مشاركتي في مسابقة طبق تقليدي بلمسة عصرية ’مجموعة 1‘

[ام نور الهدى 2014]

السلام عليكم
مرحبا بالجميع عندي جيت جري هادي حالة الخدامة اله غالب
نشكر زينب على امسابقة رائعة و جات في وقت اسمحلي شوي باش نشارك و الحمد لله بدون إطالة نبداو بطريقة تحضير طاجين الزيتون
أولا لازم نحضرو الدجاج و ندوزنوه ةو نخلوه يترقد على راحتو
جيبي اطراف دجاج
بصلة متوسطة مبشورة
2 سنينات ثوم
ملح
فلفل اكحل
قرفة
شوي موتارد غير شوي و لي مايحبهاش بلاش
شوي قصبر و معدنوس مفرومين رقيق
راس الحانوت
زنجبيل بودر
و ملعقة كبيرة سمن

و نخلط الكل جيدا مع بعض و نحك الدجاج بهاديك الخلطة و نغطوه و نخلوه في الثلاجة على الأقل 3 ساعات انا درتها صباح باش نطيبو للعشا
و نجيو تاني للحم المفروم
ناخد كمية قليلة نضيفلها سنة ثوم كبيرة او 2
فلفل اكحل
قرفة
ملح
زريعة القصبر يابسة و مطحونة
و شوي برغل شي فقط من الأفضل مشمخ في الماء انا ماكانش عندي الوقت و هدا ماكان ماحبيتش ندير الحشاوش لانو كاينين في الدجاج

نحضرو الزيتون نجيب شوي بالعظم لانو يجي روعة في الطاجين احسن منو لي منزوع العظم نقولك علاه
الزيتون اللي بالعظم نخيرو يكون لونو فاتح مش غامق و تان يجي طري و اقل مرورة من الأخضر القاتم لي تكون نسبة اليخضور فيه طالعة و بالتالي مر بزا و هو هاداك لي يديروه و ينزعولو العظم لانة يجي شاد روحو و بالتالي ما يخسرلهمش
ادن نجيب زيتون بالعظم نعملو للمرق و بلا عظم للتزيين
تدبيرة للزيتون لي تديروه في المرق نديروه في انا و نرمو عليه ماء مغلي و 2م ك سكر و نخلو راح تخج المرورة لي فيه احسن ماتغليه و تروح بنتو و المرق يجي بلا بنة زيتون
اما لي بلا عظم نغليه في الماء و نطيبو شوي لاني راح ندخلو للكوشة و ما عندو ما يطيب

بعدما يتشرب الدجاج تاعنا التتبيلة نجيبو قدرة ثقيلة او كوكوط و نرمي الدجاج تاعنا نضيفو وريقات رند و الريحة اممممم مانحكيلكمش و جزر مقطع شرائح و الزيتون و نمرق و لي تحب تضيف الشزمبينيون تضيفو

نجيب مول تاع لي دوم ندهنوه بالزبدة و نرسو فيه الزيتون بلا عظم نكونو قسمناه على 2 كما في الصورة

نجيب اللحم المفروم نزيدلو البيض و نعمل كوريات نديرها فوق الزيتون و لي تحب تحشيه فرماج

و نديرها في حمام مائي و ندخلها للفرن تطيب حوال 15 دقيقة ماتديش وقت بزاف
و كي تطيب المرقة تاعك حمري الدجاج في شوي زبدة و قدميه مع اللحم المفروم بعدما تنحيه من المول

المرق خليه يعقد مليح انا جاوني ضياف و كان راح الحال زربت حطيت

ان شاء الله يكون طاجين الزيتون على طريقتي نال رضاكم و اعجبكم و ان شاء الله تجربوه و ترجعولي خبر لانو فعلا رااائع و ينفع للمناسبات
سلام