ارز بالتونة من مطبخي الصغير

[مرام اروى]

السلام عليكم هذا الطبق يعجبهم في داري وخطرة شيخي جا عندي درتهولو عجبو كي رحت ضيفة عندهم قالتلي عجوزتي ديريلنا الروز اللي كلاه الشيخ عندكم راهو ملي جا وهوة يهدر عليه منكذبش عليكم انا من الفرحة رايحة نقعر البلافو هههههههه
المهم كي سجلت في المنتدى كنت مانعرفش نحط الصور وخطرةفي قسم واش طيبتي اليوم بريق الامل طلبت وصفة نتاع الارز كتبتهولها وردت الهام وقاتلي اني ديتو فرحت بردها بزاف وذك كي حلو قسم جديد وصفات من حراير واش طيبتي اليوم لقيت الهام كتباتو بصح نسات وشكون مولاتو قلت ذك نحطو موضوع واللي يحب الارز يجربو
بسم الله نبداو بالكونات حبة بصلة مقطعة مربعات صغيرة وزوج حبات جزر مقطع مربعات و حبة كوسة (جريوات)مقطعة وراس فلفل حلو كذالك مقطع واللي يحب الحار يديرو وشوية زيتون مغلي ومقطع دوائر وحبة بطاطا مقطعة وحبة طماطم مقطعة كلهم مربعات صغار وباطة تونة بالزيت اللي في الصورة باطة كبير مادرتهاش اكل شوية برك وارز مغسول وغليتووشوية جلبانة وشوية ملح والفلفل الأسود والكمون

في مقلة حطي شوية زيت نتاع التونة وقلي فيه الخضر بالتناوب كيما راهم في الصور توضح احسن









بعدما قليت الخضر نمرقهم بالماء ونسكر عليهم حتى يطيبو

وكي يطيب الخضر وتبقى شوية نتاع المرقة نضع الارز ونخليه حتى ينشف ويدير هذوك البقع نطفي عليه وضيف التونة ماتفتيهاش بزاف


وهاهو جاهز

ان شاء الله يعجبكم وتقولولي رايكم ونشكر الهام بزااااااف
وهذا الطبق لاعز اصدقاء للحبيبة سوسو واسما وريتاج والمستغفرة نقلهم نحبكم بزاف ونقلهم كولو واللي تقول ماهوش مليح نكسر الطبسي على راسها ههههههههه

وصح فطوركم