المعجنات الجزائرية من مطبخ Toma

[ilbeldelmondo]

السلام عليكم و رحمة الله و بركاته
في هذا الملف نحاول نحط وصف أتي في المعجنات الجزائرية و راني اول مرة نديرها هههههه كي غير حكمت عليا أمي بالإعدام في المطبخ
كل ماندير حاجة جديدة نضيفها
ملاحظات:
كاين آكلات لازملهم مرق صافي مثل شخشوخة الضفر هاذو انا ننصبهم بالخشين و من بعد نرحي و نصفي
اما مثل العيش و الكسكس الخليع نرحي كلش و ما نصفيش
و كل واحد و ذوقه


الرشتة

العجينة:

٢٥٠ غ سميد
بيضة
ملح
ماء

نخلط السميد مع الملح و البيضة و نضيف الماء حتى الحصول على عجينة سميكة نوعا ما نضعها في كيس و نتركها ترتاح نصف ساعة او اكثر
نعجنها و نتركها ترتاح مرة اخرى مدة ١٥ دقيقة

نقسم العجينة و نفردها الى شرائط بالنشاء ثم نمررها في ماكينة الباستا في ١ الأوسع ثم ٤ ثم ٦ الاضيق فيهم

حتى نتحصل شرائط طويلة و جد رقيقة نضعها على قطعة قماش نظيفة و نتركها تجف قليلا و ليس كثيرة لتصبح تنكسر
نمررها في الماكينة جهة السباغيتي الرقيقة او العريضة كل شكل عنه ذوق و الرقيقة هي الرشتة الاصلية

نضع كميات قليلة في وعاء و نرشها بالزبدة الذائبة او زيت و نخلط بالشوي بالأيدي

ندهن الكسكاس أيضاً و نضعها تتفور و لما نحيها نحاول نفتحها بالأصابع

كي تبرد يمكن استعمالها جديدة او تحتافظي بها في المجمد
المرق:

لحم خروف او دجاج
بصلة مرحية
حبات ثوم مرحية
لفت ابيض و كوسا
ملح
فلفل ابيض
فلفل حار
كسبرة
زيت
ماء
حمص طايب من قبل

نقلي اللحم مع الزيت الساخن ثم نضيف باقي المكونات مع كاس ماء و الحمص نتركه في الاخير
نخليهم يغليو مليح ثم نكمل كمية الماء تقريبا لتر و و نضيف الكوسا و اللفت و نترك المكونات حتى تنضج
ثم ننزع اللحم الكوسا و اللفت و الفلفل و نصفي المرق للحصول على مرق صافي
نرد اللحم و الخضر مع الحمص و نغليهم ٥ دقائق

تقدم الرشتة مع المرق و نزينها باللحم و اللفت و الكوسا و الحمص بعد ان فورناها لتكون ساخنة
او يمكن وضعها في قدر و رشها بالمرق و قطعة زبدة و غطيها لتتشرب نكهات المرق فوق نار خفيفة خمس دقائق



شخشوخة النعمة

اولا نقولكم الشخشوخة اول مرة نديرها و راهي جات خشينة و الاحراف اضطريت نقصهم ههههههه لكن كلاوها الكل
مقادير العجين:

سميد رقيق من الافضل الكمية لي تحبي
ملح
بيض اذا تحبي انا جربتها بيه عجبتني
ماء و نلم العجينة و نحطها في كيس مبلل بطريقة الوهرانية لمدة ثلاث ساعات او اكثر حتى انك تولي ماتحتاجيش تعجنيها
و مع ذلك انا عجنتها شوي لاني ماهليتهاش ترتاح

ندهن صينيات بازيت باه نحط فيهم كريات العجين و نزيد ندهن الكريات من فوق و نغطي بكيس بلاستيك
خليها ترتاح نص ساعة او اكثر و سيدتي هههههه صغري الكريات انا من الغباء كبرتهم عليها جاتني خشينة

فوق صينية كبيرة باستعمال الزيت تفتحي كرة العجين و الطاجين يكون سخون و تهزي ورقت العجين على وجه اليدين بهد دهنهم بالزيت و راكم تشوفو اول وحدة تثقبت ههههه لكم عادي تصرف في احسن العائلات
و نحاول نحطها على الطاجين و نمدد الحواشي

نفرد كرة اخرى بنفس الطريقة و نقلب الاولى على الطاجين و نضع عليها الثانية و نفرد الثالثة و نقلي لخريين و نحط عليهم الثالثة و نكمل حتى يكبار البرنوس هكا نقولولو
ان شاء الله نصور فيديو أمي دير فيها
انا نحبها حمرة شوي و كل واحد و ذوقه
المهم كي تكملي انا البرنوس رديتو cape لان الاحراف خشااااان هههههه
قصيها مربعات و هي سخونة و حطي في كيس
و حاولي تفريقي الاوراق يعني تحليها تتحصلي على هذا الشكل

المرق:

لحم لي تحبيه انا نفضلها بالدجاج
حمص
بصلة
طماطم مقشرة كم الافضل
فلفلة حارة
ثوم
طماطم مصبرة
هريسة
خضر لي تحبي انا درت بطاطا و حشيتها باللحم المفروم كيما الأعراس ههههههه
دبس الرمان يمكن تعويضه بالعسل ملعقة صغيرة
كسبر بالكروية ملح فلفل اسود فلفل دريس زعفران حسب الرغبة مع انه مفيد للصحة القليييييل من السكر
نرحي البصل و الطماطم و الثوم

نقلي اللحم في الزيت و نزيد باقي المكونات مع القليل من الماء و خليهم يغليو شوي و نكمل نخطيهم بالماء و نقفل الكوكوط نصف ساعة الى ٤٥ دقيقة

نحمر الدجاج بالزيت موتارد ملح فلفل كمون هريسة و نفور الشخشوخة
طريقة التقديم نسقي بالطبقة يعني نضع القليل من المرق ثم طبقة شخشوخة ثم المرق ثم الشخشوخة و نزين بالحمص اللحو و الخضر و يارب تعجبكم






بودشيش

آكلة أمازيغية بسيطة مفيدة للصحة لانها من الشعير الكامل
بلاك عندو اسم اخر مانعرف يحضر من غير لحم فقط القليل من الشحمة الغاوية
المقادير:

بصلة و طماطم مقشرة و ثوم نرحيهم
فلفل حار
فول يابس مقشر
بطاطا مقطعة
طماطم مصبرة و هريسة
زيت و ماء
كليلة اذا تحبو الطعم الحامض
القليل من الشحمة الغاوية
ملح كسبر فلفل اسود و فلفل دريس

نحط الزيت مع الشحم يسخنو و نقلي المكونات الكل و نظيف الماء و نغلف الكوكوط او القدر مدة ٢٠ دقيقة

نجيب الدشيشة و هي عبارة عن شعير مفور و مرحي كيما الفريك لكن في القشور شوي و زيد شعير ليس قمح
نقيها و نحطها في قدرة لي نجمر فيها نغطيها بالمرق و على نار هادئة نحرك من وقت الى اخر كي تتشرب المرق نزيدلها قطعة زبدة و نغطي و نطفي النار نخليها ترتاح مدة ١٥ دقيقة
تقدم مع الطرشي و المرق حسب الرغبة انا نحبها غارقة هههههه لكن هي تقدم ناشفة شوي

ان شاء الله تعجبكم و ان شاء الله نديرها كيما الكسكس باللحم و نفوروها بعد التحميص تجي تهبل

تليتلي مرق احمر


المقادير:
بصلة متوسطة
طماطم
ثوم
فلفل حار اذا تحبو الحار
و حبة صغيرة فجل ابيض
زيت او زبدة
لتر ماء
لحم لي متوفر عندكم
ملح فلفل اسود و رمادي و كسبر معطر بالكروية

نقليو اللحم بالزيت و نقطع البصل و الطماطم و الفجل و نضيفهم كلش الى اللحم و نخلط

اذا في كوكوط اقفليها و اذا قدرة خليها تغلي و اغلقي
مدة الطياب تكون حسب نوع اللحم و جزءه

كي يطيب اللحم نحيه هو و الفلفل و نرحي الباقي و نصفي و نحاول مانخليش التخ يعني بقايا الدواوات
نظيف الطماطم المصبرة و الحمص و الخضر اذا تحبيها و ردي اللحم خليهم يخليو حتى طيب الخضر

نروحو للتليتلي نجيب النوع لي نحبوه واذا عملتيه في الدار اخرجي من موضوعي راكي فحلة بزاف و هذا الموضوع للمبتدئات هههههههه

نحط 500 غ تاع تليتلي في قصعة او cuvette و نضيف القليل من الزيت و نخلط مليييييح و نحطها تفور
مدة التفوار حسب نوع التليتلي انا درت 20 دقيقة و من بعد نحيه و شليه بالماء و قطريه باه يروحو النشويات لي قادر يردوه متلاصق من بعد قطرييه و ملحيه و غطيه بي منشفة و خليه يتشرب

من زيدي فوريه مرة ثانية
حطي كمية التليتلي لي راح تفوريها و اغمريها بالمرق و قطعة زبدة و غليه شوي و طفي خليه يتشرب اكيد غطيه


و شهية طيبة




بركوكس او عيش بالقديد او الخليع

مقادير المرق :

بصلة كبيرة
طمطومتين
فلفل حااااار
ثوم كثري ما تكونيش مشتاقة
بطاطا حسب الرغبة
فرماس
كليلة
زيت
فلفل دريس ملح كسبر فلفل اسود سكر شوي برك
دبس الرمان أضفته من اجل حماضته و ذوقه اممممم يمكن تعويضه بملعقة صغيرة عسل و نحي السكر
فول يابس و حمص
قديد
طماطم مصبرة

غلي الخليع باه نحيو الشحوم و الملح الزائد صراحة انا لي درتللو الملح في العيد و يعني ماشي ملحت اللحم لحمت الملح هههههه
الفرماس نغليه باه يطرى و نحيلو العلف و نرحي البصل الفلفل الثوم الطماطم الفرماس

نقلي الخليع في الزيت و نقطع البطاطا و نضيف كلش و نخلط شوي ثم نزيد الماء و نخليهم يطيبو مدة ساعة

نروحو للعيش
اذا مفتول او مشري نفس الطريقة فقط المشري يأخذ مدة قصير في الطهي

شليه مليييح بالماء و قطريه و زيديلو الزيت و خلطي مليح خليه يتشرب شوي و فوريه نص ساعة


نحيه زيدي بخيه بكاس ماء و ملحيه و غطيه خمس دقائق و زيدي فوريه مليح
طبيه في المرق و من بعد حنا الشاوية نحبوه بالمرق بزاف كب تقدميه زيدي المرق








شخشوخة الضفر هي نوع من شخاشيخ الشرق هههههه
لكن هي تجي خفيفة شوي*
اولا لي تعرف ماتدخلش ههههه لا راني نضحك برك ادخلي لكن ما تجرحينيش برك راني غير مبتدئة و علابالنا انت طيابك مليح و انت هي الفحلة و انا مانعرفش لكن راني نخلق في التوازن الاجتماعي هههههه
ثانيا نبدا بالشخشوخة كاين لي يحب يخدمها في الدار و كاين المشرية مثل لي في الصورة*
راهو كاين موضوع المخدومة في الدار تاع اختي الفحلة
https://www.djelfa.info/vb/showthread.php?t=1414440
في كيلو راكي توكلي عرش لذالك نعطيك كيلة كاس شخشوخة يدير صحن كبيييير*
تابعي سيدتي مع الصور

1- نوع الشخشوخة لي استعملتها
2- نسيرها لنزع الفتات
3- نفرغ الكمية لي نحتاجوها في جفنة او cuvette*
4- نضيف القليل من الزيت و عينك ميزانك
5- نخلط الشخشوخة جيدا مع الزيت
6- نضعها تفور مدة 15 دقيقة او 20
و الان نروحو نحضر المرق*
المقادير:
بصلة كبيرة او متوسطة مقطعة او منشورة او مرحية
حبة طماطم متوسطة مالازمش تجي حمرا بزاف و كل واحد واش يحب مقشرة مقطعة او مرحية*
4 حبات ثوم او اكثر حسب الرغبة
فلفل اخضر حااااار
فلفل اسود
ملح
كسبر و كروية
زيت او زبدة
لحم خروف او دجاج او بقري
ماء
انا قطعت البصل و الثوم و الطماطم تكونجليها أمي حب من بعد نضعها تحت الماء تقشر وحدها
حنا في دارنا معظم الأكلات هكا نديروهم و ذللك لاانا نحبو المرق الصافيييييي*
نقلي اللحم في الزيت ثم نضيف باقي المكونات و القلييييل من الماء و نترك يتقلى ملييييح ثم نغمر المكونات بالماء و نغلق الكوكوط و مدة الطهي تكون حسب نوع اللحم*
هذه المراحل انا ما صورتش كنت مزروبة
نكمل بالصورة:

1- من بعد كي طاب اللحم و ذابت البصل الطماطم*
2- ننزع اللحم و نغطيه*
3 نميكسي المرق بعد نزع الفلفل الاخضر
4- نصفي المرق في مصفاة و شوفي واش راح تلقاو فتات العظام لي ممكن تفجفنا ههههه
5- نغسل الكوكوط و نرد المرق بحذر باه مانردش بقايا التوابل انا شخصيا لا افضلها في العجائن و خاصة في الكسكس*
6- هاي ليكم*
و الان نجيب فلفل اخضر حار جديد و طماطم مصبرة و نرد المرق يغلي*
نضيف الطماطم و لي يحب فيها الخضر يدير كوسا بطاطا خردل او يقلي الكوسا و البطاطا و يحطهم معاها و الحمص لازم*
و نخليها تغلي
اذا اللحم مزال قاسي رديه و اذا تحبي تحمريه حمريه
نرجع للشخشوخة بعد ما فارت المرة الاولى نسقيوها هنا الشخشوخة المشرية رقيقة ماتحتاجش الماء بزاف في كيلو درت ثلاث أرباع كاس ماء اما اذا خشينة زيدي
و نغطي بمنشفة نخليها تتشرب و هي سخونة اما الماء فعادي و من بعد نظيف ملعقة زبدة او حسب كمية شخشوخة و نخلط باليدين و نعيدها تفور مرة اخرى

من بعد في casserole نحط كمية الشخشوخة لي راح تاكليها لازم ماتجمريش كمية كبيرة لان كي تخليها ماتجيش مليحة كيما الجديدة
و تزيدي كمية من المرق حيث تتغطى و قليل من الزبدة*
هنا أمي جمرت حطت المرق الاول لانها تعرف كم تحتاج ماشي كيفي هههههه

و تشعلي كي تغلي طفي و غطي ترتاح 5 دقائق و تقدميها
و شهية طيبة

لي عندها استفسار راني هنا و لي ما عجبتهاش طريقتي fâche ماتهدريش معايا هههههه