التحضيرات الخاصة بشهر رمضان الكريم

[أم إناس]

ليلو حنونه فكرة رووووووووعه وأكيد تجي بنيييينه في الشربه. اممممممم
وانا عندي في رمضان الحمص نوجدو فقط نشمخو وبعد نديرو في أكياس ومن بعد المجمد. فكرة ساهله ماهله هههههههه.
يعطيك الصحه وكين جبتي فكرة ان شاء الله نحطها

[lilouchaf]

يعطيكم الصحة على الثراء وانا تاني كل ما نعمل حاجة راح نحطها هنايا باه تشوفوها

[ام صابرين]

يعطيك الصحة اختي ليلوشة اللهم بلغنا رمضان واعتق رقابنا من النار

[الغيورة على دينها]

أفكار رائعة
شكرا لصاحبة الموضوع وشكرا للجميع .
وبارك الله فيكم

[أم امتنان]

شكرا موضوع جميل لكن عندي مللاحظة الطماطم بعد ماتطيب حطيها تقطر في كسكاس راح يجيك قوامها اثقل واطيب
وعندي فكرةوهي حميص مخلل انا نفور الفلفل الحار ونرحيه ونديرلو 2 فناجل خل وفنجال زيت وسنة ثوم
وحبات زيتون اخضر ونديرو في علب المايوناز يجي هايل خاصة كي يطول ملاحظة برك كي يفور خليه يتقطر ليلة كاملة

[R I A D]

يعطيك الصحة ليلو حبيبتي على هذا الموضوع
مليح .. وانا محسوب ما نوجدش حوايج بزاف:
الحمص المشمخ نقسمو في ساك دو كونجيلاسيون و الى المجمد
البصل نرحي بزااااف و نقسمهم في دي بوات صغار و لا كيسان
و نخبيهم في الكونجيلاتوغ
الجاج نشري بال10 كيلو و نقسمهم "نشري غير لي كويس"
كل ساشي نحط فيه 5 كويس
اللحم الغنمي نشري قيس 3 ايام و نكونجلي و كي يخلص نزيد نشري كيف كيف
و نشري التوابل بزاف
الباقي كل نهار نشري حاجته فريشكة

[ryhem 16]

موضوع جد قيم أختي ليلو بارك الله فيك
عجبتني بزاففففففف فكرة الطماطم ديالك

يعطيهم الصحة الأخوات على أفكارهم الرائعة

أختي ليلو تعرفي ماما تفور الطماطم و تكمل نفس المراحل كما أنت عزيزتي
و تعمل نفس شئ بالنسبة للفلفل الأحمر الحلو تفورو و تخليه يقطر في كسكاس مليح من بعد ترحيه و تستعمل شوية منها حولي ملعقة صغيرة تاع قهوة في شربة تاع الفريك تجي بنينةةةةةةةةةةةةةةةةةةةةة

حبيبتي ماما تشمخ لحميصة كمية مليحة و من بعد تطيبها في ماء و شوية ملح و تصفيها و تخليها تبرد ثم تعملها في ساشيات صغار رزمات و تحطها في الكونجلاتوغ و تجبد حسب الحاجة للشوربة و لجوازات

لأخوات ألي تقدر تطيب الديول كما وصفة الرائعة الأخت الصوامعية و أيضا وصفتك الممتازة حبيبتي ليلوشاف و تحضر كمية مليحة و تخبي في الكونجلاتوغ بعد ما تكون قسمتها في أكياس و كل كيس قيس ما يكفيها نهار تتهنى خير و عندي حبيبتي تحشيهم من قبل ما تكونجيليهم و تخبيهم و كل نهار تجبد و تقلي برك

و الأخوات يقدرو يديرو كمية كبيرة من عجينة الفيلو و يقسموها حسب الحاجة
و بنفس الشئ ندير ثاني العجينة المورقة و نحضر كميات كبيرة و نقسم حوالي 250غ في كل كيس مع رمضان تاع هدو لعوام الأخيرة راه اجينا في السخانة تسمى نطيحو غير على المقبلات و الله حتى الشطاطح ما نتوشيوهم

مام نديرles fonds de tarte sucrée et salée نطيبهم نص طياب أو نطيبوهم كليا حسب الحاجة نخليوهم يبردو و نخبيهم و هنا لازم تكتبي فوق الأكياس بطاقات أو تغيري لون الأكياس باش تفرقي بينتهم مع واحد سخانة تاع رمضان و عيان خاصتا العاملات يتفاداوالخلط بين النوعين و ديرو في كل كيس عدد معين حسب عدد أفراد العايلة نتاعكم

نشريو اللوز و نملطوه و نخبيوه في الكونجلاوغ رانا خبناه هههههههه و نجبدوه لطاجين لحلو و بالمناسبة الأخوات من الأحسن ايطيبو في رمضان طاجين لحلو كمية مليحة خاصتا ألي يحبو يكلوه كل يوم تسمى قيس 5أيام و كل يوم تسخن برك هكدا تتهنا

مام بالنسبة للوز ترحيه و تخبيه في الكونجلاتوغ و باش توجد بيه لمحنشة و لسيقار و لقطايف و الصامصة..... للسهرات

حنا في دارنا نسحرو بحليب و قهوة هدا واش نحبو و نوجدو في عواشر رمضان كمية كبيرة من كعك النقاش لبجاوي باشراف ماما خصيصا لسحور نخبيو شوية منو في الكونجلاتوغ و الباقي نديرو في كاسرون كبير تاع حديد هداك تاع لعراس مع رشة لافاني و يبقى أنتاكك هوهو و نتناولوه في سحور و نزدو معاه بريوش

كما قالت الأخت ام امتنان مجدة بارك الله فيها مام هنا نوجدو مخلل تاع الفلفل لكن حنا نديرو الفلفل الأخضر لحلو و بنفس طريقتها برك نقصو كمية الخل خاطرش نستعملو لاموتارد و نخلوه في بلارات و تكلوه بالهناء و مام نوجدوه طول الصيف نموتو عليه في دارنا

• حبيبتي في الأخير حبيت نقولك رمضان كي يجي يجيب خيرو معاه مهما وجدنا مسبقا بصح هدا هو لوشاغم تاع التحضيرات و هادي مسألة تنظيم و مام بالنسبة لغير العاملات نتمنى يتشجعو و يحضرو قدر المستطاع مسبقا اللوازم و رمضان المبارك راه اجي في العطلة ربي يبلغهونا تسمى الأولاد يكونو في راحة ادن راهي أعظم فرصة باش يكونو للأخوات وقت كافي للعبادة فهي فرصة لا تعوض و بالتحضيرات راهي تنقص عليها الكثير من التعب, تربح وقت كبير و به تزيد حساناتها
  

سلام غاليتي نتمنى تكون اقتراحاتي البسيطة مفيدة و ادا قدرت لي عودة و ألف شكر لكي على الموضوع الرائعععععععععععععع


اللهم انك عفو تحب اعفو فعفو عنا

[lمنال]

انا عجبتي فكرة المطلوع في المجمد انا انوجد الحميص و انخبيه في الكونجيلاتور و ايضا كي يولي وقت الفريز نغسلو و نحطو في ساشيات عدة بكميات قليلة باش كي نستحق نجبد القيمة اللي انحبها نستعملها pour la salade de fruit

[أم تيم الله]

بارك الله فيك

اللهم بلغنا رمضان آمين

[صدفات]

يعطيك الصحة يا اختي فكرة هائلة لتخزين الطماطم راح نجربها خاصة في الصيف و ين تكون الطماطم رخيصة وطايبه مليح انا يا بنات من تحضيرات الشهر الفضيل (نغسل القصبر و المعدنوس نقطرهم ومن ثمه القصبر نعملو ربطات صغار ونخبيهم للحريرة والشربه اما المعدنوس نرحيه ونحطه في ساشي نتاع المجمد وعند الحاجة ننزع منه بشويه وصدقوني راه يبقى اخضر وكانه جديد و طازج ),

[ام ايمان 11]

المشاركة الأصلية كتبت بواسطة صدفات

يعطيك الصحة يا اختي فكرة هائلة لتخزين الطماطم راح نجربها خاصة في الصيف و ين تكون الطماطم رخيصة وطايبه مليح انا يا بنات من تحضيرات الشهر الفضيل (نغسل القصبر و المعدنوس نقطرهم ومن ثمه القصبر نعملو ربطات صغار ونخبيهم للحريرة والشربه اما المعدنوس نرحيه ونحطه في ساشي نتاع المجمد وعند الحاجة ننزع منه بشويه وصدقوني راه يبقى اخضر وكانه جديد و طازج ),

كفاه ترحي المعدنوس لم افهم بواش يعني مشكورة مسبقا

[صدفات]

المشاركة الأصلية كتبت بواسطة ام ايمان 11

كفاه ترحي المعدنوس لم افهم بواش يعني مشكورة مسبقا

سلام يا اختي وعفوا عن التاخير
بعد ما تغسلي المعدنوس قطيه و نحي الاوراق فقط حطيهم في le hachoir و رحيه قليلا مش بزاف حتى يطلق الماء,حطيه في
les sachets pour congélateur و بصحتك رمضان ان شاء الله.

[ام محمد78]

يعطيك الصحة نفس طريقتي

[chorok]

سلمت يداك اختي في الله

[ام هاديل وياسين]

الله يبارك فيكي اختي الله يجعل يدخل علينا رمضان بصحة والعافية

عجبتني طريقتك في تحظير الطماطم رايحة نجربها اكيد

عندي سؤال ليكم اخواتي يقال انو الخبز المكونجلي مراهوش مليح للصحة ولله اعلم


ربي يوفقك اختي