السلام عليكم و رحمة الله تعالى و بركاته
أولا : من فضلك أخي نحي من راسك ديك هدرة المهم الباك مايهمنيش المعدل ، دير في بالك راح تخدم على 13 على الأقل تدي 11 ولا أو دير في بالك راح تخدم على 14 تدي 13 ...الخ و ماشي مستحيل تجيب نقاط مليحة ( مثلا أخي و الله باكي الأول 2015 كانت عندي ظروف و بدلت الثانوية مرتين كل فصل في ثانوية و كل مرة متأخرة الناس تريفيزي و أنا ننقل ف الدروس ماقريت وابو داك العام داخلة لمركز الامتحان و المواد الأساسية تحت الصفر و ملنكذبش عليك و الله بالمواد الثانوية تحصلت على 13 و عاودت باكي 2016 و نفس الشيء أبوندونيت الجامعة و قعدت ف الدار غير الرقاد و النت ...الخ لا قراية لا والو حتى الماي فطنت بروحي و زيرت المراجعة و زيد جاتنا الدورة الثانية ..الخ حتى جبت 14.50 ) اذن ماتقولش مستحيل راني واثقة تقدر توصل
ثانيا : ماتقولش تأخر الوقت مازال باقي شهرين على موعد الامتحان تقدر دير فيها المعجزات أنا بديت المراجعة حتى أواخر مارس يعني فايتاتك ب شهر برك و صدقني ف شهر كملت المراجعة بقاتلي حل التمارين و المواضيع يعني تقدر تستغل شهر في المراجعة و شهر في حل المواضيع و مع التكثيف تقدر تقلص مدة المراجعة
ثالثا : سأخبرك عن طريقة مراجعتي لعلها تفيدك و لو قليلا
الأدب : استعملت في مراجعتي ملخصات موجودة على هذا الرابط
3as.ency-education.com/15751604160415941577-1575160415931585157616101577.html
اضافة إلى هذا الموضوع الذي وضعه الأستاذ الكريم
https://www.djelfa.info/vb/showthread.php?t=2135676
جمعتها ووضعتها في ملخص خاص بي و بعدها أنصحك للتطبيق بكتاب المراجعة النهائية + حل مواضيع البكالوريات السابقة
الرياضيات : المراجعة لا يوجد أفضل من المراجعة مع أستاذ علابالي راك تقول كيفاه و أنا مترشح حر ننصحك تبع قناة نور الدين لكن ركز ماتروحش للدروس طويلة بزاف و تديلك وقت راجع معاه الملخص و حل معاه المقترحات و مرة على مرة حل مواضيع سابقة و ادا مافهمتش حاجة الأستاذ في قناته راه داير كامل الحلول جزاه الله كل خير و نأكدلك راح تتقدم في فهم الرياضيات راني نأكدلك خاصة كي تتعود عليها
الفرنسية و الانجليزية : مافيهاش صوالح بزاف لازمك تعرف الوحدات لي تقراهم باه تكون عندك نظرة على المواضيع لي تصادفهم بالنسبة للانجليزية كاين موضوع نظن عطاتهلك الأخت قبلي ( مجلة كيف تتحصل على 15/15 ) جد رائعة و الفرنسية راني حطيت موضوع على compte rendu عطاوهلك من قبل و أنصحك بكتاب المراجعة النهائية في المادتين
العلوم : للمراجعة أنصحك بكتاب الهباج حلول أنشطة الكتاب راح تفهم كل شيء ان شاء الله ثم باشر بحل مواضيع البكالوريا
الفيزياء : أنصحك بقناة مولاي عمر أستاذ رائع + كتاب المراجعة النهائية أو حل المواضيع السابقة
يبقالك الحفظ حبذا لو يكون في فترة الصباح بعد صلاة الفجر و أنت حر في اختيار الوقت كل واحد و وقت الحفظ تاعه ، الشريعة كتاب جمال مرسلي نضمنلك 20 في الامتحان و الاجتماعيات كتاب محمودي عادل للدروس و الملخصات رائع
المادة المتبقية و هي الفلسفة عليك أولا بفهم المنهجيات التي وضعها الأستاذ شهاب الدين ثم ماعليك إلا فهم الدروس ( فهم ماشي حفظ ) و حقظ الأقوال فقط و ستتمكن من انشاء المقالات بنفسك
أخيرا أتمنى لك كل التوفيق هيا باشر العمل لا تتكاسل و دير الثقة و الارادة و ستصل ان شاء الله