Mh47 الجزء الــــ84 من واش طيبتي اليوم - الصفحة 20

omhadil · 2014-08-10, 20:49

صح عشاكم
انا عشايا شطيطحة لسان البقرى زوجى سخف عليهاانا ماقدرتش ناكل رانى مريضة شوية قلييت شوية فلفل حلو وديسير دلاع
والحمد لله

malek nour hane · 2014-08-10, 20:52

أم سهام حكمتك لموبايل راهي خضرا هههههه ااااا راح نشوف وش حطيتو عند الرفيس تاعك حبست الله يبارك يهبل قوليلي بالتفصيل كيفاه درتيه و زيدي كيفاه درتيا الزفيطي الصباح حاطاتو حبيبتي أم أناس الله يخليها و عطاتني طريقتها زيدي مديلي طريقتك نتي و للك الف شكر

طالبة الجامعة · 2014-08-10, 20:52

بصحتك الرشتة يا اولادي

طالبة الجامعة · 2014-08-10, 20:53

حنا عشانا كسكس

ام سهام 02 · 2014-08-10, 21:07

ام هديل طالبة الجامعة بصحتكم واش طيبتو بالهناءوالشفاء

اولادي غيرتني الرشتة يعطيك الصحة وكثر خيره لعطاكم الخضرة بصحتكم

توتة واش ركي ما شاء الله عليك كلامك عسل

أم ملك · 2014-08-10, 21:11

اقتباس:

المشاركة الأصلية كتبت بواسطة malek nour hane

راني هنا أم ملك اسمحيلي هذا وين دخلت... دخلت على الخضر تاع أولادي اممممممم ياسلام بصحتك
أم ملك كي يطيب السباغيتي و يكمل صفيه فكسكاس من الماء لي غليتيه فيه...و سباغيتي و هو سخون هكاك زيدي 4 مغارف فرماج رابي و كسري عليه 2 بيضات نيين و زبدة و مغرفة مايونيز و خلطيهم مليح.... والبقية كيما حطيت و إذا نسيتي حبوبة نعاودلك و إذا كشما مافهمتيش راني هنا اختي
صح عشاكم انا ملي جيت هنا و حنا غير مع البرد الحمد لله انا السخانة مانحملهاش خلااااص تفشلني.... سيغتو اليوم وحد البرد و وحد المطر تقول رانا فجانفي... عشايا حمص أم كوثر ربي يحفظها و أن شاء الله ترجعلنا فاقرب وقت ... و سلاطة و الحمدلله

شكرا حنونة ربي يخليك راني كتبتها الوصفة إن شاء الله نجربها
برك ما فهمتش البيض نيء ولا مغلي دروك سي بون شكرا حنونة

أم ملك · 2014-08-10, 21:13

هاو ليكم المطلوع سخون

ام سهام 02 · 2014-08-10, 21:13

ملاك نورهان مرات اضطر نخرج بلا مانطفي عزيزتي والر فيس عبارة عن المعارك وديريه في الروبو انبعد نفوره ونسقوه بالعسل وكاين ليدير السكر الناعم

أم ملك · 2014-08-10, 21:15

هاو ليكم المطلوع سخون

malek nour hane · 2014-08-10, 21:18

أم ملك اممممم طيابك روعة تعيشي كيفاه ديري زفيطي تاعك عطاتلي لاغوسات حبوبتي أم اناس صباح زيدي اعطيلي تاعك ختيتي... تعيشي ابعثيلي طرف مطلووووع امممم

malek nour hane · 2014-08-10, 21:22

أم هديل إن شاء الله ربي يشافيك و بصحتكم الشطيطحة
أم ملك المطلوع تاعك روعة والله يسخف كيفاه ديريه... بغيت نسقسيك إلا مافيهاش مانع انتي من الشرق؟؟؟

touta2010 · 2014-08-10, 21:23

ام سهام انت لعسل حر ماشي طايوان ههههههههههه
شكرا على الاطراء موووووووووووح
اولادي انت زوجك جاب الخضر وانا صاحب السمو جابلي كمية كبيرة من القورجات وبدا يقسم فيها في الطريق وجابلي كمية معرفتش واش نعمل بيها تقول ندخلهاله في نيفه هههههه باه يجيب بطاطة ولا دلاع جابلي قورجات قالي مكانش عند صاحبي غير القورجات

أم ملك · 2014-08-10, 21:29

كون جيتي حدايا ملك نورهان كل يوم نديرلك خبزة

شوفي حنونة ملك نورهان أحنا ما نديروش الزفيطي عندنا مي الوصفة تاعو هي
فلفل حار و ثوم وطماطم مشويين نهرسهم يهم مليح في هداك المهراس يقولو لازم مهراس تاعو سبيسيال
تزيديلو فطير لي هو رخساس في الشرق و قصبر و زيت الزيتون و تزيدي تهرسي مليح
و يتاكل في مهراسو

أم ملك · 2014-08-10, 21:39

اقتباس:

المشاركة الأصلية كتبت بواسطة malek nour hane

أم هديل إن شاء الله ربي يشافيك و بصحتكم الشطيطحة
أم ملك المطلوع تاعك روعة والله يسخف كيفاه ديريه... بغيت نسقسيك إلا مافيهاش مانع انتي من الشرق؟؟؟

لالا أنا مش من الشرق من الغرب ولاية تيسمسيلت و إدا تعرفيها
بالنسبة للمطلوع ندير عبر سميد و زوج فرينة و زوج مغارف كبار خميرة تاع الخبز و مغرف كبيرة سكر
و ندير السانوج و الحبة الطيبة إختياري بصح أنا نحبهم و نحب نستفاد من فوائدهم
و نشمخ بالماء أنا نطلقها مليح يعني نكثر الماء ما نخفاش من العجين المطلوق
و مبعد نزيد مغرف كبيرة ملح و نعجن مشي بزاف حوالي خمس دقائق و نخليها تخمر ربع ساعة
و نهبطها ثم نزيد ربع ساعة و نهبطها ثم نخبزها و نخليها تطلع مليح ثم نطيبها

ام سهام 02 · 2014-08-10, 21:41

اقتباس:

المشاركة الأصلية كتبت بواسطة touta2010

ام سهام انت لعسل حر ماشي طايوان ههههههههههه
شكرا على الاطراء موووووووووووح
اولادي انت زوجك جاب الخضر وانا صاحب السمو جابلي كمية كبيرة من القورجات وبدا يقسم فيها في الطريق وجابلي كمية معرفتش واش نعمل بيها تقول ندخلهاله في نيفه هههههه باه يجيب بطاطة ولا دلاع جابلي قورجات قالي مكانش عند صاحبي غير القورجات

والله العظيم لضحكت بصوت سمعوني جاو يجرو ليا الله يعطيك ما تتمناي يااحلي توتة بخفت دمك تنحي عاى الواحد