Les ambassadeurs au Chocolat - الصفحة 2 - منتديات الجلفة لكل الجزائريين و العرب

العودة   منتديات الجلفة لكل الجزائريين و العرب > منتدى شقائق الرجال > قسم الطبخ و المأكولات > قسم العصائر و التحليات

قسم العصائر و التحليات الوصفات حصرية لأعضاء منتدى الجلفة

في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة تقرير عن مشاركة سيئة ( تقرير عن مشاركة سيئة )، و الموجودة أسفل كل مشاركة .

آخر المواضيع

Les ambassadeurs au Chocolat

 
 
أدوات الموضوع انواع عرض الموضوع
قديم 2014-12-27, 12:36   رقم المشاركة : 1
معلومات العضو
إلهام07
متألقة ركن المعجنات
 
الصورة الرمزية إلهام07
 

 

 
الأوسمة
الموضوع المميز لسنة 2013 وسام نجمة التطبيقات 
إحصائية العضو










Mh47 Les ambassadeurs au Chocolat

البسملة1




نزولا عند رغبة الأخوات هذي وصفة لي زومباسادوغ اللي طلبتوها باقي الوصفات تلحق في الأيام المقبلة لأنو ممنوع كتابة أكثر من 2 مواضيع في 24 ساعة .


Recette Génoise



1- نبدى بإعداد كيك الشكلاطة نعطيكم الوصفة اللي أنا معتمدتها وممكن إذا حبيتو ديرو الوصفة نتاعكم لكن بما أنو بزاف أخوا ت ديما يطلبو مني وصفة الكيك والتارت رايحة نحط الوصفة باش المرة المقبلة إن شاء الله كي نحط موضوع لي تارت نحط فقط التزيين :أنا في الكيك الفانيلا معتمدة وصفة أم رامي ربي يحفظها (نفس مقادير وصفة جينواز النيستلي) ملي جربتها خلاص مابدلتهاش الاختلاف البسيط فقط في الطريقة.
أما في كيك الشكلاطة أضفت فقط على الوصفة شكلاطة ذايبة وكاكاو وزدت في كمية الخميرة لأنو الشكلاطة تخلي الكيك ثقيل .
مقادير كيك الفانيلا:
* نفس مقادير أم رامي بدون تغيير التغيير الوحيد في الطريقة:
لكل بيضة : 2 م ك سكر عادي، 1 م ك زيت، 1 م ك فرينة ، 1 م ك نشاء ، 1 قرصة خميرة كيميائية
+ قرصة ملح + فاني.
مقادير كيك الشكولا( مقادير كيكة كبيرة)
* 6 بيضات ممكن حتى 7 بيضات ( لكيكة كبيرة )
* لكل بيضة واحدة المقادير : 2 ملاعق كبار سكر ، 1 م ك زيت، 1 م ك فرينة ، 1 م ك نشاء
* قرصة ملح
* في كيك نتاع 6-7 بيضات نحط : 1.5 علبة شكلاطة سوداء ذايبة ( لازم سوداء ) نذوبها مع كمية قليلة جدا من الحليب لازم تبقى ثقيلة ماشي جارية.
* في كيك نتاع 6-7 بيضات نحط 2 م ك كاكاو معمرة مليح - الكاكاو أسود من نوعية جيدة ( ونقص 1 م ك فرينة + 1 م ك نشاء باش ماجيش ثقيلة ).
* الخميرة : في كيك الشكلاطة نحط 1 خميرة كيميائية في كيكة من 6-7 بيضات لأن الشكلاطة والكاكاو يثقلو عجينة الكيك لازم نزيد في كمية الخميرة.
* فاني.
طريقة عمل كيك الشكلاطة:


أولا قبل مانبدى نوجد كلش يعني نغربل الفرينة والكاكاو والخميرة ونكيل السكر والزيت ونشعل الفرن يسخن على 180°.
1- نحط البيض في ماء ساخن حوالي 5د باش يدفى ويطلع مليح كي نخفقو وفي نفس الوقت يذوب فيه السكر بسهولة.
2- في إنا عميق نحط رشة ملح ونفصل الصفار عن البياض نحط في الإناء فقط البياض ونحتفظ بالصفار جانبا.
3- نخفق البياض جيدا حتى يصبح كالثلج .



4- نبدى نضيف في السكر والفاني قليلا قليلا مع الخفق حتى يذوب السكر تماما.



5- تبعو هنا طريقتي مختلفة عن كل الطرق الأخرى ، باش مانزيدش نخفق الصفار وحدو ونكثر الأواني وفي نفس الوقت باش نختصر الوقت شوفو واش ندير :
بعد مانتأكد أنو السكر ذاب تماما في البياض نبدى نضيف في الصفار بالوحدة ونخفق 2-3 ثواني فقط حق مايختفي الصفار ونزيد الصفار الآخر حتى نكمل يعني نخفق ثواني قليلة فقط.
شوفو قوام الكيك كيفاش طالع وكريمي أحسن مانخفق الصفار وحدو والبياض وحدو ونخلطهم بالسباتولا من بعد يهبط البياض شوية هكذا يبقى محافظ على قوامو وربحنا وقت وجهد خاصة أنو الصفار كي نخفقوه مع السكر مايحبش يذوب فيه السكر بسهولة لأنو فيه الدسم هكذا أحسن.
هذي الطريقة ممكن طبقوها في أي وصفة كيك أو تحلية أو رولي تعطيكم نتيجة أفضل أنا عندي عام وأنا معتمدة هذي الطريقة .



6- الآن نضيف الزيت والشكلاطة نتاعي ونخفق 2-3 ثواني حذاري لو نبالغ في الخفق رايح يهبطلي البيض.



7- الآن نضيف الفرينة والكاكاو والخميرة على 2 دفعات أو 3 ، المهم يكونو مغربلين مليح من قبل . ونبدى الآن نخلط من الأسفل إلى الأعلى بالسباتولا برفق باش مايخرجش الهواء.



8- في كيكة الشكلاطة من الأحسن تفرشو في قاع المول ورق زبدة لأنو الشكلاطة والكاكاو يخليوها تلصق.
ندهن الجوانب بالزبدة أو الزيت ونرش بالفرينة .



9- نفرغ الخليط نتاعي في المول وندخل الكيك للفرن المسخن على 180° .



الكيك يطيب على 180° حتى تشوفوه طلع هنا نقصلو حتى 140° ونخليه يطيب مليح من داخل يستغرق حوالي 45د ممكن أكثر على حسب الفرن أنتوما دخلو فيها عود أسنان وشوفو إذا ناشف من داخل خرجوه من الفرن.
هذي الكيكة راهي جي خفيفة بزاف لازم تخليوها تبرد مليح قبل التقطيع.
Les ambassadeurs au chocolat

نأتي الآن لطريقة تركيب les ambassadeurs ، في دارنا كامل مايحبوهمش لأنو هذوك اللي يتباعو فيهم الكريمة باتيسيير يخدموها ثقيلة ومافيهمش بزاف كيك ويكثرو الكريمة يجيو ثقال يتعافو بصح انا درتهم فقط بالشانتيي وماكثرتش الكريمة وحطيت مليح الكيك كي تاكلوهم تحسوهم خفاف وطعم الشكلاطة غالب عليهم بزاف بصراحة هذي أول مرة عائلتي تاكل les ambassadeurs مالفين يعافوهم.
المكونات : هذه الكمية تعطينا حوالي 6 كؤوس
1- كيك الشكلاطة بثلاث بيضات
2- كريمة شانتيي ( حوالي 100غ أنا مانوزنش نخدم عيني ميزاني )
3- قاناش الشكلاطة : 3 ( 1 علبة للشانتيي و 2 علب للطبقات ) علب شكلاطة سوداء أو شكلاطة بالحليب انا نحب نستخدم Mina Noir + شوية حليب أو كرام فراش
4- حبة موز مقطعة شرائح( اختياري )
الطريقة :
1- نحضر كيك الشكلاطة ، كيكة ب3 بيضات تعمل حوالي 6 كؤوس تحلية ( إذا حضرتو كيك لهذي الوصفة ممكن تعملوه في صينية كبيرة باش يجي رقيق يطيب أسرع ويجي خفيف بزاف ويبرد بسرعة ) ونخلي الكيك يبرد مليح.
2- نحضر الشاربات : عادة لكيكة نتاع 6-7 بيضات انا ندير كاس سكر متوسط مع 2 كيسان ماء ونخليها تغلي 15د. لازم تبرد الشاربات مليح قبل الاستعمال باش مايعجنش الكيك.
3- نذوب الشكلاطة في حمام مائي مع شوية حليب لازم تكون عاقدة ( اللي يحب يخلي الشانتيي بيضاء مايزيدش الشكلاطة ويذوب فقط 2 علب ) .
4- نطلع الشانتيي نتاعي مع الحليب ( القاعدة 100غ بودرة شانتيي مع كاس متوسط ماشي كبير نتاع حليب باش تبقى عاقدة وماجيش جارية ، انا عادة مانصبش الحليب كامل مرة واحدة نصب بالشوية ونطلع حتان نوصل للقوام المطلوب لازم الشانتيي ماتكونش جارية ).
5- نخلي الشكلاطة تبرد شوية ونفرغ مقدار علبة في الشانتيي ونخفق حتى تمتزج ونحط الشانتيي في الثلاجة.
6- باقي الشكلاطة نرجعو للحمام المائي ونزيدلو شوية حليب لازم هنا الشكلاطة تكون جارية شوية مالازمش تكون عاقدة باش كي نخليها تبرد في الثلاجة تبقى طرية ماتيبسش.
7- نسقي الكيك نتاعي اللي يكون بارد بالشاربات باردة .
8- التركيب :
* في كؤوس جوتابل نحط طبقة من قطع الكيك المسقي ثم كمية مليحة من قاناش الشكلاطة ثم نحط كمية من القاناش في جيب الحلواني ونحط طبقة من الكريمة ونركز على الجوانب باش تظهر في الكاس ويجي الشكل مليح.







* نحط موز شرائح ( أنا نسيت الموز ماحطيتوش ).
* نعاود نفس المراحل حتى يتعمر الكاس .
* نزين بالشانتيي .
* بقاتلي شوية شكلاطة زينت بيها على شكل خطوط أو ممكن ترشو رشة كاكاو خفيفة على الوجه.
* نخليها تبرد مليح في الثلاجة قبل التقديم.


في الشكل جات بالشانتيي البيضاء أحسن لكن في الطعم : جاو في زوج ملاح بالصح بشانتيي الشكلاطة بان طعم الشكلاطة أكثر وأكثر.










صدقوني بنان روعة وخفاف وخير من اللي يتباعو والطعم شكلاطة في شكلاطة فعلا رائع لعشاق الشكلاطة.
إذا قدرني ربي إن شاء الله نزيد نحطلكم les ambassadeurs بكريم باتيسيير بالجبن ساهلين خلاص وبنان والكريمة باتيسيير نتاع الجبن خفيفة وسريعة ولذيذة خير من اللي تتباع.
تحياتي ............... لهومة .








 


رد مع اقتباس
 

الكلمات الدلالية (Tags)
ambassadeurs, chocolat


تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

الساعة الآن 05:32

المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية


2006-2024 © www.djelfa.info جميع الحقوق محفوظة - الجلفة إنفو (خ. ب. س)

Powered by vBulletin .Copyright آ© 2018 vBulletin Solutions, Inc