ماذا افعل معها و هي طفلة

[جيهان13091991]

hhhhhhhhhhhh ya khouya martak sghira fal 3a9liya haka khir tzahilak dar khir matkoun kbira twali t9ila warzina tasmat bassah lzm tna9as chwiya lsl rabi yhanikom wkhaliha fi 3a9liyatha ma3andak madiralha

[وهاب 76]

المهم ما راهيش تجيبلك المشاكل
هذه التصرفات مع الوقت تروح وعلمها غير بشوية فالذنب ليس ذنبها بل ذنب أمها التي لم تهيئها لمثل هذه الحياة الجديدة
و سبوتي معها الريال لا تقعد بلا عشا ههههه
بالتوفيق أخي

[بنت الباهية]

اصبر عليها و ربيها على يدك
بشوية و بسياس هادي حساسة
ربي يدوم عشرتكم

[djamelsen]

احمد ربي على هذه النعمة وهبك ربي هدية هي لم تضرك في شيء العب أنت أيضا ما أحلى اللعب تكون ببراءة أطفال و لا البكاء على الاطلال

[saladin_dz]

اخي الشيئ الممكن انصحك بيه كخبرتي في الزواج

هو انو زوجتك مازالت صغيرة العقل اي بمعنى انها ربما تكون هي البنت الوحيدة في المنزل والبقية ذكور واما ان تكون الصغرى ولا منافس لها

هاذ الاشياء خلاوها تنوض بالعقلية تاع راهي صغيرة ومازالها تحس بلي راهي صغيرة

اذا باش تكبر عقلها حملها نوعا من المسؤولية تجاه الزوج والمنزل وتقوم بالشيئ لي شوي صعيب ويديروه لحراير تاع الصح وكي دير هي محاولة اشكرها بزاف

والحاجة الموالية لي نقولهالك حسسها بلي راهي ام اولادك وربي يرزقك بالاولاد ان شاء الله لأنو كي المراة تحمل تتبدل تماما من عقلية الى اخرى تحس بالامومة

والامومة معنى كبير اذا تحس بلي راهي كبيرة وتبدا تنحي بالتدريج الاعمال الصبيانية ولفها تتفرج غلى القنوات الدينية والاجتماعية مثل قناة الناس اقرأ الحكمة قنوات

الطبخ الخ.......

زيادة على هاذا حاول ان تجنبها قنوات الجياحة واشطيح والغناء باش ما تتأثرش بيهم ولازمك تكون السند الرئيسي لها تسما سقسيها وبينلها بلي راكي مرا تاع دار

ماشي صغيرة هي بطبيعة الحا تتقاس وتتبدل نحو الاحسن

ودوك نروحو تسيبورتي الريال هاذي انزعها من الذاكرة تاعها وكي يولي ماتش يلعب قولها سيبورتيني انا انا هو كلش في حياتك

تبع اخي الطريقة لي وصيتك عليها ونتمنا يكون تحسن ونتمتى كذلك اخي المحترم طمني عليك ولو برسالة شكر على الخاص والله ولي التوفيق

سلامي الحار من الاخ صلاح الدين انا في الخدمة اخي اي مشكل تتلقاه الرسائل الخاصة اي موجودة وافتح قلبك معي ان شاء الله ما يجيك الا الخير

حاجة نقولهالك ادعيلي بالنجاح في الحياة ويبعد علينا ربي كل البلاء والشر

[صُبح الأندلس]

المشاركة الأصلية كتبت بواسطة مشكلتي

السلام
راح نطرح عليكم مشكلتي ممكن تعتبروها صغيرة مي هي فريمو تقلقني و نتمنى تعاونوني
انا راجل عندي 28 سنة متزوج من عام و 5 اشهر من مرأة عندها 23 سنة
مشكلتي هي ان زوجتي طفلة بأتم معنى الكلمة فالاول كنت نحسب بسكو فارقت الاهل و تبدلت عليها الحياة بصح عقليتها صغيرة مثال ك
1- تخاف من الظلمة مرة راح تريسيتي فالليل ماكنتش فالدار رجعت صبتها ميتة بالبكاء حتى خلعت لكشما يصرى فيها
2-تخاف من القطوط و الحشرات و بمنى اخر "من كل اشكال الحيوانات " لدرجة مايتصورهاش انسان
3- كي تبغي حاجة و نقولها لا تبقى تلح و تلح "تعيش تعيش تعيش تعيش " حتى نقول هيه و اذا ماقلتش هيه تموت و معلاباليش واش يصرى
4- تصرفاتها مع باباها كي يزورنا ماهمش تصرفات تاع وحدة متزوجة "تقعد في حضن باباها و تحكي و ماكاش خلاص الحاجز هاداك مع خاوتها الذكورة تحكي معاهم بطريقة لوكان انا تحكي هكدا معايا اختي نتشوكا ؟
5- تظال تلعب مع الاولاد الصغار و تتمسخر معاهم و كل يوم تقول "جارتنا ولدت توأم لوكان تخليني نجيب واحد ..فالسبيطار اليوم واحدة ولدت و ماتت على الطابلة لوكان تخليني نجيب ولدها ..ولد اختك يهبل علاه ماتجيبوش يبات معانا .. توحشت ولد خويا جيبهولي .والخ..."
6-و الكارثة تسيبورتي الريال و ماش عادي بجنون كي تربح البارسا داري تتقلب علاه كيفاه و يعششو "و لوكان نقوللها انا واش دخلني تقولي كيفاه "
7- كل يوم جيبلي حاجة نقولها لا تقول مالا ماتحبنيش ؟
8-كي الطبخ كي اعمال المنزل كي تصرفاتها .......كارثة طبيعية ؟؟؟
9- تقري لولاد تاع بريمار كي تصرى حاجة لتلميذ تقوللي ذرك بعد نروح عندو لولاد اللي يقراو عندها كل فاكوننس نصيبهم عندي و بدات شو الحكاية تقلقني ؟
10- انا نخدم شرطي و مرات نخرج فالليل و هي ماتقدرش هاد الشي " علاه تخليني حدي .مالا نروح نروح . ماتزيدش تهدر معايا .تروح ذرك بعد لا نفتل روحي ...."
11-الحاجة اللي تهبلني تجي تصيبني نتفرج الجزيرة ولا العربية و تشوف الحرب و الدم تبدى تبكي تبكي تبكي حتى نبدل ندير للمدام تتفرج الجزيرة ولا طيور الجنة ....
كي نقولها على حاجة تبدى تبكي حتى قبل ما نعيط عليها و نكون صريح هادي نقطة ضعفي كي نزعف نقول واش داني
صحابي واح يقولي اضربها واحد يقولي خليها تبكي حتى تسكت وحدها واحد يقولي سايسها
كيفاش ندير راني نسايس فيها كي بنتي وانا مازلت ماولدت
بالاك في بالكم المشكل صغير مي يهمني رئيكم قبل ماتتطور مشكلتي و تتهدم داري و انا معنديش الزهر
و بارك الله فيكم و اعتذر على ازعاجكم
رئيكم يهمني

يا أخي زوجتك ليست طفلة بل عندها إفراط في الأنوثة و هذا شيء مستحب في المرأة مع قليل من النصح و الصبر ، أوَ كنت تريدها مسترجلة متوحشة غليظة الطباع ؟ الله يهديك أخي ربما لأنك شرطي فأنت حازم و جدي أكثر من اللازم