ارواحي تتعرفي على ادوات الخياطه ...سطايفيه

[stayfiya]

السلام عليكم صباح الانوار اليوم بغيت نحطلكم موضوع ممكن يهم المبتدئات أكثر
ادوات الخياطه.
كل وحده تحب تتعلم الخياطه او تمارسها لازم يتوفرو عندها ادوات لي تساعدها
و تسهللها مهمتها و لي حابه تبدى تتعلم و ما عندهاش فكره واش تحتاج و لي ناقصينها ادوات
راح نشوفو مع بعض اهم الاشياء لي نحتاجها

اول حاجه المقص : لازم يكون ماضي باش ما يقلقكش و يفسدلك لفصاله
الصغير تحتاجيه في الاماكن الضيقه او لقطع الخيط اثناء الخياطه
Decouseur : هذا يساعدنا باش نطرطقو لخياطه بلاما نفسدو لقماش

الميطره نحتاجوها لاخذ القياسات ل تفريغها على الباترون و القماش

الخيط هذا من اجود الانواع الكبه الكبيره تحتاجي البيضا و السوداء
و معليش الالوان اشري من الصغار

الدبابيس نقولولهم النقاقب يساعدونا بتثبيت القماش و الباترون
و لمساسك ايضا تحتاجي واحد على الاقل

ابر الخياطه باليد الخشينه و الرقيقه و تاع المشينه من الاحسن تتبعي الرقم لي يساعد قماشك معناه اذا راكي تخيطي في قماش خشين
استعملي رقم 18 و اذا رقيق تنقصي فيه ارقام 14/16/12 و ماتنسايش المشينه المنزليه عندها نوعها و المشينه الصناعيه كذلك

و كاين حتى الابر خاصه بالقماش الايلاستيك
و هاي ليك

الجرايه هاذي نحتاجها لرفع الباترون او لتوضيح اماكن البانس

تحتاجي لحديد باش تحدي من الاحسن كل ما تخيطي جزء حديه باش جي خياطتك نظيفه و واقفه
ورق لرسم الباترون

و مساطر صغيره و كبيره
مسطرة البيروكي لرسم منحنيات الكول و فتحة الذراع ...
هي كاينه تاع الطايور سبيسيال انا هذا لي متوفر عندي

و دفتر لتسجيل القياسات و ممكن ترسمي فيه الموديل
باش تتذكري تفاصيلو

قلم و ممحاة و مبراة و الوان للرسم و طبشير و كاين لاكري طايور يتباع
و علبه لوضع مستلزماتك باش ما يتودروش

و المشينه اكيييد

والمانكان اذا توفر راه يعمل 1600دج في المارشي
وهاذي البيستولي لي تلصقلنا القالون و لي زيستراس و تساعدنا في الاعمال المنزليه
ولي قدامها لاكول نتاعها. كاين لي تمشي بلاكول الرقيق و كاين لخشين كيما لي عندي

وهاذي الفيراسودي.


وهاذي لاباراي لي تلصق لي زيستراس الرقاق انا ما ساعدتنيش ممكن كاين اخوات عجبتهم الخدمه بيها


انت تقدري تستغناي على حوايج بزاف من لي حطيتهم الا الخيط
و لبرا و لمقص و المشينه كبدايه لي ماعندهاش بالشوي تلمي حويجاتك
السوارد راهم يروحو من الأفضل تشري بيهم حوايج يهونو عليك الخدمه
اذا حبيتي تصوريلنا ادواتك و تحطيلنا نشوفوهم ماذابينا على الاقل نخلقو روح للموضوع
دعواتكم لابي
سلام