احكولنا شوية على طوايش الاولاد الصغار - الصفحة 2

مواطنة · 2012-02-08, 07:12

السلام عليكم ورحمة الله عندي زوج حكايات
عندي زوج بنات خالي وحدة عمرها ست سنين و التانية عام و نصف ماتعرفش تهدر و وعرة كانو يلعبو ببالو صغير دخل تحت سرير بنت خالي الكبيرة حاولت تجبدو بيدها ما قدرتش و بقات تحاول بلا فايده خزرت فيها الصغيرة باحتقار و دفعتها راحت جابت فرتوار و جبدت البالو كي الفحلة و ختها المسكينة تصورو حالتها.
تعرفو بلي الرجال ما يحبوش نساهم يخرجوبزاف إمالا كونا صغار خويا كان بياع فرنسى خرجتنى ماما بتخبية و قتلنا بالاكو تقولو لباباكم بلي خرجتو قنالها إيه كي رجع بابا من الخدمة راح ليه خوية البياعيجري قالو بابا بابوالله ما خرجنا اليوم و فيقها بنا.

meriem maria · 2012-02-08, 21:10

نحكيلكم على ولد اختي صغير يموت على سوبر مان ايا وحد المرة غفلت عليه اختي هي تقول راه عند جداتو و جداتو تقول راه عند يماه و هو اطلع للدالة يعني السطح بلا اسوار و تحت هذي الدالة كاينة دالة اخرى حابطة ب2م هو دار خيمار و اقفز من الدالة للدالة كيما سوبر مان سمعوه غير يبكي نكسرت يدو و رجلو و هو مكسور يقول اشرولي لبسة سوبر مان اشرينالو اللبسة و لبسها تخيلو سوبر مان داير بلاتخ في رجلو و يدوا دارت اختي وعدة و اللي يساقسي نقولولو وعدة سوبر مان اللهم احفظ اولادنا

السيدة كرمين · 2012-02-09, 11:51

بالنسبة ليا معنديش قصة معينة لكن ولدي الصغير مهبلني ومحيرني في عمروا 18 شهر

ويعرف كيفاه يكلحني

الا شافني خزرت فيه - زعفت منوا - يرميلي وحد التبسيييييييييييييمة وش نقلك

تذوب لحديد ويبدا يعمل تصرفات تخليني نضحك بلا نا نفيق

فايقين لولاد تع ضرك

و اكبر حاجة مهبلتني كي يوقف عند المايدة عييت نحيلوا هاذ الطبيعة

قوليلي علاه على أذوذ ههههههههه يقصد القازوز

ويبقى يزن على الراس وبطرقة او باخرى ينال غرضو

واذا سمع الأذان ارواحي واتفرجي

آآآوو بر........يقصد الله اكبر

ويجيب السجادة ولازم يوقف في الوسط

وكي يسجد تسمعيه يتمم عيت نفهم وش يقول

واذا شاف واحد من خوالوا يجرييييييييييييي عندوا

وغير يبوسو يقلولو عن عن يقصد الطوموبيل مريض بيها

فايق بسلامتو بعكس خوه لكبير

غنوشة · 2012-02-11, 09:53

اقتباس:

المشاركة الأصلية كتبت بواسطة الواثق

نحيلكم على روحي كي دخلت الابتدائي دخلت للقسم لقيت معلمة تقري فينا بدات الانسة تطرح في الاسئلة والاولاد يشاركو يقولو انسة انسة انييييييييسة ..........انا نحسبهم يقولو عانسة عانسة عنييييييييييسة .........هوما كي سكتو انا نضت كي الشاطر وحدي في القسم عانسة عانسة عنييييييييسة ضربتني بكف وخرجتني من القسم مافهمت والو هي دارت عليا وانا عمري 5 سنوات لانها كانت عانسة لم تتزوج بعد ..........انا فهمتها كي دخلت الاكمالية فقط ................المهم ولات تكرهني ومبعد ولات تحبني وانا ثاني وكنت نروح للمنزل تاعها نرسمو عندها رسومات هههه وهي تموت من الضحك من رسوماتنا

ههههههه أجمل قصة سمعتها في حياتي ،تخيلة الموقف .وقتلتني بالضحك .

غنوشة · 2012-02-11, 10:07

السلام عليكم
أولا شكرا أختي على هذه المبادرة الطيبة تستحق التثبيت.

عندي وليد أختي وبنت خويا عمرهم لا يتجاوز السنتين ..لقاو نحل طايح في الأرض ديخان .بنت أخي خافت وهربت ولا وليد ختي البيلدوزار. راح عفس عليهم وهو مش لابس الحداء .المسكين جاء رفد رجلو وينفخ عليها أف أف أح أح .قرص النحل ،كي شفناه تمرغنا بالضحك

*ملاك الليل* · 2012-02-11, 12:57

اقتباس:

المشاركة الأصلية كتبت بواسطة الواثق

نحيلكم على روحي كي دخلت الابتدائي دخلت للقسم لقيت معلمة تقري فينا بدات الانسة تطرح في الاسئلة والاولاد يشاركو يقولو انسة انسة انييييييييسة ..........انا نحسبهم يقولو عانسة عانسة عنييييييييييسة .........هوما كي سكتو انا نضت كي الشاطر وحدي في القسم عانسة عانسة عنييييييييسة ضربتني بكف وخرجتني من القسم مافهمت والو هي دارت عليا وانا عمري 5 سنوات لانها كانت عانسة لم تتزوج بعد ..........انا فهمتها كي دخلت الاكمالية فقط ................المهم ولات تكرهني ومبعد ولات تحبني وانا ثاني وكنت نروح للمنزل تاعها نرسمو عندها رسومات هههه وهي تموت من الضحك من رسوماتنا

هههههههه
الحمد الله لي تصلحت الامور

*ملاك الليل* · 2012-02-11, 13:09

عندي بنت اختي زهرةعندها لربعة سنين ربي يحفظها تروح تقرا خاص والمنطقة لي تقرا فيها بعيدة
كي تكون في السيارة اقول لباباها علاه القمر راه يتبع فينا حب يقرا معايا هههههههه
وكاين حاجة اخرى تقتل بالضحك
عندي اختي كبيرة عليا بعام كي كنا صغار كنا نحبو الشتاء ونهربو لماما ونخرجو نلعتو فيها
مرة تدا يضرب العظلم البرق والضو في السما اختي ولات تقلي سقمي روحك ربي راه يصور فينا ههههههه الله غالب كنا صعار ونعرفو بلي ربي سبخانو في السما
وحنا ولينا كلما يضرب البرق نسقمو رواحتينا و نتصورو والناس يخزرو فينا حسبونا مهابل هههههههه

*ملاك الليل* · 2012-02-11, 22:13

اقتباس:

المشاركة الأصلية كتبت بواسطة elkamar

تخيلتكم كيفاه كونتو تسقمو روحكم, مت بالضحك ربي يحفضكم

ههههههه اضحك و زيد

zahra30 · 2012-02-12, 22:43

شكرا على هذا الموضوع و يستحق التثبيت ( براءة الذكريات المنعشة للقلب )
انا عندي ولدي يحب طيور الجنة ومرة كان يغني اغنية ( قال الارنب لامو ....) .ولما وصل المقطع ( وراح الارنب يتمشى في البستان ...) .ولدي واش يقول ( وراح الارنب يتمشى بالفستان) وانا نضحك على البراءة انتاعو يغني بلا ما يفهم واش راه يقول وتخيلو الارنب بالفستان كيفاش ماداير هههههههه

ريحآنة الوفآء · 2012-02-13, 21:24

ههههههههههههههههه
قتلتوني بالضحك
انا كي نقعد نحكيلكم
اسمحولي ظرك معنديش وقت

ام نسمة · 2012-02-16, 13:53

اقتباس:

المشاركة الأصلية كتبت بواسطة *ملاك الليل*

عندي بنت اختي زهرةعندها لربعة سنين ربي يحفظها تروح تقرا خاص والمنطقة لي تقرا فيها بعيدة
كي تكون في السيارة اقول لباباها علاه القمر راه يتبع فينا حب يقرا معايا هههههههه
وكاين حاجة اخرى تقتل بالضحك
عندي اختي كبيرة عليا بعام كي كنا صغار كنا نحبو الشتاء ونهربو لماما ونخرجو نلعتو فيها
مرة تدا يضرب العظلم البرق والضو في السما اختي ولات تقلي سقمي روحك ربي راه يصور فينا ههههههه الله غالب كنا صعار ونعرفو بلي ربي سبخانو في السما
وحنا ولينا كلما يضرب البرق نسقمو رواحتينا و نتصورو والناس يخزرو فينا حسبونا مهابل هههههههه

والله ماتتخيليش قداش ضحكت من قلبي والله للطفولة سحر خاص جدا لن نجده ابدا في اي مرحلة اخرى من حياتنا

ام نسمة · 2012-02-16, 13:57

اقتباس:

المشاركة الأصلية كتبت بواسطة أم البراء السلفية

السلام عليكم ورحمة الله وبركاته
نحكيلكم على الصغيرة نتاعنا في الدار
المهم مرة اسرينا على بابا باش يخرجنا نشرو ملابس قالنا نديكم ان شاء الله بشرط حاجة ماتبانش منكم وحتى اختكم الصغيرة لبسولها جلباب
اختى الصغيرة عندها 4 سنين
لبسنا ورحنا
هبطنا بابا في الحانوت كانو صحابو رحنا حنا نشوفو واش ندو وبابا راح عند صحابو مجمه معاهم
واختى الصغيرة قاعدة الناس ايسلمو عليها
غيرتهم كي كانت بالجلباب
والحانوت كان معمر ماشاء الله بالغاشي
ايوه حوسنا على اختى القيناها في وسط مجموعة من النساء وصحاب بابا يخزرو فيها قاعدة تشطح زعما كيما صحاب الراب
وتغنى في هادي الغنية
احنا صحاب الراب ناكلو التراب
الفيستا محلولة
السروال مثقوب مكان والو في الجيب الخدمة ربي يجيب
بابا ماصاب حشم واحد الحشمة من صحبو ماصاب وين يدخل
زعما هو باللحية واحنا الكل بالجلباب وحتى اختى الصغيرة كانت لابسة جلباب
وتغنى وتشطح
دارو قاع بيها اللي في الحانوت وقعدو يضحكو
وكي سقساها بابا وين جبتى هادي وشكون علمك هاكدا
قاتلو من برى
الحمد لله اللي ماقتلهاش بابا

واش انقولك هادي قاع الشابة فيهم مت باضحك ولات كرشي توجعني من الضحك وابني يضحك معايا ويسقسي فيا و علاش راني نضحك باينة هاد الطفلة شقية وعفريتة تاع الصح ربي يخليهالكم

ritel dz · 2012-02-23, 12:58

عندي ولدي صغير عمرو خمس سنين يقرا في المدرسة القرانية تعلم دعاء النظر في المراة في الدار عندنا مرايا في كلما يفوت يقول الدعاء شحال من مرة وهو يجري ويلعب عمرو نساه من بعد كره تعرفو لولاد الصغار ولا كي يوصل للمراية يحبو حتى يفوت عليها باه مايشوفش روحو ومايقولش الدعاء بزاف اللهم حسن خلقه كما حسنت خلقه

أم رزق الله · 2012-02-25, 14:48

انا عندي وحدة طفلة صغيرة من عايلة زوجي تحشم بزاف مالا قالتلها يماها نحي الحشمة ازدمي كيما لبنات الصغار ايمالا خدات الراي كان عرس فالحومة تاعهم جابو الزرناجية و كي جا باباها مالخدمة لقى بنتو تشطح في وسط ليجان كي حبو يزرقوها قاتلهم يخي نتوما قلتولي نحي الحشمة

~~سياف 100~~ · 2012-04-01, 13:48

ربي يحفظ ويستر كل اولاد المؤمنين انشاء الله و اللي ما عندوش ربي يرزقو انشاء الله
موضوع رائع شكرا لكم