينا نكونوا متفألين مع بعضانا .. سبقونا ناس لي ممكن مايستهلوش هاد المهنة .. امالا حنا تاني نقدروا نغيروا ونحسنوا هذا الميدان كأطارات فالمستقبل ..ممكن نغيروا المفهوم ليحملوه هادوا الناس ونحسنوا هاد النظرة ..
البلاد رايحة تعطينا مسؤولية وثقة في نفس الوقت ... يلزم نكونوا قدها والا نقدروا نحكيوا ونقليوا مع الناس ليهدرنا عليهم .
حنا ديما نقولوا اللي فيها الخير لينا وللبلاد ربي يجيبهالنا واللي فيها الشر لينا وللبلاد ربي يبعدها علينا .
ربي يوفقنا كامل .... هههه ماعليش اذا حابيتوا تقولوا عليا راني نتفلسف عليكم اليوم مارايحش نزعف لاخترش عربالي بلي الشي ليراني نقولوا صحيح مع كل احتراماتي للجميع بمن فيهم المتشائمون والمتشائمات . سلام
( تقرير عن مشاركة سيئة )، و الموجودة أسفل كل مشاركة .
2015-01-18, 11:45
مجرد رأي
العرض العادي
