🍲🍜🍗مشاركتي البسيطة في مسابقة احسن طبق تقليدي بين الولايات🍜🍲🍛🍗

[*زهرة اللوتس*]

السلام عليكم حبيت نشارك بهاذ الطبق البسيط من ولاية باتنة، مجرد مشاركة صغيرة ههه (سخفت نشارك ) عندنا اطباق بزاااااف خاصة بمنطقتنا منطقة الشاوية حبيت نشارك بالبعض منها لكن لضيق وقتي وانشغالاتي اكتفيت بهاذ الأكلةالبسيطة اللي اكيد يطيبوها في بزاف مناطق وكل واحد كيفاه يسميها ، الطبق هو كيما نسميوه عندنا الرقاق وزدت معاه محجوبة تاع البرنوس
العجين هو كيما تاع المسمن عادي دقيق رطب وملح وماء وكاين اللي يزيد شوية برك خميرة تاع الخبز عل راس المغرف باش يجي الرقاق طري ومش يابس خاصة كي تكون نوعية الدقيق ناقصة، نعجنوه مليح ونخليوه يرتاح ونلوزوه ونخليو الكريات يرتاحو شوية
الزبدة نديرو الحرة تاع البقرة ونملحوها شوية، نحلو كرية وحدة بالزيت وندهنوها بالزبدة ونطبقوها على 4 ومبعد نزيدو نحلو وحدة اخرى وندهنوها بالزبدة ونحطو في وسطها الاولى المطبقة وهكذا حتى نديرو 3 او اربعة ، نخليوها ترتاح شوية ومبعد نعودو نحلوها بسمك حوالي 1سم ونطيبوها على طاجين الشخشوخة
وبالنسبة للحشو تاع المحجوبة: بصلة مرابية نقليوها شوية في زيت وشحمة تكون جديدة (بكري كانو يحطو شوية شحمة قديمة) انا نحط الجديدة ، ونزيدو الطماطم مرابية وشوية طماطم معلبة وملح و كسبر وفلفل احمر الصباغ واللي يحب الحار يزيد الهريسة او فلفل حاار مقطع رقيق ، نخليوها شوية برك على النار ونحيوها ونخليوها تبرد
والصور توضح الخطوات، طبعا بسيطة والجميع يعرفها ههه
حظ موفق للجميع، سلام




هنا ملحت الزبدة اللي راح نخدم بيها