ساعدوني يا لبنات وخاصة البرايجيات

[abdel02]

أنا أعرف أن الإتفاق على الشرط مهمة الرجال...
كما أعرف أن الراجل اللي طلبولو غالي يشوف على حساب جيبو...واش من قيمة بقات لهذا الراجل إذا بدا كل يوم يتصل ويطلب ترخصولو في السعر...
والمؤكد أنه ستشكل هذه النقطة منطلق العديد من الإختلافات الزوجية لأنه شرط التراضي يكاد يكون غائبا ...

[السحابة]

شوفوا اخواتي والله راني فاهمتكم انا هي صاحبة المشكلة لكن واش رح ندير والدي متوفي وامي تقولي لازم عليك ادن واش رح ندير انا ضعت

[oum tesnime]

المشاركة الأصلية كتبت بواسطة السحابة

شوفوا اخواتي والله راني فاهمتكم انا هي صاحبة المشكلة لكن واش رح ندير والدي متوفي وامي تقولي لازم عليك ادن واش رح ندير انا ضعت

للا حنونة سلامتك من الضياع

ما ضيعيش روحك على جال أمك

في الأخير هي أكيد تحبلك الخير لكن مالزمش دير على كلام الناس

راني فاهمة أناتاني من الغرب ...غير باش يتباهاو بفلان دار لفلانة كدا وكدا

أدكرك أنه لا طاعة لمخلوق في معصية الخالق

لأنوو ربنا سبحان وتعالى يقول يسرو ولايعسرو

نقولك حاجة مرة عند الصايغ مع ختي لقيت واحة تشري في خاتم خطوبة دهب مشلل

قالتنا نسهل عليه راهو مزير وكي تتسقم الحالة أن شاء الله يشريلي واحد

دري هاك وهاك وفوتيها

المهم الهنا

والله كاين بزاف عندهم لي كوفر تاع الدهب لكن ما شي هانين مع أزواجهم

[LAMRIA]

في الشرق الرجال هوما لي يتفاهمو على كلش
من قبل تهدر العروس عم راجلها و يتفاهمو ومن بعد تقول لباباها
انا تفاهمت معاه على 30 مليون داخل فيهم كلش 10 شرط 5 تاع لعشا 5 جهاز 10دهب قلت خاتم تاع لفيونساي 4.5 و 5.5 قورمات نضن منطقي

[الحجيلية]

في الشرق الرجال هوما لي يتفاهمو على كلش
من قبل تهدر العروس عم راجلها و يتفاهمو ومن بعد تقول لباباها
انا تفاهمت معاه على 30 مليون داخل فيهم كلش 10 شرط 5 تاع لعشا 5 جهاز 10دهب قلت خاتم تاع لفيونساي 4.5 و 5.5 قورمات نضن منطقي


هههه غير شوية من المفروض كان كثر ..... سبحان الله هذا وين زدت فهمت مليح علاه كاين 3.5 مليون فتاة عازبة في بلادنا فوق سن 25 سنة ........ والطلاق اكثر من الزواج
ربي يلطف بينا

[LAMRIA]

تتفاهم ماماك مع خالك ولا عمك حالتك كيما حالتي

[فاطمة الزهراء31]

السلام عليكم
ختي لعزيزة باباك الله يرحمه ويوسع عليه وكاين حالات كثر منك والله غي كاين بنات والديهم مطلقين بوهم حي ومايحضرش حتى عرسهم ولايعاونهم انتي عندك شيبانبة تاعك ربي يخليهالك بصح لازم تحضري خوالك ولاعمامك تعرفي رجال اذا لقاو المرآة ملول وحدها يحقروها
و أنا ثاني من الغرب كاينة غي تلمسان لي يشرطوا بزاف بصح لعراس لي شفتهم في وهران أغلبهم يشرطوا 5ملايين وذهب يديروا سلسلة ومسيبعات مناقيش وخاتم والفاتحة عليه وعلى حساب الراجل وزيدي ياختي الذهب راه غي يزيد ويطلع وأنا ضد عقلية راجل لي يبعث شيبانية تاعه ويقوللها هدري معاهاا وتتفاهم معاك ..نهدر معاك بكل صراحة مدام هو من برج ونتي من غرب صافي راكي تعرفيه غاية وكان قادر يقولهالك ملول ما يدخلش شيبانية في الوسط .. مراناش في سوق شحال تنقصلي وشحال تخليلي؟ ننصحك تتفهمي معاه لاخطر انتي لي رايحة تعيشي معاه ما دخلي لادراكم لادارهم اذا راكي عارفة ظروف تعه وصح ماعندهش مايشقاش تكثري شروط عليه وأي عايلة تتمنى لبنتها لهنا تفاهمي معاه مميعد هدري مع داركم وفهميهم بلي معندهش المهم لهنا الدراهم تروح وتجي وكيما يقول لمثل زواج ليلة تدبيرته عام ماتشوفيش للناس شوفي انتي واش راك باغية انا واحدة نعرفها مسكينة معندهاش وراجلها ثاني الله غالب عليه وقفت معاه وماشرطتش عليه وذهب مدارتش دارت بلاكي تفاهمت معاه وراهم عايشين متهنين ...ولي معندهش شايدير يروح يسرق ولامايتزوجش .... خممي بينك وبين روحك وانتي تعرفي اذا صح متدين ومتخلق وخدام وصح يحافظ عليك ويعاملك مليح قبلي بيه كيما راه وتقاسمي معاه كلشي وماتحصيش هادي دنيا ياما ناس كان معندهمش دورو طلعوا وربي فتحها عليهم وياما ناس كانوا فوق وبخير عليهم ومع لوقت طاحت بيهم ...وزيدي خممي مليح وراي رأيك
وبالتوفيق ختي وربي يكون معاك

[النجمة القطبية]

المشاركة الأصلية كتبت بواسطة مشكلتي

واش راااااااااااكم لاباسسسسسسس

المهم انا لدي مشكلة وهي انوا تمت خطبتي في حوالي شهر وجات اموا وعجبتها ومن بعد كنت متفاهمة معاه نديروا 7ملايين +الشرط الي هو دهب واتفقنا لكن كي قال لاموا قالتلوا قلها تتصل بيا اتصلت انا بيها وقالتلي يا بنتي راكي غليتي عليا نقصيلي قلتلها صحا 5+خاتم 1وسنسلة ومنقوش ومسايس ونحيتلها الجهاز قالتلي زيدي نقصيلي ما فهمتش واش انقص انا ماما ما جيت نقنعها بسيييييف بلي نقصت وهو قالي ما نجيش حتى تتفاهمي مع يما مليح على الشروط وعلما انا من الغرب وهو من برج بوعريريج ورح يكري سكن هو قالي دبرواااا راسكم
دبروااااااا عليا بليييييييييييز وامي دايما تقولي كيفاش ما ولاش خطبة شهر وما رجعش ما لقيت واش نديررررررررر
قولولي يا البرايجيات وانتوما واش اديروا وماهي عاداتكم

حيرتينى ختو اول مرة نشوف عروسة هكذا هههه اخاه فور انتى
تهدرى بنفسك مع ام العريس وهى تقولك نقصيلى هههه واش هذا
وين راه حياء العروسة
ياك الشروط بين الرجال او بين الكبار كيفاش الصغير يهدر مع الكبير وتقولك نقصيلى وعلاه حانوت
خلى الامور بين الكبار امك وهى مثلا
واصلا اذا راكى مقتنعة بهذا الناس الراجل يدير واش يقدر وخلاص ياك الصح فى الشخص اذا كنتى مقتنعة بيه
الصراحة رانى دايخة من هادى تع انتى اللى تهدرى على الشروط
المهم بالتوفيق
وربى يجيب الخير

[جوهرة الكون]

حبيبتي ايسرهن مهورا اكثرهن بركة

احنا في عايلتنا و الله العظيم منشرطو والو نشرطو غير الهنا

و الله هنا في قالمة الكارثة هادي نتاع الشرط بدات تروح

و الحمد لله

[شيء من رجاء !]

30 مليون ؟
لو كنتُ رجلا لأضربت عن الزواج
سيدفع للعروس هذا المبلغ بالإضافة للمصاريف التي سيصرفها هو
أين سنصل ؟ ومن بوسعه الزواج ؟ إلا من ورث ورثا أو سرق بنكا
اتقوا الله في الشباب ، أشفق عليهم

[السحابة]

لا اتختي انا امي مريضة وما تحملش تتحدث في الهاتف كثيرا وهي اموا قالتلوا قولها تكلمني انا في الاول ماكانش علبالي واش رايحة تقولي وزيد نهار الي يجوا طبعا نحضر عمي وخالي اكيد

[oum tesnime]

المشاركة الأصلية كتبت بواسطة السحابة

لا اتختي انا امي مريضة وما تحملش تتحدث في الهاتف كثيرا وهي اموا قالتلوا قولها تكلمني انا في الاول ماكانش علبالي واش رايحة تقولي وزيد نهار الي يجوا طبعا نحضر عمي وخالي اكيد

وراكي قلتيها أمك مريضة ربي يشفيها لكن ماراحش دوملك

سارعي بالزواج أختي وبالستر مدام أمك حية وعينها تشوف ...خليها تفرح بيك

والدراهم والدهب منبعد كي تروحي لدارك تشرطي كيما تحبي

الآن أرضي بالقليل المهم تربحي راجل يخdم عليك يحبك يخاف عليك ويصونك

ربي يوفقك أختي نتمنى نسمعوو أخبار طيبة تسر الخاطر

[طيب القلب]

تهلاي في المخلوق وساعدوه

[رحيق القلوب]

حنا عندنا في البرج الشرط برك اي المهر بين 8 و 10 ملايين فقط

تشري بيه الجهاز والذهب وكلش
حنا في البرج الطفلة هي الي توجد الذهب من قبل يعني اذا كانت خدامة او والدها الي يديرلها

عندنا الطفلةهي الي تشري الذهب وليس الرجل الا اذا كان الراجل عندو و حب يشريلها من عندوا تبفي ذيك بيناتهم
عليه بخاتم الخطوبة و لعشا تاع العرس
ربي يفقك اختي و نظن متهمش اللبسة والذهب اختي

[روجين]

علاش ماماه رايحة تزوج بيك حتى تتفاهمي معاها و هو وينو؟؟؟؟؟؟؟؟؟؟؟؟؟؟ عجب و الله عجب انا نعرف امور الزواج و الشرط تناقشيهم مع الزوج ماشي مع ماماه