بطاقة تعريف خياطات امنتدى الجلفة

[OM ANES]

موضوع هاااااايل انا مانيش خياطة بصح حابة نتعلم وما لقيتش لي تعلمني مليح والمشينة شريتها من عند اختي باش نتعلم فيها باش كي نعود نعرف نخيط نشري ماشينة مليحة نشالله
هيا علموني باش نولي خياطة مليحة
مشكلتي هي اني نخاف مانحبش نفسد الحوايج ما نحب نجرب والو
بصح حابة نتعلم الخياطة نموت عليها ندمت لي ما تعلمتهاش كي كنت نقرا وضرك كي عدت مع الولاد وليت نلبس القنادر في الدار بصح ما نعرفش نخيط وحدي لازم الخياطة .......................
مالا علموني باش نحيط واش نحب ونقعد ندعيلكم طول ماني نخيط
علموووووووووووووني الخييييييييييييييييياطططططططططططةةةةة

[wafaachal]

المشاركة الأصلية كتبت بواسطة stayfiya

السلام عليكم

صحيتو يا لبنات واش هذا بحث في فائدة العائلات ولاَّ هههههههه
باسم الله نداو في تعما استمارة لجنة السكن ههههه
اولها نحيي ختي ساره كل مرة تخرجلنا خرجة تحرك فيها العضوات كامل

اليوم ما جاياش باه نعاتب او نلوم هههه

لا للانااااااااااااااانية :d:d:dعجبتني هاذي
خياطة ماهرة

خياطة محترفة

خياطة مبتدئة
الجواب مكانش ربع خياطة يعني ماني مبتدئة و ماني ماهرة ولا محترفة

او مشروع خياطة قادمة كيفي هههه ويي تقدري تقولي

متى بداتي مشوار الخياطة؟ اوووو زدت على حس المشينة و كنت نقعد دايماً في طرف مّا و هي تخيط و كي كبرت شوي وليت نخيط للبوبيات و كي زدت كبرت وليت نحب نصمم من راسي و كل مرة كنت نحاول نفصل و نخيط الروب لي نرسمهم صح ما كانوش يجيو حاجة بصح كنت نجرب برك و كنت نبدل روبة نتاع كبار نقلبها صغيرة و سروال نقلبو جيب ههههه و الله كانو يحطو الحاجة نطير بيها و كي زدت كبرت و دخلت للجامعة حبيت ندخل نتعلمها في وقت الفراغ و دخلت قريت بصح ماكملتش وشراولي مشينة ليا اووووو درت فيها رايي و بقيت نلم في لي كاتالوغ و الدروس نتاع لخياطة و ندور على الخياطات نقرعج ههههه و زدت شريت وحدة اندوسترياال واش نقلكم و مازالني للضك و سيرتو زدت لقيت المنتدى هذا لصقت فيه هههه و الله نحب لخياطة و مهبولة بيها واش تحبو :d
ماهي الصعوبات الي واجهتكي فيها؟؟ وااالو الحمدلله
المشينة حبيبتي و نتفاهم معاها مليح و ماتشيطنيش مسكينة و نموووت على لمقص حتى هو يحبني
ماهي الصعوبات الي مازالت تواجهك لحد الان في هذا المجال؟؟ ماكان حتى صعوبة غير الوقت لي خايني
نسخف نحط نخيط و عندي غير يوم في السمانة برك قعاد
ماهو اول شيء قمتي بخياطته؟؟ ممكن تكون روبه نتاع دار ماشفيتش مليح

كيف كان اول ماقمتي بخياطته _ جيد ام سيء؟؟ هههههه مانكذبش اكيييييد كان ...يــــبهدل

واخيرا نصيحة للي حابين ينضمو لهذا المجال مثلي ؟؟؟
نصيحتي لاكنتي تحبيها كملي حتي لافان وما تتراجعيش من اول مشكل يواجهك كيما يقولو لي يخاف من الطيحات عمرو و لا يركب و زيد كيما تقول مَّا اخدم خدمة وانساها يدور العام و تلقاها الحرفة مليحة في اليد لقراية سلاح بصح الحرفة خبزة و ماتدريش بلاك تقولي انا قريت و وصلت و الحرفة مايديرها غير لي ماعندوش نيفو ماتغلطيش روحك حاجة ماراهي مضمونة في الدنيا كيما بالنسبة ليا اني قارية و مخلصة و خدامةولاباس عليا ماديا و لخياطة راهي هواية بصح ممكن في المستقبل تولي هي مصدر رزقي واحد ماو ضامن روحو
وبالنسبة للي مزوجة و تربي تقدر تنقص بيها ماصاريف على زوجها
اااوه عيييت على حساب الجرنان لي كتبتو رايحة تمديلي شاطو نسكن فيه هههههه هيا راني طولت سلاام

ربي يعاونك يا الفحلا كلامك حلو شكرا على صراحتك اختي سطايفية

[الصمت حكمة]

ما عنديش الوقت باه نجاوب على كل الأسئلة خاطر ضرك عندي صوالح بزاف، جاوبت خاطر هددتي كل واحدة تدخل و ما تردش و انا زعلك ما نقدرش عليه كيما يقولوا نحبك دايما زاهية انتي و جميع العضوات، و حاجة أخرى ما تعطوني لا سكنة لا خدمة علموني برك الخياطــــــــــــــــــــــــــــــــــــــــــــ ــــــــــــــة

[wafaachal]

هههههههههههههههههههههه نعلموك حتى تقولي اخطوني

[ايمان2009]

السلام عليكم كي تصفي لازم يكونوا الثقب تاع الغربال كبار شوي هههههههههههههه
ايا نبدا على بركة الله

1-انا نعتبر روحي خياطة محترفة وعندي أختي تقولي كذبو عليك كذبة صدقتيها وحسبتي روحك خياطة صح ههههههههههههههه


2-مشوار خياطتي بدا منذ نعومة اظافري انا زدت قدامي مشينة وابرة وخيط ورايا قرقاف وطومبورا هههههههههههههههههه
وهكا يعني بالوراثة

الصعوبات اللي واجهتني انه مشينتي مهبولة مرة تخيط عادي ساعات يحكموها الجنون تعودي تسوطي في القطيفة والبيزو بيزو ساعات تولي تضرب ضربة وتقطع الخيط ربي يهديها ويصلحها ههههههههههه بالاضافة الى اذواق الناس المختلفة انا خيطت لناس بزاف لكن كاين نوعية الله لايبلي بيها خياطة يجيبولك المودال كي تخيطيه وتكملي وتقولي او السعر كي يكون غالي مع انه السلعة هي الغالية وهم علابالهم يقولولك احكميهم ليك مانلبسوهمش هادي صراتلي الصيف اللي فات مع 3 اخوات تقول جاو محرشين عليا وحوايجهم لحد الان مخبيين عندي ربي ينتقملي منهم ويرجعلي حقي والله تعبت وشريت السلعة بالغلا وقالو قابلين ومبعد راحو وخلاوهم

والصعوبات اللي مازالت تواجهني لحد الان زوجي رافض اني نشري لاندوستريال يقولي حاجة زايدةوماش مهمة ماعلابالوش بلي هي حلم حياتي قبله هو ههههههههههه كون يسمع يذبحني هعهعهعهعهعهعهعهع

انا من بكري كنت نخيط للعرايس كي نلعبه بيهم و كي كبرت شوي بابا كان عنده سروال دجين درت منو جيبة ولبستها والله جات تهبل اما خياطة صح صح خيطت قندورة كتان لماما
اول حاجة خيطتها كانت هاديك القندورة مليحة غلطت درت الذرعين ضيقين لكن حليتهم من الفوق وركبتلهم الدونتال وزدت بهيتها بالدونتال في الرقبة باه ماتبانش ملفقة والله عجبتها وبقات تلبس فيها حتان رشات ههههههههه

نصيحتي للحبين يوليو خياطات لكان عندكم خواتاتكم بزاف ماكان لاه تريسكي والله يكرهوك في الخياطة وقت كامل وانت تخيطيلهم وزيد يتمشركو عليك هههه اني نتمسخر برك واللله حاجة مليحة الواحد يحكم بيها يدو الحاجة اللي يسخف عليها يلبسها من يده و نقصة مصروف الخياطة وتكسار الراس

اني كملت يا استاذة انا عندي سكنة وعندي خدمة محتاجة مشينة اندوستريال ههههههههههههه

[ام مريم اسراء]

انا عجبتني ياسر هاذ المبادرة الطيبة الي قامت بها الاخت sara و انا بصراحة مجرد هاوية او بالاحرى مبتدئة .... اول تجربة لي هي منذ الصغر كنت نخيط للدمية نتاعي وفي الكثير من المرات كنت ننسي الابرة و تدخل في الفراش و مرة على مرة تبيكي واحد من الدار خاوتي المشاغبين كانو كيحبو ينتقمو مني يحطو ابرة و يقولو .... اي و يحصلوها فيا حتان ندي عركة بالبليغة نتاع البلاستيك بونتور 40 و السبب الانتقام كبرت و ضربات لبليغة لم تقتل في حب الابرة و الخيط ولم تقتل كذلك نسياني للبرة في اي مكان ربي يستر المهم حبيت ندخل لمدرسة الفنون الجميلة لحبي لتصميم الازياء ( حينها لم اكن اعرف بوجود مدرسة ببن عكنون لتصميم الازياء ) و لما جبت الباك لكن الاب نتاعي رفض ذلك وصمم ان اكون محامية ......رحت للمحاماة وانا نغمضة عينيا و كنت حابة نخرج رسامة ااااااااااااااااااااااه كملت الدراسة و تزوجت و رااني نحوس على الدروس نتاع الخياطة في النت اخيرا وافق زوجي على دخولي مركز التكوين و كنت لما نشوف جبة مخيطة نحب نعمل كيفهل و لما نشوف مسايا نهبل .... تنبهت لعدم جود دروس جدية تعلم الاخوات الصنعة .... و لقيت الانشغال عند الكثير من البنات اولهم الاخت سارة 5 قلت نعمللكم دورة و لما نتعلمو ادعولي .... المهم راني حابة نتعلم السواري ( الكورسي ) لكن تظل لاباز مطلوبة ..... النظري مهم ..... مناش عارفين يمكن نولو كما زهير مراد و الا عبد محفوظ و غيرهم مثل ام مريم ....... ههههه اه متنساوش تشجعوني راني مشتركة في مسابقة تصميم الازياء للاخ عمر و ليوم البرايم و اذا مخرجت نوميني نعطيكم السكنة تنتخبو ميييين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[wafaachal]

المشاركة الأصلية كتبت بواسطة ام مريم اسراء

انا عجبتني ياسر هاذ المبادرة الطيبة الي قامت بها الاخت sara و انا بصراحة مجرد هاوية او بالاحرى مبتدئة .... اول تجربة لي هي منذ الصغر كنت نخيط للدمية نتاعي وفي الكثير من المرات كنت ننسي الابرة و تدخل في الفراش و مرة على مرة تبيكي واحد من الدار خاوتي المشاغبين كانو كيحبو ينتقمو مني يحطو ابرة و يقولو .... اي و يحصلوها فيا حتان ندي عركة بالبليغة نتاع البلاستيك بونتور 40 و السبب الانتقام كبرت و ضربات لبليغة لم تقتل في حب الابرة و الخيط ولم تقتل كذلك نسياني للبرة في اي مكان ربي يستر المهم حبيت ندخل لمدرسة الفنون الجميلة لحبي لتصميم الازياء ( حينها لم اكن اعرف بوجود مدرسة ببن عكنون لتصميم الازياء ) و لما جبت الباك لكن الاب نتاعي رفض ذلك وصمم ان اكون محامية ......رحت للمحاماة وانا نغمضة عينيا و كنت حابة نخرج رسامة ااااااااااااااااااااااه كملت الدراسة و تزوجت و رااني نحوس على الدروس نتاع الخياطة في النت اخيرا وافق زوجي على دخولي مركز التكوين و كنت لما نشوف جبة مخيطة نحب نعمل كيفهل و لما نشوف مسايا نهبل .... تنبهت لعدم جود دروس جدية تعلم الاخوات الصنعة .... و لقيت الانشغال عند الكثير من البنات اولهم الاخت سارة 5 قلت نعمللكم دورة و لما نتعلمو ادعولي .... المهم راني حابة نتعلم السواري ( الكورسي ) لكن تظل لاباز مطلوبة ..... النظري مهم ..... مناش عارفين يمكن نولو كما زهير مراد و الا عبد محفوظ و غيرهم مثل ام مريم ....... ههههه اه متنساوش تشجعوني راني مشتركة في مسابقة تصميم الازياء للاخ عمر و ليوم البرايم و اذا مخرجت نوميني نعطيكم السكنة تنتخبو ميييين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

عجبتني قصتك اختي

[نور المستقبل]

يعطيكم الصحة يابناتهكذا خلاتكم سارة تحكو قصص انا شاك راح الدير فيلم دراما وتخير اللي يعجبها هههههههههههههههههه راني عير نضحك امعاكم
متى بديت مشوار الخياطة؟
كنت نكره الخياطة ونحير فالناس اللي يخيطو ونحب الحلاقة اكثر ماتتصوري بالرغم كانت اختي تخيط كانت عندها مشينة وانا مشينة اخرى منحب انشوفها ولا حتى نطل عليها في يوم من الايام فتح مصنع للملابس العسكرية سجلت فيه تم القبول عامين هم يدرسوا لينا جابو احسن مدرسين من الجزائر بصح اختك تدخل من الاذن اليسرى تخرج من ايمنى بصح التطبيق كنت هايلة فيه المهم تقدري تقولي نخيطو بلا فصالة تعلمت الابسة الجاهزة نركبها مليح كي تعود مفصلة على يد خبير موش فصالة عشوائة تزوجت قعت فالدار جبت الاولاد نسيت مخبرتكش المشينة اديتها معايا كي نشوفها مغلوقة نتحسر اول قندورة خيطها قندورة نتاع الكتان دخلت فيها دخلة قولهاش متحلفة فيه والله لحد الان نص خياطة كي كبرو بناتي شوية قريت عالحلاقة بوهران في مدة بسيطة اخذت ديبلوم جيد جدا كي رجعت لمسقط راسى كنت مع زوجي كان يعمل هنك متخفيش نجاوب على كل اسئلتك متعطليش السكنة فتحت صالون للحلاقة بطبيعة الحال ميكنوش زبائن في الاول واش اندير واناقاعدة وحدي والوقت يضيع دخلت لجمعية نتعلم لفصالة نهار تجي عشرة لا وليت حبست بصح عرفت القاعدة الاساسية وبديت نفصل حوايجي ونخيطمن بعد ماتحسنت عادو زبائن الحلاقة تعجبهم لخياطة ولقيت نفسي نخيط لناس بلا ماندري
ماهي الصعوبات التي واجهتكي
من ناحية المشينة معنديش غير كي تحبس ميعرفوش يصلح شيطونيييييييييييييييي ااوالى مازالت تواجهني نحب نتعلم نخرج باترون على قاعدة صحيحة نحب نتعلم كل مايتعلق بلخياطة من ا الى ياهذا هو المشكل الكبير وراه وراه حتى نحل
واخيرا نحب ننصح كل واحدة عنها ولو 1في100رغبة في الخياطة تصبر البداية دايما صعيبة صدقوني بمجرد ماتتعلمو مليح تلقاي كلش ساهل لازم تتعبو باش توصلو وترتاحو اللي يكون عندها وقت تنميه بالتطبيقات ولي تعرف حاجة توريها لاختها ممتقليش راني نقر ونخرج طبيبة او او
المهم تعلمي وتركي خاصة انتم يابنات ياصغار ادخلو احسن معاهد خيرو الالبسة الجاهزة باش تكوني قادرة على كل انواع الخياطة والفصالة
قبل ما نخليكم على خير راني مشركة في المسابقة احسن تصديرة اليوم تضهر التصاميم ياربي نقدرو نطبقوها ادعولي اصوتو بضمير شكرا للجميع

[نور المستقبل]

سارة لازم نحكمو عليك تحكيلنا حكايتك ولا نخرجوك برا المنتدى نغلق عليك الزيارة حتى تنساي لخياطة ههههههههههههه

[sarra5]

مشكورين يا بناااات يا حلواااااااات

راني بعثت la demande لوزير السكن

راهي خابزة بصح الخدمة ماتعولوش البطالة دايرة حالة على حساب الشوفة هههه

نور انا ماعندي حتى حكاية جات في راسي نتعلم خياطة ورايحة نسجل في البريفي

طبعا نحب نخيط من وانا صغيرة

كانو les poupeés de barbies نحب نخيطلهم عملتلهم بزااف حوايج ملاح

لكن الخياطة تاع الصح جامي عملت حاجة راني نتعلم من المنتديات ومن دروس ام مريم حتى ندخل نتعلم

[wafaachal]

هههههههههههههه يتسما هفيتينا بصحتك السكنة

[kadikirou]

المهم

كل واحد تدخل تعمر ال dossier

خياطة ماهرة

خياطة محترفة

خياطة مبتدئة ana khayata mobtadi'a

او مشروع خياطة قادمة كيفي هههه

متى بداتي مشوار الخياطة؟hawali 3 sanawat

ماهي الصعوبات الي واجهتكي فيها؟؟wajahatni so3obat fi tafsil w la finition

ماهي الصعوبات الي مازالت تواجهك لحد الان في هذا المجال؟؟la finition mais al hamdouleh fark min li bdit hata al dork

ماهو اول شيء قمتي بخياطته؟؟al katir min al achya nsit exact

كيف كان اول ماقمتي بخياطته _ جيد ام سيء؟؟sayi'a
asabr w mouhawalat itkan al "amal hata yaslahlak

w bi tawfik liljami3

[وصال7]

انا خياطة مبتدئة ابى خياط وكان عندو مصنع للخياطة وكان لباس العيد كله من تصميمه لاكن للاسف حبس المهم ملى كنت صغيرة والماكنات بمختلف انواعها فى محيطى بيعت كلها وبقات واحدة للاستعمال المنزلى معنديش مشكل فى الخياطة نخيط ولاكن شوية صعوبة فى التفصيل امع العلم ان ابى مختص فى ملابس الاطفال والرجال الكلاسيك جبت من دارنا باترونات *بوغدا *بصح معقدين بالنسبة لمبتدئة المهم اول شىء خيطتو هو جبة لبنتى يعنى جات شابة تم مباشرة لشورة* التحدى*ومنقوللكمش جات روعة
الصعوبات هو طريقة التفصيل خاصة ونخاف الساتان فى التفصيل والخياطة شكرا

[stayfiya]

المشاركة الأصلية كتبت بواسطة wafaachal

ربي يعاونك يا الفحلا كلامك حلو شكرا على صراحتك اختي سطايفية

ربي يخلييك وفا ختي والله هاذي هي العقلية في الصح ولا في النت مانحبش نتكلف بزاف ههههههه ونحب كامل الناس يكونو نورمال

[ام شاهين]

انا خياطة مبتدأة خيط كروشي وقنادر تل كي كان في عمري 18 سنة ومن بع ترك كل شئ و اريد العودة . عندي افكار يستفيدو منها اخواتي لأنهن كلهم خياطات المشكلة ما عنديش الوقت